18
Павел Коринф вошән
1 Тӑм йўпийән Павел, Афины вош хӑймаԓ йупийән, Коринф воша йŏхтәс;
2 Щита ԓўв и иудей ху уйтәс, нэмәԓән Акила, Понт мўв эԓты уԓты ху. Акила тӑм ванән Италия эԓты Прискилла имеԓ пиԓән йŏхтәс, - Клавдий нэмпи кесарь иудейәта хŏԓ Рим эԓты мӑнты партсәԓы, - пӑ Павел ԓын хŏщайән йŏхтәс;
3 Ԓын и хŏрпи верты ŏт тӑйсәӈән: ԓын пирщин хотәт ԓэщатсәӈән, пӑ щишән Павел ԓын пиԓанән рупитты хӑщәс.
4 Кашәӈ шаббат хӑтәԓән ԓўв иудейәт пойәкщәты хотән иудейәт пӑ грекәт пиԓән пŏтәртәс пӑ ԓывиԓаԓ таӈиԓысԓы.
5 Хун пӑ Македония эԓты Сила пӑ Тимофей йŏхәтсәӈән, Павел иудейәта пŏтәртты ԓыԓәԓән иԉапса, мӑтты Иисус - щит Христос.
6 Хун пӑ ԓыв ԓўвеԓ йэртԓыты пӑ ԓўвеԓа атма йастәты питсәт, ԓўв ԓумтәмԓаԓ иԓ пӑркатмаԓ кемән, ԓывиԓаԓа йастәс: «Нын кӑԓыԓән нын ŏх пӑтԓәнән; ма сыстам; тӑԓта йэԓԓы па рут мир хŏща мӑнԓәм».
7 Павел иудейәт пойәкщәты хот эԓты ким этәс пӑ ванән уԓты хота ԓŏӈәс, хŏта Иуст нэмпи ху, Турәм пеԓа сӑмәӈ ŏт, ус.
8 иудейәт пойәкщәты хот куща Крисп пӑ хŏԓ ԓўв йŏԓән тӑйты мŏхиԓаԓ пиԓән Турәм Кущайа эвԓәс, пӑ Коринф мŏхәт эԓты ар хŏйат, хуԓәтман, эвәԓсәт пӑ йиӈка ԓŏӈәԓтыԓысайәт.
9 Турәм Куща пӑ атәԓән Павел вантәпсайәԓ хŏща йастәс: «Аԓ пӑԓа, туп пŏтәрта пӑ шитама аԓ йўва,
10 Ма нӑӈ пиԓэнән уԓԓәм, пӑ нэмәԓты ŏт нӑӈена атәм ӑт верәԓ, Ма тӑм вошән ар хŏйат тӑйԓәм, щишән».
11 Пӑ ԓўв щита, ԓывиԓаԓ Турәм йасӈа утәԓтыман, тӑԓ-ԓўӈ пӑ хут тыԓәщ арата хӑщиԓыйәс.
12 Щи кўтән, Ахаия мўвән Галлион проконсул уԓәм пŏрайән, иудейәт и нŏмәсән Павел йэщаԓт эԓԓәсәт пӑ сўт верты тӑхайа тусэԓ,
13 пŏтәрман, мӑтты ԓўв хŏйатәт, Турәм пеԓа сӑмәӈа уԓты, ӑнтом Закон щирән утәԓтәԓԓы.
14 Хун пӑ Павел уӈԓәԓ пел пўшты ўтщисԓы, Галлион иудейәта йастәс: «Иудейәт! Мŏԓты атәм вер мўй пӑ ԓоԓмасты, веԓтатты вер верәс ки, ма ԓуԓән нынан хуԓәтты щир тӑйсәм,
15 туп хун утәԓтәты вер эԓты, пӑ нэмәт эԓты, пӑ нын законән эԓты ўра вортԓа, нын щирәнән артаԓыйаԓән; ма щита сўта уԓты ӑт ԓӑӈхаԓәм».
