10
Mhalati za shaba
1 Mndewa Imulungu kamulongela Musa,
2 “Tenda mhalati mbili za shaba ing'ala, na mhalati azo zitoigwe kipindi cha kuwakema wanhu na kipindi cha kubena ing'hambi.
3 Mhalati zose mbili zahatoigwa hamoja, wanhu wose waiting'hane behi na gweye kuulongozi wa ulwivi lwa idihema da mting'hano.
4 Lakini kamba yahatoigwa mhalati imoja, vilongozi waiyeka wa makabila ga Izilaeli awo olondigwa kuiting'hana kuulongozi wako.
5 Mhalati ayo yahatoigwa kidogo, wanhu iwokala kuzing'hambi zili mwambu wa kudilawila zuwa wasonge kusegela.
6 Mhalati ayo yahatoigwa kidogo mwanza wa kabili, iwanhu okala kuzing'hambi za mwambu wa kusini wasonge kusegela. Kila kipindi mhalati yahatoigwa kamba avo yokuwa kilaguso cha kusonga umwanza.
7 Lakini kipindi cha kuwakema wanhu waiting'hane, mhalati azo zitoigwe kwa kugendelela siyo kidogo.
8 Wanhu wa ulelo wa Haluni, awo iwalava nhosa, awo onda wazitowe azo zimhalati. Mbuli azo muzigoge siku zose mweye na ulelo wenu.
9 “Kipindi cha ng'hondo mwiisi yenu na iwanhu owehila wahawavamila, mulave kilaguso cha ng'hondo kwa kutowa azo zimhalati ili Mndewa Imulungu, Imulungu wenu, yawakumbuke na yawahonye kulawa kwa iwanhu owehila.
10 Vivija mna ikipindi chenu cha kudeng'helela, kamba vija nyimwilinyimwili za kusimbuka kwa mbalamwezi na nyimwilinyimwili ziyagwe, mozitowa mhalati azo kipindi vimulava nhosa zenu za kusoma moto na nhosa zenu za kugala kuilumba. Baho niye Mndewa Imulungu, Imulungu wenu nowakumbuka. Niye ayo Mndewa Imulungu, Imulungu wenu.”
Waizilaeli obena ing'hambi
11 Mna isiku ya malongo mabili ya mwezi wa kabili, mwaka wa kabili toka Waizilaeli viwasegele Misili, wingu dikalile dimile uchanha ya dihema da mting'hano disegesigwa,
12 na Waizilaeli wasonga mwanza wa kusegela kuluwala lwa Sinai. Wingu dijo disegela na abaho dima kuluwala lwa Palani.
13 Kwa mwanza wa ichanduso Waizilaeli wasegela kwa kulagizwa na Mndewa Imulungu, kamba Musa viyawalongele.
14 Waja wakalile hasi ya ibendela ya kabila da Yuda, wasonga kusegela kibumbila kimoja mbaka kibumbila kiyagwe. Kilongozi wa kabila da Yuda kakala Nashoni mwanage Aminadabu.
15 Nasaneli mwanage Suali kakala kilongozi wa kabila da Isakali.
16 Na heyo Eliabu mwanage Heloni kakala kilongozi wa kabila da Zabuloni.
17 Abaho, dihema difunguligwa na wanhu wa ulelo wa Gelishoni na Melali awo wadipapile, wasonga kusegela.
18 Abaho, iwanhu wakalile hasi ya ibendela ya kabila da Lubeni, wasegela kibumbila kimoja mbaka kibumbila kiyagwe. Kilongozi wa kabila da Lubeni kakala Elisuli mwanage Shedeuli.
19 Shelumieli mwanage Sulishadai kakala kilongozi wa kabila da Simeoni.
20 Na heyo Eliasafu mwanage Deueli kakala kilongozi wa kabila da Gadi.
21 Abaho wanhu wa ulelo wa Kohati wasonga mwanza kuno wapapa viya ving'alile. Viwavikile, wavika dihema disimikigwa.
22 Abaho, iwanhu wakalile hasi ya bendela ya kabila da Efulaimu, wasonga kusegela kibumbila kimoja mbaka kibumbila kiyagwe. Kilongozi wa kabila da Efulaimu kakala Elishama mwanage Amihudi.
23 Gamalieli mwanage Pedasuli kakala kilongozi wa kabila da Manase,
24 na Abidani mwanage Gideoni kakala kilongozi wa kabila da Benjamini.
25 Kukimambukizo, waja wakalile hasi ya bendela ya kabila da Dani, wakalile kamba wakalizi wa ivibumbila vose vilongole, wasonga kusegela, kibumbila kimoja mbaka kibumbila kiyagwe. Kilongozi wa kabila da Dani kakala Ahiezeli mwanage Amishadai.
26 Pagieli mwanage Okilani kakala kilongozi wa kabila da Asheli.
27 Na Ahila mwanage Enani kakala kilongozi wa kabila da Nafutali.
28 Vino vivo viwatendile Waizilaeli kamba viwakalile mna ivibumbila vao, kila viwabenile ing'hambi na kusonga kusegela.
29 Avo, Musa kamulongela mulamu wake yokemigwa Hobabu mwanage Leueli, Mmidiani mkwe wake, “Siye tochola hanhu hohose Mndewa Imulungu kuyalongile, ‘Nowagwaa mweye hanhu hano.’ Avo, tuchole wose, na siye tokutendela ganogile, kwavija Mndewa Imulungu kalonga kotugwaa siye Waizilaeli ganogile.”
30 Hobabu kedika, “Aka niye sichola na mweye, ila nobwela mwiisi yangu kwa wanhu wa lukolo lwangu.”
31 Musa kamulongela, “Chonde sikuutuleke, kwavija gweye kojuwa hanhu ha kwika ing'hambi ako kuluwala, na kodaha kuwa kilongozi wetu.
32 Kamba wahachola na siye chochose kinogile chonda yatutendele Mndewa Imulungu, na gweye vivija kotendeligwa kinhu acho.”
Kusonga kwa mwanza
33 Avo wanhu wachola umwanza kwa siku ndatu kulawa kulugongo lwa Mndewa Imulungu. Sanduku da lagano da Mndewa Imulungu diwalongolela kuzahila hanhu ha kwika ing'hambi.
34 Kila viwakalile ochola kulawa ng'hambi imoja mbaka iyagwe, wingu da Mndewa Imulungu dikala uchanha yao imisi yose.
35 Kila kipindi sanduku vidinuligwe ili wasegele, Musa kalonga, “Inuka, gweye Mndewa Imulungu, uwapwililise iwanhu okwihila, na uwatende wakimbile kuulongozi wako.”
36 Na sanduku vidinenuligwe, Musa kalonga, “Oo Mndewa Imulungu wabwelele wanhu maelufu kwa maelufu ga Waizilaeli.”