8
Ọnu kẹ Bilidadu
1 Tọbudu iya bụ; Bilidadu,
bụ onye Shuwa bya eyeeru
iya ọnu sụ iya:
2 ?Ii-pfukpọo ụdu opfu ono
pfuberu teke ole?
Opfu ngu dụkwa gẹ
phẹrephere,
ezi taphutaphu.
3 ?Chileke ekpeje ikpe
l'ẹregede tọo?
Ọkalibe-kangọkotaru-nụ
?ọogbanweje iphe,
pfụru nhamụnha?
4 Ọ kwa iphe-ẹji, ụnwu ngu
meru iya
bẹ o buru phẹ nggo iya.
5 Obenu teke ọ bụ l'ị gbapfuru
Chileke; mbụ wata arwọ
Ọkalibe-kangokọtaru-nụ
arwọrwo;
6 ọ -bụru l'ị dụebe ree bya
abụru onye ire-lanụ
bẹ ọ tọ dụdu m'obeta ọ
bụru nta-a ọphu
ọo-rịkota onwiya gbaaru
ngu mkpu;
woru ngu dophu azụ
l'ẹka shi rwube ngu nụ.
7 Teke ị watarụ iya bẹ ọo-dụ
nwa mkpẹemkpee;
obenu o -rwua l'iphu bẹ
ịi-wata aba yoyoyo.
8 Jịnaa ndu shihawaa nụ;
g'ẹphe kọoru ngu iphe,
shi anwụjeru ndiche phẹ;
9 kẹle anyịbedua bụ-a
ụnyaphu bẹ a nwụru anyi;
ọphu ọ dụdu iphe,
anyi mawaru;
tẹme ndzụ anyi l'eliphe-a
dụepho kẹ nwa tsọkere.
10 Ndu ono e-zi ngu-a iphe
pfua opfu ye ngu lẹ nchị;
mbụ l'ẹphe e-gude
mmamiphe phẹ saarụ
ngu opfu.
11 Èjì; ?oovuje ogologo ẹka
ẹpuchi adụdu.
Mbụ-a; ẹswa, dụ l'ụda
?ọobaje yoyoyo mẹ mini
adụdu l'ụda?
12 Ọobujeru;
ọ -nọdu ezekwadu-a;
e tee gbudu iya egbugbu;
ẹphe akpọshihu nkụ;
mbụ ka ẹswa akpọhu nkụ
ẹgwegwa.
13 Noo g'ọoda-pfuje iphe,
bụkpoo ndu zọharu Chileke.
Ọ bụru ẹgube ono bụ g'ele
ẹnya iphe
ndu amadụ Chileke alajẹ
l'iyi.
14 Iphe, ọ dakoberu adụje
phuge phuge.
Iphe, ọ kpọru obu yeru bụru
udude.
15 Teke ọ dakoberu ụgbu
ẹlwu-ẹlwu iya ono
l'o rikashịhu;
l'ọ bya agbakụa ya ẹka;
ọ tọ dụdu ọphu eme nụ.
16 Ọ dụ g'iphe, a kụru l'anwụ
agba iya mini.
O rwushia irwu ọ̀phúú wụshi
kẹ jashịi l'ime mgbabu
ono;
17 bya agbaa ọgbarabvu
je agbakụa l'agbara-mkpuma;
bụru ẹka ọocho bụ ẹka
dụ epfu-epfu.
18 Obenu teke e phefuru iya
l'ẹka ono, ọ kpọru ono;
ẹka ono ajịka iya sụ lẹ ya
teke ahụmaswekwaa
ya.
19 G'e lekeberu ẹnya epfu;
ndzụ iya anwụlwashihu;
iphe, a kụru akụku ọzo
eshi l'alị l'ẹka ono
wata efushi.
20 Mbụ lẹ-a; Chileke ta
ajịkajekwa onye
adụdu iphe, o meru;
ọphu ọ bụjekwanuru
agbarike onye ẹjo-iphe.
21 Oo-mecha mee;
ọnu abụru ngu ọchi ọchi.
Ogbogboromọnu ngu abụru
iphe, e-ji iya nụ bụ
okoo ngu.
22 Ndu ọhogu ngu bẹ ee-ye
iphere g'uwe;
l'a phọkashia ụlo-ẹkwa,
ndu ẹjo-iphe
kweberu buru.