5
Yohanna Myàng Wùn Adùn Ma Tarkada-à Big Ri Pìpìnn
1 N myàng tarkada-à big ri pìpìnn níng, mpìr-à shi sig á bushu kùr-à ni níng pànn sig tarkada-à hi á vìm nuwá ni. Tarkada-à hi big ba sig bu áni finn-à ma kwíb-à bidìm pár, big nà bàg sig nu-à byar sùmpyànn.
2 I byar-à ǹ myàng wùn aswam ùwài nímá. Ku dang jír ma gbam n rag, “Mpìr-à fòr sig barà kwá gbar pù dù buká big nà bàg sig níng, má pù tarkada-à hi má jangga í ni rà?”
3 Ama walai mpìr-à mà wai kó mpìr-à á jìnn ni, kó mpìr-à wu sig, wà fòr sig barà kwá pù tarkada-à níng má jangga.
4 I byar-à ǹ kig nàikitáu wàni, jir kai bàna mpìr-à fòr sig barà kwá pù tarkada-à níng má jangga níng bàna.
5 I byar-à shun àgbam zyun áyau àgbamká ni dinya mì rag, “A kig bàna, á myàng. Wiyir zyun-à zu sig á swai Yahuda ni, wà í wùn ada Dawuda níng, ku gbam kan rìghing Shaitan. Ku fòr hing barà kwá zìg dù rìg bu-à big nà bàg sig níng, má pù tarkada-à hi.”
6 I byar-à ǹ myàng Wùn Adùn sar sig mà byar bushu kùr-à ni. Bu àkunn yina káníng kwonn ma shun àgbamká sar kàng kwìb sig ku áni. Wùn Adùn-à hi mì ri myàng í wà zyun-à big gban sig níng. Yurwá sùmpyànn, zuwá sùmpyànn, wà í Awun sùmpyànn bu Shìdun wà ku swam bi sig á dunyaru kó áni bidìm pár.
7 Wùn Adùn-à hi yag n zìg rìg tarkada-à shi sig á vìm nu mpìr-à shi sig á bushu kùr-à ni níng.
8 Barà ku yag zìg rìg tarkada-à hi àdòníng, í byar-à bu àkunn yina káníng kwonn ma shun àgbam dìzyun agban yina káníng bìnn kir wann á pyànnwá ni. Big bidìm pár big shi sig ma garya kwonn ma tasa zinariya, tulare mònn sig áni. Tulare-à hi í avig-à mpìrká ri vig Shìdun níng.
9 Big dài jonn àpyú n rag,
“A fòr hing barà wá zìg tarkada-à níng,
má pù dù rìg bu-à big nà dim sig á nu-à ni.
Big rì gban rìghing wù, jir kiwú à wu sig níng,
à wann sig mpìrká ma àsàwú n zìg bi big á byar Shìdun,
kó swai mpìr-à wà áni, kó nu jír-à wà áni, kó jànn-à wà áni.
10 A sìnn big abig shi kùr, abig shi mpìr atwìb swànn bu big,
ma abig sa ya Shìdun swàm, ma abig na kùr á shinn mpìrká á dunyaru.”
11 I byar-à ǹ myàng jakàng, ǹ fig nài jir yann aswamká bu Shìdun mà wai nìnànn nímá, big sar kàng kwìb sig bushu kùr-à hi áni. Big sar kàng kwìb sig bu àkunn yinaká shi sig ma yonki níng áni, ma shun àgbamká.
12 Big bidìm pár, big ri dài jonn nài ngbam nímá, big rag,
“Adùn-à big rì gban sig níng, ku shi sig ma gbam,
ku í mpìr-à shi sig ma kó kai, ku shi sig ma yar, ku shi sig ma gbam dìr,
ku fòr hing barà mpìrká má wib ku, má sìnn ku mpìr ùwài, má swam yan ku.”
13 I byar-à ǹ fig buká mà wai, ma buká á jìnn ni, ma buká á mìr jànn-à ni mà jìnn, ma buká shi sig mà zàpìr-à ni bidìm pár, big ri dài jonn, big rag,
“Mpìr-à shi sig á bushu kùr-à ni, ma Adùn-à níng,
abig shi àsàinká mpìrká má swam yan, má wib big, má sìnn big mpìr ùwài,
má sìnn big rag big shi sig ma gbam, hár kinn kinn.”
14 Bu yinaká shi sig ma yonki níng, big zìm n rag, “Aku shi àdòníng.” Shun àgbam káníng bìnn kir wann á jìnn ni n wib ku.