11
1 Uvizi wa vinhu va kupimila, ngevuzo kwa Mndewa Imulungu,
lakini vipimo vitelele ajo deng'ho jake.
2 Kibuli choilumba na kinyala,
lakini wanhu wahole wana ubala.
3 Wanhu wanogile olongozwa na mbuli za ukweli,
lakini wanhu hawatamaniligwa obanangwa na uvizi.
4 Ugoli haufaya kinhu siku ya ng'hasiliki,
lakini haki yokombola kulawa mwiiifa.
5 Haki ya munhu yelibule kitala yomulongozela nzila igoloke,
lakini wanhu osang'hana gehile ogwa kwa gehile gao wenyego.
6 Ganogile ga wanhu osang'hana ganogile gowakombola,
lakini wanhu hawatamaniligwa onamatwa na kusulukila kwao wenyego.
7 Msang'hana gehile yahafa tamanilo jake najo dosegela,
tamanilo diyekile mzinguvu zake dopotela.
8 Munhu yeli na haki kokomboligwa mmagazo,
msang'hana gehile ayo yonda yengile hanhu hake.
9 Yolema kumtambikila Imulungu kowabananga wayagwe kwa mulomo wake,
lakini yeli na haki kokomboligwa kwa kutanga vinhu.
10 Wanhu wene haki wahapata ganogile buga dodeng'helela,
wasang'hana gehile wahabanangigwa wanhu oguta kwa deng'ho.
11 Buga dotangigwa kwa kumweda kwa wene haki,
lakini donangigwa kwa milomo ya wehile.
12 Yombezeli miyage hagelegeza goya,
lakini munhu mwene nzewele konyamala tuluu.
13 Kidelenya kobemhela kuno kolonga gafisigwe,
lakini yeli na loho ya kutamanilwa kokwika mbuli muumoyo.
14 Isi ilibule vilongozi yogwa,
heli na vilongozi wengi hana tindiwalo.
15 Yoilava kumulihila mgeni deni jake kolumila,
lakini yoihila zamana kana tindiwalo.
16 Mtwanzi mwene moyo unogile kotogoligwa,
na mbigalo mtatali kozahila kupata ugoli wiiyeka.
17 Munhu yeli na bazi koinogeza mwenyego,
lakini munhu msede koilumiza mwenyego.
18 Munhu yehile fungu jake doyopata da uvizi,
lakini yosang'hana ganogile kopata faida ya kweli.
19 Munhu yoiyoha kusang'hana ganogile kokuwa mgima,
lakini yosagula kutenda gehile kofa.
20 Wanhu ogesa gehile, ngevuzo kwa Mndewa Imulungu,
lakini wanhu welibule vitala awo deng'ho jake.
21 Msang'hanaji gehile hadaha kuihonya na nhaguso,
lakini weli na haki okomboligwa.
22 Mtwanzi yanogile yelibule nzewele,
kaigala na zahabu ili mmhula ya nguluwe.
23 Kusulukila kwa wene haki kohelela mna iganogile,
lakini tamanilo da wanhu wehile dohelela mna ukugundumuka.
24 Yolava vinhu vake kwa moyo unogile kokwengezelwa ng'hani,
lakini mgila kobanza kuwa mkiwa.
25 Munhu yolava kwa moyo unogile koneneha,
yomng'weza mazi iyagwe na heyo kong'wezigwa.
26 Wanhu omduwila munhu yofisa ndiya,
lakini omtambikila munhu yochuuza ndiya.
27 Yozahila kusang'hana ganogile kokwengezelwa,
lakini yozahila kusang'hana gehile kopata gehile.
28 Youtamanila ugoli wake kogwa,
yeli na haki konogezigwa kamba jani bisi.
29 Yobomola ng'anda yake mwenyego kosenga beho,
mbozi kokuwa mtumwa wa munhu yeli na ubala.
30 Tunda da munhu yeli na haki uwo ugima,
na yeli na ubala kokema wanhu.
31 Kamba munhu yeli na haki kolihigwa hano mwiisi,
avo msang'hana gehile na mwene nzambi obanza ng'hani.