23
Христос Пилат йэщаԓт
1 Щи арат хŏйат хŏԓыйэ нŏх ԓойсәт пӑ Ԓўвеԓ Пилат хŏща тусэԓ,
2 щӑԓта Ԓўвеԓ нўрмәԓтты питсэԓ, пŏтәртԓәт: "Мўӈ мŏштәсэв, тӑм Ху мирэв йŏвра хўщԓәԓы пӑ, кесарьа налог мӑты ӑт эсәԓԓәԓы, Ԓўвеԓ Христос Хона айәԓԓәԓы!"
3 Пилатән Ԓўв иԋщәсса: "Нӑӈ Иудейәт Хон?" Иисус ԓўвеԓа йŏхԓы йастәс: "Нӑӈ щиты йастәԓән".
4 Пилат Турма йир верты хŏйатәт ŏх икета пӑ мир пеԓа йастәс: "Ма нэмәԓты нўр тӑм хŏйат хŏща ӑт уйәтԓәм".
5 Туп ԓыв ўрайԓаԓ нŏх пайәтԓыԓаԓ, пŏтәртман, мӑтты ки Ԓўв Иудея ԓŏватән, Галилея эԓты ўйман тӑм вош унты, мир утәԓтыман, йэшащты хўщԓәԓы.
6 Пилат Галилея эԓты хуԓмаԓ кемән, ищмәс: "Ԓўв мўй Галилея мўв ху?"
7 Щӑԓта, Ԓўв Ирод хон мўв эԓты уԓтаԓ ŏша пайәтмаԓ кемән, Ԓўвеԓ Ирод хŏща китсәԓы. Ирод щи хӑтԓәтән ищи Иерусалим вошән ус.
Ирод Христос такан иԋщәсәԓ
8 Ирод Иисус шийаԓәмаԓ кемән, нŏх амтәс, ԓўв Иисус хўвән ватты ԓӑӈхаса, Ԓўв эԓтайәԓ ар хуԓԓыйәс, щишән. Щӑԓта пӑ мӑтты пищ Ԓўв эԓтэԓ шийаԓәты нумәсыйәс,
9 пӑ Ԓўвеԓ арсыр вер эԓты иԋщәссәԓы, туп Иисус ԓўвеԓа нэмәԓты ӑт йастәс.
10 Турма йир верты хŏйатәт ŏх икет пӑ щӑԓта Закона утәԓтәты йох ванән ԓойсәт пӑ Ԓўвеԓ шек нўрисэԓ.
11 Ирод соԓтанԓаԓ пиԓән Ԓўвеԓ иԓ ԋэрмаԓ пӑ ԋӑха ԋӑхмаԓ йўпийән, хон сŏха Ԓўвеԓ ԓумәттәсԓы пӑ йŏхԓы Пилат хŏща китсәԓы.
12 Щӑԓта, Ирод пӑ Пилат йэԓпи ԓын кўтәнән кўтәӈа усӈән, щи хӑтәԓән пӑ ԓухса верәссәӈән.
Пилат Христос йӑԓпа такан иԋщәсԓәԓы
13 Пилат пӑ, Турма йир верты хŏйатәт ŏх икет, кущайәт пӑ мир ӑкәтмаԓ,
14 ԓывиԓаԓа йастәс: "Нын ма хŏщайэма тӑм хŏйат, мир йŏвра хўщты ŏт йўкана, тусԓән; тӑта щи, ма нын уԓман ԓэрапсэм пӑ тӑм хŏйат, нын Ԓўвеԓ нўрмәԓтан щирән, нэмәԓты хŏща нўрәӈа уԓтаԓ ӑт уйәтсэм.
15 Ирод ики ищи, ма Иисус ԓўв хŏщайәԓ китыԓысэм; сŏрәм кеша, нэмәԓты верәм вер Ԓўв хŏщайәԓ ӑт уйәтса;
16 щишән, хомщийән сэкты йўпийән, ма Ԓўвеԓ эсәԓԓэм".
17 Пилата, йэмәӈ хӑтәԓ урәӈән, ԓывиԓаԓа касна хот эԓты и хŏйат эсәԓты мосәс.
18 Туп ԓыв аратэԓән хŏԓыйэ и тўрән ўвты питсәт: "Щитэн ўйи, мўӈева Варавва эсԓы!"
