49
Jekopu'a mofavre naga'a asomu ke huzmante'nea naneke
1 Jekopu'a amanage huno mika ne'mofavre'amokizmi zamasmi'ne, Henkama tamagrite'ma fore hania zamofo nanekea tamasamigahuanki,
2 Jekopu mofavre naga'nimota tamagra eme atru huneta tamagesa anteta nerafa'na Israeli'na hanua nanekea antahiho.
3 Rubeniga nagonesa mofavremoka,
ese hihamu ni'afinti kasegante'nogenka
zamagaterenka mareri vahe mani'nanku, hanave kamo asaga hu'ne.
4 Hianagi timo hageno eviankna huno, nagakafina ran kagia omanegahie.
Na'ankure negafa sipare marerinka
haviza hunka mago a'ni'a avazu nehunka sipani'a eri hi'mna vu'nane.
5 Simioni'ene Livaikea kogna mani'na'e.
Bainati kazinkno zanimo'a, vahera zamazeri havizantfa hugahie.
6 Nagri knare antahi antahimo'a, tanagri antahi antahifina omanegahie.
Nagra kema anakisapina omanigahue.
Na'ankure zanarimpa ahenke'ne vahera akafrigaha'e.
Zanagra musezampi vu'ne, Bulimakao agia agruna nofi akafrina'e.
7 Tanarimpa ahe'zantera tusi huneranantoe. Na'ankure tanarimpa ahezamo'a arava ohegahie.
Tanarimpa nehena, hazenke vahe manigaha'e.
Jekopu'na nagri'pintira tanatufe atra'nena, Israeli mopafina arure arure huta manigahaze.
8 Judaga kafu kaganaza kagi erisga hugahaze.
Kagri kazamo'a ha' vahe ka'amokizmi zamanankempi megahie.
Kagri negafa ne'mofavremo'za kepri hu'za zamarena regahaze.
9 Judaga laioni anenta kna hu'nane.
Kagra nenamofoga laionimo ne'zaga aheno nenaku kva hiankna hu'nane.
Kagrikura vahe'mo'za kagoro hugahaze. Mago vahe'mo'a kvako osugahie.
10 Judaga kva vahe'mokizmi azompamo'a kagripi mevava hugahie.
Kini vahe azompamo'a agiararemofo amu'nompi me'nesigeno,
Nafa'amo'a henka Sailo kumate ehanatigahie.
Hanige'za hakare ranra kumate veamo'za agri kea erizafa hugahaze.
11 Donki anentara krepire nofiteti rentesnankeno manigahie.
Agaho donkima avesi'nesia krepi nofite'ma arentesigura antahi muhara osugahie.
Kukena'a waini timpi sese hu'ne, na'ankure ne'zamo'a amporegeno nehana huga osu'ne.
12 Agra rama'a waini tina nenegu huno tare avurgamo'a koranke hu'ne,
agra afu'mofo amirina rama'a nenegu huno, ave'mo'a efenentake hu'ne.
13 Zebuluniga hageri ankenare umanigahane.
Umani'nesanke'za vente'mo'za efre'za vu'za hugahaze.
Mopa kamofo agemo'a Saidoni kuma atupare uhanatigahie.
14 Isakaga hankave donkie,
tare fenonku'mofo amu'nompi manigsa hugahane.
15 Agrama kegeno knare manigsa kuma me'negeno,
ana kumamo knare zantfa hu'negeno,
hanave'a erigoteno eri'za eri'ne.
Ana hu'neanagi henka'a kna'ane kazokzo eri'za erigahie.
16 Daniga kva (jas) vahe tro hunka vaheka'a kegava hugahane. Mago naga Israeli kevufi manigahaze.
17 Ha' osifavemo kamofo ankenare mani'neno, hosimofo agamerumpafi amprigeno, agumpifi vu'nea ne'mo amefigati asga hurami'ne.
18 Ra Anumzamoka nahoke ahesnanegu, kavega ante'na mani'noe.
19 Gatiga kumza vahe'mo'za kahegahaze.
Hianagi rukrahe hunka, zamagumpi zamarotgo hugahane.
20 Asaga hentofa ne'za eri fore hugahane.
Rankva vahe zame'nesia ne'za, hankregahane.
21 Naftaliga, afi a' afu dia atregeno agareno viankna nehunka,
knare so'e nanekege hugahane.
22 Josefega zafa azankunamo raga renteankna hugahane,
azankunamo ti ankenare me'neno raga reno,
pagagi huno kegina refiteankna hugahane.
23 Ha' vahekamo'za atireti hanaveti'za hara hunegante'za,
kevea negahe'za, kazeri haviza hugahaze.
24 Hianagi Jekopu Anumzamo'a Josefena hankavea aminkeno azamo'a oragesigeno, kevema ahesiana hantaga osugahie.
Ana Anumzamo'a Israeli vahera sipisipi afu kegava hiankna nehuno, zamagu'vazi havegna hugahie.
25 Na'ankure Jekopu'na negafa'na Anumzamo kaza nehuno,
hihamu'ane Anumzamo asomu huneganteno,
anagamu monafinkati asomu huneganteno,
mopa agu'afinti tina hanati'nigenka asomura e'nerinanke'za,
karimpafinti'ma fore hanaza mofavre'mo'zanena asomura erigahaze.
26 Kagri negafa'na asomumo'a nagri nagehe'i asomura agatereno mevava agonagna huno mareri'ne,
ana asomumo'a, Josefega kokovite me'nenige'za, kafuhe'za kage anagamute'za kagegahaze.
27 Benzameniga afi ha' kragna (wolf) hugahane.
Nanterampi freno zaga aheno traga hiankna nehunka,
kinaga'afi refko huno erino ome'mi eme'mi hiankna hugahane.
28 Ama ana maka 12fu'a Israeli nagakino, nezmafa'a mago mago naga nofi'ma mani'naza avamente asomu kea huzmantetere hu'nea naneke.
Jekopu fri'nea naneke
29 Jekopu'a amanage huno mofavre naga'amokizmia zamasmi'ne, Nagrama fri'na vahe'ni'ane umani knanimo'a kofta nehie. Hagi nafahe'ima ase zamante'naza mopare, havegampi ome asenanteho. Hiti ne' Efroni mopama mizama se'nefi ome asenanteho.
30 Makapela havegampi Mamre kuma tvaonte Kenani mopa agu'afi, Abrahamu'ma ana mopane havegane vahe asente'zane huno Efroni'pinti'ma mizama se'nea mopafi ome asenanteho.
31 E'i anampina Abrahamune nenaro Serane ase'znante'naze. Aisakine nenaro Rebekagiznia anampi ase znante'nafi, anampinke a'ni'a Liana asente'noe.
32 Ana mopane havegane Hiti ne' mofavrefinti miza se'neane.
33 Anagema huno mofavre naga'amokizmi zamasmi vaga reteno, agiararena sipare asuteno vagare asimu atreteno frino naga'ane umani'ne.