15
Апостоләт Иерусалимән ӑктәщты вер
1 Тухԓәт, Иудея эԓты йŏхтәм ŏтәт, хӑнам йох утәԓтәсәт: «Моисей щирән ӑт эвтәсԓәты ки, нŏх пайтәсты ӑт верәтԓәты».
2 Хун пӑ нŏмәс ар щира пӑ мŏԓты кем ўра ворты вер ԓыв пиԓԓаԓән Павел пӑ Варнава хŏща тыйәс, Павела пӑ Варнавайа пӑ ԓыв кўтэԓ эԓты па тухәԓ йохәта Иерусалима мӑнты пŏтсайәт пӑ апостоләт пӑ уна уԓты икет пиԓән тӑм вер эԓты пŏтрэмәты.
3 Щиӈәԋща, пойәкщәты мŏхэтән мӑнты ԋотәм йўпийән, ԓыв Финикия пӑ Самария мŏхты мӑтсәт, па рут мир Турәм пеԓа керԓәты вер эԓты пŏтәртман, пӑ хŏԓ хӑнам йох хŏща ун амәт версәт.
4 Иерусалима йŏхәтмеԓ кемән, ԓыв пойәкщәты мŏхетән, апостоләтән пӑ ун икетән вана ўсайәт, пӑ Павел пӑ Варнава такан иса хŏԓыйэ йастәсԓән, Турәм мўй ԓын пиԓанән верәс пӑ хŏты па рут йоха эвәԓты вер ов пел пўншәс.
5 Щиӈәԋща тухәԓ фарисейәт эԓты эвԓәм мŏхет ўшмащты питсәт пӑ пŏтәртсәт, па рут йох эвтәптәты пӑ Моисей закон нŏх катәԓты партты мосәԓ.
6 Апостоләт пӑ ун икет щи вер ватты урәӈән ӑктәщсәт.
7 Хув нумәсмеԓ йўпийән Петра, нŏх ԓойман, ԓывиԓаԓа йастәс: «Хӑнам йох! Нын уйәтԓәты, Турәм оԓәӈ хӑтԓәт эԓты мўӈ эԓтэв мӑнэм пирысԓы, ма ўӈԓэм эԓты па рут мир Йӑм Айкеԓ йасәӈ ат хуԓсәт пӑ ат эвәԓсәт;
8 пӑ Сӑм Уйәтты Турәм ԓывиԓаԓа ныты пос мӑс, ԓывиԓаԓа Йэмәӈ Ԓыԓ мўӈ итэва мойԓәс.
9 Щӑԓта мўӈ пӑ ԓыв кўтэԓа нэмәԓтты кӑт сыра вантәсты щир ӑт пŏнәс, эвәԓты верән ԓыв сӑмԓаԓ сыстапсәԓы.
10 Мўйа пӑ нын ин Турәм хўщԓәԓән, утәԓтәты хŏйатәт сапԓа ԓавәрт пŏнман, мўй ӑнта мўӈ ащиԓув, ӑнта мўӈ туты ӑт верәтсэв?
11 Туп мўӈ эвәԓԓув, Турәм Куща Иисус Христос мӑты йӑмән, ԓыв итэԓән, нŏх пайәтԓайув».
12 Щи йўпийән ӑктәщәм мŏхет хŏԓ мӑшйайа йисәт пӑ Варнава пӑ Павел хуԓәтсәт. Ԓын пŏтәртсәтән, мўй хŏрпи йэмәӈ посәт пӑ вантыԓԓаӈәԓ верәт Турәм ԓын мŏхтан па рут мир кўтән верәс.
13 Щи йўпийән, хун ԓын мӑшйайа йистән, Иаков пŏтәр ўс пӑ йастәс: «Хӑнам йох! Мӑнэм хуԓәнтаты.
14 Симон аԉиԓысԓы, хŏты Турәм оԓәӈән па рут мир пеԓа ӑӈкәрмәс, щитԓаԓ эԓты Ԓўв нэмәԓ урәӈән мир ӑкәтты.
15 Тӑм эԓты Турәм айкеԓ туты хŏйатәт ищи пŏтәртысәт, хŏты хӑшман уԓԓа:
16 'Йухәт йŏхәтԓәм пӑ Давид иԓ питәм хот нŏх верԓэм, пӑ щита мўй шўкатман уԓԓа, нŏх верԓэм пӑ ԓўвеԓ па йӑԓпа ԓэщатԓэм,
17 па хŏйатәт пӑ хŏԓ мирәт Турәм Куща ат кӑшсәт, хŏйтат кўтән Ма нэмем йастәԓа. Щиты Турәм Куща, тӑм мўй иса верты Ŏт, пŏтәртәԓ'.
18 Турма хŏԓ Ԓўв верԓаԓ йис эԓты ԓэрәт.
19 Щишән ма нумәстэмән па рут мир эԓты Турәм пеԓа керԓәты ŏтәт уԓәпсайэԓ ԓавәрта верты ӑт мосәԓ,
20 ԓывиԓаԓа хӑшты мосәԓ, ԓыв ԓуӈхәтән шӑкатәм ԓэтŏт эԓты, пакрасԓәты вер эԓты, шакәптәм вой ԋŏхи пӑ ўр эԓты йŏхи ат ԓавԓәссәт, пӑ па хŏйатәта щит ӑт ат версәт, мўй ԓывиԓаԓа ӑт ԓӑӈхасәт.
