8
Тухәԓ нэӈәт Иисуса ԋотсәт
1 Щи йўпийән Иисус вошәт куртәт хўват, Турәм эԓты сыйәӈа пŏтәртман, Йӑм айкеԓ Турәм Хон Уԓәпса эԓты тўвман, йӑӈхәс. Ԓўв пиԓәԓән кӑтхŏщйаӈ утәԓтәты йохԓаԓ усәт,
2 пӑ тухәԓ нэӈәт, хŏйтат Ԓўв кўԉ сŏх пӑ арсыр мушәт эԓты йӑмәԓтәс: Магдалинайа айәԓты Мария, ԓўв эԓтэԓ ԓапәт кўԉ сŏх ким этәс;
3 Иоанна па, Ирод хŏща хот рупата ŏх ху Хуза ийими; Сусанна, хŏԓна пӑ па имет. Тӑм нэӈәт Иисуса тӑйәм ŏхԓаԓән ԋотсәт.
Сŏхәӈ ŏтәт эԓты уԓты утәԓтәты пŏтәр
4 Хун щи арат ар мир ӑктәщәс пӑ арсыр вошәтән уԓты мŏхет Ԓўв хŏщайәԓ йŏхәтсәт, Ԓўв утәԓтәты пŏтәрән пŏтәртты питәс:
5 "Ики мўв хӑрәԓа ԓат сэм йовәԓты этәс, хун ԓўв ԓат сэмԓаԓ йŏвәԓмаԓән, тухәԓԓаԓ йуш пўӈԓа рӑкәтсәт пӑ иԓ пурәтсайәт, щищкетән ԓэсайәт;
6 тухәԓԓаԓ па кев эԓты рӑкәтсәт, тŏрән тӑйԓаԓ йэша нŏх этмисәт, йик ӑт тӑймаԓ пӑтыйән, нŏх сорсәт.
7 Тухәԓ ԓат сэмԓаԓ пуԓән кўта рӑкәтсәт, пуԓән пӑ энмәс, щӑԓта пуԓәнән лӑп аԓэмәсайәт;
8 тухәԓ ԓат сэмԓаԓ йӑм мўва рӑкәтсәт пӑ энәммеԓ йўпийән, йӑм арат ӑкәтса, иԓ йовԓәм ԓат сэм эԓты сот пўш ар". Щи пŏтәр пŏтәртмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"
9 Утәԓтәты йохԓаԓән Ԓўв иԋщәсса: "Мўй эԓты тӑм утәԓтәты пŏтәр".
10 Иисус йŏхԓы йастәс: "Нынан Турәм Хон Уԓәпса хӑԋа щирәт уйәтты мӑса, па хŏйатәта утәԓтәты пŏтәр хŏща, щиты ԓыв, ватман, ӑт шийаԓәԓәт, хуԓман, ӑт мŏштәԓәт.
11 Утәԓтәты пŏтәр щит айәԓԓәԓ: ԓат сэм – щит Турәм йасәӈ.
12 Йуш пўӈԓа рӑкнәм ԓат сэмәт хŏрпет тухәԓ йасәӈ хуԓты хŏйатәт, хŏйтат хŏща йухәт хиԋ йŏхәтәԓ пӑ щи йасәӈ сӑмԓаԓ эԓты нŏх уԓԓы, ԓыв ӑт ат эвәԓсәт пӑ нŏх ӑт ат пайтәссәт.
13 Кев эԓты питәм ԓат сэмәт хŏрпет тухәԓ хŏйатәт, амәтман йасәӈ вана ўԓәт. Туп ԓыв ԓэр ӑт тӑйԓәт, оԓәӈән эвәԓԓәт, хун хўщәпса этмәԓ, йŏхԓы ԓэԓәпԓәт.
14 Пуԓән кўта рӑкнәм ԓат сэмәт хŏрпет тухәԓ йасәӈ хуԓты хŏйатәт, туп ԓыв айән-айән кашәӈ хӑтәԓ верԓаԓән, тащәӈ пӑ каш хŏрпи уԓәпсайән йŏхи пайәтԓайәт, пӑ щи йасәӈ нэмәԓтыйа ӑт йиԓ.
