1 O lasitêwaac, aê jakêŋ puc amac gebe taêm ênam ŋawae ŋajam êtiam. Aê kasôm ŋawae ŋajam tau lasê gêdêŋ amac ma amac akôc sa ma ŋawae ŋajam tau kêpuc amac tôŋ akô ŋajaŋa. 2 Embe akôc ŋawae ŋajam, taŋ kasôm lasê gêdêŋ amac naŋ tôŋ, go ênam amac kêsi. Mago embe akôc tôŋ atom, oc akêŋ êwiŋ ŋaôma.

3 Biŋ ŋamataŋa, taŋ kakêŋ gelom amac naŋ, gelom aê amboac tonaŋ gebe Kilisi gêmac êndu kêtu aêacnêŋ secŋa kêtôm teto gêc. 4 Êsêac sêsuŋ eŋ ma Anôtô gêŋu eŋ sa gêdêŋ bêc kêtu têlêac kêtôm teto gêc. 5 Eŋ geoc tau lasê gêdêŋ Kepa su acgom, go gêdêŋ êsêac 12. 6 Go geoc tau lasê gêdêŋ lasitêwai, taŋ sêlêlêc 500 su naŋ, ma sêlic eŋ sêwiŋ tauŋgeŋ. Lau tau nêŋ taêsam tec mateŋ jali sêmoa ma ŋagêdô sêmac êndu su. 7 Go geoc tau lasê gêdêŋ Jakobo su, go gêdêŋ aposolo samob.

8 Eŋ geoc tau lasê gêdêŋ samob su, go kêtu ŋamuanô tau eŋ geoc tau lasê gêdêŋ aê amboac tonaŋ, tec katôm ŋapalê, taŋ têna kêkôc eŋ keso têm. 9 Aê katu aposolonêŋ ŋac ŋamuŋa teŋ. Aê katôm gebe sêsam aê gebe aposolo atom, gebe aê kêjanda Anôtônê gôlôac dabuŋ. 10 Mago Anôtônê moasiŋ kêkêŋ aê katu aposolo. Ma ênê moasiŋ, taŋ kêkêŋ gêdêŋ aê naŋ, ŋanô masi atom. Aê gajam kôm kapôêŋ kêlêlêc êsêac samob su, mago aê tauc gagôm atom, Anôtônê moasiŋ, taŋ gêwiŋ aê naŋ gêgôm. 11 Mago mêtê tau aê to êsêac ajam kêtôm taugeŋ ma amac tec akêŋ gêwiŋ.

