5
Timote ênam sakiŋ to ejop nê lau ŋapep
1 Ônsaic biŋ ŋamalacanô teŋ atom, ôlêŋ biŋ eŋ amboac tamam. Ma lau wakuc naŋ ôlic êsêac amboac lasimi.
2 Lauo ŋanô naŋ ôIêŋ biŋ êsêac amboac tênami, ma lauo wakuc amboac latômio tonêm ŋalêlôm ŋawageŋ.
3 Awêtuc embe awêtuc ŋanôgeŋ, naŋgo otoc êsêac sa.
4 Ma awêtuc teŋ embe nê gôlôac to dêbui sêmoa, naŋ sênam eŋ sa êjô moasiŋ taŋ teneŋi to tameŋi sêkêŋ gêdêŋ êsêac naŋ. Sêŋgôm amboac tonaŋ, ec ênac Anôtô mataanô ŋajam.
5 Ma embe awêtuc ŋanô, taŋ taugeŋ êmoa naŋ, oc êkêŋ mata Anôtôgeŋ ma êsap mec tôŋ ma eteŋ Anôtô êtôm êmbêc to eleŋgeŋ.
6 Ma awêtuc teŋ embe êsa nê lêŋ taê ênam tau ôligeŋ, naŋ talic eŋ mata jali, mago gêmac êndugac.
7 Ônac biŋsu êsêac gebe sêmoa tobiŋ masigeŋ.
8 Ŋac teŋ embe ejop tau nê lau to êmoasiŋ tau nê lasitêwai atom, oc enseŋ biŋ takêŋ gêwiŋŋa su. Eŋ êtu ŋac sec êlêlêc lau-sêkêŋ-gêwiŋ-atomwaga su.
9 Oto awêtuc teŋ nê ŋaê êsêp awêtucnêŋ ŋaêmôkê paliŋ-paliŋgeŋ atom. Awêtuc taŋ nê jala kêtu 60 su ma gêjam ŋac tageŋ naŋgeŋ nê ŋaê êsêp.
10 Ênê wae gêjam kôm ŋajamŋa ênêc amboac tonaŋgeŋ. Eŋ embe êlôm nê gôlôac ŋapep, êŋgôm ja lau, êkwasiŋ Anôtônê lau eŋkaiŋ, ênam lau sêŋgôŋ jageoŋa sa to êpuc gêŋ ŋajam samob ŋam, naŋgo nê ŋaê êsêp ŋaêmôkê.
11 Oto awêtuc wakuc nêŋ ŋaê êsêp ŋaêmôkê atom, gebe êsêac oc taêŋ ênam biŋ ŋacŋa ma ôliŋ ŋakam êsa êndêŋ Kilisi.
12 Lauo tonaŋ ŋai oc sêsap nêŋ biŋ, taŋ sêmoatiŋ kêtu ŋamata naŋ, tulu e sêmoa tobiŋgeŋ.
13 Lauo amboac tonaŋ têdôŋ tauŋ gebe sênam ojom ma sênac laoc launêŋ andugeŋ. Ma sêjam ojomgeŋ atom, aweŋsuŋ ŋakasop-kasop ma sêlênsôŋ lau ŋagêdô nêŋ biŋ to sêsôm biŋ, taŋ têtôm atom gebe sêsôm naŋ.
14 Amboac tonaŋ aê gabe awêtuc wakuc sênam ŋac êtiam, ec sêkôc ŋapalê ma sêmansaŋ nêŋ andu ŋapep. Sêŋgôm amboac tonaŋ, gebe ŋacjo êmbu aêac êtu lêŋ keso teŋŋa atom.
15 Awêtuc tau ŋagêdô tec sêkac tauŋ su ma sêsap Sadaŋ tôŋgac.
16 Awêtuc ŋagêdô embe sêŋgôŋ sêwiŋ nêŋ awê kêkêŋ gêwiŋŋa teŋ, go awê tau ênam êsêac sa, gebe êkêŋ wapac êndêŋ gôlôac atom. Go gôlôac dabuŋ têtôm gebe sênam awêtuc sawaanô sa.
17 Atôc gôlôacnêŋ laumata, taŋ sêjam jaom nêŋ gôlôac ŋapep naŋ, sa êlêlêcmaŋ. Aê kasôm biŋ kêpi êsêac, taŋ sêjam mêtê to têdôŋ lau sim tauŋ sugeŋ naŋ.
18 Amac ajala gebe teto gêc gebe “Ôkic bulimakao, taŋ kêka mopolom gêmoa naŋ, awasuŋ auc atom.” Ma biŋ teŋ gêc gêwiŋ gebe “Koleŋwaganê kôm ŋaôli gêjac eŋ ŋawaegoc.”
19 Biŋ teŋ embe êpi laumata teŋ, naŋ ôkêŋ taŋam sebeŋ atom. Ŋac luagêc me têlêac sêwa sa êtôm tau acgom, go ôkêŋ êwiŋ.
20 Lau taŋ sêŋgôm sec naŋ, ômêtôc êsêac aŋga lau samob laŋôŋnêm gebe lau ŋagêdô sêlic ma têtêc tauŋ.
21 Aê kakô Anôtô agêc Kilisi Jesu to aŋela, taŋ Anôtô kêjaliŋ êsêac sa naŋ, laŋôŋnêm ma aoc gêjac aôm gebe Ojop ŋagôliŋ tonaŋ ŋapep. Ômoasiŋ ŋac teŋ êlêlêc ŋac teŋ su atom to taêm labu nêm ŋac ôlim andaŋ taômŋa atom.
22 Ôkêŋ lêmam ênsac ŋac teŋ gebe ônam mec eŋ êtu sakiŋ teŋŋa sebeŋ atom. Ma ôwê lau ŋagêdô nêŋ sec ŋakaiŋ ôwiŋ atom. Ojop taôm nêm ŋalêlôm gebe ŋawageŋ.
23 Ônôm bu ŋaômageŋ atom, ônôm wain ŋagec êwiŋ êtu nêm têmtacwalô to gêmac gêgôm aôm elêmêŋa.
24 Lau ŋagêdô nêŋ sec kêtu awê sebeŋ ma sec tau kêsêlêŋ gêmuŋ têm sêmêtôc êsêacŋa. Mago ŋagêdô nêŋ sec oc êtu awê êndaŋgucgeŋ.
25 Ma koleŋ ŋajam kêtu awê amboac tonaŋgeŋ. Ma ŋagêdô embe êtu awê sebeŋ atom, oc êsiŋ tau êtôm atom.