6
Иисус шаббат хӑтәԓән рупитәԓ
1 И пўш, шаббат хӑтәԓән Иисус ԓатән опсәм мўв хӑр хўват шушәс. Ԓўв утәԓтәты йохԓаԓ ԋаԋ тŏрән тӑйәт мӑшсәт, йошән сыстапсыԓаԓ пӑ ԓат сэмԓаԓ йŏхи ԓэсԓаԓ.
2 Тухәԓ фарисейәт иԋщәссәт: "Мўйа нын шаббат хӑтәԓән, мўй ӑт эсәԓман уԓԓа верты, щит верԓәты?"
3 Иисус йŏхԓы йастәс: "Нын мўй ӑт ԓўӈәтсәԓән, хун Давид мŏхиԓаԓ пиԓән сӑмԓаԓ вохәмән, мўй ԓўв верәс?
4 Хŏты ԓўв Турәм Хота ԓŏӈәс пӑ Турәм кеша пŏнәм йэмәӈ ԋаԋәт усԓы, ԓэс пӑ хŏԓна ԓўв пиԓәԓән уԓәм мŏхиԓаԓа мӑсԓы, Турма йир верты хŏйатәт тўмпийа щи ԋаԋәт нэмәԓт хŏйата ԓэты ӑт эсәԓман уса?"
5 Щӑԓта Иисус ԓывиԓаԓа йастәс: "Хŏйат Пŏх шаббат хӑтәԓ хŏща па куща".
Иисус шаббат хӑтәԓән кӑшаӈ хŏйат тўмтака верәԓ
6 Па шаббат хӑтәԓән пӑ Иисус Турәм йасӈа утәԓтәты хота ԓŏӈәс пӑ утәԓтәс. Щита и хŏйат ус, ԓўв йӑм пеләк йошәԓ нŏх сорман ус.
7 Закона утәԓтәты икет пӑ фарисейәт Иисус ватман тӑйԓэԓ, шаббат хӑтәԓән хŏйат тўмтака верԓәԓы мўй ӑнтом, Ԓўв хŏщайәԓ нўр этәԓтәты урәӈән.
8 Иисус, ԓыв нŏмәсԓаԓ уйәтман, сорәм йошпи хŏйата йастәс: "Нŏх ԓойа пӑ хот кўтпа йўва". Щитэн нŏх ԓойәс пӑ хот кўтпа этәс.
9 Иисус лывиԓаԓа йастәс: "Ма нынан иԋщәсԓәм: шаббат хӑтәԓән мўй верты эсәԓман уԓԓа? Йӑм вер мўй атәм вер? Ԓыԓ этәԓтәты мўй пӑратты?" Ԓывәт иса мӑшйайәт.
10 Ԓыв пеԓайԓаԓа ӑӈкәртмаԓ йўпийән, Иисус щи хŏйата йастәс: "Йошэн йэԓ ԋиншәмты". Щитэн щиты версәԓы; ин йошәԓ кимет йошәԓ хŏрпийа пӑ йӑма йис.
11 Ԓыв пӑ пӑԓщәм ԉикән йŏхәтсайәт, кўтԓаԓән пŏтәртсәт, а мўй хŏты Иисус верты.
Кӑтхŏщйаӈ апостол пирыйты вер
12 Щи хӑтԓәтән Иисус кев пай ԓоӈԓа нŏх хуӈхәс пойәкщәты урәӈән, щита ат хўват Турәм пеԓа пойәкщәман ус.
13 Хун хӑтԓа йис, Ԓўв утәԓтәты йохԓаԓ вохсәԓы пӑ ԓыв эԓтыԓаԓ кӑтхŏщйаӈ хŏйат пирыйәс, ԓывиԓаԓ апостоләта айәԓты щи питсәԓы:
14 Симон, ԓўвеԓ Петрайа пӑ айәԓты питсәԓы, ԓўв Андрей апщеԓ па, Иаков пӑ Иоанн, Филипп пӑ Варфоломей,
15 Матфей пӑ Фома, Иаков - Алфей пŏх пӑ Зилота нэмтәм Симон,
16 Иуда - Иаков пŏх пӑ Иуда Искариот – щит щӑха Иисус пӑратты йохәт йоша мӑты ху.
17 Ԓыв пиԓԓаԓән кев пай эԓты иԓ ŏхәԓмаԓ йўпийән, Иисус пайԓы тӑхайән иԓ ԓойәс, хŏта мŏԓты кем Ԓўв утәԓтәты йохԓаԓ пӑ ар хŏйат Иудея мўв ԓŏват эԓты, Иерусалим вош эԓты, па щарәс питар мўвӈән Тир па Сидон эԓты ус,
18 Ԓыв Иисус хуԓәтты па мушԓаԓ эԓты тўмтака пайтәсты урәӈән йŏхәтсәт, щӑԓта пӑ кўԉ сŏхән шукатты ŏтәт ищи йӑма йисәт;
19 Мир xŏԓыйэ Ԓўв хŏщайәԓа хӑнәмтыты ўратԓәт, Ԓўв эԓтайәԓ йур йис пӑ хŏԓыйэ тўмтака версайәт.
