3
Buká Má Sa Ayúnn-à Wà Kinn Shinn
1 Sàn sig á yì buká má sa wà àyúnn-à wà kinn shinn ma nyàan fòr. Mpìrká má wa shwìn wàni.
2 Kó ni má zìm íri shinnwá, bá shi mpìr sunu bài, bá gbar àshí, bá gbar dù shinn, bá swau shí, bá wib fig tabá ma nàbá bàna, bá sa fig godiya bàna, bá wib fig Shìdun bàna.
3 Bá shi fig shu pìkyinn ajun bàna, bá myàng fig ashi mpìr bàna, bá zìnn swau mpìr, bá pànn fig shinn bàna, bá shi mpìrká ri dù pìkyinn kíni, bá ngàng bu ǹsàn.
4 Bá shi mpìrká ri ji amana, bá rag bu-à du big ma mpìr bàna, bá yan shinnbá, wà barà big nìm má zìm Shìdun níng, bá zìm sòr àjwár fig.
5 Bá dang rag big ri bàg Kristi àràg barà yi ri bàg níng, ama bá ngàng gbamwá. Kada á shi kwonn ma írì mpìr káníng bàna.
6 Káhi áyaubá ni ri kà yag mà lu lu, mi ri tonn gban uwàká yì fig bu bàna níng. Uwà káníng big ri bai kyinn á jir bu pyìrbá big ri sa. Big ri pànn fig shinnbá bàna, mi ri sa sunu bu-à bibai kim kim.
7 Uwà káníng ri zìm abig yì jir Shìdun, ama big yì byann fig gbìb àjai bàna.
8 Aràg barà Yanisu ma Yambarisu rì ngàng sig jir Musa níng, í barà wunù káníng ri ngàng jir àjai áni tìnn. Kyinnbá bai, big ngàng gbìb àjai.
9 Ama bá yag fig mà pyànn bàna, jir kai bàna mpìrká má yì rìg wà kyinnbá bai àràg bu Yanisu ma Yambarisu.
Bulus Dinya Timoti Bu-à Wàníng Má Sa
10 Ama wù Timoti, à bàg hing bu tàgmí ma shumí ma barà mì ri zìm á kyinnmí ni ń sa jwar pìkyinn Kristi. A myàng hing pìkyinn birmí, ma barà mì ri tib pìkyinn, ma barà mì ri zìm mpìrká, ma barà ǹ bà sig kyinn.
11 A myàng hing barà mpìrká ya mì shwìn, barà ǹ wa sig shwìn áni. A yì hing buká sa sig mì mà Antakiya bidìm pár, ma wà mà Ikoniya, ma wà mà Listra, ǹ bà hing kyinn á shwìnká mpìrká ya sig mì bidìm pár. Ama Shinn Luyí pinn zu rìg mì á shwìnká níng ni bidìm pár.
12 Mpìr-à ma ri bàg Yesu, ma ri zìm aku shi shu ǹsàn àràg barà Yesu Kristi ri zìm, bá ya ku shwìn.
13 Ama mpìr bibai ma mpìrká ri tonn gban mpìr níng, bá sa swàb kà yag mà pyànn. Bá tonn zu rìg mpìrká á gbìb Shìdun, Shaitan má tonn gban big tìnn.
14 Ama buwú á bàg kyann gbìb àjai wà big tàg sig wù níng, á sar gbam áni. A yì rìghing shu mpìrká tàg sig wù.
15 Tun sai-à wù í wùnshái à yì hing jir Shìdun-à big ba sig á tarkada ni, wà ri tìya wù yar-à wá wìm zu á jir pìkyinnwú à bir sig á byar Yesu Kristi.
16 Buká big ba sig á jir Shìdun ni bidìm pár í Awun Shìdun tàg síg nì abig ba àdòníng. Jírká hi ri tàg mpìrká gbìb àjai, ri twìb mpìrká byur, ri tìya mpìrká bu bibaiká big ri sa, mi ri tàg mpìrká barà bá shi shu ǹsàn,
17 àjirà mpìr-à ma ri wib Shìdun aku yì byann gbìb Shìdun, ma àjirà aku shi shu barà kwá sa swàm ǹsàn kó wà áni bidìm pár.