14
Шаббат хӑтәԓ эԓты уԓты утәԓтәпса
1 Имŏԓты шаббат хӑтәԓән Ԓўв фарисейәт эԓты уԓты и куща хота ԓэтыйа йŏхтәс, ԓывәт пӑ Ԓўвеԓ эԓты ватман тӑйсэԓ.
2 Ин щӑԓта, Ԓўв йэщаԓтәԓ йикән пўвԓәптәм муш тӑйты хŏйат этәс.
3 Тӑм вер эԓты Иисус Закона утәԓтәты икет пӑ фарисейәт иԋщәсәс: "Шаббат хӑтәԓән йӑмәԓты рӑхәԓ мўй ӑнта?"
4 Ԓыв мӑшйайән усәт. Ԓўв мушәӈ хŏйат хŏща хӑнәмтыман йӑмәԓтсәԓы пӑ эсәԓсәԓы.
5 Щи пўԉаӈ ԓывиԓаԓа йастәс: "Нын мӑтты ŏтԓән хŏща осёлән мўй хор мисән йик ўйԓыты ўс ԓыпийа ки иԓ рӑкәнәԓ, шаббат хӑтәԓ кепа, ищи кўрәмән мўй ԓўвеԓ нŏх ӑт таԓԓәԓән?"
6 Пӑ ԓыв щит пеԓа Ԓўвеԓа йŏхԓы йастәты ӑт верәтсәт.
Йŏрәӈ мойәӈ ху эԓты утәԓтәты пŏтәр
7 Иисус, вохәм мŏхет ԓӑтәӈшәк омәсты тӑхайәт пирыты щир, шийаԓәмаԓ кемән, утәԓтәты пŏтәр ԓывиԓаԓа йастәс:
8 "Хун нӑӈ порыйа вохԓайән, ԓӑтәӈ омәсты тӑхайа аԓ опса, щиты питты верәтәԓ, мӑтты вохәм мойәӈ хŏйат нӑӈ эԓтэн вŏԓаӈшәк питәԓ,
9 нӑӈен пӑ ԓўвеԓ вохәм хŏйатэн, вана шушман, нӑӈена йастәты верәтәԓ: "Тӑм омәсты лотен ԓўвеԓа мийи"; щи пŏрайән йэԓәмман мет йŏхи хӑщәм лота нӑӈен омәсты вера йиԓ.
10 Хун нӑӈ порыйа вохԓайән ки, йŏхәттэнән, мет йухәт омәсты тӑхайа опса, нӑӈен вохәм ŏтэн нӑӈ хŏщайэн вана шушман ат йастәԓ: "Пиԓху! Ўтԓышәк опса", щи пŏрайән омәсты хŏйатәт йэԓпийән нӑӈ ԓӑтәӈа питԓән,
11 кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат, ԓӑтәӈа пайәтԓа".
12 Ԓўвеԓ вохәм фарисей пеԓа йастәс: "Хун ԓэты пӑсан верԓән, пиԓйохԓан, йайԓан, рут йохԓан, нӑӈ ԉэпенән уԓты тащәӈ хŏйатԓан аԓ вохаԓән, ԓыв ищи нӑӈен ӑт ат вохԓэԓ пӑ ищиты нӑӈен йŏхԓы ӑт аԓт сŏхәптәсԓаԓ.
13 Хун ун ԓэты пӑсан вәрԓән, нўша хŏйатәт, мушмәм хŏйатәт, нŏхты хŏйатәт, сэмԓы хŏйатәт воха,
14 щи пŏрайән ŏйәӈа йиԓән, щит ԓыв нӑӈена йŏхԓы сŏхәптәты ӑт верәтԓәт, нӑӈена Турәм щирән уԓты хŏйатәт нŏх ԓыԓәӈԓәты хӑтәԓән сŏхәптәԓа".
Ун поры эԓты утәԓтәты пŏтәр
15 Щит хуԓмаԓ кемән, Ԓўв пиԓәԓән пӑсан сурыйән опсәм и ŏт Ԓўвеԓа йастәс: "Щит ŏйәӈ питәԓ, хŏй Турәм Хон Уԓәпса хŏща поры пӑсан сурыйән ԓэԓ-йищәԓ!"
16 Иисус ԓўвеԓа йастәс: "И хŏйат ун ԓэты пӑсан ԓэщатәс пӑ ар хŏйат вохәс.
17 Хун ԓэты пŏра йŏхтәс, митхуйәԓ вохәм мŏхиԓаԓ хŏща китсәԓы йастәтыйа: "Йўваты, мўй иса ԓэщатса!"
18 Пӑ иса хŏԓ и йӑха йастантәм ŏтәт иты йŏхԓы рŏвемәты питсәт. Ит йастәс: "Ма мўв хӑр ԓутсәм пӑ мӑнэм ԓўвеԓ ватты йӑхты мосәԓ; щи ԓŏват йӑм вера, ԉик аԓ тӑйа".
