ଏବ୍ରୀୟମାନଙ୍କ ନିକଟକୁ ପତ୍ର
ଏବ୍ରିମରଞ୍ଜି ଆସନ୍ ସିଟିନ୍
ସନେକୁଲନ୍
ଅଙ୍ଗା ମନ୍ରାଜି କ୍ରିସ୍ଟାନୁନ୍ ଆମ୍ରାୟ୍ଲଞ୍ଜି ଆସନ୍ ଆନ୍ନାମରଞ୍ଜି ଆନିଞ୍ଜିଆଡଙ୍ ଡଣ୍ଡାୟେଞ୍ଜି, ଆନିଞ୍ଜି ତି ଆ ଡନଣ୍ଡାୟ୍ ସଏଲେ ଅଃର୍ରପ୍ତିଲଜି । ତିଆସନ୍ କେନ୍ ଡନଣ୍ଡାୟନ୍ ଆଞ୍ରାଙେଞ୍ଜି ଆ ମନ୍ରାଜିଆଡଙ୍ ଅନବ୍ଉୟୁବନ୍ ଆସନ୍ କେନ୍ ଆ ସିଟି ଅନିଡନ୍ ଡେଏନ୍ ୧୨:୨ । ଜିସୁନ୍ ମା ଆଜାଡ଼ି ଇସ୍ୱରନ୍, ତିଆସନ୍ ଡର୍ନେଲୋଙନ୍ ରବ୍ଡୋଲନ୍ ଗବ୍ରିଲନ୍ ଡକୋନାବା ଗାମ୍ଲେ ଇଡଲ୍ମରନ୍ ପଡ଼େନେମରଞ୍ଜିଆଡଙ୍ ବର୍ତଜି ।
କେନ୍ ଆ ସିଟିଲୋଙ୍ ୟାଗି ବର୍ନେନ୍ ଆଇଡିଡ୍ ।
ପୁର୍ବାନ୍ ସିଲଡ୍ ଡ ପୁର୍ବାଃତେ ଜାୟ୍ ଜିସୁନ୍ ଇସ୍ୱରନ୍ ଆ ଡାଙ୍ଗଡ଼ାଅନ୍ । ଆନିନ୍ ଆପେୟ୍ ଇସ୍ୱରନ୍ଆଡଙ୍ ଆଙ୍ଗିୟ୍ ଅଃନ୍ନାଲ୍ଲେଲୋ । ଜିସୁନ୍ ଇସ୍ୱରନ୍ ଆ ଡାଙ୍ଗଡ଼ାଅନ୍ ତିଆସନ୍ ପୁର୍ବାଃତେ ବର୍ନେମରଞ୍ଜି, ପାଙ୍ଲଙ୍ବର୍ମରଞ୍ଜି ଡ ମୋସାନ୍ ସିଲଡ୍ ନିୟ୍ ଆନିନ୍ ସୋଡ଼ା ।
ପୁର୍ବାନ୍ ଆ ରାଓଡ଼ାଜି ସିଲଡ୍ ଆନିନ୍ ସୋଡ଼ା ଆରି ଆନିନ୍ ଆଏଡ଼ର୍ ଡକୋତନେ । ଇସ୍ୱରନ୍ ଜିସୁନ୍ଆଡଙ୍ ରାଓଡ଼ା ଅମ୍ମେଲେ ତବ୍ନଙେନ୍ ।
ମନ୍ରାନ୍ ଜିସୁନ୍ ଆମଙ୍ ଡର୍ରନ୍ ଡେନ୍ ଆନିନ୍ ଇର୍ସେନ୍, ବନ୍ତଙନ୍ ଡ ରନବୁନ୍ ସିଲଡ୍ ଅଡ଼ୁର୍ତେ । ସରେବାସିଙନ୍ ଆ ରାଓଡ଼ାଜି ଅନମଙନ୍ ତିୟ୍ଲବୋ ଡେନ୍ ଅନୁରନ୍ ଞାଙ୍ତବୋ ଗାମ୍ଲେ ସତ୍ତର୍ ବର୍ନେନ୍ ତୁମ୍ ବର୍ରଞ୍ଜି । ବନ୍ଡ ଜିସୁନ୍ ମା ମନ୍ରାଞ୍ଜି ଆସନ୍ ଅନୁରନ୍ ଆ ତଙର୍ ଅବ୍ତୁୟ୍ଲଙ୍ଲନ୍ । ଇସ୍ରାଏଲନ୍ ଆ ପୁର୍ବାବର୍ଲୋଙ୍ ସିଲଡ୍ ଲାଙ୍ଲେଡ୍ ପୁର୍ବାନ୍ ଆ ମନ୍ରାଜି ଆ ବର୍ନେ ବର୍ରନ୍ ଇଡଲ୍ମରନ୍ ପଡ଼େନେମରଞ୍ଜିଆଡଙ୍ ଡର୍ନେଲୋଙନ୍ ରବ୍ଡୋଲନ୍ ଗବ୍ରିଲନ୍ ଡକୋନାବା ଗାମ୍ଲେ ବର୍ତଜି ୧୩:୨୪ । ଆରି ଜିସୁ କ୍ରିସ୍ଟନ୍ଆଡଙ୍ ସେଙ୍ଲେ, ଅଡ଼୍କୋ ଡୁକନ୍, ସନିନ୍ତାନ୍, ଡନଣ୍ଡାୟନ୍ ସଏଲେ ଆତନିକ୍କି ଜାୟ୍ ଜିସୁ କ୍ରିସ୍ଟନ୍ ଆମଙ୍ ଡର୍ନେନ୍ ବାତ୍ତେ ଗବ୍ରିଲନ୍ ଡକୋନେନ୍ ଆସନ୍ ଇଡଲ୍ମରନ୍ ପଡ଼େନେମରଞ୍ଜିଆଡଙ୍ ବର୍ତଜି ।
ବଇନ୍ ଆ ପନାଲ୍ଲାଙ୍
୧. ଜିସୁ କ୍ରିସ୍ଟନ୍ ଇସ୍ୱରନ୍ ଆ ପୁର୍ବାଃତେ ବର୍ନେମର୍ ଆରି ଆନିନ୍ ପାଙ୍ଲଙ୍ବର୍ମରଞ୍ଜି ସିଲଡ୍ ନିୟ୍ ସୋଡ଼ା । ୧:୧–୪:୧୩
୨. ଜିରୁସାଲମନ୍ ସେବା କାବ୍ବାଡ଼ାନ୍ ଆର୍ଲୁମ୍ତେଞ୍ଜି ଆ ମନ୍ରାଜି ସିଲଡ୍ ନିୟ୍ ଜିସୁନ୍ ସୋଡ଼ା । ୪:୧୪–୭:୨୮
୩. ମୋସାନ୍ ଆ ବନାଁୟ୍ବର୍ ସିଲଡ୍ ଜିସୁନ୍ ଆ କାବ୍ବାଡ଼ା ସୋଡ଼ା । ୮:୧–୧୦:୩୧
୪. ଜିସୁନ୍ ମା ଅଡ଼୍କୋନ୍ ସିଲଡ୍ ସୋଡ଼ା । ୧୦:୩୨–୧୩:୧୭
୫. ଇଡଲ୍ମରନ୍ ଲାଙ୍ଲେଡ୍ ଅନୁୟୁବ୍ ବର୍ନେଞ୍ଜି ବର୍ତନେ । ୧୩:୧୮-୨୫
୧
ଆ ଡାଙ୍ଗଡ଼ାଅନନ୍ ଅମ୍ମେଲେ ଇସ୍ୱରନ୍ ଆ ବର୍ନେ
୧ ଆମ୍ମୁଙ୍, ଇସ୍ୱରନ୍ ଆନ୍ନା ଆନ୍ନା ଆ ବନେଡ଼ାଇଂ ଆରି ତରଙ୍ଆନ୍ନାଡାଗୋ ଅମ୍ମେଲେ ପୁର୍ବାଃତେ ବର୍ନେମରଞ୍ଜି ଆ ତଅଡ୍ଗଡ୍ ପୁର୍ବା ଜୋଜୋଲେଞ୍ଜି ବୟନ୍ କଡାଡ଼ିଲନ୍ ।
୨ ବନ୍ଡ କେନ୍ ଆନଞିଡ୍ ଡିନ୍ନା ଇଙନ୍ ଆନିନ୍ ଆ ଡାଙ୍ଗଡ଼ାଅନନ୍ ଅମ୍ମେଲେ ଇନ୍ଲେନ୍ ବୟନ୍ କଡାଡ଼ିଲନ୍; ଇସ୍ୱରନ୍ ଆନିନ୍ଆଡଙ୍ ସନୋଡ଼ାଗଡନ୍ ତିୟେନ୍ ଆରି ଆନିନ୍ ବାତ୍ତେ ଅଡ଼୍କୋ ପୁର୍ତିନ୍ ଗବ୍ଡେଲେନ୍ ।
