23
Nongezi ya 6
1 Wahakala hamoja na mtawala kuna indiya,
mulole heyo yeli kuulongozi wako.
2 Ikimile ng'hani kusulukila kwako ndiya,
hata kamba gweye kujaga ng'hani.
3 Sikuusulukile ndiya zake zinogile,
vodaha kukuvizila.
Nongezi ya 7
4 Sambi uigaze kuzahila ugoli,
uwe na nzewele na leka kutenda avo.
5 Kufing'hiliza na kufumbula ugoli ulawanya,
kamba ota mbawa,
uguluka kuulanga kamba mhungu.
Nongezi ya 8
6 Sambi uje lujo lwa munhu mgila,
na sambi usulukile ndiya zake zinogile,
7 kwavija moyo wake opeta chuuja.
Kokulongela, “Diya na ing'wa!”
Lakini moyo wake hauli hamoja na gweye.
8 Kodeka kija kiudile,
na mbuli zose ziulavile za kumtogola zokuwa bule.
Nongezi ya 9
9 Sikuulonge mbuli zako hamoja na mbozi,
kwavija kozibezeli mbuli zako za nzewele.
Nongezi ya 10
10 Sambi usegese zimbaka za umwaka,
hebu kuwaboka wakiwa migunda yao,
11 kwavija Imulungu ayo mkombola wao, kana udahi,
koigombela haki yao na gweye kokoneka kubananga.
Nongezi ya 11
12 Tumia nzewele zako kukweleleza kuzumwa,
tumia magwiti gako kuhulika mbuli za kutanga vinhu.
Nongezi ya 12
13 Sambi uleke kumzuma mwana,
wahamzabula mbalati hafa bule.
14 Wahamzabula mbalati,
koukombola ugima wake na kuzimu.
Nongezi ya 13
15 Mwanangu, kamba moyo wako wahawa na ubala,
moyo wangu vivija okuwa na deng'ho.
16 Moyo wangu odeng'helela,
mulomo wako wahalonga mbuli zinogile.
Nongezi ya 14
17 Moyo wako sambi uwonele migongo weli na nzambi,
lakini gweye gendelela kumdumba Mndewa Imulungu siku zose.
18 Kweli kuna siku zinogile ako kumwande,
na tamanilo jako honda jage bule.
Nongezi ya 15
19 Tegeleza mwanangu, uwe na ubala,
na ulongoze moyo wako mwiinzila inogile.
20 Sambi uwe imoja wa wang'waji ugimbi,
na wamelo wa kulonda nyama,
21 kwavija wang'waji na wamelo ohelela muukiwa,
na utulo owatenda wavale viwalo videgeke.
Nongezi ya 16
22 Mtegeleze tatako yakulelile,
sambi umbezeli mamako yahawa mvele.
23 Gula ukweli, sambi uuchuuze,
gula ubala na mafundizo na nzewele,
24 Tata wa mwana yeli na haki komema deng'ho,
na yolela mwana yeli na ubala kodeng'helela.
25 Wanogeze tatako na mamako,
mamako yakulelile yadeng'helele.
Nongezi ya 17
26 Mwanangu, nitegeleze kwa moyo wako wose,
meso gako gakweleleze nzila zangu.
27 Mtwanzi mgoni kaigala na kolongo tali,
mwehe mgoni kaigala na kisima kisisili.
28 Heyo konyaluka kamba mbokaji,
kowahonza wambigalo wengi sambi watamaniligwe.
Nongezi ya 18
29 Nani yotowa lukenze?
Nani yeli na lusikisiki?
Nani yeli na ndwagi?
Nani yoiyalala?
Nani yalumile bila chanduso?
Nani yeli na meso madung'hu?
30 Waja waiyeka kipindi chose wa mwiidivai,
waja ozahila divai ihanganyigwe.
31 Sambi uisulukile divai hata kamba yahawa ndung'hu,
hata kamba yometameta mkikonha,
na yohulumuka goya wahaing'wa.
32 Wahesha kuing'wa yoluma kamba nyoka,
yohoma kamba nyoka yeli na sumu.
33 Meso gako gokona maluweluwe,
moyo wako olava mbuli za chakachaka.
34 Koyona kotigisika kamba munhu yowasa mwiimeli kuno kuna kukuzumbi,
hebu munhu yatambalale mwiinzabi ya meli.
35 Kolonga, “Wanizabula, lakini silumile,
wanitowa, lakini sigesa.
Nolamuka lini?
Leka nizahile king'waji kiyagwe.”