14
Isi ili umwambu wa kudihongela zuwa wa Yolidani yogoligwa
1 Zino azo isi ziwagweleligwe iwanhu wa Izilaeli ako mwiisi ya Kanaani. Eleazali imulava nhosa na Yoshua mwanage Nuni na ivilongozi wa zing'holo za makabila ga Izilaeli wawagolela iwanhu wa Izilaeli.
2 Isi ayo igoligwe kwa kubwanha simbi kamba Mndewa Imulungu viyalagize kubitila Musa mbuli ya ago gamakabila tisa na nusu.
3 Kwavija Musa kakala yawagwelele uhazi iwanhu wa makabila mabili na nusu ako umwambu wa kudilawila zuwa wa lwanda lwa Yolidani, lakini kwa Iwalawi hawagwelele bule uhazi wowose.
4 Kwavija mna iwanhu wa ulelo wa Yusufu gawa makabila mabili, Manase na Efulaimu. Kuduhu isi iwagweleligwe Iwalawi, ila wagweleligwa mabuga ga kukala na hanhu ha kudimila fugo zao na kwika vinhu vao viyagwe.
5 Wanhu wa Izilaeli waigola isi ayo kamba Mndewa Imulungu viyamulagize Musa.
Kalebu kogweleligwa Hebuloni
6 Abaho iwanhu wa kabila da Yuda wamcholela Yoshua ako Giligali. Kalebu mwanage Yefune ayo yakalile Mkenizi kamulongela, “Gweye kojuwa Mndewa Imulungu kamulongela Musa, imunhu wa Imulungu, ako Kadeshi Balinea mbuli ya niye na gweye.
7 Kipindi acho niye nikala na miyaka malongo mane, Musa, imsang'hanaji wa Mndewa Imulungu, viyanitumile kulawa Kadeshi Balinea nikaisungulile isi ayo. Vinibwelile nimgalila usenga kamba vinyonile mna umoyo wangu.
8 Lakini wayangu wanicholile nao wawadumbiza iwanhu, ila niye nimkweleleza Mndewa Imulungu, Imulungu wangu kwa moyo wangu wose.
9 Mna isiku ayo Musa kaiduwila, ‘Kweli isi yuukanyage kwa magulu gako yokuwa uhazi wako na ulelo wako milele, kwavija kumkweleleza Mndewa Imulungu, Imulungu wako kwa moyo wako wose.’
10 Lola, sambi Mndewa Imulungu kanika mgima kamba viyalongile miyaka malongo mane na tano tangu kipindi acho Mndewa Imulungu viyamulongele Musa mbuli ino, Waizilaeli viwakalile obita kuluwala. Sambi nina miyaka malongo nane na tano.
11 Sambi ning'hali na nguvu kamba vinikalile siku ayo Musa viyanitumile. Kamba ving'halile na nguvu kipindi acho na sambi ning'hali nazo, nodaha kuchola kuing'hondo, na kusang'hana sang'hano yoyose iyagwe.
12 Avo, sambi unigwelele isi ino ya kuvigongo iyalongile Mndewa Imulungu siku ija, kwavija gweye kuhulika siku ija kamba Waanaki wakala okala mumo, mna gamabuga gazunguluswe senyenge ya mibwe. Mndewa Imulungu yawe na niye, na niye nowawinga kamba Mndewa Imulungu viyalongile.”
13 Avo Yoshua kamtambikila Kalebu mwanage Yefune na kamgwelela buga da Hebuloni kamba uhazi wake.
14 Avo buga da Hebuloni diwa uhazi wa Kalebu mwanage Yefune, ayo Imkenizi, mbaka vino lelo, kwavija kamkweleleza kwa moyo wake wose Mndewa Imulungu, Imulungu wa Izilaeli.
15 Buga da Hebuloni ako umwaka dikala dikemigwa Kiliati Aliba, ayo Aliba kakala munhu mkulu mna Iwaanaki. Isi ayo ibwihila na kukala kuduhu ng'hondo.