19 Варавва, хŏйатәт пиԓән вошәӈ мир пеԓа йэшащман уԓмаԓ урәӈән пӑ веԓтатмаԓ урәӈән, касна хота омәсман уса.
20 Туп Пилат, Иисус хŏԓт эсәԓты ўтщисԓы, пӑ ипуш па ԓывиԓаԓа такан йастәс.
21 Ԓыв туп ўвсәт: "Пернайа сэӈки! Пернайа Ԓўвеԓ сэӈки!"
22 Пилат хуԓмет пўш ԓывиԓаԓа йастәс: "Мўйсыр атәм вер Ԓўв верәс? Сŏрәм кеша, ма нэмәԓты атәм вер Ԓўв хŏщайәԓ ӑт уйәтсәм; щишән, хомщийән сэкты йўпийән, Ԓўвеԓ эсәԓԓэм".
23 Туп ԓыв, такан ўвман сурман, партсәт, Иисус пернайа ат сэкса; ԓыв пӑ Турма йир верты хŏйатәт ŏх икет ўв сыйэԓ нŏх питәс.
24 Щӑԓта Пилат, хŏты ԓыв ԓӑӈхасәт, щиты кашащәс;
25 ԓўв щит ким эсԓәс, хŏй ԓыв вохсәт, щит, хŏй, йэшащәм пӑ веԓтантәм вер урәӈән, касна хотән ус, Иисус пӑ ԓыв ԓӑӈхатэԓ щира мӑсԓы.
Христос пернайа сэкты щир
26 Хун Ԓўвеԓ туты питсэԓ, мўв хӑрәԓ эԓты шушәм Симон, Киринея мўвәӈ ики, пӑтән хŏрэмәса; ԓўв порхәԓа перна шуп пŏтса, Иисус йўпийән ат тусԓы.
27 Ԓўв йўпеԓән щи арат ар мир шушәс пӑ щи кўтән нэӈәт Ԓўв урӈәԓән такан хоԓԓәсәт пӑ йирӈәԓтысәт.
28 Ԓыв пеԓайэԓ керԓәман, Иисус йастәс: "Иерусалим эвет, Ма урӈемән аԓ хŏԓԓаты, нын урӈәнән пӑ нын ԋавремԓән урәӈән хоԓԓаты,
29 хӑтԓәт щи йŏхәтԓәт, хун йастәԓа: "Ԋаврэмән ӑт партәм нэӈәт, пӑ ԋаврем хŏԓна ӑт тайәм нэӈәт, пӑ эсәмән ӑт ԓаптыԓыйәм нэӈәт ŏй тӑйԓәт!"
30 Щи пŏрайән кев пайәта йастәты питԓа: "Мўӈ эԓтэв ӑркәмтаты!" пӑ сӑхмәта: "Мўӈев эԓт лаӈкаԓән!"
31 Вŏсты лыптәӈ йўх щиты ки верԓа, сорәм йўх пӑ мўй тӑйәԓ?"
32 Ԓўв пиԓәԓән пӑрты тӑхайа хŏԓна кӑт хорахщи туса.
33 Пӑ хун "Ŏх ԓŏв" нэмпи тӑхайа йŏхәтсәт, щита Ԓўвеԓ пернайа сэксэԓ, хŏрахщэӈән па, итәԓ йӑм пеләк сӑхат, киметәԓ пӑрта пеләк сӑхат.
34 Иисус пӑ пŏтәртәс: "Ащи, ԓывиԓаԓ нўра аԓ ўйи, мўй верԓәт, ӑт уйәтԓәт". Пос вŏщкиман, Ԓўв сŏхԓаԓ ортԓысԓаԓ.
35 Хŏйатәт ԓойсәт пӑ ватсәт. Ԓыв пиԓԓаԓән кущайәт па хўләщсәт, пŏтәртман: "Па хŏйатәт нŏх пайтыԓыйәс; Ԓўв Христос, Турәм пирыйәм Ŏт ки, Ԓўвеԓ Ԓўв нŏх aт пайәтԓәԓы".
36 Ԉаԉ йох ищиты Ԓўв эԓтайәԓ, вана хӑтыԓыман, вŏщрем ўна ўӈԓәԓа тутԓыман, хўләщсәт
37 пӑ пŏтәртсәт: "Нӑӈ - Иудейәт Хон ки, Нӑӈен Нӑӈ нŏх пайты!"
