12
Иисус ропхәӈ вер сўтытәԓ
1 Щи кўтән, щŏрәс мир щиты ӑктәщәс, пӑ хŏйатәт йэрмат кўтән ўратысәт, Иисус, оԓәӈән утәԓтәты йохԓаԓ пеԓа ватман, пŏтәртты питәс: "Фарисей сŏхәм щир, ԋаԋ шўм хŏрпи, ропхәӈ вер эԓты шаващаты, кӑт вешпийа аԓ уԓаты.
2 Нэмәԓты сайԓәм вер ӑнтом, ищипа эԓпа этәԓ, пӑ хӑԋа вер ӑнтом, ищипа уйәтԓа.
3 Щишән, мўй эԓты нын пӑтламән йастәсты, нŏвийән хуԓԓа, пӑ мўй хот ԓыпийән пӑԓ ўса йастыԓысты, щит хот ԓоӈәԓ эԓты такан йастәԓа.
4 Ма нынана, пиԓйохԓама, пŏтәртԓәм: щитәт эԓты аԓ пӑԓаты, хŏй хŏйат эԓ пӑратәԓ, пӑ нэмәԓты па верты ӑт верәтәԓ.
5 Туп йастәԓәм нынана, хŏй эԓты пӑԓты мосәԓ: Щит эԓты пӑԓаты, хŏй, пӑратмаԓ йўпийән, шук туты тӑхайа пайәтты веритԓәԓы. Йӑна пŏтәртԓәм нынана, Щит эԓты пӑԓаты.
6 Вет щищки кӑт пӑтәр ŏх карты сӑхат ӑт тыныԓа? Турәмән ит нэш ӑт йŏрэмәм.
7 Нын ŏхԓәнән ŏхсŏхԓән хŏԓна хŏԓ ԓўӈәтман уԓԓайәт. Аԓ пӑԓаты: нын ар ай щищкет эԓты тыныӈшәкәт, сӑмәӈашәк тӑйԓайты.
8 Нынана пŏтәртԓәм: кашәӈ хŏйат, хŏй эԓпат Мӑнэм хŏйатәт хŏща, вана уԓԓы, щит Хŏйат Пŏхән ищи Турәм ангеләт хŏща вана ўԓа.
9 Хŏй хŏйатәт хŏща Ма эԓтэм йŏвра керԓәԓ, щит эԓты па Турәм ангеләт хŏща йŏвра керԓәԓа.
10 Кўш хŏйа, хŏй йŏвра йасәӈ Хŏйат Пŏха йастәԓ, щи нўрәԓ йŏрэмәԓа; хŏй Йэмәӈ Ԓыԓ эԓты ӑт рӑхты йасәӈ йастәԓ, щит нўрәԓ ӑт йŏрэмәԓа.
11 Хун нын Турәм йасӈа утәԓтәты хотәта, кущайәт пӑ ŏха уԓты кущайәт хŏща туԓайты, аԓ нумәсаты, хŏты мўй пӑ йŏхԓы йастәԓты, мўй пӑ пŏтәртты верән уԓ,
12 Йэмәӈ Ԓыԓ нынан щи пўԉаӈ утәԓтәԓԓы, мўй йастәты".
Тащәӈ ики эԓты утәԓтәты пŏтәр
13 Мŏԓты хŏйат мŏхет кўт эԓты Ԓўвеԓа йастәс: "Утәԓтәты Ху! Йайәма йаста, ащемән-анԏэмән хӑйәм хот тэԓ ма пиԓэмән ат ортԓәԓы!"
14 Иисус ԓўвеԓа йастәс: "Нын сўтән верты хŏйән Ма ԓощәԓтәсайәм мўй пӑ нынан ортԓыты?"
15 Щӑԓта пӑ ԓывиԓаԓа йастәс: "Ватман уԓаты, щӑр кўш щир эԓты шаващаты. Хŏты кепа хŏйат тащәӈ ат ус, ԓўв уԓәпсайәԓ ӑнта щиԓта уԓ".
16 Щӑԓта Ԓўв утәԓтәты пŏтәр пŏтәртәс: "И тащәӈ ху хŏща мўв хӑрәԓән энмәԓты ԓэвпәс йӑма энмәс;
17 пӑ ԓўв щирәԓән нумәсәԓ: "А мўй мӑнэм верты? Энмәм ԓэтәтԓам хŏԓта пŏнты?"
18 Нŏмәс верәс: "Тӑмиты верԓәм: ампарԓам нŏх лосытԓыԓам пӑ ԓӑщкамшәк ампарәт верԓәм, щита энмәм ԓат сэмԓам пӑ па пŏрмасԓам урәӈән тэԓыйэ пŏнты тӑха питәԓ.
19 Щӑԓта ма мӑнэма йастәты верәтԓэм: тэԓыйэ йӑм тӑйԓән, ар тӑԓа тӑрмәԓ. Ин щутща, ԓэва, йиԋща, каш вера!"
20 Турәм ԓўвеԓа туп щиты йастәс: "Ŏшԓы ŏт! Тӑм ат уԓәпсайэн нŏх уԓа; тащтәм ŏтԓан хŏйа питԓәт?"
