14
Oc kêsêgô gamêŋ
1 Apômtau kêsôm gêdêŋ aê, Jeremia, kêtu oc kêsêgô gamêŋŋa gebe
2 “Juda gêjam abec
nê malac sêmasaŋ biŋŋa kêtu gasaŋ
ma nê lau sêc nom tonêŋ ŋalêlôm ŋawapacgeŋ
ma Jerusalem gêmôêc gebe sênam eŋ sa.
3 Lau towae sêsakiŋ nêŋ sakiŋwaga kêtu têtê buŋa.
Êsêac sêja bumata,
mago têtap bu sa atomanô.
Êsêac sêmu sêmêŋ tonêŋ bulakôp sawageŋ.
Êsêac majeŋ ma kauc kêlêsôp,
tec sêsaŋ laŋôŋanô auc.
4 Kom gêjac atom
ma nom ŋakeleŋ kêsa laŋgwageŋ.
Lau-sêkaliŋ-nomwaga sêmoa tomajeŋgeŋ,
tec sêsaŋ nêŋ laŋôŋanô auc.
5 Mojawa têna gêwi nê ŋalatu wakuc siŋ
aŋga kôm gebe gêgwaŋ masianô.
6 Doŋkibôm sêkô gamêŋ ŋabau selec-selec
ma imbeleŋ olec-olecgeŋ amboac kêambôm.
Êsêacnêŋ mateŋanô kêtu malô gebe geŋ sêniŋŋa masi.
7 “Aêŋoc lau sêmôêc gêdêŋ aê gebe
‘O Apômtau, aêacma sec geoc aêac lasê,
mago ônam aêac sa êtu aômnêm ŋaêŋa.
Aêac akac tauŋ su aŋga aômnêm kêtu dim taêsam.
Aêac agôm sec gêdêŋ aôm.
8 Aôm taômgeŋ, tec lau Israel sêkêŋ mateŋ.
Aôm taômgeŋ kôtôm gebe ônam aêac sa êndêŋ gêŋ enseŋ aêacŋa.
Kêtu asageŋŋa gômoa ma gamêŋ amboac ŋacjaba teŋ
amboac ŋacleŋ teŋ, taŋ gêmoa gêbêc tageŋ naŋ.
9 Kêtu asageŋŋa aôm gômoa amboac ŋac, taŋ gêŋ teŋ kêtakê eŋ naŋ, amboac siŋwaga teŋ nê ŋaclai masi gebe ênam saŋa naŋ.
O Apômtau, aôm gômoa gôwiŋ aêac.
Sê aômnêm ŋaê kêpi aêac. Ôwi aêac siŋ atom.’ ”
10 Apômtau kêsôm biŋ tonec kêkanôŋ lau tonaŋŋa gebe “Êsêac têntac gêwiŋ gebe sêlêti sejo sêja-sejo sêja ma sêjam gôliŋ nêŋ eŋkaiŋ atom. Amboac tonaŋ aê galic êsêac gêjac aê matocanô ŋajam atom. Aê gabe taêc ênam êsêacnêŋ geo, taŋ sêgôm naŋ, ŋapaŋ ma jakêŋ ŋagêjô êtu nêŋ secŋa.”
Tôbôm ŋawae
11 Apômtau kêsôm gedeŋ aê gebe “Oteŋ mec êtu lau tonec sêmoa ŋajamŋa atom.
12 Êsêac sêjam dabuŋ mo, mago aê gabe jaŋô êsêac aweŋ atom. Êsêac sêkêŋ daja to da keleŋ, mago aê gabe jakôc da tau sa atom. Aê gabe janseŋ êsêac su ŋa siŋ to tôbôm ma gêmac sec.”
13 Go aê kasôm gebe “Ojae, Apômtau Anôtô, ôlic acgom, propete sêsôm gêdêŋ êsêac gebe ‘Amac oc alic siŋ atom ma oc aôc tôbôm atom. Aê oc jakêŋ amac aŋgôŋ gamêŋ tonec towamageŋ ŋapaŋ.’ ”
14 Ma Apômtau kêsôm gêdêŋ aê gebe “Propete tonaŋ seoc biŋdansaŋ lasê sêjam aê laŋôc, naŋ aê kasakiŋ êsêac atom ma aê kajatu êsêac atom to kasôm biŋ gêdêŋ êsêac atom. Êsêac seoc ŋakatu dansaŋ to biŋ ŋaôma ma dansaŋ, taŋ êsêac tauŋ nêŋ ŋalêlôm taêŋ gêjam naŋ, lasê gêdêŋ amac.
15 Amboac tonaŋ tec Apômtau kêsôm biŋ tonec kêkanôŋ propete tau gebe Propete, taŋ kasakiŋ êsêac atom, mago seoc biŋ lasê sêjam aê laŋôc ma sêsôm gebe ‘Siŋ to tôbôm oc êtap gamêŋ tonec sa atom’ naŋ siŋ to tôbôm tau oc enseŋ êsêac su sênaŋa.
16 Ma lau, taŋ propete seoc biŋ lasê gêdêŋ êsêac naŋ, siŋ to tôbôm oc enseŋ êsêac su ma sêmbaliŋ êsêac siŋ sênêc intêna Jerusalemŋa ma ŋac teŋ êmoa gebe ênsuŋ êsêac to nêŋ lauo ma nêŋ latuŋio to ŋacŋa atom. Gebe aê gabe jansêwa êsêac tauŋ nêŋ sec naêpi êsêac tauŋ.
17 “Aôm ôsôm biŋ tonec êndêŋ êsêac gebe
‘Matocsulu enseleŋ êtôm êmbêc to eleŋgeŋ,
enseleŋ ma êpa atom
gebe sêjac ŋoc lau latuŋio, awêtakiŋ tau, e kêtap kamoc kapôêŋ sa.
Sêjac eŋ secanô.
18 Aê embe jasa kôm jana, oc jalic ŋacmatê, taŋ siŋ geseŋ êsêac su naŋ.
Ma embe jamêŋ malac, oc jalic lau togêmac tôbômŋa.
Propete to dabuŋwaga sêjac laoc gamêŋgeŋ
ma sêpô lêna kauc sênam lau saŋa.’ ”
Lau teteŋ Apômtau ŋanôgeŋ
19 Aôm kôtiŋ Juda su samucgeŋ me.
Aôm ôlim ŋakam gêdêŋ Sion me.
Amboac ondoc tec gôjac aêac
kêtôm gebe ôliŋ ŋajam êsa êtiam atom nec.
Aêac akêŋ mateŋ têm ôliŋ ŋajam êsaŋa,
mago gêŋ êtakê aêacŋageŋ mêŋkêsa.
20 O Apômtau, aêac ajala ma sec to tameŋinêŋ keso
gebe aêac agôm sec gêdêŋ aôm.
21 Ôtiŋ aêac su atom êtu nêm ŋaêŋa
ma ôŋgôm nêm lêpôŋ ŋawasi ŋawae êtu sec atom.
Taêm ênam nêm poac, taŋ kômoatiŋ gêdêŋ aêac naŋ,
ma onseŋ su atom.
22 Tenteŋlatunêŋ anôtôi jaba têtôm gebe sêkêŋ kom ênac me.
Me undambê kêtôm gebe êŋgôm kom ênsêwa me masi.
O Apômtau Anôtô, aôm taômgeŋ kôtôm.
Aêac akêŋ mateŋ aôm taômgeŋ
gebe aôm gôgôm gêŋ samob tonaŋ ŋai ŋanô kêsa.