22
Malagizo mbuli ya kuliha
1 “Munhu yaheba ng'ombe hebu ng'hondolo na yahamchinja hebu kumuuza, kolondigwa yalihe ng'ombe watano hanhu ha ng'ombe imoja, na yalihe ng'hondolo wane hanhu ha ng'hondolo imoja.
2 Mbavi yahagogigwa ikilo kotula ng'anda ya munhu na yahakomigwa, munhu yamkomile hatendile nzambi kwa kumkoma mbavi ayo.
3 Lakini mbavi yahagogigwa na kukomigwa imisi, yamkomile katenda nzambi. Mbavi kolondigwa yalihe, kamba kabule kinhu cha kuliha, heyo mwenyego yauzigwe ili kuliha vija viyebile.
4 “Kamba mnyama kebigwa na yahakoneka yang'hali mgima kwa mbavi ayo, avo mbavi ayo yalihe miyanza mibili, iwe kwa ng'ombe hebu kihongwe na hata ng'hondolo.
5 “Kamba munhu yahawadima wanyama zake mumgunda wa munhu iyagwe, yalihe vinhu vinogile vili mumgunda wake hebu va mizabibu yake.
6 “Munhu yahabwinha moto na kulukuza mibiki ya miba na moto awo wahalokela mmigunda na kulukuza ndiya ya munhu ing'hali hainasengigwa, hebu mgunda wose wahalukula, munhu ayo yabwinhile umoto kolondigwa yalihe unanzi wose awo.
7 “Munhu yahamgwaa munhu sente hebu vinhu viyagwe yamwikile na vinhu avo vahebigwa mng'anda ya munhu ayo, mbavi yahagogigwa yalihe miyanza mibili ya vinhu avo viyebile.
8 Lakini kamba imbavi hagogigwe, mwene ng'anda kolondigwa yachole kuulongozi wa Imulungu na yalonge siyo heyo yebile vinhu va miyage.
9 “Wanhu wahamgombela ng'ombe yagile hebu kihongwe hebu ng'hondolo hebu viwalo hebu kinhu chochose chagile, na wanhu ogomba na kila munhu kolonga vinhu avo vake, wanhu awo wabili wachole kuulongozi wa Imulungu. Munhu ija yonda yoneke kaviza, komuliha miyage miyanza mibili.
10 “Kamba munhu yahamgwaa miyage kihongwe hebu ng'ombe hebu ng'hondolo hebu mnyama yoyose, yamulolele na kamba ija imnyama yahafa hebu kulumila hebu yahasoligwa na munhu kinyelegezi,
11 wanhu awo wabili wachole kuulongozi wa Mndewa Imulungu, na ayo yagweleligwe imnyama ili yamulole yaiduwile, kulagusa kamba hamwibile mnyama ayo wa miyage. Munhu mwene ayo imnyama yatogole mbuli ayo, na ayo iyagwe honda yalihe kinhu chochose.
12 Lakini kamba mnyama ayo kasoligwa kuno heyo kolola, kolondigwa yamulihe mwene ayo imnyama.
13 Kamba mnyama ayo kadigwa na mnyama wa kumuhulo na vihande viyagwe visigala, munhu yagweleligwe mnyama ayo yamulole kolondigwa yagale vihande avo kamba usindila na honda yalihe kinhu chochose.
14 “Kamba munhu yahampula mnyama wa miyage na yahalumila hebu yahafa kipindi mwenyego kahabule, kolondigwa yamulihe munhu ayo.
15 Lakini kamba mwenyego kabaho, munhu ayo yampulile honda yalihe chochose. Kamba mnyama ayo kasoligwa kwa kukodi, sente yonda ilihigwe ni ija ya kukodi.
Malagizo ga wanhu viwolondigwa kukala
16 “Munhu yahamvizila mhambe yang'hali kusoligwa na abaho kowasa nayo, kolondigwa yamfungile zengele na yamsole mhambe ayo.
17 Kamba tata wa mhambe ayo kalema mwanage sikuyasoligwe, munhu ayo yalihe sente ilondigwa kulihigwa kwa mhambe ayo.
18 “Sikuumuleke mtwanzi muhawi yawe mgima.
19 “Munhu yoyose yotenda ugoni na mnyama kolondigwa yakomigwe.
20 “Munhu yomulavila nhosa imulungu iyagwe yoyose na siyo niye Mndewa Imulungu, yakomigwe.
21 “Sikuumdununze munhu baki yokala kumwenu kwavija na mweye vivija mukala wanhu baki mwiisi ya Misili.
22 Sikuumdununze mtwanzi mgane hebu mwana mkiwa.
23 Kamba wahatenda avo, niye Mndewa nohulika kulila kwao na nowataza,
24 kwa ng'hasiliki yangu, nowakoma mna ing'hondo, na wehe zenu okuwa wagane na wanenu okuwa wabule tata.
25 “Wahamkopesha sente munhu imoja mna iwanhu zangu weli wakiwa, sikuuwe kamba wanhu okwika sente na kulonda nyongeza.
26 Kamba wahasola mgolole wa miyago kamba poni, kolondigwa umbwezele zuwa ding'hali hadinahonga,
27 kwavija awo mgolole wake uyeli nao wa kuigubika. Vino gweye kogesa yahawasa koigubika choni? Yahanililila niye nomtegeleza, kwavija niye nimema bazi.
28 “Sikuumulige Imulungu na sikuumduwile kilongozi wa wanhu zako.
29 “Sikuukawe kundavila ndiya na zabibu ili mumgunda wako.
“Ndavileni wanenu wa chaudele wa kimbigalo.
30 Vivija ndavileni wana wa chaudele wa ng'ombe na ng'hondolo zenu. Kila mwana wa chaudele wa fugo zenu yakale na mamake kwa siku saba, na siku da nane ndavileni.
31 “Mweye mokuwa wanhu zangu mung'alile. Avo sikumuje nyama ya mnyama yakomigwe na mnyama wa kumuhulo, nyama azo wapigisileni umbwa.