19
Jiobu epfu g'opfu ono gude erwube iya l'ẹhu
1 Tọbudu iya bụ; Jiobu bya
eyee ọnu sụ:
2 “?Unu a-nụkpoo mu aphụ
ọwa-a,
unu anụ mu ọwa-a jasụ
teke ole?
?Bụ teke ole bẹ unu
e-gweberu mu uji ọwa-a,
unu gude opfu egwe mu
g'unu egwe mu ọwa-a?
3 Ọwaa kwewaa ugbo iri,
unu kọru mu ọnu;
ọphu iphere adụdu unu ẹka
unu abya mu l'iphu
ẹhuka-ẹhuka.
4 Ọme ọ bụkpoonu l'ọo eviya
lẹ mu shiswewaru ụzo;
emeswe ọbu, mu mesweru
ọbu bụkwa mu bẹ ọ nọ swiru.
5 Unu -nọdu etu onwunu
ọphushugbu eje
abyapfuta mu;
bya egude iphe-iphere,
anwụru mu nụ abarụ mu
mba;
6 unu maẹkwarupho
l'ọ kwa Chileke meru mu ẹji.
Ọo ya woru ụgbu-egege iya
woru lọ-phee mu
mgburugburu.
7 Mu chia mkpu sụ l'eemekwa
mu ẹji;
ọphu ọ dụdu onye yeru
mu ọnu.
Mu chia sụ g'a gbaaru
mu mkpu;
ọphu ọ dụdu onye harụ
mu enge.
8 Ọo Chileke nọ-chiru mu
ụzo gẹ mu ta aghatashị.
Ọ bya emee; ụzo,
mu eshi gbakọta ọchii.
9 Ọ nafụru mu ùbvù,
e shi akwabẹje mu;
bya eye ẹka kputa mu
okpu-eze, mu shi kpuru.
10 Ọ tọ dụkpodaa ụzo,
o to shidu alajashị mu
kẹ tarara tarara jasụ mu
bvụ gẹ mu bvụru-a.
Iphe, mu ele ẹnya l'oo-me
l'ẹhu mu bẹ o phefuwaru
g'onye phefuru oshi.
11 Ẹhu-eghu iya bẹ o mewaru;
o nwuhu ọku l'ẹhu mu;
bya agụru mu yeru ndu
ọhogu iya.
12 Ojọgu iya phẹ nọdu
asọ kpereree abyapfuta mu.
Ẹphe kephee mu ekephe;
bya anọ-phee ẹka mu
bu mgburugburu.
13 Ndu mu l'ẹphe bụ nwune
bẹ o bukafụru mu l'ẹphe;
bya emee ndu mu l'ẹphe
shi aswị ọswi;
ẹphe gbakashịhu.
14 Ndu mu l'ẹphe bụ ipfu
gbawa nanụ-nanụ.
Ẹguru ọ̀nyà mu phẹ
zọhashia mu.
15 Ẹbyaa, byaru mu nụ;
mẹ ndu bụ ohu mu gụa
mu l'onye lwarụ alwalwa.
Ẹphe nọdu asụje lẹ mu
bụ onye ọhozo.
16 Mu -kua ohu mu oku;
ọ tọo zadụ mu ẹnu;
l'ẹka mu gudekpọkwaa
ọnu mu rwọo ya arwọrwo.
17 Udzu ọnu mu nọdu
eshijechaa nyee mu ishi.
Unwune mu gẹdegede
nọdu ebuhachaa mu ebuha;
18 mbụ l'ụnwegirima
nshịi yịchakwa lẹ ndu
epfutọshi mu nụ.
Ẹphe -hụma mu;
ẹphe achị mu ọchi.
19 Ndu mu l'ẹphe shi nọdu
phakuu
bẹ mu dụkotawaa ashị.
Ndu mu yeru obu ghaa
ọhu meahaa iphe,
a-tsụru mu nụ.
20 Nta-a ta adụedu iphe,
mu bụ,
abụdu phulaphula akpọ
yẹe ojogorogo ọkpu.
Nta-a bụwaa iphe,
phọduru mu l'ọnu,
gege abụru eze bụ
ẹgbu kpoloko.
21 Unu kabẹnu phụaru
mu obu-imemini unubẹdua,
mu l'unu eshi ọ̀nyà.
G'imemini mu kabẹnu dụ unu;
l'ọ kwa Chileke chiru
mu ẹka-a, mu l'iya eme-a.
22 ?Dẹnu g'o gude unu je
anọdu achịkwa mu phọ
gẹ Chileke achị mu?
?Unu teke atajikpọdaa anụ
mu ẹpho?
23 Ọ dụ mu g'a sụ l'iphe-a,
mu epfu-a bẹ eede edede
l'ẹkwo;
mbụ g'a sụ l'e ebyịru iya
ebyibyi l'ẹkwo dobe;
24 l'e gude mkpụrukpu-ígwè
dee ya l'eli mkpuma;
mbụ kaa ya akaka l'agbara
mkpuma g'ọ nọwaro ojejoje.
25 Ọle ọphu mu maru bụ
l'onye a-gbafụta mu nụ
nọ-a ndzụ;
l'e -mechakpọepho l'ikpazụ
iya bẹ ọo-pfụru-a l'eliphe-a.
26 Lẹ teke e
mebyishichakpọorunu
akpọ-ẹhu mu ọwa-a
bẹ mu e-gudelẹ-a anụ-ẹhu
mu hụma Chileke.
27 Ọo mbẹdua l'onwomu
e-gude ẹnya mu
hụma iya gẹdegede;
ọ tọ bụdu onye ọzo;
mbụ l'oovukpọo mu
evuvu l'ọkpoma shii.
28 Unu -jee l'asụ:
‘?Anyi a-chịhunuru iya gụnu;
l'ẹka ọ bụ iya bẹ iphe-ẹhuka
ono l'ophu shi l'ẹka.’
29 Unu tsụnapho ogu-echi
Chileke ebvu;
unubẹdua l'onwunu;
kẹle oke ẹhu-eghu bụkwa
ogu-echi bẹ oowotajẹru
nemadzụ.
Ọ bụru teke ono bẹ unu
a-maru l'ikpe dụ.”