20
Павел Македонияйа пӑ Грецияйа мӑнты вер
1 Йэшащты вер вŏԓыйәм йўпийән, Павел утәԓтәты йох вана вохмаԓ пӑ ԓыв номәсԓаԓ такапмаԓ йўпийән, ԓыв пиԓԓаԓән пайәмуԓәм верәс, ким этәс пӑ Македония мўва мӑнәс.
2 Щи тӑхайәт сӑхат мӑнман пӑ эвәԓты хŏйатәт йӑм артан утәԓтәсԓы. Еллада мўва йŏхәтмаԓән,
3 щита ԓўв хуԓәм тыԓәщ ус. Хун ԓўв Сирия мўва хопән мӑнты ӑктәщәс, иудейәт ԓўвеԓ пӑратты вер ԓэщатәм хуԓмаԓ кемән, Македония сӑхат йŏхԓы мӑнты нŏмәс верәс.
4 Ԓўв пиԓәԓән Асия унты Сосипатр, Верия вошәӈ ху, Пирр пŏх, Фессалоника эԓты уԓты Аристарх пӑ Секунд, щӑԓта Гаий - Дервия вошәӈ ху пӑ Тимофей, щӑԓта пӑ Асия эԓты уԓты Тихик пӑ Трофим йӑхсәт.
5 Ԓыв, йэԓԓы мӑнман, мўӈев Троада вошән ԓавәԓсэԓ.
6 Мўӈ пӑ, тўтәӈ ԋаԋ хӑтԓәт йўпийән, Филиппы эԓты хопән мӑтсув пӑ ветмет хӑтәԓән Троадайән ԓыв хŏщайэԓ йŏхәтсув, щита ԓапәт хӑтәԓ усув.
Пӑрәм Евтих но̆х ԓыԓӈатәм вер
7 Ԓапәт оԓәӈ хӑтәԓән, хун утәԓтәты йох ԋаԋ морәтты урәӈән йӑха ӑктәщсәт, Павел ԓыв пиԓԓаԓән пŏтрэмәс пӑ, кимет хӑтәԓ мӑнты нумәсмаԓ хўват, ԓўв пŏтрәԓ ат кўтәп унты тусԓы.
8 Нўм хот йӑтән, хŏта мўӈ ӑктәщсув, йӑм ар тўт хŏшам ус.
9 Павел хув пŏтрэмәмаԓ эԓты, и энәмты пŏх, нэмәԓән Евтих, ишԋи хопән опсәс, такан иԓ вŏйәпса пӑ ԋŏхԓәмаԓ сӑхат, хуԓмет хот пӑԓат эԓты иԓ рӑкнәс, пӑ нŏх аԓэмәмән, пӑрмаԓ.
10 Павел, иԓ эсԓәщәс, энәмты пŏх эԓт ŏԓсәԓы пӑ ԓўвеԓ ӑпәԓтман, йастәс: «Аԓ хурыйаты, ԓўв ԓыԓәӈ».
11 Павел нўм хŏт йӑта ԓŏӈмаԓ кемән пӑ ԋаԋ морәтмаԓ пӑ ԓэвмаԓ йўпийән, йӑм хўват, хŏԓна пӑ хутԓәты унты, пŏтрэмәс, пӑ йухәт ким этәс.
12 Щи кўтән энәмты ԋаврэм ԓыԓӈат йŏхи туса пӑ щит эԓты хŏԓ шек амәтсәт.
Троада эԓты Милита мӑнты вер
13 Мўӈ паршәӈ ун хопа ԓэԓсув пӑ йэԓԓы Асс вош пеԓа мӑтсув, щиԓта Павел ўты урәӈән; ԓўв мўӈева щиты партсәԓы, ԓўв кўрән шушты ўтщийәԓ.
14 Хун пӑ ԓўв мўӈ пиԓэвән Асс вошән уйтантәс, ԓўвеԓ пӑтән паршәӈ ун хопа ўймев кемән, мўӈ Митилина воша мӑтсув.
15 Щӑԓта, щи мӑнман, кимет хӑтәԓ мўӈ Хиос пухәр шŏма иԓ ԓойсув, хӑтәԓ хӑйман пӑ Самос пухра хойсув пӑ, Трогиллия воша йŏхтыԓымев йўпийән, кимет хӑтәԓ Милит воша йŏхәтсув,
16 Павел Ефес хӑйман мӑнты нŏмәс верәс, Асияйән ӑт ат рŏнты, щишән, ԓўв тэрматыйәс, Ветйаӈ хӑтԓәп йэмәӈ хӑтәԓ кеша Иерусалимән уԓты ԓӑӈхас.
Павел Ефес пŏйәкщәты хŏйатәт ун икет пиԓән пŏтәртты вер
17 Милит эԓты Ефеса китәсәс, Турма пŏйәкщәты хŏйатәт ун икет ԓўв хŏщайәԓа вохсәԓы,
18 пӑ, хун ԓыв ԓўв хŏщайәԓа йŏхәтсәт, ԓывиԓаԓа йастәс: «Нын уйәтԓәԓән, хŏты ма мет оԓәӈ хӑтәԓ эԓты, хун Асияйа йŏхәтсәм, ивевән нын пиԓанән усәм,
19 ма Турәм Куща пеԓа рома уԓман пӑ ар сэмйик мӑнәԓтман верәт версәм, иудейәт верәм ԉикәӈ нŏпсәт пӑтыйән кӑмән кем шук мӑнэм тўты вера йис;
20 Ма нэмәԓтты щит эԓты ӑт хӑйсәм, мўй эԓты нынан пŏтәртты мосәс ԓуԓән, мўйа нынан утәԓтәты мосәс ԓуԓән, мир ватман пӑ хотԓән ԓыпийән.