15 Йӑм мўва питәм ԓат сэмәт хŏрпет тухәԓ хŏйатәт, хŏй йасәӈ хуԓмеԓ йўпийән йӑм пӑ вещкат сӑмԓаԓән шавиԓэԓ, пӑ щи йасӈеԓ ун йӑм вер верәԓ"; Щит йастәмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"
Тўт сун эԓты уԓты утәԓтәты пŏтәр
16 Нэмәԓты хŏйат тўт сун ўщәтмаԓ йўпийән, хŏшамән лӑп ӑт пŏнԓәԓы, мўй пӑ иԓ ӑт хӑԋатԓәԓы, хŏԓна пӑ тўт акԓа нŏх опсәԓԓәԓы, ԓŏӈты хŏйатәта нŏви ат ныса.
17 Нэмәԓты хӑԋа ӑнтом, мўй эԓпа ӑт ат этәс, пӑ нэмәԓты хӑԋатәм ӑнтом, мўй эԓпа ӑт ат аԉса пӑ эԓпа ат питәс.
18 Щӑԓта, вантаты, хŏты нын хуԓәтԓәты: хŏй тӑйәԓ, щита па мӑты питԓа, хŏй ӑт тӑйәԓ, щит эԓты, мўй тӑйты нумәсәԓ, щитәԓ па нŏх ўԓа.
Христос Ԓўв апщиԓаԓ
19 Ԓўв хŏщайәԓ аԋԏеԓ пӑ ху апщиԓаԓ йŏхәтсәт, хŏйатәт кўт эԓты вана мӑнты ӑт верәтсәт.
20 Иисуса йастәса: "Аԋԏен пӑ ху апщиԓан камән ԓойԓәт, Нӑӈен ватты ԓӑӈхәԓайәт".
21 Ԓўв щиты йŏхԓы йастәс: "Турәм йасәӈ хуԓәтты пӑ йасәӈ хўват уԓты ŏтәт – щитәт Ма аԋԏем пӑ Ма ху апщиԓам".
Так вот роммәԓты вер
22 И хӑтәԓән Иисус утәԓтәты йохԓаԓ пиԓән хопа ԓэԓәс пӑ йастәс ԓывиԓаԓа: "Ԓор тўм пелка ўшԓув". Щӑԓта мӑтсәт.
23 Мӑнмеԓ сыс Ԓўв иԓ вŏйәпса. Ԓорән ун вота йис, хўмпәтән эԓт хӑщ мӑнԓайәт, пӑ ԓыв туп сŏртэԓа йŏхәтсәт.
24 Иисус хŏща вана ԋўрман, Ԓўвеԓ нŏх кўрәтсэԓ пӑ йастәсәт: "Утәԓтәты Ху! Утәԓтәты Ху! Щи пӑрԓув". Нŏх киԓмаԓән, Ԓўв вот пӑ хўмпәт иԓ вŏԓәтсәԓы; щӑԓта ромәпсәт, пӑ шитама йис.
25 Щиӈәԋща Ԓўв утәԓтәты йохԓаԓ пеԓа йастәс: "Хŏта нын эвԓәпсайән?" Ԓыв, пӑԓман пӑ пакәнман, кўтэԓән пŏтәртсәт: "Хŏй щит щимәщ, вотәта па йиӈка партәԓ, Ԓўвеԓа ԓыв хуԓәтԓәт?"
Кўԉәт пурщәта воштәты вер
26 Галилея шŏма уԓты Гадара мўва йŏхәтсәт.
27 Хун Иисус ўты ŏхԓәс, Ԓўв йэщаԓтәԓ вошән уԓәм и хŏйат этәс. Ԓўв хўв тэԓән кўԉәтән ԓŏӈман уса па ԓумәтты сŏха ӑт ԓумәтԓыйәс, ӑнтом хот ԓыпийән, ӑпайәт пŏнәм кев хŏшапәт ԓыпийән ус.
