7
144 mio me tohaha me owahara oke, Ihayeo mati.
1-2 Manakobisa Teoso nanarifa me 4 na me owahara oke, bahi kakamaki ya owa wa, bahi totoka ya owa wa, wami beri ya owa wa, kowani ka ya owa wa nari, wami me katomabone me ati na mati, ma toha naro, Teoso ati ehene. Boni nafi me ma kanaharake mata, boni wataribone karo wami ya, ma toha, awa nafi toha na ya. Teoso nanarifa owa onahara oke, kimisari bahi kakamaki ya, Teoso ehene nanawata ka yama tama nari, Teoso yati nari. Me 4 na mera ha nareka ati kitahari, ati e nari ahi:
3 "Wami te nahabiriyahi mata, ma toha, awa toha naro. Hibareya mata. Me ate hani ota nawatabone otake mata, bofe ka e ka Teoso nanarifa mati, Teoso me hikayawa mati", ati nareka.
4 Faya me ati omitara oke, me tomi kani me kamina mati, me ate hani wataha mati. 144 mio me tohahamone me ati narake, Ihayeo me nafi ate ka me toha mati.
5 Yota 12 mio me toha, Hobi 12 mio me toha, Kati 12 mio me toha,
6 Ase 12 mio me toha, Nafitari 12 mio me toha, Manase 12 mio me toha,
7 Simiao 12 mio me toha, Refi 12 mio me toha, Isaka 12 mio me toha,
8 Seboro 12 mio me toha, Yose 12 mio me toha, Bisami 12 mio me toha, narake, me ate hani wataha mati.
Me tamaha me owahara oke.
9 Manakobisa me tamaha me owahara oke. Me tomi kani hinakere, afa tabora nafi ka mati, me ati yoro tokana mati. Me naoharake, hahi katera ya itari nokosi ya, Ofeya ya famahari. Me ka makari yaboha sawawa narake, yomasaro nima yama na afe me bokori kanaha mati.
10 Me ha narake me ati kitaha mati, me ati e na mati ahi: "Fare ota ka Teoso ohari era kasomi watote amaka, towisawa iitari ya itariari, Ofeya toha nari", me ati narake.
11 Bote me toha, yama abe 4 na toharawa na me naoharake, me moto kawahama mati, itari beri ya. Afa me bari ya Teoso nanarifa me nafi kemesearake. Me noki tokowarisaharake wami ya, Teoso nokosi ya, he me kahiyara mati, me ati e na mati ahi:
12 "Ame. E ka Teoso e kahiyaratehabone eke fara yama tohaha ya. Amosi mati tohehimona e ati tehibonaka. Yama watohimona e ati tehibonaka. 'Faya amake', e ati tehabone eke he ni ya. E nafi yosi fare tohatehibonaka. Kiti mati tohehimona e ati tehibonaka fara yama tohaha ya. Ame", me ati narake.
13 Faya bote me ka owa owa aate nareka. "Hibake me amari ha, me bori sawawa na mati? Hika ya me kakehani me amari?" ati nareka.
14 Owati yana nara oke. "Me tiwato tike", onahara oke.
Ati yana namatasahareka. "Afa me amake, yama nawaha nafiha me hiri na mati. Me bori me soko narake Ofeya emene ya, sawahabonehe.
15 Makoni me naorineke waha Teoso nokosi ya, towisawa iitari ya itariari. Me ka yama ahi ni fawa nofara me amake, Teoso me narifa mati, hinaka teboro ya. Me winawahaboneke he ni ya, me hekatoma mati.
16 Me fimimarahaboneke waha. Bakasi me awamarihi naboneke. Bahi hiwene me karimarihi naboneke,
17 Teoso ka katera beri ka Ofeya me hekatoma mati, ofeya me nanarifa nima nari. Mera towakifewebonaka faha amosa ya, me sawi fara tohahabone mati Teoso ya me tabaha mati. Teoso me noki fehe nafi nahokoriwa nebonaka".