27
Wandele wa Selofehadi
1 Mala na Nuhu na Hogila na Milika na Tiliza wakala wandele wa Selofehadi. Selofehadi kakala mwanage Hefeli, Hefeli kakala mwanage Gileadi, Gileadi kakala mwanage Makili na Makili kakala mwanage Manase na Manase kakala mwanage Yusufu.
2 Avo, awo iwandele wane wamcholela Musa, wema kuulongozi wa Eleazali imulava nhosa na vilongozi wose wa Izilaeli hana ulwivi lwa dihema da mting'hano walonga,
3 “Tataetu kafa ako kuluwala. Hakalile mna iwanhu wamkweleleze Kola, ayo yamulemile Mndewa Imulungu ila heyo kafa kwa nzambi zake mwenyego, na kakala kabule wana wa kimbigalo.
4 Avo habali twaga da tataetu dipotele mna iwanhu wa Izilaeli kwavija kakala kabule wana wa kimbigalo? Avo mtugwelele uhazi hamoja na iwandugu wa tataetu.”
5 Avo Musa kaigala mbuli ayo kuulongozi wa Mndewa Imulungu.
6 Mndewa Imulungu kamulongela Musa,
7 “Azo ziwolonga iwandele wa Selofehadi za ukweli, uwagwelele uhazi hamoja na iwandugu wa tatao, waleke wasole uhazi wa tatao.
8 Abaho uwalongele Waizilaeli kamba munhu yahafa bila kuleka mwana wa kimbigalo, uhazi awo yagweleligwe mwana wa ikitwanzi.
9 Na kamba kabule mwana wa kitwanzi, avo uhazi awo wagweleligwe wakulu zake hebu wadodo zake.
10 Na kamba kabule wakulu hebu wadodo, uhazi awo wagweleligwe tata zake wakulu hebu wadodo.
11 Na kamba kabule tata mkulu hebu mdodo, avo uhazi awo yagweleligwe ndugu yake wa behi, na heyo yausole kamba wake mwenyego. Gano gago malagizo gangu kwa Waizilaeli, kamba niye Mndewa Imulungu vinikulagize.”
Yoshua kosaguligwa yawalongoze Waizilaeli
(Kumbukumbu 31:1-8)
12 Mndewa Imulungu kamulongela Musa, “Kwela uchanha ya ivigongo vino va Abalimu, uilole isi yonda niwagwelele Waizilaeli.
13 Wahamambukiza kuilola na gweye vivija kofa kamba ndugu yako Haluni viyafile,
14 kwavija hamdigogile lagizo jangu kuja kuluwala lwa Sini. Kipindi iwanhu wose viwaniyalalile kuja Meliba, mulema kulagusa ukulu wangu mgameso gao viwalondile wagweleligwe mazi.”
15 Musa kampula Mndewa Imulungu, kalonga,
16 “Go, Mndewa Imulungu wangu, gweye uli mwanduso wa ugima nokupula umsagule munhu wa kuwalola iwanhu wano,
17 na yawalongoze mna izisang'hano zao zose, ili sikuwawe kamba ng'hondolo yelibule msusilaji.”
18 Avo Mndewa Imulungu kamulongela Musa, “Msole Yoshua mwanage Nuni, imunhu yeli na moyo unogile, abaho umwikile makono,
19 na gweye umwimize kuulongozi wa imulava nhosa Eleazali na umting'hano wose na gweye umsagule yawe kilongozi wao.
20 Umgwelele hanhu ha sang'hano zako ili Waizilaeli wose wamtegeleze.
21 Heyo yamuuzege Eleazali imulava nhosa yeli na dija idibwe da kujuwa gaja igangu. Kwa nzila ayo Eleazali komulongoza Yoshua na iwanhu wose wa Izilaeli mna zimbuli zose.”
22 Musa katenda kamba viyalagizwe na Mndewa Imulungu. Kamsola Yoshua na kamwimiza kuulongozi wa Eleazali imulava nhosa na iwanhu wose wa Izilaeli.
23 Abaho kamwikila makono na kamgwaa isang'hano kamba viyalagizwe na Mndewa Imulungu.