31
Lau Israel sêmu sêmêŋ nêŋ gamêŋ êtiam
1 Apômtau kêsôm gebe “Êndêŋ têm
tonaŋ oc jatu Israelnêŋ gôlôac samob nêŋ Anôtô
ma êsêac oc têtu aêŋoc lau.”
2 Apômtau kêsôm biŋ tonec gebe
“Lau, taŋ sêsêp siŋ sawa naŋ, têtap moasiŋ sa aŋga gamêŋ sawa.
Gêdêŋ taŋ Israel gesom gamêŋ êlêwaŋ tauŋa naŋ,
3 Apômtau geoc tau lasê gêdêŋ eŋ aŋga gamêŋ jaêc.
Aê têtac gêwiŋ aôm ŋa têtac gêwiŋ teŋgeŋŋa.
Kêtu tonaŋŋa aê kamoasiŋ aôm gedeŋ tôŋgeŋ.
4 O awêtakiŋ Israelo, aê gabe jakwê aôm sa ôkô êtiam.
Ôŋgêlôŋ taôm ŋa gegob êtiam
ma ôsa naôtê wê ôwiŋ lau têntac-ŋajamwaga.
5 Aôm oc ôsê kôm wainŋa êsêp lôc Samariaŋa êtiam.
Lau-sêsêwaga oc sêsê ma têtu samuc kôm ŋanô.
6 Gebe bêc teŋ oc mêŋêsa, go dibwaga oc sêmôêc aŋga lôc Epraimŋa gebe
‘Ajôc, andi ma tapi Sion dandêŋ aêacnêŋ Apômtau Anôtô tana.’ ”
7 Gebe Apômtau kêsôm biŋ tonec gebe
“Anam lasê totêmtac ŋajamgeŋ êtu Jakobŋa.
Awem êôc lau tomôkê-tomôkê nêŋ ŋamataŋa.
Asôm lasê to atoc sa ma asôm gebe
‘Apômtau gêjam nê lau Israel nêŋ ŋapopoc kêsi.’
8 Alic acgom, aê gabe jakôc êsêac aŋga gamêŋ nodoŋa
ma jajoŋ êsêac sa aŋga nom ŋagamêŋ jaêcsêga.
Oc jajoŋ mateŋpec to puliŋ ma lauo, taŋ taêŋ to êsêac, taŋ ŋapalê kêtuŋ êsêac naŋ sêwiŋ.
Gôlôac toŋ kapôêŋ teŋ oc sêmu sêmêŋ tonec.
9 Êsêac oc sêmêŋ tomateŋsulugeŋ
ma jawê êsêac tobiŋmalôgeŋ sêmu sêmêŋ.
Aê jakêŋ êsêac sêsêlêŋ sêmoa bu ŋakêŋkêŋ ŋataligeŋ,
oc sêsêlêŋ sêmoa intêna solop gebe sembeŋ atom
gebe aê katu Israel tama
ma Epraim kêtu ŋoc ŋacsêga.
10 “O tenteŋlatuac, akêŋ taŋem Apômtaunê biŋ
ma asôm lasê aŋga gamêŋ gwêcŋa, taŋ gêc jaêcsêga naŋ.
Asôm gebe ‘Ŋac taŋ kêsa Israel êliŋ-êliŋ naŋ,
gebe ejoŋ eŋ sa êtiam
ma ejop eŋ amboac ŋacgejob gejob nê domba.’
11 Gebe Apômtau gêjam ôli Jakob su
ma gêjam eŋ kêsi aŋga lau, taŋ lemeŋ ŋajaŋa kêlêlêc Jakobnê su naŋ.
12 Êsêac oc sêmêŋ ma sênam wê kapôêŋ aŋga lôc Sion.
Êsêac ôliŋ êpigeŋ êtu Apômtaunê moasiŋŋa,
êtu polom to wain ma ŋalêsi
ma domba to bulimakao ŋalatuŋa.
Êsêac katuŋ êtôm kôm, taŋ bu kêmalôm naŋ,
ma sêpô lêna gêŋ teŋ êtiam atom.
13 Go awêtakiŋ têtê wê totêntac ŋajamgeŋ
ma lau matac to lau ŋanô têtu samuc.
Aê oc janam nêŋ taŋiboa ôkwi êtu têntac ŋajam.
Aê oc janac êsêac têntac tôŋ ma jakêŋ êsêac têntac ŋagaô êsa êjô ŋalêlôm ŋawapac su.
14 Aê oc jalôm dabuŋwaga ŋa gêŋ ŋajam taêsam
ma ŋoc moasiŋ êôc ŋoc lau tôŋ.
Apômtaunê biŋ tau tonec.”