୩ ଡାଙ୍ଗଡ଼ାଅନନ୍ ଆମଙ୍ ଇସ୍ୱରନ୍ ଆ ଗନୁଗୁ ପନେମେଙ୍ ଆ ସନାଆର୍ ଆରି ଇସ୍ୱରନ୍ ଆ ଞନଣ୍ଡ୍ରମ୍ ଆ ଗୁନ ଅନ୍ତମ୍, ଆନିନ୍ ଆ ବୋର୍ସା ବର୍ନେନ୍ ବାତ୍ତେ ଅଡ଼୍କୋନ୍ ପୁର୍ତିନ୍ ଞମେନ୍ । ଆରି ଇର୍ସେନ୍ କେମାଡାଲେ ତୋଣ୍ଡୋ ରୁଆଙନ୍ ଇସ୍ୱରନ୍ ଆର୍ଜଡ଼ୋମ୍ଗଡ୍ ତଙ୍କୁମେନ୍ ।
ଇସ୍ୱରନ୍ ଆ ଡାଙ୍ଗଡ଼ାଅନ୍ ଅଡ଼୍କୋନ୍ ସିଲଡ୍ ସୋଡ଼ା
୪ ଆନିନ୍ ଏଙ୍ଗାଲେ ରୁଆଙ୍ ପାଙ୍ଲଙ୍ବର୍ମରଞ୍ଜି ସିଲଡ୍ ସୋଡ଼ା, ଆଞୁମନ୍ ନିୟ୍ ଏତ୍ତେଲେମା ଆଞୁମଞ୍ଜି ସିଲଡ୍ ସୋଡ଼ା ।
୫ ଇନିଆସନ୍ଗାମେଣ୍ଡେନ୍ ଆଙ୍ଗିୟ୍ଜା ଇସ୍ୱରନ୍ ଅନ୍ନିଙ୍ ଆ ପାଙ୍ଲଙ୍ବର୍ମରନ୍ଆଡଙ୍ ଏନ୍ନେଲେ ଅଃବ୍ବର୍ରଜି;
“ଆମନ୍ ଡାଙ୍ଗଡ଼ାଅନ୍ଞେନ୍;
ଲଙେ ସିଲଡ୍ ଞେନ୍ ଆପେୟ୍ନମ୍ ଡେଲିଁୟ୍ ।”
ଅଡ଼େ ଇସ୍ୱରନ୍ ଅନ୍ନିଙ୍ ଆ ପାଙ୍ଲଙ୍ବର୍ମର୍ ଆ ବର୍ନେ ଏନ୍ନେଲେ ଅଃବ୍ବର୍ରନେ,
“ଞେନ୍ ଆପେୟନ୍,
ଆରି ଆନିନ୍ ଡାଙ୍ଗଡ଼ାଅନ୍ଞେନ୍ ।”
୬ ବନ୍ଡ ଇସ୍ୱରନ୍ ଆମ୍ମୁଙ୍ ଆ ଡାଙ୍ଗଡ଼ାଅନନ୍ଆଡଙ୍ କେନ୍ ପୁର୍ତିନ୍ ଆରାପ୍ପାୟ୍ଲାଞନ୍ ଆଡିଡ୍ କେନ୍ ଆ ବର୍ନେ ବର୍ରନେ,
“ଇସ୍ୱରନ୍ ଆ ପାଙ୍ଲଙ୍ବର୍ମରଞ୍ଜି ଆନିନ୍ଆଡଙ୍ ସେଙ୍କେତଜି ।”
୭ ରୁଆଙ୍ ପାଙ୍ଲଙ୍ବର୍ମରଞ୍ଜି ଆ ବର୍ନେ ଇସ୍ୱରନ୍ କେନ୍ ଆ ବର୍ନେ ବର୍ରନେ;
“ଇସ୍ୱରନ୍ ଆ ପାଙ୍ଲଙ୍ବର୍ମର୍ଜି ରିଙ୍ଗେନ୍ ଅନ୍ତମ୍
ଆରି ଇସ୍ୱରନ୍ ଆ କାବ୍ବାଡ଼ାମରଞ୍ଜିଆଡଙ୍ ଆଉଲ୍ଲାଙ୍ତୋଡନ୍ ଅନ୍ତମ୍ ଏମ୍ମେଏଞ୍ଜି ।”