12 Aêac ajam mêtê gebe Anôtô gêŋu Kilisi gêdi sa aŋga ŋacmatênêŋ. Ma amboac ondoc amacnêm lau ŋagêdô sêsôm gebe ŋacmatê oc sêndi sa atom nec. 13 Ŋacmêtê embe sêndi sa atom, oc Anôtô êŋu Kilisi gêdi sa atom amboac tonaŋgeŋ. 14 Kilisi embe êndi sa atom, oc jaeŋ, taŋ aêac ajac gêdêŋ amac naŋ, ŋanô masi ma amacnêm akêŋ gêwiŋ ŋanô masi amboac tonaŋgeŋ. 15 Embe amboac tonaŋ, oc aêac atu lau, taŋ awa biŋdansaŋ sa kêpi Anôtô, aêac awa sa gebe Anôtô gêŋu Kilisi sa, mago eŋ embe êŋu ŋacmatê sa atom, naŋgo gêŋu Kilisi sa atom amboac tonaŋgeŋ. 16 Anôtô embe êŋu ŋacmatê sa atom, naŋgo gêŋu Kilisi sa su atom amboac tonaŋ. 17 Mago eŋ embe êŋu Kilisi sa atom, oc akêŋ êwiŋ ŋaôma ma amoa tonêm secgeŋ ŋapaŋ. 18 Ma êsêac, taŋ sêkêŋ gêwiŋ Kilisi ma sêmac êndu su naŋ, sêjaŋa amboac tonaŋgeŋ. 19 Aêac embe takêŋ mateŋ Kilisi êndêŋ têm tamoa nom tonecŋageŋ, go lau sêlic aêac tatu gêŋ gêbac ma taêŋ walô aêac êlêlêc lau ŋagêdô samob su ŋêŋgeŋ. 20 Mago Anôtô gêŋu Kilisi gêdi sa aŋga ŋacmatênêŋ sugac. Eŋ kêtu lau, taŋ sêmac êndu su naŋ, nêŋ ŋamêc. 21 Ŋamalac tageŋ kêtu tamac êndu ŋaŋamôkê, ma ŋamalac tageŋ kêtu dandi sa aŋga ŋacmatênêŋ ŋaŋamôkê. 22 Biŋ tau amboac tonec gebe Adam gêbiŋ aêac tôŋ, tec samob tamac êndu, ma Kilisi gêbiŋ aêac tôŋ, tec samob mateŋ jali êsa. 23 Mago samob mateŋ jali êsa êndêŋ-êndêŋgeŋ êtôm nêŋ noc. Kilisi kêtu ŋamêc, go êsêac, taŋ têtu ênê lau naŋ, sêndi sa êndêŋ noc eŋ êmu êmêŋŋa. 24 Su, go Kilisi ênac dabiŋ gêŋ samob. Eŋ oc enseŋ gôliŋ to ŋaclai ma ŋajaŋa samob su, ma êkêŋ gôliŋ tau êndêŋ Tama Anôtô. 25 Gôliŋ kiŋŋa gêjac Kilisi ŋawae e Anôtô êkêŋ ŋacjo samob sêsô eŋ akaiŋ ŋalabu acgom. 26 Go êtu ŋamu enseŋ ŋacjo gêmacanô tau su. 27 Teto gêc gebe “Gêŋ samob kêsô eŋ akaiŋ ŋalabu.” Teto gebe “Gêŋ samob kêsô eŋ ŋalabu,” mago biŋ tonec gêc awê gebe ŋalô Gêŋ samob kêkanôŋ ŋac, taŋ kêkêŋ gêŋ samob kêsô eŋ ŋalabu naŋ, gêwiŋ atom. 28 Gêŋ samob êsô Latu ŋalabu su acgom, go Latu tau êsô ŋac, taŋ kêkêŋ gêŋ samob kêsô eŋ ŋalabu naŋ, ŋalabu amboac tonaŋ, gebe Anôtô ênam gôliŋ gêŋ samob ênam aucgeŋ.

29 Lau taŋ sêliŋ saŋgu sêjô ŋacmatê naŋ, oc sêŋgôm amboac ondoc. Ŋacmatê embe sêndi sa atomanô, go êsêac sêliŋ saŋgu sêjô ŋacmatê su êtu asageŋŋa. 30 Ma aêac amboac ondoc. Aêac amoa jageo kêtôm bêc samob kêtu gêŋ ŋaclai gebe enseŋ aêacŋa nec kêtu asageŋŋa. 31 O lasitêwaac, biŋŋanôgoc, aê gêmac êndu kêtôm bêcgeŋ. Aê kasôm biŋ tonaŋ kêtu amac atu ŋoc waec, taŋ gêc gêwiŋ aêacnêŋ Apômtau Kilisi Jesu naŋŋa. 32 Aê gajac siŋ gêdêŋ bôc ŋaclai aŋga Epese. Aê embe janac siŋ tau êtu biŋ ŋamalacŋageŋ, oc ênam aê sa amboac ondoc. Ŋacmatê embe sêndi sa atom, go taniŋ to tanôm gêŋ tanac ŋawaegeŋmaŋ, gebe ŋaeleŋ oc tamac êndu.

33 Ansau taôm atom. Embe asêlêŋ awiŋ lau sec, oc enseŋ nêm mêtê ŋajam su. 34 Tekwem saki êsa ŋapep ma aŋgôm sec êtiam atom. Aê jasôm biŋ tonec e jaŋgôm amac majem êsa gebe Amacnêm lau ŋagêdô sêjam kauc Anôtô.

