16
Ӑнтом вещкат хот шавиты пӑ ԓэщатты хŏйат эԓты утәԓтәты пŏтәр
1 Ԓўв пӑ утәԓтәты йохԓаԓа йастәс: "И тащәӈ хŏйат хотәԓ-вещәԓ шавиты пӑ ԓэщатты хŏйат тӑйәс. Щитэн эԓты ԓўвеԓа айкеԓ туса, мӑтты ԓўв пŏрмасԓаԓ посатәԓ;
2 щӑԓта, ԓўвеԓ вана вохсәԓы пӑ йастәс: "Мўй ма нӑӈ эԓтэн хуԓԓәм? Йаста, хŏты хот шавиты пӑ ԓэщатты верәт версән, щиӈәԋща ма хŏщайэма рупитты ӑт питԓән".
3 Щишән щи хŏйат ԓўв турмәԓән нумәсыйәԓ: "Хŏты нэриты? Ма кущайэм хот шавиты пӑ ԓэщатты верэм нŏх ўԓԓы; мўв хирты йур ӑт тӑйԓәм, ԓэтŏт вохты йэԓәмԓайәм;
4 ԓыв хотԓаԓа ма ат ўсайәм, уйәтԓэм, мўй верты, хун хот шавиты пӑ ԓэщатты вер эԓты пўӈԓа пайәтԓайәм".
5 Пӑ кущайәԓ хŏща артнайәӈа уԓты хŏйатәт ԓӑтәԓ щирән вохсәԓы, пӑ оԓәӈ хŏйат ищмәсԓы: "Мўй арат артна нӑӈ кущайэм хŏща тӑйԓән?"
6 Щитәԓ йастәс: "Сот мера оливка вŏй". Щӑԓта щитәԓа йастәс: "Артна нэпекен ўйи, пӑ сорашәк иԓ опса, хӑнши: ветйаӈ".
7 Щӑԓта кимет артнайәӈ хŏйата йастәс: "Нӑӈ пӑ мўй арат артна тӑйԓән?" Ԓўв йŏхԓы йастәс: "Сот мера нŏви ԓат сэм". Щӑԓта ԓўвеԓа йастәс: "Артна нэпекен ўйи пӑ хӑнши: ԋийәԓйаӈ".
8 Хотәӈ куща хот шавиты пӑ ԓэщатты ӑнта вещкат хŏйатәԓ ишәксәԓы, нŏпсәӈа вермаԓ урәӈән; тӑм йисән уԓты пŏхәт ԓыв хŏрпи ŏтԓаԓ кўтән нŏви турәм пŏхәт эԓты нŏпсәӈшәкәт.
9 Ма пӑ нынана пŏтәртԓәм: нын пиԓйохәт ԓэщататы нӑрәӈ тащ-вещ ŏнтасән, ԓуԓән, хун нўшайа йиԓты, ԓыв нынан и пўша уԓты тӑхайа ат ўсэԓ.
10 Ай верән вещкат ŏт, щит ун верән па вещкат, ай верән ӑнта вещкат ŏт, щит ун верән ищи ӑнта вещкат.
11 Щишән, нын нӑрәӈ тащ-вещ тӑйман вещката ӑт усты ки, хŏй нынана вещката уԓты тащ-вещ эвԓәптәԓ?
12 Пӑ па ŏт тащ-вещ хŏща вещката ӑт усты ки, хŏйән нынана нын кешайән уԓты ŏт мӑԓа?
13 Нэмәԓты митху кӑт куща пеԓа уԓты ӑт верәтәԓ: мўй пӑ итәԓ ԉикән этты питԓәԓы, киметәԓ пӑ сӑмәӈа тӑйты питԓәԓы, мўй пӑ итәԓа сӑмәӈа рупитты питәԓ, киметәԓ эԓты пӑ йŏвра ватты питәԓ. И пўԉаӈ Турәм пеԓа пӑ тащ-вещ пеԓа уԓты ӑт верәтԓәты".
Христос фарисейәта йэԓпи йастәты вер
14 Щит иса ŏх сӑмәӈа тӑйты фарисейәтән па хуԓса, пӑ ԓыв Ԓўвэԓ ԋӑха ԋӑхсэԓ.
15 Ԓўв ԓывиԓаԓа йастәс: "Нын хŏйатәт йэԓпийән нынан тўӈа-щира уԓты ŏтәта айәԓԓәԓән, туп Турәмән нын сӑмԓән уйәтԓайәт, хŏйатәт хŏща мўй ԓӑтәӈ, Турәм йэԓпийән щит ԋим".