21 Ма иудейәта па, грекәта па такан йастыԓысәм, ԓыв кӑрэк эԓты шӑшән керԓәман, Турәм пеԓа ат керԓәсәт пӑ мўӈ Турәм Кущайэва Иисуса Христоса ат эвәԓсәт.
22 Пӑ тата щи, ин ма, Ԓыԓән хўщман, Иерусалима мӑнԓәм, ӑт уйәтԓэм, мӑнэма щита мўй питәԓ;
23 Туп Йэмәӈ Ԓыԓ кашәӈ вошән аԉәԓ, пŏтәртман, касна хот пӑ шукәӈ щирәт мӑнэм ԓавәԓԓәт.
24 Туп ма нэмәԓты пеԓа ӑт ӑӈкәртыԓәм пӑ ма ԓыԓэм ӑт шавиԓэм, туп, амәтман, ԓўԓән мӑ йушем мӑнты пӑ Турәм Кущайән Иисусән мийәм ма верэм йэтшәптәты ат верәтсэм, Йӑм Айкеԓ Турәм йӑм эԓты пŏтәртты.
25 Пӑ ин, тӑм, ма уйәтԓэм, хŏԓ нын, хŏй кўтән, Турәм Хон Уԓәпса эԓты пŏтәртман, ма йӑхсәм, мӑнэм па ӑт ватԓәԓән.
26 Щишән нынана тӑм хӑтәԓ ма такан йастәԓәм: «Нэмәԓты пӑрәм хŏйат хŏща ўнавот ӑт тӑйԓәм,
27 ма Турәм ԓӑӈхаты вер аратәԓ нынана такан йастәты ӑт хӑԋатысэм.
28 Щиӈәԋща, нынан ватман тӑйаԓән пӑ хŏйат тащ аратәԓән па, хŏта Йэмәӈ Ԓыԓ нынан ŏха пŏтсәԓы, Турәм Куща пӑ Турәм ӑктәщиты мŏхиԓаԓ нын такан ат шависԓән, Ԓўв кӑԓэԓ сӑхат мŏщатәм пойәкщәты мŏхиԓаԓ.
29 Ма уйәтԓэм, хун ма мӑнԓәм, нын хŏщайән ԉикәӈ йэврәт ԓŏӈԓәт, ԓыв пӑ тащ ӑт щаԉәтԓэԓ.
30 Щӑԓта нын эԓтыԓән хŏԓна хŏйатәт нŏх ԓойԓәт, хŏй пŏтәртаԓән вещкат вер йŏвра таԓты питԓәԓы, утәԓтәты йох ԓыв йўпиԓаԓән туты урәӈән.
31 Щишән нумәсман уԓаты! Нумаԓән, ма нынан тӑԓаӈ хуԓәм тӑԓ-ԓуӈ атәԓ-хӑтәԓ ивевән сэмйик сурән нын эԓтайән кашәӈ ŏт утәԓтысэм.
32 Пӑ ин нынан, хӑнам йох, Турма пӑ Ԓўв йӑмәԓ эԓты уԓты йасӈа эвԓәптәԓԓам, хŏй нынан утәԓтәты пӑ нынана Ԓўв йэмәӈ мирәԓ кўтән ŏх вŏԓ мӑты верәтәԓ.
33 Ӑнта щелŏх, ӑнта сорԋи, ӑнта ԓумтәм нэмәԓты хŏйат эԓты ма ӑт ԓӑӈхасәм:
34 нын уйәтԓәԓән, мӑнэм мосты ŏт пӑ ма пўӈԓэмән уԓәм хŏйатԓама мосты ŏт тӑм ма йошӈиԓамән шитәптәсәм.
35 Кашәӈ верән ма нынана этәԓтысԓам, щиты рупитман, вевԓы хŏйатәта ԋŏтты мосәԓ пӑ Турәм Куща Иисус йасӈәт нумты мосәԓ, Ԓўв йастәс: 'Ўты эԓты, мӑты йӑмшәк'».
36 Щит йастәмаԓ кемән, ԓўв шашӈиԓаԓ иԓ эсәԓсәԓы пӑ хŏԓ ԓыв пиԓԓаԓән пойәкщәс.
37 Щи пŏрайән хŏԓыйэ хоԓԓәсәт пӑ, Павел ӑпәԓтыман, ԓўвеԓ мосәԓтәсэԓ.
38 Мет шопәӈ ԓўв йастәм йасәӈԓаԓ эԓты хощсәт, мӑтты ԓыв па нэмәԓты пŏрайән ԓўв вешәԓ ӑт ватԓэԓ. Щӑԓта ԓўв пиԓәԓән паршәӈ хоп унты мӑтсәт.