22
Balak kêkalem Bileam
1 Go lau Israel dêdi jasê nêŋ becobo kêkô Moabnêŋ gaboaŋ aŋga Jordan ŋamakeŋ ônêŋa kêkanôŋ malac Jeriko.
2 Ma Sipor latu Balak gêlic gêŋ samob, taŋ lau Israel sêgôm gêdêŋ lau Amor naŋ.
3 Ma lau Moab têtêc lau Israel gebe lau taêsam ŋasec ma êsêac sêmoa tonêŋ ŋalêlôm ŋatutuc kêlêlêc su kêtu lau Israelŋa.
4 Ma êsêac sêsôm gêdêŋ lau Midian nêŋ laumata gebe “Ojae, galoc lau Israel nêŋ toŋ kapôêŋ oc sêniŋ gêŋ samob, taŋ gêc aêacŋa naŋ, su amboac bulimakao seŋ gêgwaŋ aŋga kôm.” Ma Sipor latu Balak kêtu lau Moab nêŋ kiŋ gêdêŋ ŋasawa tonaŋ.
5 Ma eŋ kêsakiŋ lau jaeŋŋa gêdêŋ Beor latu Bileam, taŋ gêŋgôŋ malac Petor, taŋ gêc gamêŋ Amauŋa aŋga bu Euprat ŋatali. Lau jaeŋŋa sebe sêkalem eŋ ma sêsôm gêdêŋ eŋ gebe “Ôlic acgom, lau-m teŋ sêwi Aiguptu siŋ sêmêŋ sêjam gamêŋ auc samucgeŋ mêŋsêŋgôŋ sêkanôŋ aêac.
6 Amboac tonaŋ ômôêŋ sebeŋ mêŋôpuc boa lau tônê êtu aêŋa, gebe lau tau ŋajaŋa sêlêlêc aê su. Embe ôpuc boa êsêac, oc moae jatôm, gebe jaku êsêac tulu ma jajanda êsêac e sêwi gamêŋ siŋ, gebe aê kajalagac aôm embe ônam mec ŋac teŋ, oc êtap mec ŋanô sa, ma embe ôpuc boa ŋac teŋ, oc êtap kôpuc boa ŋaŋanô sa amboac tonaŋgeŋ.”
7 Ma lau Moab to lau Midian nêŋ laumata dêdi ma sêkôc ŋaôli Bileam eoc biŋ lasêŋa gêwiŋ. Êsêac jasêô lasê dêdêŋ Bileam ma sêsôm Balaknê biŋ gêdêŋ eŋ.
8 Ma eŋ kêsôm gêdêŋ êsêac gebe “Anêc awiŋ aê êndêŋ êmbêc tonec, go jasôm biŋ êndêŋ amac êtôm Apômtau êsôm êndêŋ aê.” Tec lau Moab nêŋ kasêga sêmoa sêwiŋ Bileam.
9 Ma Anôtô gêdêŋ Bileam jakêsôm gebe “Asa lau sêmoa sêwiŋ aôm.”
10 Bileam kêsôm gêdêŋ Anôtô gebe “Sipor latu Balak, lau Moab nêŋ kiŋ, kêsakiŋ biŋ teŋ gêdêŋ aê gebe
11 ‘Ôlic acgom lau-m teŋ sêwi Aiguptu siŋ sêmêŋ sêjam gamêŋ auc samucgeŋ. Amboac tonaŋ ômôêŋ mêŋôpuc boa êsêac, moae jatôm, gebe janac siŋ êndêŋ êsêac ma jajanda êsêac e sêwi gamêŋ siŋ.’ ”
12 Mago Anôtô kêsôm gêdêŋ Bileam gebe “Ôsêlêŋ ôwiŋ êsêac atom ma ôpuc boa lau tau atom amboac tonaŋgeŋ, gebe aê gajam mec êsêac su.”
