13
Wanhu longo na wabili otumigwa
(Kumbukumbu 1:19-33)
1 Mndewa Imulungu kamulongela Musa,
2 “Watume wanhu wachole wakaisungulile isi ya Kanaani, isi yonda niwagwee wanhu wa Izilaeli. Umtume munhu imoja kulawa kila kabila, na munhu ayo yawe kilongozi.”
3 Kwa kulagizwa na Mndewa Imulungu Musa kawatuma wanhu kulawa kuluwala lwa Palani. Wanhu watumigwe wakala vilongozi wa makabila gose ga Izilaeli.
4 Gano gago matwaga ga wanhu awo.
Kabila da Lubeni, kachola Shamua mwanage Zakuli.
5 Kabila da Simeoni kachola Shafati mwanage Holi.
6 Kabila da Yuda kachola Kalebu mwanage Yefune.
7 Kabila da Isakali kachola Igali mwanage Yusufu.
8 Kabila da Efulaimu kachola Hoshea mwanage Nuni.
9 Kabila da Benjamini kachola Paliti mwanage Lafu.
10 Kabila da Zabuloni kachola Gadieli mwanage Sodi.
11 Kabila da Yusufu ndio kulonga kabila da Manase, kachola Gadi mwanage Susi.
12 Kabila da Dani kachola Amieli mwanage Gemali.
13 Kabila da Asheli kachola Setuli mwanage Mikaeli.
14 Kabila da Nafutali kachola Nabi mwanage Wofisi.
15 Kabila da Gadi kachola Geueli mwanage Maki.
16 Gano gago matwaga ga iwanhu Musa yawatumile wachole wakaisungulile isi ya Kanaani. Musa kamgwaa Hoshea mwanage Nuni, twaga diyagwe, kamkema Yoshua.
17 Musa viyawatumile wachole wakaisungulile isi ya Kanaani, kawalongela, “Avo choleni Negebu, mkakwele ivigongo,
18 mkaisungulile ili mujuwe isi ayo viili. Vivija loleni kamba iwanhu iwokala mumo wana nguvu hebu wadoda, kamba wengi hebu wadodo.
19 Loleni kamba isi ayo inoga hebu iha, na mulole kamba wanhu okala mzing'hambi hebu okala mzing'anda zizungulusiligwe.
20 Vivija isungulileni kamba isi yenyego ina mboji hebu kuduhu, ina muhulo hebu kuduhu. Mgangamale vonda mubwele soleni matunda ga isi ayo.” Kipindi acho ukala msimu wa zabibu kusonga kwipa.
21 Avo wanhu awo wachola kuisungulila isi ayo kulawa kuluwala lwa Sini mbaka Lehobu, behi na nzila ya kwingilila Hamati.
22 Wachola mbaka Negebu na wabita mbaka buga da Hebuloni. Amo wawavika Waahimani na Washeshai na Watalimai, ulelo wa Anaki. Buga da Hebuloni dikala dilongole kuzengwa kwa miyaka saba ding'hali hadinazengwa buga da Soani dili ako Misili.
23 Viwavikile kubonde da Eshikoli, wanhu awo wakanha tambi dikalile na zabibu nyingi, wasomeka lumango wadipapa wanhu wabili. Vivija wasola makomamanga na tini.
24 Hanhu aho hakemigwa bonde da Eshikoli mbuli ya ditambi da zabibu dikanhigwe na iwanhu awo wa Izilaeli kuko.
25 Viwamambukize kuisungulila isi ayo kwa siku malongo mane, wanhu awo wabwela.
26 Wabwela kwa Musa na Haluni na umting'hano wose wa Waizilaeli ako Kadeshi, kuluwala lwa Palani, walonga gose gawone na wawalagusila matunda ga isi ayo.
27 Wamulongela Musa, “Tuvika mwiisi yuututumile kuisungulila, isi ayo imema maziwa na uki! Gano gago matunda ga isi ayo.
28 Lakini iwenekae wa isi ayo wana nguvu ng'hani na mabuga gao makulu na gazunguluswa senyenge ya mibwe. Vivija tuyona mizinhu mikulu, awo iwanhu wa ulelo wa Anaki.
29 Waamaleki okala ako Negebu, Wahiti na Wayebusi na Waamoli okala kuvigongo, na Wakanaani okala behi na bahali ya Meditelania na behi ya lwanda lwa Yolidani.”
30 Lakini Kalebu kawatenda wanhu wanyamale kuulongozi wa Musa, kawalongela, “Tucholeni tukaisole isi ayo, kwavija todaha kuwahuma.”
31 Lakini iwanhu wacholile kuisungulila isi ayo na heyo, walonga, “Hatudaha kuwatowa wanhu awo, hewo wana nguvu kubanza siye.”
32 Avo wabwililisa mbuli za uvizi hagati ya Waizilaeli mbuli ya isi ayo iwacholile kuisungulila, walonga, “Isi ayo hainogile bule kukala. Vivija iwanhu wose tuwone kuko wakulu ng'hani.
33 Ako tuyona mizinhu mikulu, awo iwanhu wa ulelo wa Anaki. Siye tuyona kamba mbalangulu na hewo vivo watuwone.”