୮ ଆ ଡାଙ୍ଗଡ଼ାଅନନ୍ ଆ ବର୍ନେ ଆନିନ୍ ବର୍ରନେ,
“ଏ ଇସ୍ୱର, ରାଜ୍ୟନମ୍ ଆଏଡ଼ର୍ ଡକୋତନ୍,
ଆମନ୍ ଆଜାଡ଼ି ପନ୍ସୁଆତିନ୍ ବାତ୍ତେ ମନ୍ରାଞ୍ଜିଆଡଙ୍ ସାସନତଜି ।
୯ ଆମନ୍ ଡରମ୍ମମରନ୍ଆଡଙ୍ ଡୁଙ୍ୟମ୍ତେ ଆରି ଏର୍ଡରମ୍ମମରନ୍ଆଡଙ୍ ଏଡ଼ୁର୍ମଡ୍ତେ ।
ତିଆସନ୍ ଇସ୍ୱରନମ୍ ଆମନ୍ଆଡଙ୍ ସେଡାଲମ୍,
ଆରି ଗଡ଼ିନମ୍ଜି ସିଲଡ୍
ଆମନ୍ଆଡଙ୍ ଗୋଗୋୟ୍ ମାନ୍ନେଲେ ଅବ୍ସର୍ଡାଲମ୍ ।”
୧୦ ଆନିନ୍ ନିୟ୍ ଆରି ବର୍ରନେ
“ଏ ପ୍ରବୁ, ଆମ୍ମୁଙ୍ ଆମନ୍ ପୁର୍ତିନ୍ ଗବ୍ଡେଲେନ୍,
ଆରି ଆମନ୍ ଅସିନମ୍ ବାତ୍ତେ ରୁଆଙନ୍ ଗବ୍ଡେଲେନ୍ ।
୧୧ ତି ଅଡ଼୍କୋନ୍ ବଡିନ୍ନା ସତନେ, ବନ୍ଡ ଆମନ୍ ଆଏଡ଼ର୍ ଡକୋତନ୍;
ଆନିଞ୍ଜି ପାପୁର୍କାବନ୍ ଅନ୍ତମ୍ ଗୁରୁଡ୍ଡେତଜି ।
୧୨ ସିନ୍ରିନ୍ ଆର୍ରବ୍ରବ୍ତେନ୍ ଅନ୍ତମ୍ ଆମନ୍ ତି ଅଡ଼୍କୋନ୍ ରବ୍ରବ୍ଲେ ଡକ୍କୋତେ ଆରି ସିନ୍ରିନ୍ ଆବ୍ରାର୍ତବନ୍ ଅନ୍ତମ୍ ବାର୍ତନେ । ବନ୍ଡ ଆମନ୍ ଆମ୍ମୁଙ୍ମା ସିଲଡ୍ ଆଏଡେତ୍ତେନ୍ ଡକୋ ଆରି ଅଃନ୍ନଞିଡମ୍ ।”
୧୩ ଇସ୍ୱରନ୍ ଆ ପାଙ୍ଲଙ୍ବର୍ମରଞ୍ଜିଆଡଙ୍ ଆଙ୍ଗିୟ୍ ଏନ୍ନେଲେ ଅଃବ୍ବର୍ରଜି;
“ବନେରାମର୍ବେଞ୍ଜିଆଡଙ୍ ଞେନ୍
ତାଲ୍ଜଙ୍ବାବେନ୍ ଅଣ୍ଡ୍ରଙ୍ ଡକ୍କୋଆଞନ୍ ଜାୟ୍
ଅର୍ଜଡ଼ୋମ୍ଗଡ୍ଞେନ୍ ତଙ୍କୁମ୍ଲେ ଡକୋନାବା ।”
୧୪ ଏତ୍ତେଲ୍ଡେନ୍, ରୁଆଙ୍ ପାଙ୍ଲଙ୍ବର୍ମରଞ୍ଜି ଆନା ? ଆନିଞ୍ଜି ଇସ୍ୱରନ୍ ଆ କାବ୍ବାଡ଼ାମର୍ଜି ଆରି ଅନୁରନ୍ ଆଞ୍ରାଙେଞ୍ଜି ଆ ମନ୍ରାଜି ଆ ସନାକ୍କେ ଆସନ୍ ଇସ୍ୱରନ୍ ଆରାପ୍ପାୟ୍ଲାଞଞ୍ଜି ଆ ପୁରାଡ଼ାଜି ତଡ୍ ପଙ୍ ?