51
Mec Anôtô êsuc sec ôkwiŋa
1 O Anôtô, taêm walô aê gebe aôm ŋac moasiŋ.
Aôm taêm walô ŋatau kapôêŋ, onseŋ aêŋoc sec su.
2 Ôkwasiŋ ŋoc tôp su
ma ômbuŋ ŋoc geo su e jatu selec.
3 Gebe aê tauc kajala ŋoc kesogac
ma matoc gê ŋoc geo gedeŋ tôŋgeŋ.
4 Aê gagôm sec gêdêŋ aôm taômgoc
ma gagôm gêŋ, taŋ aôm gôlic gebe sec naŋ.
Tec kômêtôc aê jagêdêŋ
ma nêm mêtôc tau solop.
5 Ojae, tinoc kêkêkam aê tobiŋgeŋ
ma kêkôc aê tosecgeŋ.
6 Aôm gobe biŋŋanô ênam ŋamalacnêŋ ŋalêlôm auc,
amboac tonaŋ ôwa mêtê tokauc ŋabiŋ ŋalêlômŋa sa êndêŋ aê.
7 Ônsêlô ŋoc geo su tomalageŋ gebe jatu selec.
Ôkwasiŋ aê gebe ŋakêŋkêŋ laŋgwageŋ.
8 Ôkêŋ aê jatu samuc to têtac ŋajam êsa
ma ôlic, taŋ gôjac popoc naŋ, ôli êpi-êpi êtiam.
9 Ônsaŋ laŋômanô auc êndêŋ ŋoc sec
ma ômbuŋ aêŋoc geo samob su.
10 O Anôtô, ôkêŋ ŋoc ŋalêlôm ŋawa êsa
ma ôkêŋ ŋalau wakuc to ŋaŋêŋ teŋ êŋgôŋ ŋoc ŋalêlôm.
11 Ôtiŋ aê su aŋga laŋômnêm atom
ma ôkôc nêm Ŋalau Dabuŋ su aŋga aê atom.
12 Ôkêŋ nêm moasiŋ êŋgôm aê têtac ŋajam êsa êtiam
ma ôpuc aê tôŋ ŋa ŋalau taŋoc wamuŋa.
13 Go aê jandôŋ aômnêm biŋ êndêŋ lau, taŋ sêgêli aômnêm biŋ sêmoa naŋ,
ma lau sec sênam tauŋ ôkwi dêndêŋ aôm sêmu sêwac êtiam.
14 O Anôtô, ŋoc moasiŋ ŋaAnôtô, ônam aê sa gebe jamac êndu atom,
go imbeloc êôc aôm sa toôndugeŋ gebe aôm ŋac gêdêŋ.
15 O Apômtau, ondelec gêdôcôlic
gebe aocsuŋ jasôm aôm waem lasê
16 gebe da gêjac matamanô ŋajam atom
ma embe jansuŋ daja êwac, aôm oc ôlic ŋajam atom.
17 Da taŋ gêjac Anôtô mataanô ŋajam naŋ, katuŋ popoc.
O Anôtô, laŋôm eo ŋalêlôm popoc to ôluŋ-ôluŋ atom.
18 Moasiŋ ŋatau aôm, ômoasiŋ Siongeŋ.
Ômboa tuŋbôm Jerusalemŋa sa êtiam.
19 Go da ŋanô to daja ma da samuc ênac matamanô ŋajam,
go sêkêŋ bulimakao kapoac wacênsac nêm altar ŋaô.
propete Natan gêdêŋ eŋ gêja. Pesalem dambu tauŋŋa kêtu aclêŋa.