Apômtau taê walô nê lau
15 Apômtau kêsôm biŋ tonec gebe
“Sêŋô awa ŋaonda aŋga Rama.
Sêwakic to têtaŋ taŋiboa ŋanô.
Rahel kêtaŋ nê gôlôac.
Sêjam malô-malô eŋ kêtu nê gôlôacŋa kêtôm atom gebe sêjaŋagac.”
16 Apômtau kêsôm biŋ tonec gebe
“Ônam taŋiboa tôŋ ma ômbuŋ matamsulu su
gebe nêm koleŋ oc êtap ŋagêjô ŋajam sa
ma êsêac oc sêmu sêmêŋ aŋga ŋacjonêŋ gamêŋ.
Apômtaunê biŋ tau tonec.”
17 Apômtau kêsôm gebe
“Ôkêŋ matam têm, taŋ gêc nêmŋa naŋ,
gebe latômi oc sêmu sêmêŋ tauŋ nêŋ gamêŋ.
18 Aê tec gaŋô Epraimnê taŋiboa tonec gebe
‘Aôm kômêtôc aê amboac kômêtôc bulimakao kapoac wakuc mata dauŋ
ma aê kasô nêm mêtôc ŋalabu.
Ôkôc aê jamu jana gebe jamoa ŋajam êtiam,
gebe Apômtau, aêŋoc Anôtô, aôm.
19 Aê kakac tauc su mago galoc gajam tauc ôkwi.
Ma gêdêŋ taŋ ŋoc kauc kêsa naŋ, aê gabu tauc.
Aê majoc ma ŋoc ŋalêlôm popoc
gebe ŋoc lêŋ ŋapalêgeŋŋa kêmajec aê.’
20 Epraim eŋ ŋoc latuc têtac gêwiŋ eŋŋa me masi.
Aoc gêjac eŋ gebe Ŋoc gêŋenec, me masi.
Têm samob, taŋ kasôm biŋ kêpi eŋ naŋ, taêc gêjam eŋ gamoa.
Tec ŋoc ŋalêlôm gêjam awa su eŋ
ma kêkac aê gebe taêc walô eŋ.
Apômtaunê biŋ tau tonec.
21 “Ôŋguŋ ka êkô êtu nêm intêna ŋabelo.
Matam êndiŋ intênasêga ma ojop intêna, taŋ kôsa naŋ.
O awêtakiŋ Israelo, ômu ômôêŋ,
ômu ôndêŋ nêm malac tonec ŋai ômôêŋmaŋ.
22 O latuco, taŋ gôwi aê siŋ naŋ,
aôm gobe o sic e êndêŋ ondocgeŋ.
Gebe Apômtau kêkêŋ gêŋ wakuc aŋga nom amboac tonec gebe
Awê gêjam ŋac kêsi.”
23 Lausiŋ undambêŋa nêŋ Apômtau, Israelnêŋ Anôtô kêsôm biŋ tonec gebe “Êndêŋ taŋ aê jamansaŋ launêŋ lêŋ êtu wakuc êtiam naŋ, êsêac oc sêsôm biŋ tonec aŋga gamêŋ Judaŋa to nêŋ malac samob êtiam gebe
‘O malac, taŋ biŋgêdêŋ gêŋgôŋ naŋ,
o lôc dabuŋ, Apômtau ênam mec aôm.’
24 Ma gamêŋ Judaŋa to ŋamalac samob ma kômwaga to êsêac, taŋ sejop domba ŋatoŋ naŋ, oc sêpi tageŋ sêŋgôŋ gamêŋ tau ŋalêlôm.
25 Gebe aê jaŋgôm katu, taŋ têkwa gêbac naŋ, têkwa saki êsa ma jakêŋ gêŋ êndêŋ katu, taŋ kêpô lêna naŋ, e êôc eŋ tôŋ.”
26 Su, go matoc gêlac ma galic gamêŋ. Aê gaêc bêc ŋajam kêmoasiŋ aê.
Poac wakuc
27 Apômtau kêsôm gebe “Alic acgom, têm kêdabiŋ gebe jasê ŋamalac ŋawê to bôc ŋawê êsêp gôlôac Israel to Juda.
28 Aê matoc gêdiŋ êsêac gêdêŋ taŋ sêbuc sa to têtuc popoc, gêdêŋ taŋ sêku tulu to seseŋ su ma sêlêsu êsêac naŋ, tec êndêŋ taŋ sêkwê sa to sêsê gêŋ naŋ, matoc êndiŋ êsêac amboac tonaŋgeŋ. Apômtaunê biŋ tau tonec.