28 Иисус шийаԓәмаԓ кемән, ԓўв ўваԓтәс, Иисус йэԓпийа иԓ рӑкнәс пӑ сыйәӈ тўрән йастәс: "Нӑӈен ма хŏщайэм мўй вер, Иисус, Нўм Турәм Пŏх? Нӑӈен пойәкԓэм, мӑнэм аԓ шукаты!"
29 Иисусән кўԉ тӑм хŏйат эԓты ким этты партса, ԓўв щишән ўвәс. Ин унты кўԉән ар пўш мŏщатыса пӑ шукатыса, карты кеԓән йошԓаԓ кўрԓаԓ хŏԓна иԓ йӑрыԓысайәт, щиты шависа, туп ищипа карты кеԓәт ԓўв лакки мӑшԓәԓы, пӑ кўԉән атэԓт тӑхайа воштәԓа.
30 Иисус ԓўвеԓ иԋщәссәԓы: "Нӑӈ нэмен мўй?" Щитэн йастәс: "Легион", ԓўв хŏщайәԓа шек ар кўԉ ԓŏӈман ус.
31 Ԓыв Иисус пойәксэԓ, пӑтыԓы ўса ԓыв ӑт ат китсайәт.
32 Щита, кев ԓŏӈәԓән пурәщ тащ ԓӑрпиԓәмаԓ; кўԉәт Иисус пойәксэԓ, ԓуԓән ԓывиԓаԓ пурщәт ԓыпийа ԓŏӈты ат эсәԓсәԓы. Ԓўв эсәԓсәԓы.
33 Кўԉәт хŏйат эԓты ким этмеԓ йўпийән, пурщәт ԓыпийа ԓŏксәт, пӑ пурәщ тащ кев веш эԓты ԓора иԓ керәптыйәс пӑ щита щи иԓ шуйԓәс.
34 Тащ шавийәм хŏйатәт, щит шийаԓәмеԓ кемән, сӑм мӑнман хухәԓмәсәт пӑ вошән, куртәтән уԓты хŏйатәта пŏтәртсэԓ.
35 Тыйәм вер ватты ким этсәт; Иисус хŏща йŏхәтмеԓән, ԓыв кўԉәтән хӑйәм хŏйат шийаԓәсәт, Иисус пўӈәԓән опсәс, ԓумәтԓыман, ŏшәԓән ус; щиӈәԋща, пӑԓтамәсәт.
36 Вантәм мŏхет пӑ ԓывиԓаԓа пŏтәртсэԓ, хŏты кўԉәӈ ху тўмтака йис.
37 Гадара вош ԉэп мўвән уԓты хŏйатәт хŏԓ Иисус пўӈԓа мӑнты партсэԓ, шек ун пӑԓщәмән йŏхәтсайәт, щишән. Ԓўв хопа ԓэԓәс пӑ йŏхԓы мӑнты питәс.
38 Кўԉәтән хӑйәм хŏйат Ԓўв пўӈԓәԓән уԓты пӑтән ўратәс. Туп Ԓўв ин ху щиты йастәман китсәԓы:
39 "Йŏхи хотэна мӑна, пӑ пŏтәрты, мўй нӑӈена Турәм верәс". Ԓўв мӑнәс пӑ вош хўватән сыйәӈа пŏтәртәс, мўй ԓўвеԓа Иисус верәс.
40 Хун Иисус йŏхԓы йŏхтәс, ар хŏйатән ўщайән верса, хŏԓыйэ Ԓўвеԓ ԓавәԓсәт, щишән.
Мушәӈ нэ тўмтака йиты вер
41 Щӑԓта, Ԓўв хŏщайәԓа Иаир нэмпи ики, Турәм йасӈа утәԓтәты хот куща, йŏхтәс; Иисус кўрӈән хŏща хŏмта иԓ шаншатман, Ԓўвеԓ ԓўв хотәԓа ԓŏӈты вохсәԓы;
42 ԓўв кӑтхŏщйаӈ тӑԓ ԓŏват кем эви, туп и ԋаврэм, тӑйәс пӑ щитәԓ пӑрты кема йис, щишән вохсәԓы. Хун Ԓўв Иаир пиԓән шушәс, Иисус ар хŏйатән лӑп нӑпәтса.
