22
1 «Хӑнам йохәт пӑ ащет! Манэм нын йэԓпанән ӑратыты урәӈән, мӑнэм пŏтәрты эсԓаԓән».
2 Ԓўв пӑ ԓыв пиԓԓаԓән еврей йасәӈән пŏтәртты хуԓмеԓ кемән, мет шитама йисәт. Ԓўв йастәс:
3 «Ма иудей ху, Киликияйән уԓты Тарс вошән сэма питәм ŏт, тӑм вошән Гамалиил утәԓтәты ху хŏща энмәԓтәм ŏт, ащиԓув Закон щирән шек йӑма утәԓтәм ŏт, Турәм вер пеԓа такан уԓты ŏт, хŏты нын хŏԓ ин уԓԓәты.
4 Ма хŏԓна сŏрәм унты тӑм утәԓтәпса йўпи тўвәм хŏйатәт ԋухәтԓысԓам, иԓ йӑрман йохәт пӑ нэӈәт касна хота мийԓысԓам.
5 Щит вантәм ŏтәт - Турма йир верты ŏх ху пӑ йӑха актәщиты ун икет аратэԓән. Ма хŏԓна ԓыв эԓтыԓаԓ Дамаск вошәӈ хӑнам йохәта хӑншәм айкеԓ нэпекәт ўсәм пӑ щи мӑтсәм, христианәт эԓты хŏй щита ус пӑ щитәт катәԓты, пӑ ԓывиԓаԓ Иерусалима сэкты урәӈән туты.
6 Хун пӑ ма йушән уԓмемән пӑ Дамаск воша ванамәсәм, хӑтәԓ кўтәп кемән шӑмкап турәм хӑр эԓты щи хŏрпи нŏвийән похәтсайәм, пӑ сэм хŏԓна нŏх ӑт эԓԓәԓ.
7 Ма мўва иԓ рӑкәтсәм пӑ мӑ пеԓайэм пŏтәртәм тур сый хуԓмәсәм: "Савл, Савл! Мўйа нӑӈ Мӑнэм ԋухәԓԓэн?"
8 Ма йŏхԓы йастәԓәм: "Хŏй Нӑӈ, Турәм Куща?" Ԓўв мӑнэма йастәс: "Ма Назарет эԓты уԓты Иисус, Хŏй нӑӈ ԋухәԓԓэн".
9 Ма пиԓэмән уԓәм ŏтәт нŏви ватсэԓ пӑ пӑԉщәмән йŏхәтсайәт; туп ма пеԓайэма Пŏтәртәм Ŏт тўр сый ӑт хуԓсэԓ.
10 Щиӈәԋща ма йастәсәм: "Турәм Куща! Мӑнэм мўй верты?" Турәм Куща пӑ мӑнэма йастәс: "Нŏх ԓойа пӑ Дамаска мӑна, пӑ щита нӑӈена иса йастәԓа, мўй наӈена верты постәса".
11 Хŏты ма вŏԉиты нŏви эԓты сэмԓы питсәм, ма пиԓэмән йўвәм мŏхет йош пелкем эԓты Дамаска ватәԓтәсайәм.
12 А-хой Анания, Закон хўват уԓты Турма эвәԓты хŏйат, Дамаскән уԓты иудейәтән хŏԓ йӑма айәԓтса,
13 ма хŏщайэм йŏхтәс пӑ, вана шушман, мӑнэма йастәс: "Савл хӑнам ху, сэмәӈа йўва!" Пӑ ма ищи кумат ԓўвеԓ шийаԓәсэм.
14 Ԓўв пӑ мӑнэм йастәс: "Мўӈ ащиԓув Турәм нӑӈен пирыйәс, наӈ Ԓўв ԓӑӈхаты щирәԓ ŏша ат пайәтсэн, Вещкат Ŏт ат шийаԓәсән пӑ тўр сый Ԓўв ўӈԓәԓ эԓты ат хуԓсән.
15 Нӑӈ Ԓўвеԓа хŏԓ хŏйатәт йэԓпийән вантәм ŏта питԓән, щит эԓты, мўй ватсән пӑ хуԓсән.
16 Щиӈәԋща, мўй нӑӈ айәԓта уԓԓән? Нŏх ԓойа, Турәм Куща Иисус пеԓа пойәкща, йиӈка ат ԓŏӈәԓтыԓайән пӑ, кӑрэкԓан хŏԓт ат ԉŏхәтԓайәт".