16 Щӑԓта сўт верты тӑха эԓты ԓывиԓаԓ воштәсԓы.
17 Грекәт хŏԓыйэ иудейәт пойәкщәты хот куща Сосфен ԋӑрэмәсэԓ пӑ ԓўвеԓ сўт верты хот йэԓпийән сэксэԓ; туп Галлион щит эԓты йэша нэш ӑт нумисыйәс.
Павел Антиохияйа йŏхԓы керԓәты вер
18 Павел йам арат хӑтәԓ Коринф вошән ус. Щи йўпийән ԓўв хӑнам йох пиԓән пайәм уԓәм верәс пӑ Акила пӑ Прискилла пиԓән Сирия мўва хŏпән мӑнәс. Мӑнтаԓ йэԓпийән Павел Кенхрей вошән ŏхәԓ ԓŏртсәԓы, Турма аԉәм вер тӑйәс, щишән.
19 Ефеса йŏхәтмеԓ йўпийән ԓынан щита хӑйсәԓы, ԓўв пӑ иудейәт пойәкщәты хота ԓŏӈәс пӑ иудейәт пиԓән нумәсман пŏтрэмәс.
20 Хун пӑ ԓыв ўратсәт, ԓўв хўвшәк ԓыв хŏщайэԓ ат ус, ԓўв ӑт кашащәс,
21 туп ԓыв пиԓԓаԓән пайәмуԓәм верәс, йастәман: «Мӑнэм йиты йэмәӈ хӑтәԓән мет шопәӈ Иерусалимән уԓты мосәԓ; нын хŏщайән пӑ, Турма рӑхты ки питәԓ, па йŏхԓы йŏхәтԓәм». Щӑԓта Ефес вош эԓты хопән мӑнәс. [Акила пӑ Прискилла Ефесән хӑщсәтән.]
22 Хоп эԓты Кесария воша ŏхәԓмаԓ йўпийән, ԓўв Иерусалима нŏх йŏхтәс, щита пойәкщәты ӑктәщиты мŏхет йӑм йасәӈән йастәсԓы пӑ Антиохия воша мӑнәс.
23 Щӑԓта щита мŏԓты кем сыс хӑйман, этәс, пӑ и оԓтман Галатия пӑ Фригия мўвӈән мŏхты мӑнәс, утәԓтәты йŏх такапман.
Аполлос Ефесән пӑ Коринфән
24 И мӑтты иудей, нэмәԓән Аполлос, Александрия вошәӈ ху, туса пŏтәртты пӑ Йэмеӈ Нэпек уйәтты ху, Ефеса йŏхтәс.
25 Ԓўв Турәм Куща Йуш пеԓа утәԓтәман ус пӑ шек такан пӑ эвәԓты щира пŏтәртәс, тўӈа-щира Турәм Куща эԓты утәԓтәс, кўш туп ԓўв Иоанн йиӈка ԓŏӈәԓтыйәпса уйтәс.
26 Ԓўв, ӑт пӑԓман, иудейәт пойәкщәты хотән пŏтәртты питәс. Ԓўвеԓ хуԓмаԓ кемән Акила пӑ Прискилла ԓўвеԓ вана ўсԓән пӑ тўӈашәк Турәм Куща Йуш ԓўвеԓа таӈсәԓән.
27 Хун пӑ ԓўв Ахаия мўва мӑнты утщийәс, хӑнам йох щита уԓты утәԓтәты йохәта нэпек хӑшсәт, ԓыв ԓўвеԓ вана ўты партсэԓ; ԓўв тŏхи йŏхәтмаԓ йўпийән, ар ԋотәп щи хŏйатәта верәс, хŏй Турәм йӑм хўватән эвәԓман ус.
28 Ԓўв мир йэԓпийән иудейәт ԓомтәтԓыты вер шек эԓпа аԉиԓысԓы, Йэмәӈ Нэпек хўват этәԓтыман, мӑтты Иисус уԓ Христос.