91
No proteksion no Dios
1 No masaray no Dios a iya so pachagoman na as kadi na abdibdisan a mavidin do proteksion no makapamarin a Dios,
2 am iya o maparin a makavata sia do Dios, “Imo o omonong diaken as omdefende diaken. Imo o Dios ko a voyvoh ko a ichasaray.”
3 Ta iya o mapavawa dimo do di sa tanggal a pangananawan as kan do atavo a mahara a ganit.
4 Oliven naymo as kakopkop na dimo. Maynyoha ava sia a machonong kano omdefende dimo.
5 Dawa mamo ka pava do kadelikadoan do mahep anmana no mangananawa sa mandiman an maraw.
6 Mamo kava no marahet sa espirito an masari dana anmana aran ango a makadiman an masehdang pa.
7 Aran livolivohen dana sa anti o madiman do omdivon dimo am arava anti o omsalid dimo,
8 ta mavoya mo anti an maypaypango na sa kastigoan no Dios o makagatogatosen saya a tawo.
9 Makayamot do ka no mato a Dios no chinasaray mo a omonong kano omdefende dimo,
10 am arava o marahet a maparin dimo as kan arava o makatetek dimo kano familia mo.
11 Takwan tovoyen na sa anti o angheles na a machonong dimo.
12 Talahen daymo do tanoro da tapian di ka makarawa do kabatoan.
13 Aran manngonngo sa o komontra dimo so kasolib a mayplano so kapamarin so katetek da dimo am maparin ava ya dimo asna no kahomis mo pa sira.
14 “Makayamot do kapanganohed kano kaddaw da niaken,” kwana no Dios, “am librien ko sa as kapachonong ko sira takwan sincharan da yaken.
15 An tawagan da yaken am atbayen ko sa. An mian sa do kagologoloan am karoan ko sava, ta sidongen ko sa as katoroh ko dira so onor.
16 Pakamiahen ko sa a torohan so manaro a viay as katoroh ko pa dira so kalibrian.”