16 Закон пŏра пӑ Турәм йасәӈ туты хŏйатәт пŏра Иоанн унты ус; ин ўш эԓты Турәм Хон Уԓәпса Йӑм айкеԓ эԓты сыйәӈа пŏтәртԓа, пӑ кашәӈ хŏйат йур вевән ԓыпийа ўратәԓ.
17 Туп сорашәк турәм пӑ мўв хŏԓты пеԓа ушԓәтән, Закон йасӈәт эԓты и хӑнши нўвийэ хŏԓты хун ушәԓ.
Христос имеӈән–икеӈән кӑтна мӑнты вер эԓты утәԓтәԓ
18 Щит, хŏй имеԓ пиԓән кӑтна мӑнәԓ пӑ па ими туԓ, пакрасԓәԓ, пӑ щит, хŏй икеԓ пиԓән кӑтна мӑнәм ими вана ўԓԓы, пакрасԓәԓ.
Тащәӈ хŏйат пӑ Лазарь эԓты утәԓтәты пŏтәр
19 И тащәӈ хŏйат ус, ԓўв тынәӈ питы ўрты ԓумтәма пӑ пирыйәм ухәԓ щӑшкана ԓумәтԓыйәс пӑ кашәӈ хӑтәԓ поры пӑсан верыԓыйәс.
20 Щӑԓта пӑ Лазарь нэмпи и куԋар хŏйат ус, ԓўв пушас овәԓ иԓпийән керәтԓыйәс, эԓәԓ ԓайӈәӈ ԋўләмән лӑп каритәм
21 пӑ тащәӈ ики пӑсан эԓты иԓ рыйты пўләта ԓуԓән хŏԓна амәтман ус, сӑмәԓ вŏԓәттыйа, ампәт вана йŏхтыԓысәт пӑ ԓўв карԓаԓ ԋŏԓыԓысԓаԓ.
22 Куԋар ху пӑрәс пӑ ԓўв ангеләтән Авраам хŏща туса. Тащәӈ ики па пӑрәс, пӑ мўва иԓ лоттәса.
23 Иԓта турәмән шукащман ус, ԓўв сэмԓаԓ нŏх аԓәпсәԓы пӑ йэԓән Авраам, ԓўв пўӈԓәԓән пӑ Лазарь ики шийаԓәс.
24 Такан ўвман йастәс: "Авраам ащи! Ма урӈемән сӑмен ат ԋŏхԓәԓ пӑ Лазарен киты, ԓўй тӑйәԓ йиӈка ат метшиԓыԓԓы пӑ ԋаԓмем ат йолхәԓԓәԓы, тӑм тўт хŏща щикем шукащԓәм!"
25 Авраам йастәс: "Пŏхийэ, нумәԓми, нӑӈ йӑмен уԓмен сыс мŏщатсэн; Лазарь пӑ – туп атәм тӑйәс. Ин пӑ ԓўв тӑта тŏрамтыйәԓ, нӑӈ пӑ шукащԓән;
26 щи тўмпийән мўӈ пӑ нын кўтәнән ун ус шики верман уԓ, тӑԓта нын хŏщайән мӑнты ԓӑӈхаты ŏтәт ӑт веритԓәт щи мӑнты, ищиты щиԓта мўӈ хŏщайэв ӑт ўншиԓыԓәт".
27 Щиӈәԋща тащәӈ ху йастәс: "Щи ԓŏват йӑм вера, ун ащи, ма ащем хота ԓўвеԓ киты,
28 ма вет ху апщи тӑйԓәм, ԓўв ԓывиԓаԓа ат йастәԓ, ԓуԓән ԓыв пӑ тӑм шукәӈ тӑхайа ӑт аԓ йŏхәтсәт".
29 Авраам ԓўвеԓа йастәс: "Ԓыв Моисей пӑ Турәм йасәӈ туты икет тӑйԓәт; ԓывиԓаԓ ат хуԓәтԓәт".
30 Ԓўв пӑ йастәс: "Ӑнта, Авраам ун ащи, туп хун пӑрәм хŏйатәт эԓты ԓыв хŏщайэԓ мӑтты ŏт йŏхәтәԓ ки, щи пŏрайән ԓыв кӑрэкԓаԓ эԓты керԓәԓәт".
31 Щӑԓта Авраам ԓўвеԓа йастәс: "Моисейа пӑ Турәм йасәӈ туты икета ӑт хуԓәтԓәт ки, пӑ пӑрәм хŏйатәт эԓты мӑтты ŏт нŏх ԓыԓәӈԓәс ки, хун эвәԓԓәт".