Йӑм щирәт
20 Щӑԓта Ԓўв, утәԓтәты йохԓаԓ пеԓа ӑӈкәртман, йастәс: "Куԋар сӑмпи ŏтәт щўԋԓәԓты! Турәм Хон Уԓәпса нынана уԓ.
21 Ин ԓэԓԓы уԓты ŏтәт ŏй тӑйԓәты, щӑха тӑрәмԓайты! Ин хоԓԓәты ŏтәт ŏй тӑйԓәты, ԋӑхты питԓәты!
22 Нын щўԋԓәԓты, хун хŏйатәтән ԉикән этты питԓайты, хун нŏмәс кимпийән тӑйты питԓайты, пӑ ԋэрты питԓайты, нэмԓән нўрәӈа айәԓты питԓайәт, Хŏйат Пŏха эвәԓман урәӈән.
23 Щи хӑтәԓән амтәтԓыйаты пӑ ԋӑхман-йŏтман уԓаты: турәмән нын мойԓапсайԓән вŏԓаӈәт! Ԓыв ащиԓаԓ Турәм йасәӈ туты хŏйатәт пиԓән ищи щиты уԓԓысәт.
24 Туп, тащәӈ хŏйатәт, нынана шук – нын тŏрамтыты щир тӑԓаӈ тэԓән мŏщатсәԓән!
25 Ин тарәмтыйа ԓэты ŏтәт, нынана шук! Сӑмԓән вохты питԓайәт! Ин ԋӑхман уԓты ŏтәт, нынана шук – хоԓԓәты пӑ йирӈәԓтыты питԓәты!
26 Шук нынана, хун хŏйатәт иса нын эԓтан йӑма пŏтәртты питԓәт! Ԓыв ащиԓаԓ ӑнта йӑна Турәм йасәӈ туты хŏйатәт пиԓән ищи щиты уԓԓысәт!"
Турәм Хон Уԓәпсайән уԓты щирәт
27 "Нынана, Мӑнэм хуԓәтты ŏтәта, пŏтәртԓәм: нынан нўрмәԓтты хŏйатԓән мосман тӑйаԓән, йӑм вер вераты щи хŏйатәта, хŏйән нын ԉикән этԓайты,
28 нынан эӈкәрты ŏтԓәна Турәм эԓты йӑмән вохаԓән, пӑ нынана атәм верты хŏйатәт урәӈән, пойәкщаты.
29 Веш пўӈԓэн эԓты рэскийәм ŏтэна, кимет веш пўӈԓэн па шӑши, эԓты ԓумтәмен эхты ŏтэна, ԓыпи йэрнасэн ўты па аԓ йэрты.
30 Кашәӈ нӑӈ эԓтэн вохты хŏйата, мўй вохәԓ, мийи, пӑ нӑӈ ŏтэн ўйәм xŏйат эԓты ŏтэн йŏхԓы аԓ вохи.
31 Хŏты ԓӑӈхаԓайты, нын пиԓәнән хŏйатәт ат усәт, щиты ԓыв пиԓԓаԓән нын уԓаты.
32 Нынан мосман тӑйты хŏйатәт мосман тӑйԓәԓән ки, нынан мўй йӑм? Кӑрэкәӈ хŏйатәт ԓывиԓаԓа мосты хŏйатԓаԓән ищи мосман тӑйԓайәт.
33 Пӑ щи хŏйатәта йӑм вер верԓәты ки, хŏй нынан йӑм вер верәԓ, нынана мўй йӑм? Кӑрэкәӈ хŏйатәт ищи щиты верԓәт.
34 Пӑ, хŏйатәта артнайа мийԓыԓты ки, щи хŏйатәт эԓты артнайән йŏхԓы хоӈәтԓәԓән ки, нынан мўй йӑм? Кӑрэкәӈ хŏйатәт ищи кўтэԓән артнайа мийантыԓәт, йŏхԓы ищи щи арат ўты нумәсԓәт.
35 Туп нынан нўрмәԓтты хŏйатԓән мосман тӑйаԓән, йӑм вер вераты пӑ, нэмәԓты йŏхԓы ӑт хоӈәтман, артнайа мийаты; щишән нынан мойԓәпса вŏԓаӈ питәԓ, пӑ Нўм Турәм ԋаврэма уԓты питԓәты; Ԓўв кўш йӑм ӑт нумты хŏйатәт пеԓа, кўш ԉикәӈ хŏйатәт пеԓа и хŏрпийа сӑмәӈ.
