26
1 Akwabẹ ùbvù te
ekweduru onye-eswe.
Ọ dụ g'ẹka aka-mini-sunoo
l'ada l'ọnanwu.
Ọ dụ g'ẹka igwe edze mini
teke emeta iphe e
meberu l'alị.
2 Ọnu, a tụru onye adụdu iphe,
o meru ta adụkwa iphe,
oo-me onye ọbu.
Ọ dụkwa g'ẹka ogbe eme
pẹremu pẹremu
pẹremu;
ọzoo g'ẹka agbẹta ezi
swịiswiiswii.
3 Ẹchachi bẹ eechije ịnya;
a nọdu egudeje ọkpukpu
akpụ nkapfụ-ịgara.
Nokwaphọ g'eegudeje
mgbọro echi
onye-eswe l'okpurukpu.
4 B'eyekwaru onye-eswe ọnu lẹ
mkpọkoro opfu, oopfu.
Ọdumeka bẹ gụ l'iya
a-tụkokwa bụru ndu
eswe.
5 Yechikwaaru onye-eswe
ọnu ẹhuka ẹhuka lẹ
mkpọkoro opfu,
o pfuru.
Ọdumeka bẹ oo-dobesụkwa
lẹ ya maru iphe.
6 Onye ezi onye-eswe ozi bụ
onwiya bẹ o ribushi ọkpa.
Tẹme ọ nọdu akpataru
onwiya opfu.
7 Ọo g'ọkpa atụgbaa onye
ẹniyeni lwakpalwakpa
bụ g'ẹtu, onye eme eswe
anma atụ lwakpalwakpa.
8 Akwabẹ onye-eswe ùbvù
dụkwa g'eye mkpuma
lẹ rọbo.
9 Ẹka onye-eswe anma ẹtu
dụkwa g'ẹka onye mẹe
atsụ akpa onwiya óbvú,
dzụru iya l'ẹka.
10 Onye ekuje onye-eswe;
ọzoo onye aghata
aghata g'o jeeru iya
ozi dụkwa g'onye ojọgu,
egudeje apfụ iya meka
onyemonye iphe.
11 Ọo gẹ nkụta anwajẹ ẹnwa
laphu azụ je erichaa
ya-a bụ g'onye eswe
abụjeru: o -mechaa
rigbarigba l'ọ laphu azụ
je emephu iya azụ.
12 ?Ị hụmaru onye arị lẹ ya
maru iphe?
Onye ono bẹ onye eme eswe
kaẹpho mma.
13 Onye ẹnyiru sụru l'oduma
nọ lẹ gbororo;
l'oduma tsoru gbororo
azọ-phe.
14 Ọo gẹ mgbo anọduje
aghaphu onwiya
l'arịwa-a bụ g'onye
ẹnyiru anọduje aghaphu
onwiya l'iphe-azẹe ya.
15 Onye ẹnyiru abụjeru:
o -jee etsuta ụtara l'ophe;
ẹka akwaa ya l'ochi.
Ẹnyiru te ekwedu iya g'o ye ẹka
l'ọnu.
16 Onye ẹnyiru arịje lẹ ya
maru iphe
maghata ụmadzu ẹsaa,
maru eye ọnu l'opfu.
17 Onye aghata aghata bya
ahụma ẹka aaswọ ụswo
bya eworu onwiya
chie ya dụkwa g'onye
hụmaru nkụta bya alọta
iya lẹ nchị.
18 Ọ kwa g'onye ọbvu eme,
agba apfụ enwu ọku
phoophoophoo bya
atụ icheku-ọku
phuuphuuphuu;
19 bụ g'ọ dụ mbụ onye
meru nemadzụ ibiya
mkpurukpuru-ẹnya bya
emechaa bya asụ iya
l'ọ kwa ebvu bẹ ya
ebvukoshi iya.
20 Nkụ -adụdu l'ọku;
ọku anyịhu.
Asụlasu -adụdu l'opfu;
ụswo anyịhukwapho.
21 Ọo g'icheku aphunwu
ọku-ụzu;
bya abụru gẹ nkụ
aphunwu ọku mmanụ
bụ g'onye opfu aphunwuje
opfu.
22 Asụlasu anọduje atsọ ntụmatu.
Ọotukoje iphe, bụ ẹhu vọo
pfurupfuru.
23 Ẹrengete opfu edomije
ọkpoma mgbashị;
ẹgube nshị mkpọla-ọchaa
etechije ite,
a kpụru l'ụrwa-a.
24 Onye nemadzụ dụ ashị
egudeje opfu-ọnu
domia onwiya.
Ọle o domiru ẹjo-iphe
l'ime ọkpoma iya.
25 Ọ -nọdu epfukpọo opfu,
atsọ ntụmatu;
b'eyekwaru iya ọnu;
kẹle ẹjo-ahụma,
nọ iya l'ọkpoma rwukwaru
l'ẹsaa.
26 Ashị, ndiphe dụ iya bẹ
oogudeje ẹregede
domia.
Ọle ẹjo-iphe, oome bẹ
ee-mechaa tụa too
l'edzudzu-ọha.
27 Onye ebu iduma bụ iya
e-mechaa daba iya.
Ọ bụru onye eswi mkpuma
bẹ mkpuma
ewephutajẹ azụ bya
eswipyabẹ.
28 Onye atuphu ire bẹ akpọje
ndu o mebyiru
ẹhu ashị.
Tẹme ọnu, enwu opfu
enwunwu nọdu
emebyije iphe emebyi.