14
No makagatogatosen a kaparin no tawo
Salmo ni David.
1 No tawo a abo so matalineng a pangtoktoan am vatahen na do karakohan na, “Arava o Dios.” Niaya o fermi do aktokto da as oyod a mahara o parinyen da a marahet. Arava o aran asa a abo so sinadan.
2 As do hanyit am naypalawong o Dios do tawotawo a tomidib dia an mian sa o sivog a komitachita as omonot do komwan do Dios.
3 Amna tinadichokoran no atavo o Dios as kawnot da dia o tanyan da a ichahoho as dawa arava o aran asa a mayanong so atavo a parinyen.
4 Vatan sia no Dios, “Ara paroava o aktokto da nia? Mapanmo da paroava o karahet no kapaysarasaray da dira do tawotawo ko saya as kano kadi daya machahoahokan diaken?”
5 Amna mawara anti o kalayin da mamo takwan agoman sa no Dios o omonot sia.
6 Valavalaten da no marahet saya so kaparin a tawo o plano da no mapamahbo so karakohan da amna no Dios o pachagoman da.
7 Rakoh o kahoho ko nia an mawara dana o kalibrian a yapo do Dios do Sion do tawotawo a Israel. Ta an mawara anti o mapia aya a tiempo da a yapo do Dios am oyod anti a rakoh o kasoyosoyotan da!