29 Êndêŋ bêc tônê oc sêsôm biŋ tonec êtiam atom gebe
‘Tameŋi seŋ wain ŋanô matac
ma nêŋ gôlôac luŋluŋ siŋ-siŋ.’
30 Lau samob sêmac êndu êtu tauŋ nêŋ secŋa ma lau samob, taŋ seŋ wain ŋanô matac naŋ, tauŋ luŋluŋ siŋ-siŋ.”
31 Apômtau kêsôm gebe “Alic acgom, têm oc mêŋêsa, go jamoatiŋ poac wakuc êndêŋ gôlôac Israel to gôlôac Juda.
32 Poac tonec oc êtôm poac, taŋ kamoatiŋ gêdêŋ êsêac tameŋi gêdêŋ taŋ kakam êsêac gêdêŋ lemeŋ ma gawê êsêac sêsa aŋga Aiguptu sêmêŋ naŋ atom. Êsêac sêjac ŋoc poac tonaŋ popoc, tec gawa tauc sa gebe êsêacnêŋ ŋatau aê.
33 Apômtau kêsôm gebe Bêc tônê ŋai êmbacnê acgom, go jamoatiŋ poac tonec êndêŋ gôlôac Israel gebe jakêŋ to jato ŋoc biŋsu êsêp êsêacnêŋ ŋalêlôm ma aê oc jatu nêŋ Anôtô ma êsêac oc têtu ŋoc lau.
34 Êndêŋ noc tonaŋ lau teŋ oc sêndôŋ nêŋ lau sackapoacgêdô gêdêŋ tauŋŋa to nêŋ latuŋi ma sêsôm gebe ‘Ajala Apômtaumaŋ’ êtiam atom gebe gôlôac to nêŋ lau towae samob oc sêjala aê gebe aê oc jasuc êsêacnêŋ geo ôkwi ma taêc ênam nêŋ sec êtiam atom. Apômtaunê biŋ tau tonec.”
35 Apômtau kêsôm biŋ tonec gebe
“Asa kêkêŋ oc ŋawê gêdêŋ geleŋŋa
ma ajôŋ to utitalata ŋawê gêdêŋ gêbêc.
Asa gêli gwêc sa e ŋadembom kêgasim ŋakicsêa kapôêŋ.
Ŋac tau nê ŋaê gebe Lausiŋ undambêŋa nêŋ Apômtau.
36 Apômtau kêsôm gebe
Ŋagôliŋ ŋajaŋa tonaŋ embe ênaŋa aŋga aê laŋôcnêmŋa,
go Israelnêŋ wakuc sêmoa aê laŋôcnêmŋa têtôm lau-m tageŋ êtiam atom endeŋ tôŋgeŋ amboac tonaŋgeŋ.”
37 Apômtau kêsôm biŋ tonec gebe
“Embe êtôm gebe sênam dôŋ undambê lôlôcŋa
ma sêkip nom ŋalabuŋa ŋanombaŋ ŋam sa,
go aê jatiŋ Israelnêŋ wakuc samob su êtu gêŋ samob,
taŋ sêgôm naŋŋa. Apômtaunê biŋ tau tonec.”
38 Apômtau kêsôm gebe “Alic acgom, têm oc mêŋêsa, go sêkwê malac sa êtiam êtu Apômtauŋa. Oc sênac m aŋga Hananelnê andu soso e naêndêŋ Sacgêdô Kêclêsuŋa.
39 Ma gam dôŋŋa êsêlêŋ solopgeŋ e naêndêŋ gamêŋ ŋabau Gareb, go êmôê êndêŋ gamêŋ Goa êna.
40 Ma gaboaŋ ŋawêlêlaŋŋa to waoŋa samucgeŋ ma kôm samob e naêndêŋ bu Kidron to Sacgêdô Hosŋa ŋagamêŋ gêmu oc kêpi ŋa, gamêŋ samob tonaŋ ŋai oc êtu Apômtaunê gamêŋ dabuŋ. Lau teŋ oc senseŋ su to têtuc popoc êtiam atom endeŋ tôŋgeŋ.”
32:1–35:19 Jeremia gêjam ôli nom aŋga nê malacmôkê gêdêŋ taŋ Nebukadnesar kêgi malac Jerusalem auc naŋ. Biŋ tonaŋ gêgôm kêtu dôŋ teŋ ma gebe êwa sa gebe lau sêkêŋ mateŋ têm, taŋ gêc nêmŋa naŋ. Anôtô oc êŋgôm nê biŋ ŋanô êsa, Jerusalem oc ênaŋa, mago êtu ŋamu eŋ oc êmboa lau Juda sa êtiam. êsêac sa tatu lau samob nêŋ toŋ ŋamataŋa.