36 Щиӈәԋща хŏйатәт пеԓа сӑмәӈа уԓаты, хŏты Турәм Ащан сӑмәӈ.
37 Аԓ сўтытаты пӑ нынан нэмәԓты хŏйат сўтәтты ӑт питәԓ. Аԓ ԋухмантаты, пӑ нын эԓтан нэмәԓты хŏйат ԋухматты ӑт питәԓ. Нўр аԓ нуматы, пӑ нын нўрԓән ищи йŏрэмәԓайәт.
38 Мийаты, пӑ нын па мӑԓайты: йӑм мŏртән, йовԓәм, иԓ тыԋхәм, щурщаӈа пŏнәм тэԓәӈ мŏртән хŏхәнԓәна шŏшәмԓайты; мўй сыр мерайән пŏнԓәты, щимәщ мерайән нынана пŏнты питԓа".
Сэмԓы хŏйат сэмԓы хŏйатән ватәԓтәты эԓты утәԓтәты пŏтәр
39 Утәԓтәты пŏтәр ԓывиԓаԓа па пŏтәртәс: "Сэмԓы хŏйат мўй верәтәԓ сэмԓы хŏйат ватәԓтәты? Мўв ўса мўй ӑнта кинәӈтак иԓ питԓәтән?
40 Утәԓтыты хŏйат утәԓтәты икеԓ эԓты унашәк ӑт уԓԓыйәԓ, туп утәԓтыты вер йэтшәман, кашәӈ хŏйат утәԓтәты икеԓ иты йиты верәтәԓ.
41 Мўйа нӑӈ ԓухсэн сэма питәм нўв шўк пеԓа ватԓән, нӑӈ сэменән ŏԓты павәрт шуп ӑт мŏштәԓэн?
42 Мўй щирән нӑӈ веритԓән щи ԓухсэна йастәты: "Ԓухсэм, мийи ма нӑӈ сэмен эԓты нўв шўк нŏх ўԓэм, - щи пўԉаӈ нӑӈ сэменән павәрт ӑт шийаԓәԓэн? Кӑт вешпи хŏйат! Оԓәӈән павәрт нӑӈ сэмен эԓты нŏх ўйи, щӑԓта ныты питԓа, хŏты нўв шўк ԓухсэн сэм эԓты нŏх ўԓэн".
43 И йӑм йўх атәм ԓэвпәс ӑт энмәԓԓәԓ; пӑ и вевтам йўх йӑм ԓэвпәс ӑт энмәԓԓәԓ,
44 кашәӈ йўх ԓўв энмәԓтәм ԓэвпәсԓаԓ эԓты уйәтԓа. Пеԓантыты варәс эԓты смоква вощтŏт ӑт ӑкәтԓа пӑ варәс пŏхәл эԓты – виноград ӑт ӑкәтԓа.
45 Сӑмәԓ йӑм хŏйат сӑмәԓән шавиты йӑмәԓ этәԓтәԓ, ԉикәӈ хŏйат сӑмәԓән тӑйты ԉикәԓ этәԓтәԓ, хŏйат тэԓәӈ сӑмәԓ эԓты ԓўв ўӈԓәԓ пŏтәртәԓ".
Кӑт хотӈән пӑты эԓты утәԓтәты пŏтәр
46 "Мўйа нын Мӑнэм вохԓәԓән: "Турәм Куща, Турәм Куща!" пӑ хŏты Ма йастәԓәм, щиты ӑт верԓәты?
47 Кашәӈ Ма хŏщайэма йŏхтыԓыты хŏйат пӑ Ма йасәӈԓам хуԓәтты хŏйат пӑ йасәӈԓам щирән верты хŏйат, нынана йастәԓәм ԓўв хŏй хŏрпи.
48 Ԓўв щимәщ хŏйат хŏрпи, хŏй хот омәсәԓ, хот лотәԓ мӑԓа хирсәԓы пӑ хот пӑтэԓ кев эԓты ўсԓы. Мўйа, хун йик эпәтмаԓән пӑ щи хот йикән ԋорәтман, йэша нэш пўӈԓа ԋŏхтәты ӑт верәтса, хот кев эԓты омәсман уса, щишән.
49 Ма йасӈем хуԓәтты хŏйат пӑ йасәӈ щирән ӑт верәԓ, щит хотәԓ мўв эԓты опсәм хŏйат хŏрпи, хотәԓ так пӑты ӑт тӑйәԓ; хун ун йикән ԋорәтса, и щишән иԓ ӑркәмтәс; щи хот пŏԉха шўкаԓәс".