12
Kùr Pànn Sìr Bitrus
1 Asai-à níng hi mpìrká káhi áyau mpìrká ri bàg Yesu níng, big wa shwìn á vù kùr Hirudus ni.
2 Ku du kà mpìrká big pànn Yakubu wunzà Yohanna, n kyag gban rìg wàníng ma kafai.
3 Barà ku myàng Yahudawaká ri fig àjwárwá á dò jir bu-à ku sa sig níng ni, í wà ku pànn Bitrus tìnn. Ku pànn wàníng áyau suká big ri ji brodi zyun-à bàna big yisti.
4 Barà ku pànn wàníng n du kà á tonn fi-à ni, ku ya kà wàníng á vù sojaká ri sar gadi. Big shi sig mpìr yina yina, hár kyau yina tìnn. Ku sìnn káníng jirà a káníng sar myàng kwonn ma Bitrus í zyun, jirà sai-à ba ji wam zu rìghing buju àyúnn Pìm Wam Zu, bá zìg bi Bitrus á pyànn mpìrká ni jirà abig wà ku kwonn.
5 I byar-à big fim Bitrus mà tonn fi-à ni, mpìrká ri bàg Yesu big ri vig Shìdun á jir shinnwá ni, jirà a Shìdun zìg zu ku.
Shìdun Pinn Zu Bitrus Mà Tonn Fi-à Ni
6 A fi-à ni Hirudus ri kyab rag wà byar-à ma kyàr hing, bá zìg zu bi Bitrus jirà abig wà ku kwonn. Bitrus na kà sig áyau soja pyànà, ku na jànn kwonn sig ma kan àsháu-à big wìr kà sig ku á vù-à ni. Asar gadiká káhi sar dim sig á nu nkyun-à ni.
7 I byar-à hi wùn aswam Shìdun mà wai kà yag mà tonn-à ni, finn tonn-à í yar rìg-à gbauu. Wùn aswam Shìdun pànn Bitrus á fir vù-à ni n dab finn zir wàníng. Bitrus fìm finn zir. Wùn aswam Shìdun dinya ku rag, aku dù nann zu kíni. Sái Bitrus dù. A byar-à níng hi kan àsháu-à big wìr kà sig ku á vù-à ni níng, í wan zu rìg-à.
8 Wùn aswam Shìdun rag, aku zir gbam byànntíwá ma aku pag kà tabar. Bitrus zir gbam byànntíwá, n pag kà tabarwá. Wùn aswam Shìdun rag, “A bir mayafiwú, ma á bàg bi mì.”
9 Bitrus í mayafiwá í bir-à, mì wàníng í bàg yag-à. Barà ku kan bàg yag wàníng níng, ku wà sig rag ku ri la la. Ku yì fig wà bu-à hi í àjai bàna.
10 Big dù, n wam zu rìg mpìrká sar sig gadi-à níng, n wam zu yag kàng mà byar gadi-à wà wa pyànà. Big bi fòr á byar nu nkyun-à byar-à bá zu má kà á finn swann-à ni. Agìr nu nkyun-à níng hi big sa sig big àsháu. Barà big fòr yag àdòníng àgìr nu nkyun-à hi í pù fim rìg-à ma shinnwá. Big zu yag mà myann, n yag bànn fù zu rìg mà gbìb-à ni, mi ri yag. I byar-à wùn aswam Shìdun-à níng dà fim rìg Bitrus màhàn.
11 I byar-à Bitrus dang rag, “Asái, ǹ yì rag hing wà bu-à sa sig mì níng í àjai. Shìdun swam bi wùn aswamwá, n zìg zu rìghing mì áyau shwìn-à Hirudus ya sig mì níng. Bu-à mpìr Yahudawaká ri zìm abig sa mì níng, Shìdun zìg zu rìghing mì áyau-à ni.”
12 Barà ku yì rag bu-à sa sig ku níng, í byar-à ku dù n yag mà lu Maryamu na Yohanna Markus, n yag dìg mpìrká kwonn shi sig màhàn, big ri vig Shìdun á shinnwá ni.
13 Ku yag kwìb nu nkyun-à kwìb kwìb. Sái wùn uwà zyun dù bi. Zìnn wùn uwà-à níng hi í Roda. Ku bi aku pù nu nkyun-à.
14 Sai ku rag aku fig nài jír-à, í nài jir Bitrus. Ku shàr kàng yag mà finn lu-à ni ma àjwár á pìkyinnwá ni. Ku pù fig nu nkyun-à bàna, n yag dinya mpìrká rag “I Bitrus!”
15 Big rag, Kai! Kwá shàr ǹsáng rà? Ama ku rag, “Ajai í Bitrus.” Sái big rag, “I ku bàna, adìnwá bi síg nì.”
16 Barà Bitrus shi sig, mi ri kwìb nu nkyun-à, big bi pù fim ya ku. Barà big myàng ku àdòníng big sa mamaki.
17 I byar-à ku kà yag, n sa nann zu big vù rag, abig shi akim. Ku kan dinya big barà Shìdun zìg zu sig ku áni mà tonn fi-à ni. I wà ku dinya káníng rag, a káníng dinya Yakubu ma mpìrká ri bàg Yesu bidìm pár bu-à sa sig níng. Barà ku dang kinn jírwá àdòníng, ku dù mà byar-à hi, n yag rìg byar zyun.
18 Byar-à bi kyàr. Mpìrká ri sa gadi á tonn fi-à ni níng, myàng fig Bitrus bàna. Pìkyinnbá gib, jir kai bàna big yì fig byar-à ku dù, n yag sig bàna.
19 A byar-à hi kùr Hirudus rag abig yàn kyann ku. Big dìg fig ku bàna. Sái big bi pànn àsàinká ri sa gadiwá níng. Hirudus bib big jír, í wà n dang rag abig gban rìg big.
Daka á byar-à hi Hirudus dù mà jànn Yahudiya, n yag mà Kaisariya. Ku shi màhàn su títi nímá.
Barà Hirudus Wu Kiwá
20 Hirudus ri dù kyinn ma mpìrká á jànn Taya ma Sidon. I byar-à mpìr káníng kwonn shinn n yag mà byar Hirudus. Big yag jag má á byar àgbam swàm áyau luwá ni, àgbam-à hi zìnnwá í Bilastus. A byar Bilastus ni, big dìg gbìb-à yág mà byar Hirudus ni, n dang jír barà bá jùn kwonn kàng ma ku, jir kai bàna big ri dìg kyann buju á jànnwá ni.
21 Ayúnn zyun ku wìr kà sig jà kùrwá, n shi sig, mi ri dang jír ma mpìrká bi sig á byarwá ni.
22 Sai mpìrká ri dài swam ku. Big rag, “Kai! Wàníng í mpìr ri dang fíg nì jír-à níng bàna, í Shìdun ri dáng nì.”
23 A byar-à hi wùn aswam Shìdun mà wai dab ta wann Hirudus á jìnn ni, jir kai bàna Hirudus wib fig Shìdun bàna. Afirká zwam gban rìg ku.
24 I byar-à hi jir Shìdun swàb kà yag rag mà pyànn á byar mpìrká nìnànn nímá.
25 Barnabas ma Shawulu sa kinn rìg swàmbá zyun-à mpìrká á Antakiya ri zìm abig sa mà Urushalima, í wà big kàng bi á Antakiya. Big bi kwonn ma Yohanna Markus.