7
Ọkwa, aanmaru ndu ejeje
kẹ nwanyị-ụkpara
1 Nwa mu; meje olu mu!
Woru iphe, mu sụru g'i meje
kwachia akwachi
l'ime obu ngu!
2 Ị -nọdu emewaa iphe,
mu sụru g'i meje bẹ ịi-nọdu
ndzụ.
Ọo g'iiletajẹ ẹnya
l'akpụru-ẹnya-oji ngu-a
bụ g'ii-leta iphe, mu ezi
ngu ẹnya.
3 Gbaru iya l'ẹka g'ọ bụru
ngu echi mkpụshi-ẹka!
L'i woru iya dee edede
l'ime obu ngu!
4 Kua mmamiphe nwune
ngu nwanyị!
L'i kua nkwamẹnya onye gụ
l'iya bụ ndu unuphu!
5 Ọo phẹ a-nọdu ephufuje ngu
l'ẹka nwanyị-ovuọba;
mbụ l'ẹka nwanyị-ụkpara,
opfu ọnu iya akwọ
tẹretere.
6 A sụ ngu lẹ-a; mu gbẹ lẹ
windo ụlo mu lee ẹnya;
mbụ-a; mu gbẹkwa lẹ
windo ụlo mu pyofu
ẹnya l'etezi;
7 mu hụma l'echi ẹka ndu
amadụ iphe dọru;
mbụ l'echilabọ ụnwokorobya;
l'o nweru onye ọphu
egomunggo swehuru.
8 Yẹbedua tsoru gbororo eje
eshita ẹka nwanyị ovuọba
ono bu;
mbụ gha iphu eje l'ụzo
ẹka ụlo nwanyị ono nọ.
9 Teke ono bụ ụzenyashi;
gẹ nchi ejihuwaa;
mbụ g'ọchii atukpuwa ẹhu.
10 Tọbudu iya bụ; nwanyị lanụ
fụta byapfutashịa ya;
kwaa akwa nwanyị-ụkpara;
tẹme ẹregede jikwa iya
phọ obu.
11 Nwanyị ọbu bẹ anọduje
atụ kwokwokwo;
tẹme ọphu ọ dụdu onye
ookweje g'ọnu iya rwu
iya l'ẹhu;
ọphu íkè etsupfuduru
iya l'oshi.
12 Teke i shiru ụzo gbororo;
l'ị hụma iya.
Ị -lụfushia l'edupfu-ọha l'ọ
nọduwa iya.
Oowojeru onwiya tsụkpaa
l'ẹkameka.
13 Noo ya; ọ bya eduta
nwokorọbya ono bya
anma iya akpa;
bya eworu iphu gbua
teterete ghaaru iya
iphu sụ iya:
14 “Anụ, mu bọtaru lẹ
ngwẹja-ẹhu-guu,
mu shi je egwegwe nọkwa
l'unuphu; noo kẹle ọ
kwa ntanụ-a bẹ mu
meẹbekotaru iphe,
mu riburu angụ lẹ
mu e-me.
15 Ọo iphe ono meru g'o gude
mu fụta bya ele ẹnya ngu.
Nta-a bẹ mu chọwaru ngu
jasụ mu hụma ngu!
16 Iphe-azẹe mu bẹ mu
gudewaa ẹkwa,
tụru iphe poopoo dozia;
mbụ ẹkwa, e kwerurọ
lẹ Ijiputu.
17 Iphe-azẹe mu bẹ mu
wụkotaru manụ,
eshi kwẹekweekwee.
Mu wụru iya mẹru;
yẹe alowe; waa sinamọnu.
18 Bya g'anyi zẹe l'ibe mu
gbiriri jasụ l'ụtsu!
Bya g'anyi kwaa gude mee
g'ẹhu tsọo anyi ụtso.”
19 Ji mu ta anọkwa l'unuphu.
O jeru ẹka kwatakpọo
dụ ẹnya.
20 Ẹda, ooyeje okpoga bẹ
o yejiru okpoga eyeji
wota gude jeshia;
k'ọphu bụ l'ọ -bya alwa
bẹ ọnwa e-dzuakwanụ
edzudzu.
21 O gudeẹpho epfu opfu
ẹrengete ono gbiriri jasụ
ọ jịta iya.
Ọ bụru ire iya, akwọ tẹretere
ono bẹ o gude dephua
ya.
22 Teke ono teke ono o phukuru
tsoru iya g'eswi,
a kpụ eje egbugbu;
ọzoo g'ele, eje adalahụ
l'ọ́nyà;
23 jasụ apfụ bụru iya lẹ
meji pụrumu;
mbụ g'ẹnu, ephe eje ala
l'ẹka a gbabẹru ọ́nyà,
ata makpọdanu lẹ ndzụ
iya tsewaru l'ọnu ẹta.
24 Ntamanụ-a; unubẹ ụnwu mu;
unu ngabẹru mu nchị!
Unu tọgbokwa nchị g'iphe,
mu epfuru unu bahụ iya!
25 Unu te ewojekwaru obu unu
ziberu nwanyị ono;
ọphu unu ekwekwa g'o
duswee unu ụzo;
duru unu lashịa ụzo, ooshi.
26 Kẹle ikpoto nemadzụ bẹ
o chitaakwaru tụa;
tẹme ndu o gburu egbugbu
dụkwapho igwerigwe.
27 Ụlo iya bụ gbororo ụzo
alị-maa.
Ụzo ono kwasẹkpoerupho
gbiriri jasụ l'ime
mkpuru ẹka ọnwu
gbaru iphe-azẹe buru.