13 Gêdêŋ bêbêcgeŋ Bileam gêdi sa ma kêsôm gêdêŋ Balaknê kasêga gebe “Aêc amu ana nêm gamêŋ êtiam, gebe Apômtau gedec gebe aê jasêlêŋ jawiŋ amac.”
14 Go lau Moab nêŋ kasêga dêdi jasêô lasê gêdêŋ Balak ma sêsôm gebe “Bileam gedec gebe êsêlêŋ êwiŋ aêac êmêŋ.”
15 Tec Balak kêsakiŋ kasêga ŋagêdô kêtiam. Êsêac lau taêsam to lau towae sêlêlêc lau ŋamataŋa su.
16 Êsêac sêô lasê dêdêŋ Bileam ma sêsôm gêdêŋ eŋ gebe “Sipor latu Balak kêsôm biŋ tonec gebe ‘Ôndêŋ aê ômôêŋmaŋ, gêŋ teŋ êkô aôm auc atom.
17 Aê gabe jatoc aôm sa ŋanôgeŋ ma jaŋgôm biŋ samob, taŋ aôm ôsôm êndêŋ aê naŋ, ŋanô êsa. Amboac tonaŋ ômôêŋ mêŋôpuc boa lau tônê.’ ”
18 Mago Bileam gêjô Balaknê sakiŋwaga aweŋ gebe “Silber to gold êsô Balaknê andu e mêŋêc gebe êkêŋ êndêŋ aê, mago jatôm gebe jaŋgêli aêŋoc Apômtau Anôtô nê biŋ ŋagec atomanô.
19 Tageŋ anêc awiŋ aê êndêŋ êmbêc tonec, gebe jajala biŋ ŋagêdô, taŋ Apômtau oc êsôm êndêŋ aê naŋ.”
20 Ma gêdêŋ gêbêc Anôtô gêdêŋ Bileam jakêsôm gêdêŋ eŋ gebe “Lau tonaŋ sêmêŋ gebe sêkôc aôm me. Amboac tonaŋ ôndi ma ôsêlêŋ ôwiŋ êsêac. Mago ôŋgôm biŋ, taŋ aê jajatu aôm naŋgeŋ, ŋanô êsa.”
Aŋela ma Bileamnê doŋki
21 Amboac tonaŋ Bileam gêdi gêdêŋ bêbêc kanucgeŋ. Eŋ kêpô ômbiŋkap kêsêp nê doŋki ma kêsêlêŋ gêwiŋ lau Moab nêŋ kasêga.
22 Mago Apômtau têtac ŋandaŋ kêsa gêdêŋ eŋ gebe eŋ gêdi gêja. Ma Apômtaunê aŋela kêkô intêna auc eŋ, taŋ gêŋgôŋ doŋki ŋaô ma nê sakiŋwaga luagêc sêsêlêŋ sêwiŋ eŋ naŋ.
23 Doŋki gêlic Apômtaunê aŋela kêkô intêna auc ma aŋela kêmêgôm siŋ ŋamata teŋ. Tec doŋki gêwi intêna siŋ ma kêsêlêŋ kêsêp kômlêlôm. Tec Bileam gêjac eŋ gebe êmu êsa intêna êna êtiam.
24 Go Apômtaunê aŋela jakêkô intêna gasuc-gasuc, taŋ kêsa kôm wainŋa ŋalêlôm naŋ, gebe tuŋbôm kêkô intêna makeŋ-makeŋ.
25 Doŋki gêlic Apômtaunê aŋela, tec jagêjac tuŋbôm ŋamakeŋ e kêkapiŋ Bileam akaiŋ tôŋ tamiŋ tuŋbôm, tec Bileam gêjac eŋ kêtiam.
26 Go Apômtaunê aŋela gêmuŋ gêja kêkô gamêŋ, taŋ intêna ŋasawa kêtu sauŋ naŋ, ma ŋasawa teŋ gebe doŋki êmôniŋ êsa anô me gasêŋa gêc atom.
