15
Vinhu vimtenda munhu yafite
1 Mndewa Imulungu kamulongela Musa na Haluni,
2 “Walongele vino wanhu wa Izilaeli, ‘Mbigalo yoyose yahalava udusi, udusi awo ufita.
3 Udusi awo uwe ogendelela kulawa hebu uhaleka kulawa mbigalo ayo kokuwa kafita, udusi awo omtenda yafite.
4 Lusazi londa yawasile mbigalo ayo hebu kigoda chonda yakalile chokuwa kifita.
5 Munhu yoyose yonda yakwase lusazi lwa mbigalo ayo yafuwe viwalo vake na yakoge na heyo kokuwa kafita mbaka ichungulo.
6 Munhu yoyose yonda yakalile kinhu kiyakalile mbigalo ayo yolawa na udusi yafuwe viwalo vake na yakoge, na heyo kokuwa kafita mbaka ichungulo.
7 Munhu yoyose yonda yamkwase mbigalo yolawa na udusi yafuwe viwalo vake na yakoge, na heyo kokuwa kafita mbaka ichungulo.
8 Mbigalo yolawa na udusi yahamtemela mate munhu iyagwe munhu ayo yafuwe viwalo vake na yakoge na heyo kokuwa kafita mbaka ichungulo.
9 Kwembe jojose donda yakalile kumgongo wa mnyama dokuwa difita.
10 Munhu yoyose yonda yakwase kinhu kiyakalile mbigalo ayo kokuwa kafita mbaka ichungulo. Munhu yonda yapape kinhu acho yafuwe viwalo vake na yakoge, na heyo kokuwa kafita mbaka ichungulo.
11 Mbigalo yoyose yolawa na udusi yahamkwasa munhu yang'hali hanasunha makono gake, munhu ayo yakwasigwe yafuwe viwalo vake na yakoge na kokuwa kafita mbaka ichungulo.
12 Nongo yoyose yonda yakwase mbigalo ayo, ituligwe. Lakini kiya chochose cha mbiki kisunhigwe kwa mazi.
13 “ ‘Mbigalo yoyose yahalawa na udusi na yahahonyigwa, mbigalo ayo yabete mbaka siku saba zishe abaho yasegesigwe ukufita kwake. Yafuwe viwalo vake na yakoge mazi ga lwanda na heyo kokuwa kang'ala.
14 Siku da nane yagale huwa wabili hebu makinda mabili ga njiwa hana ulwivi lwa dihema da mting'hano kuulongozi wa Mndewa Imulungu na yamgwee mulava nhosa.
15 Mulava nhosa yawalave nhosa, imoja kwa nhosa ya kusegesa nzambi, iyagwe kwa nhosa ya kusoma moto. Baho mulava nhosa komtendela loholo da nzambi kuulongozi wa Mndewa Imulungu na kumsegesela ukufita kwake mbuli ya kulawa udusi.
16 “ ‘Mbigalo yoyose yahalawa na chelesi, yakoge lukuli lose, na heyo kokuwa kafita mbaka ichungulo.
17 Kiwalo chochose hebu ng'hwembe yahalagalilwa na chelesi kifuwigwe, na chokuwa kifita mbaka ichungulo.
18 Kamba mbigalo yahawasa na mtwanzi, na kalava chelesi baho wose wabili wakoge na okuwa na wafita mbaka ichungulo.
19 “ ‘Mtwanzi yoyose yotumika, kokuwa kafita kwa siku saba. Munhu yoyose yonda yamkwase mtwanzi ayo kokuwa kafita mbaka ichungulo.
20 Kinhu chochose kiyowasila mna ikipindi viyotumika chokuwa kifita, na kinhu chochose chonda yakikalile chokuwa kifita.
21 Munhu yoyose yonda yakwase lusazi lwake yafuwe viwalo vake na yakoge na kokuwa kafita mbaka ichungulo.
22 Munhu yoyose yonda yakwase kinhu kiyakalile mtwanzi ayo, yafuwe viwalo vake na yakoge na kokuwa kafita mbaka ichungulo.
23 Munhu yoyose yonda yakwase kinhu chochose kiyawasile hebu kukalila mtwanzi ayo, kokuwa kafita mbaka ichungulo.
24 Kamba mbigalo yahamuwasa mtwanzi ayo na idamu ya mtwanzi ayo yomtenda mbigalo ayo yavuluduke hana gamaungo gake madeke, avo mbigalo ayo kokuwa kafita kwa siku saba. Lusazi lolose londa yawasile mbigalo ayo lokuwa lufita.
25 “ ‘Kamba mtwanzi yahatumika kwa siku nyingi ng'hani kubanza viiwaga hebu kotumika mna ikipindi siyo chake baho kogendelela kukala yafitile kipindi chose viyotumika.
26 Lusazi lolose luyowasila mtwanzi ayo kipindi chose acho hebu kigoda kiyokalila, chokuwa kifita kamba viiwaga kipindi viyotumika.
27 Munhu yoyose yonda yakwase vinhu avo kokuwa kafita na yafuwe viwalo vake na kukoga, na heyo kokuwa kafita mbaka ichungulo.
28 Mtwanzi ayo yahaleka kutumika, yabete mbaka zishe siku saba ili yatendigwe yang'ale, na zahesha siku azo saba kokuwa kang'ala.
29 Siku da nane yasole huwa wabili hebu makinda mabili ga njiwa na yamgalile mulava nhosa hana ulwivi lwa dihema da mting'hano.
30 Mulava nhosa yamulave imoja kwa nhosa ya kusegesa nzambi na iyagwe kwa nhosa ya kusoma moto. Baho mulava nhosa komtendela loholo da nzambi kuulongozi wa Mndewa Imulungu ili kumsegesela ukufita kwake mbuli ya kutumika.
31 “ ‘Vino avo vonda muwazume wanhu wa Izilaeli mbuli ya ukufita kwao, ili sikuwadifitize hema jangu ding'alile dili hagati ya hewo kipindi viwokwingila mumo akuno wafita, wahatenda vivo okomigwa.
32 “ ‘Dino dijo lagizo kwa mbigalo yafitile kwavija kolawa udusi hebu kolava chelesi.
33 Vivija kwa mtwanzi yafitile kwavija kotumika, na kwa mbigalo hebu mtwanzi yoyose yafitile kwavija kolawa na kinhu chochose na vivija kwa mbigalo yafitile kwavija kamuwasa mtwanzi yotumika.’ ”