43 Ԓыв кўтэԓән и нэ ус, кӑтхŏщйаӈ тӑԓ кӑԓыйән этәԓтәса; ԓўв ԉэккарәта, мўйкем ŏх, пŏрмас тӑйәс, хŏԓ мӑсԓы, нэмәԓты ŏтԓаԓән йӑмәԓтты ӑт верәтса;
44 Иисус хŏща шӑш пеләк сӑхат ԓўв вана хӑтәс, Ԓўв сŏхәԓ кимԓа йошән хӑнәмтыйәс, и мŏхты кӑԓэԓ мӑнты нŏх вŏԓыйәс.
45 Щиӈәԋща Иисус ищмәс: "Хŏй Ма хŏщайэма хӑнәмтыйәс?" Хун хŏйатәт иса йастәсәт: "Ӑнтом ма, ӑнтом ма", Петра пӑ Иисус пиԓән уԓәм па мŏхет йастәсәт: "Утәԓтәты Ху, Нӑӈ ар хŏйатән керәтман ԓойԓайән, пӑ тӑӈәртԓайән, Нӑӈ хŏԓна иԋщәсԓән: "Хŏй Ма хŏщайэма хӑнәмтыйәс?"
46 Иисус пӑ йастәс: "Ӑнта, Ма хŏщайэма а хŏй хӑнәмтыйәс, Ма эԓтэм йур шўкем этмаԓ щащәԓ".
47 Ин нэ ватԓәԓы, хӑнәмтыйәм верәԓ ӑт пентәс, сӑмәԓ мӑнман, вана мӑнәс пӑ Иисус йэԓпийән хŏмта иԓ шаншантәс. Ԓўвеԓа, хŏйатәт хуԓәтман, йастәсԓы, мўй урәӈән Ԓўв хŏщайәԓ хӑнәмтыйәс, пӑ ищи кўрәмән тўмтака йис.
48 Иисус щиты йастәс ԓўвеԓа: "Эвийэм, аԓ пӑԓа, нӑӈ эвԓәпсайэнән нӑӈ нŏх пайәтсайән; йӑм нŏмәсән мӑна".
Иаир эви нŏх ԓыԓәӈԓәты вер
49 Хун Ԓўв хŏԓна щит пŏтәрмаԓән, Турәм йасӈа утәԓтәты хот куща, ԓўв хотәԓ эԓты и хŏйат йŏхтәс пӑ ԓўвеԓа йастәс: "Нӑӈ эвен пӑрәс, Утәԓтәты Ху хŏща аԓ тŏрастыйа".
50 Иисус щи йасӈәт хуԓмаԓ кемән, ԓўвеԓа йастәс: "Аԓ пӑԓа. Туп эвԓа, пӑ эвен сŏрәм эԓты нŏх пайәтԓа".
51 Ԓўв хотәԓа йŏхәтмаԓән, Иисус нэмәԓты хŏйата йŏхи ԓŏӈты ӑт эсԓәс, туп Петрайа, Иоанна па Иакова, пӑ эви ащийа, аԋԏийа.
52 Хŏԓыйэ эви урәӈән хоԓԓәсәт, ирӈәԓтысәт. Туп Иисус йастәс: "Аԓ хоԓԓаты; ԓўв ӑнта пӑрәс – ԓўв ŏԓәԓ".
53 Ԓыв уйәтԓэԓ - эви йӑна пӑрәс, щишән Ԓўв эԓтэԓ ԋӑхты питсәт.
54 Иисус ԓывиԓаԓ хŏԓ ким воштәсԓы пӑ эви йошәԓ эԓты катәԓсәԓы, такан йастәс: "Ԋаврэмийэ! Нŏх ԓойа".
55 Щӑԓта эви ԓыԓән йŏхәтса; ԓўв мŏхты нŏх ԓойәс, Иисус ԓўвеԓ ԓапәтты партсәԓы.
56 Ащеԓ-аԋԏеԓ ӑԓ пакнысыстән. Иисус пӑ нэмәԓты хŏйата щи вер эԓты пŏтәртты ӑт эсәԓсәԓы.