27 Doŋki gêlic Apômtaunê aŋela, go gêu tau kêsêp jagêc. Ma Bileam têtac ŋandaŋ kêsa ma gêjac doŋki ŋa nê tôc.
28 Go Apômtau gêŋa doŋki awasuŋ ma kêsôm gêdêŋ Bileam gebe “Aê gagôm asageŋ gêdêŋ aôm, tec gôjac aê kêtu dim têlêac nec.”
29 Bileam kêsôm gêdêŋ doŋki gebe “Aê gajac aôm gebe gôjam ôwê gêdêŋ aê. Aê gabe embe jakôc siŋ teŋ êsêp lemoc, oc janac aôm tomatêgeŋ.”
30 Go doŋki kêsôm gêdêŋ Bileam gebe “Aê katu nêm doŋki, taŋ gôŋgôŋ ŋaô gedeŋ tôŋgeŋ e mêŋgêdêŋ galoc me masi. Aêŋoc mêtê gebe jaŋgôm aôm kwalec amboac tonec me.” Ma eŋ kêsôm gebe “Masi.”
31 Go Apômtau gêgôm Bileam mataanô kêpoa lasê e gêlic Apômtaunê aŋela kêkô intêna to lêma kêmêgôm siŋ ŋamata. Ma eŋ gewec to gêu tau jagêc laŋôanô gêdêŋ nom.
32 Go Apômtaunê aŋela kêsôm gêdêŋ eŋ gebe “Aôm gôjac nêm doŋki kêtu dim têlêac kêtu ageŋŋa. Ôlic acgom, aê tec gamêŋ gebe jakô aôm auc, gebe aê galic aôm kôsa intêna keso.
33 Doŋki gêlic aê ma gêjac jaê aê kêtu dim têlêac. Embe ênac jaê aê atom, oc janac aôm êndu biŋŋanôgeŋ, ma doŋki tau oc êmoa mata jali.”
34 Go Bileam kêsôm gêdêŋ Apômtaunê aŋela gebe “Aê gagôm sec. Aê gajam kauc gebe kôkô intêna auc aê atom, Amboac tonaŋ embe ôlic sec, naŋgo jamu jana êtiam.”
35 Go Apômtaunê aŋela kêsôm gêdêŋ eŋ gebe “Ôsêlêŋ ôwiŋ lau tau. Mago ôsôm biŋ tageŋ, taŋ aê oc jajatu aôm naŋgeŋ.” Amboac tonaŋ Bileam kêsêlêŋ gêwiŋ Balaknê kasêga.
Bileam agêc Balak
36 Balak gêŋô Bileam gêmêŋ ŋawae, tec gêdi kêpuc eŋ tôŋtôŋ gêja Moabnê malac, taŋ gêc bu Amon ŋatali aŋga gamêŋ tau ŋamadiŋ jaêcgeŋ naŋ.
37 Balak kêsôm gêdêŋ Bileam gebe “Aôm gôdêŋ aê gômôêŋ atom kêtu asageŋŋa. Aê kakêŋ jaeŋ to kakalem aôm atom me. Aôm gobe aê oc katôm gebe jatoc aôm sa atom me.”
38 Bileam gêjô eŋ awa gebe “Ôlic acgom, aê tec gadêŋ aôm gamêŋgac. Mago aê oc katôm gebe jasôm biŋ me masi. Aê oc jasôm biŋ tageŋ, taŋ Anôtô êkêŋ êsêp aocsuŋ naŋgeŋ, lasê.”
39 Go Bileam kêsêlêŋ gêwiŋ Balak e sêô lasê Kiriat-Husot.
40 Ma Balak kêkêŋ bulimakao to domba kêtu da ma kêsakiŋ ŋagêdô gêdêŋ Bileam to kasêga, taŋ sêmoa sêwiŋ eŋ naŋ.
41 Ma gêdêŋ bêbêcgeŋ Balak kêkôc Bileam jakêpi Bamot-Bal. Aŋga ônê eŋ gêlic lau Israel nêŋ gamêŋ becŋa ŋagêdôgeŋ.