3
Jír-à Yesu Kristi Dinya Sig Yohanna Rag a Wàníng Ba Dwim Yag Mpìrká Mà Sardisu
1 Yesu dinya mì rag ń ba dwim yag wùn aswam Shìdun áyau mpìrká ri bàg Yesu mà Sardisu, ń ba jírwá rag,
“Jír-à níng í jírmí, mì mpìr-à pànn sig Awun sùmpyànn bu Shìdun kwonn ma asuswir sùmpyànn. N yì hing bu-à wù ri sa. A dang rag à shi sig ma yonki, àsái à yì fig bàna à wu rìghing.
2 A fim zir, ma á sar gbam swàb kà á pìkyinn bir títi-à à shi sig ma kàhi, jir kai bàna ri nyàan zu. N myàng fig bu-à wù ri sa wà sàn sig á pyànn Shìdunmí ni bàna.
3 Jir wàníng, á kyab pànn bu-à big tàg sig wù ma bu-à à fig sig, ma á wib, á fim bu bibai sa. Wà wa fim zir fig bàna, má bi á byarwú ni àràg ajwú, wá yì fig sai-à má bi bàna.
4 Ning mpìrká á finn swann Sardisu, áyauná ni mpìrká káhi sa bai fig shinnbá ma buká bibai á jànn-à ni bàna. Bá shi ma mì, bá wìr jà mìmìg, jir kai bàna big fòr hing barà bá shi àdòníng.
5 Mpìrká ma gbam kan hing Shaitan, bá wìr jà mìmìg. Má tùn bab fig zìnnbá mà tarkada yonki bàna. Má dinya Tamí ma yann aswamká buwá mà wai rag, káníng í mpìrká bumí.
6 “Mpìr-à ma shi sig ma sung-à kwá fig jír, aku fig bu-à Awun Shìdun ri dinya iklisiyaká.”
Jír-à Yesu Kristi Dinya Sig Yohanna Rag a Wàníng Ba Dwim Yag Mpìrká Mà Filadalfiya
7 Yesu dinya mì rag ń ba dwim yag wùn aswam Shìdun áyau mpìrká ri bàg ku mà Filadalfiya, ń ba jírwá rag,
“Jír-à níng í jírmí, mì zyun-à shi sig kyìkyàr, mì ri sa bu á gbìb àjai, mì àsàin-à pànn sig kíi bu nu nkyun byar-à Shìdun ri na kùrwá, mì í àsàin-à ma pù hing nu nkyun-à, mpìr má kìg sar fig bàna, ma kìg hing, mpìr má pù sar fig bàna tìnn.
8 N yì hing swàmwú. N yì hing rag à shi sig ma gbam títi, ama bidìm pár à bàg hing bu tàgmí, à pànn hing gbìbmí ma pìkyinn ńzyun. N pù ya sig wù nu nkyun wà zyun-à mpìr má kìg sar fig bàna.
9 To, á myàng, má sa mpìrká zyun-à ri dang rag big í mpìr Yahudawaká jirà abig tàg rag big í bu Shìdun, ama big í bu Shaitan níng, bá bìnn kir wann á pyànnwú ni. Big bidìm pár bá yì rag mì ri zìm wù.
10 To, barà à wib jírmí wà zyun-à ǹ dinya sig wù rag á sa muyar níng, sai-à shwìn-à má bi á shinn mpìrká á dunyaru má màg màg fig mpìrká níng, ma bi hing, mì má, má sìnn wù ítau.
11 Mì ri bi tàma tàma-à níng. A pànn samyib bu-à à shi sig ma kàhi, jirà kada mpìr zyun aku tonn zu wù á gbìb ǹsàn, ma àjirà kada á dìg bu-à Shìdun ri zìm aku ya wù níng bàna.
12 Mpìr-à ma gbam kan hing Shaitan, má sìnn kà ku kwá shi kyann mà byar Shìdun. Kwá fim fig byar Shìdun bàna. Má ba zìnn Shìdunmí á dìrwá ni, má ba zìnn finn swann ùwài bu Shìdunmí á dìrwá ni wà zyun-à í Urushalima àpyú wà zyun-à má wann bi mà byar Shìdunmí ni mà wai. Má ba zìnn àpyúmí á dìrwá ni tìnn.
13 “Mpìr-à ma shi sig ma sung-à kwá fig jír, aku fig bu-à Awun Shìdun ri dinya iklisiyaká.”
Jír-à Yesu Kristi Dinya Sig Yohanna Rag a Wàníng Ba Dwim Yag Mpìrká Mà Lawudikiya
14 Yesu dinya mì Yohanna rag ń ba dwim yag wùn aswam Shìdun áyau mpìrká ri bàg ku mà Lawudikiya, ń ba jírwá rag,
“Jír-à níng í jir àjai, í jírmí mì zyun-à zìnnmí í Aku Shi Adòníng, mì zyun-à shi sig ma gwangga, buká Shìdun màm sig bidìm pár, yi ma ku màm sig zyun.
15 N yì hing swàmwú. A zìm fig mì bàna, à ngàng fig mì bàna tìnn. Mì ri zìm a wù nìm ngàng mì, kó a wù nìm zìm mì.
16 To, ama barà à shi tafinn sig átai n ngàng fíg mì bàna n zìm fíg mì bàna níng, má ngàng wù àràg barà mpìr ri tu tafinn bu.
17 Wù ri dang rag wù í mpìr-à yì sig gbìb Shìdun wàni, à dìg sig kó kai bidìm pár, ama à yì fig wà á pyànn Shìdun ni, wù í mpìr ashi níng bàna. Wù í mpìr ashi, wù í àfau, wù ri kyann mìr áyonn.
18 Mì ri wà shang ya wù jír rag, á wann zinariya á byarmí ni wà kyìkyàr nímá, jirà á shi mpìr ashi bàna. A wann jà mìmìg ma á wìr dim rìg mìr àyonnwú ma kàhi. A wann gantí ma á wìr kà á zuwú ni jirà á myàng.
19 Mpìrká zyun-à mì ri zìm big, mì ri yan ta big, mì ri wab tag big. Jir wàníng á sa àtùtwài barà wá shi ǹsàn má fim bu-à bibai sa.
20 N sar sig á nu nkyun-à ni mì ri kwìb, mpìr-à ma fig hing nài jírmí, ma pù hing nkyun-à, má kà yag mà byarwá ni, má ji buju ma ku, kwá ji buju ma mì tìnn.
21 Mpìr-à ma gbam kan hing Shaitan, má ya ku gbam-à kwá shi á byar-à ǹ na sig kùrmí, àràg barà n gbam kan Shaitan, tàma-à níng ǹ shi sig á byar Tamí ni byar-à ku na sig kùrwá.
22 “Mpìr-à ma shi sig ma sung-à kwá fig jír, aku fig bu-à Awun Shìdun ri dinya iklisiyaká.”