16
Kola na Dasani na Abilamu
1 Ako kumwande, Kola mwanage Ishali, mzukulu wa Kohati mwanage Lawi, hamoja na wanhu wadatu kulawa kabila da Lubeni wakala, Datani na Abilamu wanage Eliabu na Oni mwanage Peleti,
2 awo wose hamoja na vilongozi magana mabili na malongo matano, wasaguligwe na Waizilaeli wose, wamulema Musa.
3 Waiting'hana kuulongozi wa Musa na Haluni wawalongela, “Mweye mubanza ng'hani! Mting'hano wa wanhu wose ung'ala na kila munhu yeli hano kang'ala, na Mndewa Imulungu kahamoja na siye wose. Habali mweye moitenda wakulu wa mting'hano wa wanhu wa Mndewa Imulungu?”
4 Musa viyahulike avo, kaibwanha hasi kingubanguba.
5 Abaho kamulongela Kola na iwanhu wose wamkweleleze, “Mayo imitondo, Mndewa Imulungu kolagusa nani yeli wake na nani yong'ala, na heyo yonda yamsagule, komtenda yakwese behi yake.
6 Avo, tendeni vino, imitondo gweye na wanhu wako okukweleleza, soleni viya va kuhalila makala ga moto,
7 haleni makala ga moto na mugele ubani uchanha yake, abaho mvigale kuulongozi wa Mndewa Imulungu. Abaho tolola nani yasaguligwe na Mndewa Imulungu. Mweye Walawi mbanza ng'hani!”
8 Musa kagendelela kumulongela Kola, “Tegelezeni mweye Walawi!
9 Vino, mweye mokona mbuli ndodo kumwenu, Mndewa Imulungu kawasagula mweye hagati ya Waizilaeli wose, ili mumkwesele behi na musang'hane mdihema da Mndewa Imulungu, na muwasang'hanile wanhu wose?
10 Kawagwaa ukulu wa kukala behi na heyo, mweye hamoja na Walawi waenu wose. Lakini sambi vivija molonda na ulava nhosa?
11 Avo, gweye na wayago momulema Mndewa Imulungu. Mweye momuyalalila Haluni, lakini ukweli mweye momuyalalila Imulungu.”
12 Abaho Musa katuma usenga kwa Datani na Abilamu wanage Eliabu, ili weze, lakini hewo walonga, “Hatwiza bule!
13 Vino mbuli ndodo gweye kutulava Misili, isi imemile maziwa na uki, ili wize kutukoma kuno kuluwala? Abaho koitenda mkulu wetu!
14 Abaho hutugalile mwiisi imemile maziwa na uki na hutugwelele migunda ya kulima na migunda ya mizabibu. Kogizaga kodaha kuwatenda wanhu wano wawe wasuwameso? Siye hatwiza bule!”
15 Musa kagevuzika ng'hani, kamulongela Mndewa Imulungu, “Sikuuzitogole nhosa za wanhu wano. Niye sisolile kihongwe wa munhu yoyose na simulumize munhu!”
16 Musa kamulongela Kola, “Mayo gweye na wayago mwize kuulongozi wa Mndewa Imulungu. Vivija Haluni kokuwa hamoja na mweye.
17 Kila imoja wenu yasole kiya chake cha kuhalila makala ga moto, na yagele ubani na abaho yakigale kuulongozi wa Mndewa Imulungu, vose kwa vose vokuwa viya magana mabili na malongo matano, vivija gweye na Haluni, kila imoja kokuwa na kiya chake.”
18 Avo kila imoja wao kasola kiya chake cha kuhalila makala ga moto, kagela makala ga moto na ubani, abaho wachola na wema wima hana ulwivi lwa dihema da mting'hano, hamoja na Musa na Haluni.
19 Na heyo Kola kawating'haniza wanhu wose hamoja, wema wima kuulongozi wa Musa na Haluni awo wakalile hana ulwivi lwa dihema da mting'hano. Abaho ukulu wa Mndewa Imulungu uwalawilila wanhu wose!
20 Abaho Mndewa Imulungu kamulongela Musa na Haluni,
21 “Segeleni hagati ya umting'hano uno, ili niwakome wose sambi baha.”
22 Lakini Musa na Haluni wagwa kingubanguba walonga, “Go Mndewa Imulungu, gweye uli mwanduso wa ugima wa wanhu wose. Vino munhu imoja yahakutendela gehile kowagevuzikila wanhu wose?”
23 Mndewa Imulungu kamulongela Musa,
24 “Walongele wanhu, ‘Kweseni kutali na ikibanda cha Kola na Datani na Abilamu.’ ”
25 Avo Musa kachola kwa Datani na Abilamu, na vilongozi wa Waizilaeli wamkweleleza,
26 viyavikile kawalongela iwanhu, “Chonde segeleni kuna ivibanda va wanhu wano wehile, sikumkwase kinhu chao chochose, ili sikumukomigwe hamoja na hewo mbuli ya nzambi yao.”