21 Щиты, щимәщ хŏйат пиԓән уԓԓыйәԓ, хŏй тащ ԓўв урӈәԓа ӑкәтәԓ, Турәм хŏща тащәӈа ӑт уԓ".
Турәм Хон Уԓәпса кӑншаты
22 Щӑԓта Иисус утәԓтәты йохԓаԓа йастәс: "Щишән Ма нынана пŏтәртԓәм: уԓәпсайән эԓты аԓ нумәсаты, мўй нынан ԓэты, эԓԓәна мўй ԓумәтты.
23 Уԓәпса ԓэтәт эԓты ԓӑтәӈшәк, пӑ хŏйат эԓ - ԓумтәм эԓты ԓӑтәӈшәк.
24 Хулхәт пеԓа вантаты: мўва ԓат ӑт омәсԓәт, ԓат тŏрән ӑт ӑкәтԓәт, ԓыв ун ампарәт, ԓат сэм шавиты тӑхайәт, ӑт тӑйԓәт – Турәмән ԓыв ԓапәтԓайәт; Мўй арата нын щи тŏхԓәӈ войәт эԓты ԓӑтәӈшәкәт!
25 Пӑ хŏй нын эԓтан, ԓўвеԓ ԓэщатман, ԓўв пӑԓатәԓ кўш кепа и кўш оԓәӈ арата эԓәтты веритԓәԓы?
26 Нын ай верыйэ верты ӑт веритԓәты ки, мўй пўӈәԓ верәт эԓты нумәсԓәты?
27 Ӑԋа лыптәт пеԓа вантаты, хŏты ԓыв энәмԓәт: ӑт рупитԓәт, сŏхәм ӑт верԓәт. Туп нынана пŏтәртԓәм: Соломон ики хŏԓна ԓўв вŏсԓәты–вŏрԓәты щирәԓән щиты ӑт ԓумәтԓыйәс, хŏты кашәӈ ŏтԓаԓ ԓумәтԓыԓәт.
28 Хӑр мўвән энәмты хŏрамәӈ лыптәт, тӑм хӑтәԓ уԓԓәт, хӑԓэвәт кура вŏщкиԓайәт, Турәмән щиты ки ԓумәтыԓайәт, пӑр мŏԓты Ԓўв нынан ӑт ԓумәттәԓԓы, шимәԓ эвәԓты ŏтәт!
29 Щӑԓта, аԓ кӑншаты, нынан мўй ԓэты пӑ мўй йищты, аԓ пӑ нумәсаты.
30 Щит тӑм мир уԓәпсайән уԓты хŏйатәт кӑшԓәт; Ащан уйәтәԓ, мўй нынан мосәԓ.
31 Метшопәӈ Турәм Хон Уԓәпса кӑншаты, пӑ иса щитән ищи мӑԓайты.
32 Аԓ пӑԓа, ай тащийэ! Турәм Ащан Хон Уԓәпса нынана мойԓәты йӑм кашәԓ ус.
33 Пŏрмасԓән тыныйаԓән пӑ нўша хŏйатәта мийԓыйаты. Ӑт ԓыйты тўтхотәт, турәмән ӑт хŏԓаты сорԋэт нынана ԓэщататы, хŏԓта ԓŏԓмах ӑт ванамәԓ пӑ хŏта хӑхәт ӑт ԓэԓ.
34 Хŏта нын сорԋиԓән уԓԓәт, щита сӑмԓән уԓты питԓәт.
Ԓавԓәсты митху эԓты утәԓтәты пŏтәр
35 Ӑнтәпԓән йӑрман ат ԓойԓәт, пӑ тўт сунԓән ат ԓэԓәт.
36 Нын пӑ щи митйохәт иты уԓаты, кущайэԓ поры эԓты йŏхи йŏхәтты ԓавәԓԓәт, ԓуԓән, хун ԓўв йŏхәтәԓ пӑ ов хӑтщәԓԓы, ов мŏхты пелки ԓўвеԓа пўшмәты ат верәтԓэԓ.
37 Щи митйохәт щўԋԓәт, хŏйтат, куща ху йŏхәттаԓән, эԓәпән уԓман уйәтԓәԓы. Йӑна нынана пŏтәртԓәм, ԓўв ӑтпәԓ йӑрԓәԓы, митйохԓаԓ пӑсан сурыйа опсәԓтԓәԓы, вана рӑхиԓыман, ԓывиԓаԓ ԓапәтты питԓәԓы.
38 Ат кўтәпән ки йŏхәтәԓ, мўй пӑ хутԓәты йэԓпийән йŏхәтәԓ, пӑ ԓывиԓаԓ щиты уйәтԓәԓы ки, щи митйохәт ŏй тӑйԓәт.
39 Нын уйәтԓәԓән: хотәӈ куща уйәтсәԓы ки, хун ԓоԓмах йŏхәтәԓ, ԓўв ԓуԓән ӑт ŏԓәс пӑ хот питарәԓ ԓуԓән пел хирты ӑт эсәԓсәԓы.