21 Моисей закон йис тэԓән вошәтән иса пŏтәртԓа пӑ кашәӈ шаббат хӑтәԓән иудейәт пойәкщәты хотәтән ԓўӈәтԓа».
Апостоләт хӑншәм айкеԓ па рут мир эԓты уԓты эвԓәм йохәта китԓәт
22 Щиӈәԋща апостоләт пӑ ун икет аратәԓ пойәкщәты хŏйатԓаԓ пиԓән, ԓыв кўтԓаԓ эԓты йох пирыман, Антиохияйа Павел пӑ Варнава пиԓән китты нŏмәс версәт, щи мŏхет: Варсавайа айәԓтты Иуда, пӑ Сила, хӑнам йох кўтән кущайа уԓты кӑтӈән.
23 Ԓыв пиԓԓаԓән щимәщ хӑншәм айкеԓ мӑсәт: «Апостоләт пӑ ун икет пӑ хӑнам йохәт Антиохияйән, Сирияйән пӑ Киликияйән уԓты па рут мир эԓты уԓты хӑнам йохәта: ўща уԓаты.
24 Мўӈ хуԓтмәсэв, мӑтты тухәԓ, мўӈ эԓтэв ким этәм ŏтәт, ԓыв пŏтәрԓаԓән нынан ԓыԓәтсәԓаԓ пӑ нын сӑмԓән йэша мӑнәԓтсәԓаԓ, пŏтәртман, мӑтты эвтәсты мосәԓ пӑ закон хўват уԓты мосәԓ. Щит мўӈ ԓывиԓаԓа ӑт партыԓысув,
25 мўӈ, йӑха актәщман, йох пирыман, сӑмԓува мосты мўӈ Варнавайэв пӑ Павелэв пиԓән нын хŏщайән китты и нŏмәсән артаԓәсэв,
26 ԓын мўӈ Турәм Кущайэв Иисус Христос нэм урәӈән сӑмԓән мийәм хŏйатӈән.
27 Щиӈәԋща, мўӈ Иуда пӑ Сила китсув, нынана ԓын йасәӈән щит па ԓэра верԓәԓән.
28 Йэмәӈ Ԓыԓ пӑ мўӈ тӑм мосты вер тўмпийән нынан нэмәԓтты па вер верты ӑт мӑԓув:
29 ԓух йир, пӑ ўр, пӑ шакәптәм ԋŏхи, пӑ пакрасԓәты эԓты йŏхи ԓавԓәсты, пӑ па хŏйатәта щит ӑт верты, мўй нынана ӑт ԓӑӈхаԓты. Тӑм эԓт тӑйман, йӑма верԓәты. Тўмтака уԓаты».
30 Щӑԓта, китәм ŏтәт Антиохияйа йŏхәтсәт пӑ, хŏйатәт ӑкәтмеԓ кемән, хӑншәм нэпек мӑсэԓ.
31 Ԓыв пӑ, ԓўӈәтмеԓ кемән, щи утәԓтәпса эԓты нŏх амәтсәт.
32 Иуда пӑ Сила, Турәм айкеԓ туты хŏйатӈәна уԓман, хӑнам йоха йӑм арат йасәӈ утәԓтәты щира йастәсӈән пӑ ԓывиԓаԓ такапсәԓән.
33 Мŏԓкем щита уԓман йўпийән, ԓын хӑнам йохән апостоләт хŏща йӑм нŏмәсән эсәԓсайӈән.
34 Туп Сила щита хӑщты нŏмәсән йŏхәтса. [Иуда пӑ Иерусалима йŏхԓы йŏхтәс.]
35 Павел пӑ щӑԓта Варнава Антиохияйән усӈән. Щита ԓын утәԓтәсӈән пӑ Турәм Куща йасәӈ Йӑм Айкеԓа па мŏхет пиԓән тутԓысӈән.
Павел Йӑм Айкеԓ туты кимет пўш мӑнәԓ
36 Мŏԓты кем пŏра хӑщмаԓ йўпийән Павел Варнавайа йастәс: «Па мӑнԓәмән, мин хӑнам йохԓәмән хŏща йӑхԓәмән, кашәӈ вошән, хŏта мин Турәм Куща йасәӈ тутԓысмән, ватԓэмән, хŏты ԓыв уԓԓәт».
37 Варнава, Марка айәԓты, Иоанн пӑтән ўты ўтщисԓы.
38 Туп Павел щит пӑтән ўты ӑт ԓӑӈхас, хŏй Памфилияйән ԓынан хӑйсәԓы пӑ ԓынана мийәм вер тӑԓаӈа верты ӑт ԋотәс.
39 Тӑм эԓты нŏпса ӑт ԓэщаԓәты вер тыйәс, щишән ԓын кўтанән кӑтна мӑтсәӈән; щӑԓта Варнава, Марк ўйман, Кипр пеԓа нык хўвԓәс;
40 Павел пӑ, ԓўвеԓа Сила пирымаԓ йўпийән, хӑнам йохәтән Турәм йӑма эвԓәптыман, мӑнәс,
41 пӑ Сирия пӑ Киликия сӑхат, пойәкщәты мир такапман, йӑӈхәс.