17 Хун пӑ ма Иерусалима йŏхԓы йŏхәтсәм пӑ Турәм Хотән пойәкщәсәм, мӑ вантәпса ватсәм
18 пӑ Ԓўвеԓ шийаԓәсәм, пӑ Ԓўв мӑнэма йастәс: "Тэрматыйа пӑ Иерусалим эԓты ким эта, тӑта нӑӈ Ма эԓтайэм пŏтәртты щирэн вана ӑт ўԓа".
19 Ма йастәсәм: "Турәм Куща! Ԓыв уйәтԓэԓ, ма Нӑӈена эвәԓты хŏйатәт касна хота тухрыԓысԓам пӑ иудейәт пойәкщәты хотәтән сэӈкиԓысԓам,
20 пӑ хун Стефан, Наӈен вантәм ŏтэн, кӑԓэԓ щŏрӈәԓтәм пŏрайән, ма щита ԓойсәм, ԓўв паратты верәԓ эԓт тӑйсэм, ԓўвеԓ паратты ŏтәт ԓумтәмәт ма шависәм".
21 Щӑԓта ԓўв мӑнэма йастәс: "Мӑна, Ма нӑӈен хўва Турма ӑт эвәԓты па рут мир хŏща китԓэм"».
22 Тӑм йасәӈ унты ԓўв хуԓәтса; щи йўпийән ўвты питсәт, пŏтәртман: «Мўв сŏх эԓты ԓўвеԓ нŏх ушийи! Ԓўвеԓа уԓты ӑт рӑхәԓ».
23 Щи ԓыв ўвмеԓ кўтән, ԓумтәмԓаԓ йовәԓсәт пӑ кўрпӑт хиш нŏх йовәԓсәт,
24 щŏрәс ԉаԉ йох куща ԓўвеԓ ԉаԉ йŏх уԓты тӑхайа туты партсәԓы. Ԓўвеԓ хомщийән сэкты пӑ такан иԋщәсты партсәԓы, мўй урәӈән ԓўв пеԓайәԓ мир щиты ўвәс.
25 Туп хун ԓўв лаккеԓәтән йӑртсәԓәса, Павел ԓойәм сот ԉаԉ йох кущайа йастәс: «Нынан мўй Рим ху сэкты рӑхәԓ, хŏԓна пӑ сўт такԓы?»
26 Щит хуԓмаԓ кемән, сот ԉаԉ йох куща мӑнәс пӑ щŏрәс ԉаԉ йох кущайа щит тусԓы, пŏтәртман: «Ванта, мўй нӑӈ верты ўтщиԓән? Тӑм хŏйат - Рим ху».
27 Щиӈәԋща щŏрәс ԉаԉ йох куща, ԓўв хŏщайәԓ вана шушман, иԋщәсәԓ: «Йаста мӑнэма, нӑӈ Рим ху?» Ԓўв йастәс: «Па хŏты».
28 Щŏрәс ԉаԉ йох куща йŏхԓы йастәс: «Ма ун ŏх сӑхат щи Рим хŏйата уԓты вер ԓутсэм». Павел пӑ йастәс: «Ма пӑ щита сэма питсәм».
29 Щиӈәԋща ищи кумат ԓўвеԓ шукатты утщийәм ŏтәт ԓўв эԓтайәԓ пўӈԓа хӑтәмәсәт. Щŏрәс ԉаԉ йох куща пӑ, ԓўв Рим хŏйата уԓты верәԓ мŏштәмаԓ кемән, хŏԓт пӑԓтамәс, ԓўвеԓ йӑрсәԓамаԓ урәӈән.
Павел синедрион йэщаԓт ԓойты вер
30 Кимет хӑтәԓ, тŏрԓы уйәтты ԓӑӈхаман, мўй хŏща ԓўв иудейәтән ўнавота пайәтса, ԓўвеԓ кеԓԓаԓ эԓты хŏԓт пайәтсәԓы пӑ Турма йир верты ŏх икета пӑ синедриона хŏԓ ӑктәщты партсәԓы пӑ, Павел ким этәԓтәсԓы пӑ ԓыв йэԓпиԓаԓа ԓощәԓтәсԓы.