19 Киметәԓ йастәс: "Ма йаӈ хор мис ԓутсәм пӑ рупатайән ԓывиԓаԓ ватты мӑнԓәм; щи ԓŏват йӑм вера, нўрэм аԓ нуми".
20 Хуԓметәԓ йастәс: "Ма нэ тусәм, щишән йиты ӑт веритԓәм".
21 Щӑԓта митху йŏхи йŏхәтмаԓән, щит иса кущайәԓа йастәсԓы. Щиӈәԋща хотәӈ куща ԓыкащәс пӑ митхуйәԓа йастәс: "Кашәӈ вош хўлы хўват йӑӈха пӑ нўша хŏйатәт, мушмәм хŏйатәт, нŏхты пӑ сэмԓы хŏйатәт тый тўваԓән".
22 Щӑԓта митхуйәԓ йастәс: "Куща! Версэм, хŏты нӑӈ партсэн, хŏԓна па омәсты лот уԓ".
23 Щиӈәԋща куща митхуйәԓа йастәс: "Йушәт хўват мӑна пӑ пушасәт пўӈәԓән йӑӈха пӑ хŏйатәт йŏхәтты эвԓәптаԓән, хотэм хŏйатән ат тэкәтса.
24 Нынана йастыԓыԓәм, тўм вохәм хŏйатәт эԓты, нэмәԓты хŏйат ма ԓэтŏтэм хŏща ўӈԓәԓ ӑт хойԓыйәԓ, вохәм хŏйат ар, туп пирыйәм хŏйат шимәԓ!"
Иисус щит эԓты пŏтәртәԓ, Ԓўв утәԓтәты хŏйатәԓа уԓты - мўй щит
25 Ԓўв пиԓәԓән тэԓыйэ хŏйат шушәс; Ԓўв, йŏхԓы керԓәман, ԓывиԓаԓа йастәс:
26 "Хŏй Ма хŏщайэма йŏхәтәԓ ки, щӑԓта ащеԓ пӑ аԋԏеԓ, имеԓ пӑ ԋаврэмԓаԓ, йайԓаԓ пӑ ŏпиԓаԓ, пӑ апщиԓаԓ, пӑ хŏԓна ԓўв уԓәпсайәԓ нŏпсәԓ эԓты хŏԓт ӑт вŏщкәԓԓы ки, щит Ма утәԓтәты хŏйатэма уԓты ӑт верәтәԓ.
27 Щӑԓта хŏй ԓўв пернайәԓ ӑт туԓԓы пӑ Ма йўпемән ӑт шушәԓ, Ма утәԓтәты хŏйатэма уԓты ӑт верәтәԓ.
28 Хŏй нын эԓтан йухтас пӑԓ хот омәсты ўтщийәԓ ки, оԓӈа иԓ ӑт омәсәԓ пӑ тынәԓ ӑт ԓўӈәтԓәԓы мўй, йухтас пӑԓ хотәԓ ԓўв йэтшәптәты веритԓәԓы мўй ӑнтом?
29 Хот пӑтэԓ ўԓԓы ки пӑ йэтшәптәты щир ӑт тӑйты ки питәԓ, хŏԓыйэ ватты ŏтәт ԓўв эԓтэԓ ԋӑхты питԓәт:
30 "Тӑм хŏйат хот омәсты питщәс пӑ ӑт йэтшәптәсԓы".
31 Мўй пӑ мӑты хон ики па хон хŏща ԉаԉа мӑнтаԓ йэԓпийән иԓ ӑт омәсәԓ пӑ оԓәӈән мŏхиԓаԓ пиԓән ӑт ŏшйащәԓ, ԓўв йаӈ щŏрәс ԉаԉәсты йохԓаԓ пиԓән а мўй йурәӈ, щи, ԓўв пеԓайәԓ йиты, па хон ики хус щŏрәс ԉаԉәсты йŏх йэщаԓт ԓойты а мўй верәтәԓ?
32 Ӑнта ки, щит йэԓән уԓтаԓ сыс, ԓўв щитәԓ хŏща хŏйатәт китәԓ, ԉаԉԓы уԓәпса вохты урәӈән.
33 Щиты нын эԓтан кашәӈ хŏйат, хŏй мўйәԓ-кашӈәԓ эԓты ӑт ки верәтәԓ йирԓәты, Ма утәԓтәты хŏйатэма уԓты ӑт верәтәԓ.
34 Сŏԓ - щит йӑм ŏт; туп сŏԓ эпԓәԓ уштәԓԓы ки, хŏты ԓўвеԓ йӑԓпа сŏԓаӈа верты?
35 Ӑнта мўва, ӑнта ԋащама ӑт рӑхәԓ; ким ԓўв вŏщкәԓа. Хŏй хуԓты кеша пӑԓ тӑйәԓ, ат хуԓәԓ!"