39
1 ?Ịimajeru teke eghu-ọswa,
bu l'úbvú nwụru nwa?
?Ịihubeje ama l'ọwa-a teke ne
ele anwụ nwa baa?
2 ?Ịiguje ọnwa ole,
ẹphe anọje tẹme ẹphe
atsụa ime?
?Ị maru teke ẹphe ezedajẹ
gẹdegede?
3 Ọobujeru; ẹphe -bya ezeda;
ẹphe egbushi ikpere l'alị
woru nwa phẹ nwụa.
Ime, shi eme phẹ nụ
abụru sarịmu.
4 Ụnwu iya ọbu agbashịa ike
nọdu l'ime ẹgbudu
l'ẹka ono vua vughee.
Ẹphe aparu ne phẹ ono haa
gbakashịhu;
ẹphe ta lwapfutabaẹdu iya.
5 ?Bụ onye harụ
nkapfụ-ịgara-ọswa;
ọ nọdu akpaphe;
ọphu ọ dụdu iphe,
eme iya nụ?
?Bụ onye tọshiru phẹ haa;
ẹphe nọdu ejeje ẹka dụ
phẹ ree?
6 Echiẹgu alị ọkponku bẹ mu
nụkpoeru iya phọ sụ
g'o buru;
bya emee alị ono,
bụepho únú únú ono g'ọ
bụru ẹka oo-buru eburu.
7 Wọowoowoo, aanọduje atụ lẹ
mkpụkpu bẹ ọonoduje
achị ọchi;
ọphu ọonudu gbagbagba,
ndu udumalị anọduje ara.
8 Úbvú úbvú bẹ ọotukoje gbaa
ophorokpo achọ iphe,
oo-ri;
achọkpoepho nwa
rwushirwushi ẹswa
gẹ ya taa.
9 ?Atsụ e-kwe-a bya anọdu
meahaa iphe,
ị sụru g'o mee?
Mbụ-a; ?ii-dobe iya-a g'ọ
nọdu l'ẹka eeyejeru anụ nri;
l'ọ nọdu iya l'ẹnyashi?
10 ?Ọ dụru ọphu ịi-dụ ike
tụa eri kpụta kpụru g'o
jeeru ngu ozi ẹgu;
?ọzoo ii-gude iya-a kọo
ọkoro lẹ nsụda?
11 ?Ịi-chịru ụpfu kwẹe ya
sụ l'o shihuru ike?
?Ịi-parụ-a ozi ngu ẹka o
shihuru ike parụ
haarụ iya?
12 ?Ii-kweta haa ya g'o je
evulataru ngu ereshi ngu;
vuru iya je akụbe l'ụlo,
eechishije balị?
13 Oke-ẹnu ọsuturichi egudeje
ẹhu-ụtso chia ǹkù pyaa.
Ọle ị tịi tụduru ẹ́bà iya eyeru
ẹ́bà korokoro.
14 Oke-ẹnu ọsuturichi ono atụje
ẹkwa l'alị.
Ọ bụru l'alị bẹ ọonoduje kpua
ya.
15 Ọ tọo kpadụ ishi k'a nọnyaa
a zọo ya ọkpa zọpyaa;
ọzoo l'ụnwu anụ
l'a-zọpyashi iya.
16 Ụnwu iya bẹ ọonoduje ehe
anụka anụka g'ẹphe ta
abụdu ụnwu iya;
ọphu ọ kpadụ ishi kẹ
l'akanya, o seru bụ
ọla-l'iswi;
17 noo kẹle Chileke ta anụduru
iya mmamiphe.
Ọphu o keduru oke
k'egomunggo nụ yẹbedua.
18 Ọle o -wokwanụru ǹkù iya
phụshia kẹ gẹ ya wata
agba ọso
l'ọ nyịghaaro ịnya yẹe onye
nọ iya l'eli chịa phẹ ẹbyi.
19 Sụ-a; ?bụ ngu nụru ịnya ike,
dụ iya nụ?
Tọo ?bụ ngu gbarụ nza-ịnya
phụshi iya l'olu;
ọ dụ kẹ nwa
buyabuya ono?
20 ?Bụ ngu meru iya;
ọ nọdu anọduje apfụ
shọoshoo g'igube ono;
o -zia unme fuu;
ndzụ agụhu ụnwu-eliphe?
21 Ọozoje garamu garamu;
ẹhu atsọ iya ntụmatu
l'ike dụ iya.
Looje ẹnari ẹnari ejepfu ọgu,
dụru iya nụ.
22 Ọchi bẹ ọochije ndzụ-agụgu;
kẹle ọ tọ dụdu iphe,
ọotsu ebvu;
ọphu ọola-phujedu azụ
mẹ a haliaru iya ogu-echi.
23 Ikpoto apfụ, kụru l'ẹkpa apfụ,
nọ iya lẹ mgburẹku
anọduje azụ iya
yọgoro yọgoro;
yẹle o-gbungerengere arwa.
24 G'o gude awụ kẹ wugelengu
wugelengu bẹ
ooghudujechaa mẹ o
lwee alị elwelwe;
ọphu ọ byadu apfụru doo
mẹ e gbua opu.
25 E -gbua opu ono l'o woru
okwe rwua.
Ọgu -nọdukwaduro ụzenya;
l'ọ kpọtawa ẹgburu iya.
L'ọ nụwaro olu ndu-ishi
ojọgu ono;
waa mkpu-ọgu, ada nụ.
26 “Sụ-a; ?bụ mmamiphe ngu
bẹ ọkpo-ngwere gude
ephe l'eli?
?Bụ ngu meru iya;
ọ nọdu ewojeru ǹkù jasaa
l'ụzo ndọhali ono?
27 ?Bụ ngu ezije ugo g'o phee
phaa phemihu imeli imeli
je anọdu kpaa ẹpfune iya
l'ẹka dụ ephekerephe
ephekerephe?
28 Ẹka ọonoduje bụ l'újì,
nọ ephekerephe
ephekerephe;
nọwaro l'ẹka ono
jasụ nchi abọhu.
Ọ bụru l'ẹka ono bẹ oodomije
onwiya.
29 Ọ bụru ẹka ono bẹ ọonoduje
levu iphe, oo-ri.
Ọ -nọdukwaduro ụzenya;
ẹnya iya arwụtawa iya.
30 Ụnwu iya amịje mee.
Ọ bụru ẹka odzu dabyiru bẹ
yẹbedua anọduje.”