35 Lau ŋagêdô oc têtu kênac gebe “Ŋacmêtê oc sêndi sa amboac ondoc. Ma embe mêŋsêpi, oc sêkôc ôliŋ amboac ondoc.” 36 Melocma. Gêŋ taŋ kôsê naŋ, embe êtu palê atom, oc êpoa atom. 37 Embe ôsê gêŋ, oc ôsê ŋadambê, taŋ êlêc êpi êmêŋ naŋ atom, oc ôsê ŋamatugeŋ, amboac jaŋgom me gêŋ ŋagêdô ŋawê. 38 Anôtô êkêŋ ŋanô êndêŋ ŋawê êtôm taê gêjam ma êkêŋ ŋanô tokaiŋ-tokaiŋ êndêŋ ŋawê êndêŋ-êndêŋgeŋ. 39 Gêŋ samob ôliŋ têtôm tauŋ atom. Ŋamalac ôliŋ teŋ ma bôc ôliŋ teŋ ma moc ôliŋ teŋ ma i ôliŋ teŋ. 40 Ŋanô undambêŋa to ŋanô nomŋa gêc gêdêŋ-gêdêŋgeŋ amboac tonaŋ. Mago gêŋ undambêŋa ŋawasi teŋ, ma gêŋ nomŋa ŋawasi teŋ. 41 Oc ŋawasi teŋ ma ajôŋ ŋawasi teŋ ma utitalata ŋawasi teŋ. Ma utitalata tonaŋ ŋai ŋawasi gêdêŋ-gêdêŋgeŋ amboac tonaŋ.

42 Êndêŋ noc ŋacmatê sêndi saŋa naŋ, oc amboac tonaŋ. Sêsê gêŋ, taŋ ê su naŋ, ma gêŋ teŋgeŋŋa oc êndi sa. 43 Sêsê ôli ŋaôma ma ôli ŋawasi oc êndi sa. Sêsê ôli palê-palê ma ôli toŋaclai oc êndi sa. 44 Sêsê ôli nomŋa ma ôli ŋalauŋa oc êndi sa. Embe ôli nomŋa ênêc, go ôli ŋalauŋa ênêc amboac tonaŋgeŋ. 45 Amboac teto gêc gebe “Ŋac ŋamataŋa, Adam, kêtu gêŋ mata jali.” Mago Adam ŋamuŋa eŋ ŋalau, taŋ kêkêŋ aêac daŋgôŋ mateŋ jali. 46 Ôli ŋalauŋa mêŋkêsa kêtu ŋamata atom, ôli nomŋa gêmuŋ, go ôli ŋalauŋa kêdaguc. 47 Ŋamalac ŋamataŋa eŋ aŋga nom, tec kêtu gêŋ nomŋa. Ŋamalac kêtu luagêcŋa gêmêŋ aŋga undambê. 48 Lau nomŋa têtôm ŋac nomŋa tonaŋ, ma lau undambêŋa têtôm ŋac undambêŋa tonaŋ. 49 Aêac tec tawê kaiŋ ŋac nomŋa laŋô nec, oc tawê kai ŋ ŋac undambêŋa laŋô amboac tonaŋgeŋ. 50 O lasitêwaac, biŋ tonec tec jasôm gebe Aêac ôliŋ to dec tonec tawê kaiŋ Anôtônê gamêŋ atom. Ma gêŋ, taŋ ê su naŋ, oc êwê kaiŋ gêŋ teŋgeŋŋa atom.

51 Aŋô acgom, aê jasôm biŋ ŋalêlômŋa teŋ êndêŋ amac gebe Aêac samob oc tamac êndu atom, mago Anôtô oc êpô aêac samob ôliŋ ôkwi kaiŋ teŋ êsa. 52 Biŋ tau êsa sep tageŋ ma eb tageŋ êndêŋ dauc êtaŋ ŋamuŋa. Dauc tonaŋ embe êtaŋ, go ŋacmatê oc sêndi sa toôliŋ teŋgeŋŋa ma Anôtô oc êpô aêac oliŋ ôkwi kaiŋ teŋ êsa, 53 gebe gêŋ tonec, taŋ ê su naŋ, oc êsô gêŋ teŋgeŋŋa sa amboac ŋakwê, ma gêŋ tonec, taŋ êmac êndu naŋ, oc êsô gêŋ, taŋ êmac êndu atomŋa naŋ sa. 54 Mago êndêŋ taŋ gêŋ tonec, taŋ ê su naŋ, oc êsô gêŋ teŋgeŋŋa sa, ma gêŋ tonec, taŋ êmac êndu naŋ, oc êsô gêŋ, taŋ êmac êndu atomŋa naŋ sa, go biŋ, taŋ teto gêc naŋ, êtu anô gebe

58 O ŋoc lasitêwaace, amboac tonaŋ atu lau ŋajaŋa to amoa nêm ŋaŋêŋ. Anam Apômtaunê kôm ênam amac auc ŋapaŋ. Ma ajala gebe koleŋ, taŋ anam êtu Apômtauŋa naŋ, oc anam ŋaôma atom.