38 Ԓўв нўмпеԓән грек, рим пӑ еврей йасӈәтән хӑшман уса: "Тӑми - Иудейәт Хон".
39 Пернайа сэӈкәм и хорахщи, ԉикащман, Ԓўв пеԓайәԓ пŏтәртәс: "Нӑӈ Христос ки, Нӑӈен нŏх пайты, пӑ мўӈев па!"
40 Киметәԓ пӑ, ԓўвеԓ нŏх вŏԓәтԓәԓы, йастыйәԓ: "Турәм эԓты мўй нӑӈ ӑт пӑԓԓән, хун нӑӈ па щиты сўтәтман ӑт уԓԓайән?
41 Мин хŏты вещката сутәтсаймән, мин верԓәмән хўват мŏщатсәмән. Ԓўв пӑ нэмәԓты атәм ӑт верәс".
42 Щӑԓта Иисуса йастәс: "Мӑнэм нумәԓмийэ, Турәм Куща, хун Нӑӈ Хон Уԓәпсайэна йŏхәтԓән!"
43 Иисус ԓўвеԓа йастәс: "Йӑна нӑӈена йастәԓәм, тӑмхӑтәԓ щи Ма пиԓэмән ŏйәӈ-щўԋәӈ тӑхайән уԓты питԓән".
44 Хӑтәԓ хутмет щос ԉэп ус, мўв ԓŏватән йӑрәԏйаӈ щос унты пӑтлама йис:
45 щиӈәԋща най хурԓәс, пӑ Турәм Хот ԓыпийән йэртэп сŏх кўтԓәпәԓ эԓты кӑтна тŏхнәмтәс.
46 Иисус, сыйәӈ тўрән ўваԓман, йастәс: "Ащи! Нӑӈ йошӈиԓана Ма ԓыԓэм мӑԓэм". Щиӈәԋща, щит йастәман, ԓыԓәԓ эсәԓсәԓы.
47 Сот ԉаԉ йох ŏх ху пӑ, щи тыйәм вер пеԓа ватмаԓ эԓты, Турәм ишәксәԓы пӑ йастәс: "Йӑна пӑ тӑм хŏйат тўӈа–щира хŏйат уԓмаԓ".
48 Щит ватты йŏхтәм мир хŏԓыйэ, тыйәм вер пеԓа ватман, мевәԓаԓ эԓты ԓывиԓаԓ ԓыв сэкман, йŏхԓы мӑтсәт.
49 Хŏԓыйэ, Иисус уйтәм мŏхет, пӑ Галилея эԓты Ԓўв йўпеԓән йўвәм нэӈәт йэԓәншәк ԓойсәт пӑ щийэԓ ватсәт.
Христос ԓэщатты вер
50 Ӑктәщиты хŏйатәт кўтән Иосиф нэмпи ики ус. Ԓўв сӑмәӈ пӑ вещкат ус.
51 Ӑктәщиты тӑхайән хŏйатәт пиԓән ӑт кашащәс, ԓыв верэԓ хŏща ӑт ус; Ԓўв Иудеяйән уԓты Аримафея вошәӈ ху, Турәм Хон Уԓәпса ищи ԓавәԓман ус.
52 Пилат хŏща йŏхтәс пӑ Иисус мотавтәԓ вохсәԓы;
53 щӑԓта перна эԓты ԓўвеԓ иԓ ўйман, щи кеша уԓты пуԓән щӑшканән йŏвәрмәсԓы пӑ кев пай ԓыпийән хот йӑт ԓŏват сэврәм тӑхайа пŏтсәԓы. Щи тӑхайа хŏԓна нэмәԓт хŏйат пŏнман ӑт уса.
54 Щит шаббат хӑтԓа ԓэщатыты пŏра ус, пӑ щи хӑтԓа йиты щи питәс.
55 Иисус пиԓән Галилея эԓты йŏхтәм нэӈәт па Иосиф йўпийән шушсәт пӑ ӑпа пŏнты кев хот ватсэԓ пӑ хŏты Ԓўв мотавтәԓ пŏнман уса ищи;
ԓэԓтŏт ԓыпийән
56 воша йŏхәтмеԓән йӑм эпԓәӈ йик пӑ миро вŏй ԓэщатсәт. Шаббат хӑтәԓән Турәм партәпса йасәӈ щирән ԓыв щутщәман усәт.