40 Нын пӑ ԓэщатыман уԓаты, ӑт ԓавԓәсԓәты пўԉаӈ Хŏйат Пŏх йŏхәтәԓ".
Вещкат хот шавиты хŏйат эԓты утәԓтәты пŏтәр
41 Щӑԓта Петра Ԓўвеԓа йастәс: "Турәм Куща! Мўӈева мўй тӑм утәԓтәты пŏтәр пŏтәрԓэн, мўй пӑ хŏԓ хŏйатәта?"
42 Турәм Куща пӑ йастәс: "Хŏй вещкат пӑ ŏшәӈ хот шавиты пӑ ԓэщатты хŏйат, кущайән митйохԓаԓ нўмпийа пŏнԓа, мŏрт пŏрайән мŏрт арат ԋаԋ ортты урәӈән?
43 Щўԋәӈ щи митху, хŏй йŏхтәм кущайән щиты верман уйәтԓа.
44 Йӑна нынана йастәԓәм, ԓўв уԓпәсәԓ ватты ԓўвеԓ пŏнԓәԓы.
45 Щи митху пӑ сӑмәԓән ки йастәԓ: "Ма кущайэм сора ӑт йŏхәтәԓ, митйохԓаԓ пӑ митнэԓаԓ сэкты питԓәԓы, ԓэты пӑ ищты, пӑ кўтщәты унты ищты питәԓ,
46 щиӈәԋща щи митхуйэн кущайәԓ ӑт ԓавәԓты хӑтԓәԓән, нумԓы сысән йŏхәтәԓ, пӑ ԓўвеԓ кӑтна сэвәрмәԓԓы, пӑ ӑт эвәԓты хŏйатәт иты верԓәԓы.
47 Щи митху, хŏй кущайәԓ партәпса уйәтсәԓԓы пӑ йэтшәптыман ӑт ус, пӑ ԓўв ԓӑӈхатаԓ щира ӑт верәс, артан сэкты питԓа;
48 хŏй пӑ нэмәԓты ӑт уйтәс, пӑ сэкты хŏрпийа верәс, шимәԓшәк сэкты питԓа. Кашәӈ хŏйата, хŏйа ар мийман уса, ԓўв эԓтэԓ арәԓ кӑншәмәԓа, хŏйа ар аԉиԓыса, щит эԓты аршәк иԋщәсԓа.
Христос утәԓтәты хŏйата уԓты щир тын аԉәԓ
49 Ма мўва тўт туты йŏхәтсәм, пӑ Ма щикем ԓӑӈхаԓәм, ԓуԓән ԓўв ат ўщиԓәмаԓ!
50 Йиӈка ԓŏӈәԓтыты верән Мӑнэм мосәԓ йиӈка ԓŏӈәԓтыты; хŏты Ма шукащԓәм, хун щит йэтшәԓ!
51 Нын нумәсԓәты, Ма мўва пайԓы уԓәпса туты йŏхәтсәм? Ӑнта, нынана йастәԓәм, ортәсты вер Ма тусәм;
52 тӑԓта йэԓԓы и хотән уԓты вет хŏйат кӑтна ортәсԓәт: хуԓәм хŏйат кӑт хŏйат йэщаԓт, пӑ кӑт хŏйат хуԓәм хŏйат йэщаԓт эԓԓәԓәт.
53 Ащи пŏхәԓ йэщаԓт эԓԓәԓ, пӑ пŏх ащеԓ йэщаԓт, аԋԏи эвеԓ йэщаԓт эԓԓәԓ, пӑ эви аԋԏеԓ йэщаԓт, унтәп меԋәԓ йэщаԓт эԓԓәԓ, пӑ меԋ утпәԓ йэщаԓт эԓԓәԓ".
Христос пŏра моштәты ӑт хошты щир эԓты пŏтәртәԓ
54 Мир пеԓа йастәс: "Хун нын кев пеләк эԓты нŏх этты пӑԓәӈ шийаԓәԓты, нын мŏхты йастәԓты: "Йэрта йиԓ", пӑ щиты щи уԓԓыйәԓ;
55 пӑ хун нўм вот пŏԓәԓ, пŏтәрԓәты: "Рўва йиԓ", пӑ щиты щи уԓԓыйәԓ.
56 Ар вешпи хŏйатәт! Турәм пӑ мўв хŏрас мŏштәты хошԓәты, мўй щирән тӑм пŏра ӑт мŏштәԓԓән?
57 Мўйа пӑ нын нын щирәнән ӑт ԓэрапԓәԓән, мўй уԓты верәԓ уԓ?
58 Хун нӑӈ пеԓайэн нўр туты хŏйатэн пиԓән сўт хŏща мӑнԓән, йушән ԓўв эԓтайәԓ хŏԓт пайтәса. Ԓўв нӑӈен сўт ху хŏща аԓт йŏхтәптәсԓы, сўт ху пӑ нӑӈен касна хот шавиты ŏта аԓт мӑсԓы, щит пӑ нӑӈен касна хота аԓт вŏщкәсԓы.
59 Пŏтәртԓәм нӑӈена: хӑщәм ŏх шўкен ӑт мӑтән унты, щиԓта нӑӈ ӑт этԓән".