16
Jiobu epfu l'ọ̀nyà iya phẹ dụru iya ẹhuka
1 Tọbudu iya bụ; Jiobu bya
eyee ọnu sụ:
2 Mu anụmajehaakwa ẹgube
opfu-a, unu epfu-a.
Ayọ ọshi k'unu bẹ unu
gudekwa ayọpyashi
nemadzụ ayọpyashi.
3 Opfu, phẹrephere apa ono,
unu epfu ono;
?tọo bvụdu abvụbvu?
?Bụ gụnu bẹ kpatsuru unu
k'epfu g'unu epfu ono?
4 Mbẹdua gege epfukwa g'unu
epfu ono;
ọme ọ dụru unu g'ọ dụru
mu-a.
Mu gege anọdukwa epfu
ẹrengete opfu gude eyeru
unu ọnu;
ekweru unu une.
5 Ọle mu gege akabẹkwa gude
ọnu mu dụa unu obu;
mbụ l'ọshi, mu gude obu mu
phọ yọoru unu gege
emekwa g'ẹhu gụa unu phoo.
6 Ọle ọ bụ; mu -pfua opfu gẹ
mu epfuhabe;
iphe, eme mu nụ emelẹ
mu-a l'ẹka oome mu.
Teke mu harụ epfufu;
?bụ g'ọ ka mma?
7 Mbụ-a; Chileke mewaru;
ike bvụ mu;
bya eworu ndibe mu l'ophu
mee; ẹphe lakọta l'iyi.
8 O mewaru mu;
mu gbajọshihuchaa
agbajọshi.
Ono bụru iphe, ekebe dụ.
Awụfu, mu wụfuru bụru
ọkpu bụkwaru phọ iphe,
agba mu ekebe.
9 Chileke gudewaa ẹhu-eghu
lajashịa mu alajashị;
mu bya adụ iya ashị;
tẹme ọ nọdu ataru mu
eze nyịkinyiki.
Onye ọhogu mu ono nọdu
agba mu ẹnya agbagba.
10 Ndiphe anọduje ebvu mu
ọnu l'ẹhu.
Tẹme ẹphe nọdu anọduje
echi mu ẹka lẹ nchị
gude eme mu iphe-iphere;
mbụ tụgba nanụ g'ẹphe
kpọnyia mu ẹnya.
11 Chileke nwuwaru mu
yeru ndu ẹjo-iphe;
mbụ-a; o nwuwaru mu ye
ndu ẹjo-iphe l'ẹka.
12 Ẹhu shikpọekwapho
dụ mu gubala;
ọ bya anyakashia mu tọgbo;
pyịta mu l'ẹkpiri woru mu
hua ehurugehu.
O woru mu mee iphe,
o gude anwụ agba mgbẹka.
13 Apfụ iya shi mu l'iphu shi
mu l'azụ ada mu l'ẹhu
pụrumu pụrumu.
Ọphu imemini mu adụkpodaa
ya g'ọosufushi mu meji.
Ọtso-ilu mu nọdu awụ l'alị
kẹ torotoro.
14 O -gude l'o yeru mu ọru l'o
yekwasẹ mu iya ọzo.
Ọ nọdu azụje mu gburumu
pfụrii g'onye ọgbogu.
15 Mu chịtawaru uwe-aphụ
kpube onwomu;
bya eworu ukuu-ẹnya mu
nwua l'imime urwuku.
16 Mu rawaru ẹkwa;
ẹnya chakọta mu kẹ tọroro;
mbụ l'ẹnya gbahụkotawaru
mu kẹ tsụkiribaa.
17 Ọle ọ tọ dụkwanu
iphe-kpanganga,
mu asụ lẹ mu mejeru.
Tẹme epfupfu, mu anọduje
epfu anụ Chileke bụru
iphe, doru rịsaa.
18 Gụbe alị; te erikwa mee mu!
Jiko gẹ mkpu,
mu echi ba adamihukwa
adamihu!
19 Mbụ lẹ ntaakpọnu bẹ
onye-ekebe mu nọkwa
l'imigwe.
Onye agbarụ mu ọdzori
anọdukwapho
l'ephekerephe.
20 Ọo ndu mu l'ẹphe eshi ọ̀nyà
ekweru mu une.
Ọle onye mu arakwanụ ẹkwa
ekpu bụ Chileke.
21 E gege akabẹkpoo rwọo
Chileke l'iswi ẹhu nemadzụ
ẹgube ono, nemadzụ arwọje
arwọrwo l'iswi ẹhu
nemadzụ ibiya ono.
22 “Ọ kwa nwapha olemole
phọduru;
mu ejeshia iphe-ọzo ono,
bụ: mu -jee ya mu ta
alwabaẹdu onoya.