3
1 Wà má àdòníng, mpìr Yahudawaká kab síg nì mpìrká zyun-à yì fig jir Shìdun bàna níng rà? Jur kyag shi sig ma yìr rà?
2 Jur kyag shi sig ma yìr wàni. Jir Shìdun zu bi jag sig á vù mpìr Yahudawaká ni.
3 Wà mpìrká káhi ma bir fig pìkyinnbá bàna, í kai má sá nì rà? Jirà big bir fig pìkyinnbá bàna níng má kan dim wà Shìdun má sa bu-à ku gib ya sig yi nu níng rà?
4 Má kan dim fig Shìdun bàna kó títi nímá. Shìdun í mpìr gwangga, kó barà mpìr jíkwìnn bidìm pár í mpìr agim ǹsáng níng. Jir Shìdun dang rag,
“Wà Shìdun ma dang jír,
mpìrká má myàng bu-à ku dang sig níng í àjai.
Walako mpìr-à má wà kwonn Shìdun hár má dang tir ku jír.”
5 Wà bu-à bibaiká yi ri sa níng, má tàg byann hing barà Shìdun sàn sig áni, yá dang í kai rà? Wà Shìdun ma sìnn kà hing yi á shwìn jir bu pyìrká buyí, yá dang rag bu-à ku sa sig níng bai rà? (Bu-à mì ri dang níng, í barà mpìr jíkwìnn ri dang áni.)
6 Shìdun nìm má mpìr ǹsàn bàna, ku nìm má wà sar fig kwonn dunyaru bàna.
7 Mpìr zyun má bib shinnwá rag, wà ma í jir ǹsángká bumí, í bu-à sa gwangga Shìdun bi sig á yiyar-à ni ma àsànwá, bu-à sa big ri wà mì kwonn á shinn bu pyìrká bumí í jir kai rà?
8 Wà má àdòníng, yá kà má sa íri bu-à bibai, jirà bu ǹsàn aku bi rà? Mpìrká káhi ri swau mì rag, mì ri tàg mpìrká bu káníng. Shìdun má wà kwonn mpìr káníng.
Mpìr Gwangga Bàna
9 Yi mpìr Yahudawaká yi sàn kab síg nì mpìrká zyun-à í Yahudawaká bàna níng rà? Yi kab fig big bàna kó títi nímá, jir kai bàna yi mpìr Yahudawaká ma ká zyun-à yì fig jir Shìdun bàna, yi bidìm pár yi shi sig áyau bu pyìr, àràg barà ǹ dang sig níng.
10 Big ba sig á jir Shìdun rag,
“Mpìr gwangga bàna, kó ńzyun.
11 Walai mpìr-à shi sig ma yar,
walai mpìr-à ri yàn kyann gbìb Shìdun, kó mpìr ńzyun bàna.
12 Big bidìm pár, big fim rìghing gbìb Shìdun, n sa rìghing bu-à bibai.
Walai mpìr-à ri sa bu ǹsàn kó ńzyun.
13 Anam jírbá bai, big ri gim ǹsáng,
jír-à ma zu á nubá ni shi àràg í kyànn bushùwí ri zu bí nì.
14 Jírbá bidìm pár mònn sig íri shì.
15 Big í mpìrká ri gban ki.
16 Byar-à ba yag bidìm pár, sái ba sa bai hing bu, hár sai pìkyinn mpìr ma bai hing.
17 Big ri sa fig bu-à má sa tag pìkyinn bàna.
18 Big ri shàr fig Shìdun á bu-à big ri sa bàna.”
19 Tàma-à níng yi yì hing bu-à doka ma dang bidìm pár, ri dang ma mpìrká zyun-à ri bàg á kwíbwá ni, jirà aku kìm rìg ǹsáng mpìr jíkwìnn. Shìdun má wà mpìrká á dunyaru bidìm pár kwonn.
20 Doka ri sìnn kàng fig mpìr aku shi mpìr sìsàn á pyànn Shìdun ni bàna. Bu-à doka ri sa bàna, ku ri tìya mpìrká abig yì rag big ri sa bu-à bibai.
Barà Shìdun Má Sìnn Yi Ayi Shi Mpìr Nsàn á Pyànnwá Ni
21 Tàma-à níng Shìdun tìya hing yi gbìb zyun barà mpìr má shi mpìr ǹsàn á pyànnwá ni. Gbìb-à níng hi, bu-à du ku ma doka bàna. Doka-à wà Musa ba sig, ma bu-à mpìrká ri dang kyann jir Shìdun ba sig níng, big dang hing jír á shinn gbìb-à níng hi ni.
22 Shìdun í àsàin-à ri sìnn kà mpìr aku shi ǹsàn á pyànnwá ni á jir shinn pìkyinn bir á byar Yesu Kristi. Shìdun ri sa àdòníng ma mpìrká zyun-à bir sig pìkyinnbá á byar Kristi, jir kai bàna Shìdun ri zìm zu fig íri mpìr ńzyun bàna.
23 Mpìrká bidìm pár sa hing bu pyìr, n kinn fig bu zyun á pyànn Shìdun ni bàna.
24 A jir shinn bu ǹsàn-à Shìdun sa ya sig mpìr átai níng, í bu-à sa mpìrká shi sig mpìr ǹsàn á pyànn Shìdun, jir shinn Yesu Kristi zyun-à pinn zu sig big.
25 Shìdun ya sig yi Yesu Kristi aku wu á tàm bín-à ni, jir shinn bu pyìrká buyí. Mpìr-à ma bir hing pìkyinnwá á byar Yesu Kristi, bu pyìrká zyun-à ku sa sig níng, Shìdun má yafa ya ku. Shìdun sa sig àdòníng jirà aku tìya mpìrká rag ku í mpìr kyìkyàr. Wàrì níng, ku ri tib pìkyinnwá mi ri pù fig nuwá á bu pyìrká zyun-à mpìrká ri sa bàna,
26 ama tàma-à níng ku ri fim fig big abig sa bu pyìr bàna, jirà aku tìya big rag ku í mpìr kyìkyàr. Shìdun í mpìr kyìkyàr, mpìr-à ma bir hing pìkyinnwá á byar Yesu Kristi ni, Shìdun má sìnn ku aku shi mpìr kyìkyàr á pyànnwá ni.
27 Wà má àdòníng, yi bàna ma pyù barà yá gbar dù shinn á shinn doka. Yi bàna ma pyù, jir kai bàna Shìdun má pinn zu fig yi jir doka yi ri bàg níng bàna, kwá pinn zu yi jir pìkyinn-à yi ri bir á byar Yesu.
28 Yi yì hing Shìdun má sìnn kàng mpìr aku shi ǹsàn á pyànnwá ni, wà mpìr-à hi ma bir hing pìkyinnwá á byar Yesu Kristi, ná sai wà kwa wib hing bu-à doka ma dang.
29 Shìdun shi fig íri bu mpìr Yahudawaká bàna. Ku shi sig í bu mpìrká zyun-à í Yahudawaká bàna níng tìnn.
30 Shìdun í ńzyun, kwá zìg zu mpìr Yahudawaká, ká ma bir hing pìkyinnbá á byarwá ni. Kwá zìg zu mpìrká zyun-à í Yahudawaká bàna, ká ma bir hing pìkyinnbá á byarwá ni tìnn.
31 Jirà yi dang rag, ya bir hing pìkyinnyí á byar Yesu Kristi, Shìdun má sìnn kà yi mpìr ǹsàn á pyànnwá ni níng, í bu-à sa yá tafinn rìg rag doka wib rà? Ai bàna, yá pànn samyib ku ǹsàn nímá.