27 Avo wanhu wasegela kutali na ikibanda cha Kola na Datani na Abilamu.
Datani na Abilamu walawa kunze na kwima hana ulwivi lwa ivibanda vao hamoja na wehe zao na wanao wose mbaka waja wakalile okong'ha.
28 Musa kawalongela iwanhu, “Sambi mojuwa kamba Mndewa Imulungu ayo yanilagize niye kutenda mbuli zino zose, na siyo notenda vinilonda.
29 Kamba wanhu wano wahafa ifa kamba siku zose wanhu wayagwe viwofa, avo mjuwe kamba Mndewa Imulungu hanitumile bule.
30 Lakini kamba Mndewa Imulungu yahatenda kinhu hakinatendigwa, na kamba isi yogubuka na kuwameza wanhu wano hamoja na vinhu vao vose, ochola hanhu kowochola wanhu wafile kuno wang'hali wagima, baho mojuwa wanhu wano wambezeli Mndewa Imulungu.”
31 Bahaja viyamambukize kulonga mbuli azo, isi igubuka hasi ya Dasani na Abilamu,
32 na iwameza wanhu awo hamoja na kae zao na wanhu wose wailumbile hamoja na Kola na vinhu vao vose.
33 Wahumulukila kowochola wanhu wafile kuno wang'hali wagima. Isi iwagubika, wose walawanya.
34 Waizilaeli wose wayagwe wakalile behi viwahulike wanhu awo olila, wakimbila walonga, “Tukimbile! Isi sikuitumeze na siye vivija!”
35 Abaho Mndewa Imulungu kagala moto uwalukuza wanhu waja magana mabili na malongo matano wacholile kulava ubani.
36 Abaho Mndewa Imulungu kamulongela Musa,
37 “Mulongele Eleazali mwanage Haluni imulava nhosa yavisegese avo iviya hana umoto, yaupwililise kutali awo umoto, kwavija viya avo ving'ala.
38 Viya avo ving'ala kwavija wanhu awo wavigala muupango wa nhosa wa Mndewa Imulungu. Avo, visole viya avo va wanhu awo wakomigwe mbuli ya nzambi zao, vilumbuligwe kwa moto ili viwe ngubiko ya upango wa nhosa. Mbuli ayo yokuwa kilaguso kwa Waizilaeli wose.”
39 Avo Eleazali imulava nhosa kavisola viya avo va shaba ya kiguzi, vigaligwe kuulongozi wa Mndewa Imulungu na wanhu waja walukuzigwe vilumbuligwa kwa moto, na ilawa ngubiko ya upango wa nhosa.
40 Mbuli ayo ikala kilaguso kwa Waizilaeli kamba munhu heli mulava nhosa, ndio kulonga halawa muulelo wa Haluni sikuyachole hana uupango wa nhosa na kusoma ubani kuulongozi wa Mndewa Imulungu. Ama sivo kokomigwa kamba Kola na wayage. Ago gose gatendigwa kamba Mndewa Imulungu viyamulagize Eleazali kubitila Musa.
Haluni kowahonya iwanhu
41 Imitondo yake Waizilaeli wose wamuyalalila Musa na Haluni walonga, “Muwakoma wanhu wa Mndewa Imulungu.”
42 Viwakalile waiting'hane kuulongozi wa Musa na Haluni kuno oiyalala, wahinduka kulola kuna dihema da mting'hano, wona wingu digubika dihema, na ukulu wa Mndewa Imulungu ulawilila aho.
43 Musa na Haluni wachola wema kuulongozi wa dihema da mting'hano,
44 na Mndewa Imulungu kamulongela Musa,
45 “Segeleni hagati ya iwanhu awo, sambi baha nolonda kuwakoma wose!” Lakini hewo wagwa kingubanguba.
46 Musa kamulongela Haluni, “Sola kiya chako cha kuhalila makala ga moto, gela makala ga moto kulawa muupango wa nhosa, abaho ugele ubani na uchole nacho himahima kwa iwanhu uwatendele loholo. Lopola! Ng'hasiliki ya Mndewa Imulungu iwavikila na utamu usonga hagati yao.”
47 Avo Haluni katenda kamba Musa viyamulongele. Kasola kiya chake na kakimbila mbaka hagati ya iwanhu wakalile waiting'hane. Utamu ukala usongile hagati ya iwanhu, kagela ubani mna ikiya chake na kawatendela iwanhu loholo.
48 Viyatendile avo, utamu awo usegela na heyo kakala hagati ya iwanhu wafile na wagima.
49 Iwanhu wose kwa wose wafile kwa utamu awo wakala elufu kumi na nne na magana saba (14,700), bila kuwapeta waja wafile mbuli ya nzambi ya Kola.
50 Utamu awo viusegele, Haluni kabwela kwa Musa hana ulwivi lwa dihema da mting'hano.