26
1 Heshima iyogweleligwa mbozi haifaya,
iigala na seluji ya kipindi cha zuwa kali,
hebu mvula ya kipindi cha kusenga.
2 Kamba viili kwa shomolo hebu kinega viwoguluka,
vivo ili kwa duwilo dilibule kilamuso hadimpata munhu.
3 Mbalati kwa falasi, lijamu kwa kihongwe,
mbalati kwa mgongo wa mbozi.
4 Sambi umwidike mbozi kwa ubozi,
buleavo na gweye koigala na heyo.
5 Mwidike mbozi kuigala na ubozi wake,
sambi yaiyone mbala ng'hani.
6 Yogala usenga kubitila mbozi,
kamba kukanha mgulu hebu kung'wa sumu.
7 Kamba magulu ga mbetembete vigotinga,
vivo viili kwa nongezi mmulomo wa mbozi.
8 Kumgwaa heshima mbozi,
kamba kufunga dibwe mna ing'humbewe.
9 Kamba munhu yakoligwe yogeza kung'ola mwiba mumkono wake,
vivo viili kwa nongezi mmulomo wa mbozi.
10 Munhu yomuajili mbozi hebu munhu yobita nzila,
kamba munhu yopigisa mgoha kohoma kila munhu.
11 Mbozi yobwelela ubozi wake,
kaigala na umbwa yoja gaja gayadekile.
12 Wahamona munhu koiyona mbala,
nokulongela mbozi kana tamanilo kubanza heyo.
13 Munhu mnyeke kolonga, “Ako kunze kuna simba,
sidaha kuchola.”
14 Kamba vija mulango vuutinga kunze na mgati,
vivo viili kwa mnyeke viyohinduka mulusazi lwake.
15 Munhu mnyeke kougela mkono wake mwiisahani ya ndiya,
lakini kodonha kwinula kugala mmulomo.
16 Mnyeke koiyona mbala,
kubanza wanhu saba weli na nzewele.
17 Yoingiza muugomvi siwake,
kaigala na munhu yomgoga magwiti umbwa yobita.
18 Kamba munhu yeli na lukwale viyochezela miwenge ya moto,
hebu migoha ya ifa,
19 vivo viili kwa munhu yomvizila miyage,
labaho kolonga, “Ng'hala nokugeweza tu!”
20 Kamba habule ngodi moto ofa,
kamba habule mdetaji ugomvi omala.
21 Kamba vigeli makala hebu ngodi vizikong'heza moto,
vivo mgomvi viyokong'heza ugomvi.
22 Mbuli za kidelenya kamba ndiya inogile,
ikwingila mbaka muutumbo.
23 Kamba shaba ibakigwe mwiinongo,
vivo vizili mbuli zamulile zilawa mmoyo wihile.
24 Munhu yokwihila kofisa kwiha kwake kwa mbuli zinogile,
lakini mmoyo wake kofisa uvizi.
25 Yahalonga mbuli zinogile sambi umtogole,
kwavija mmoyo wake umema ngevuzo saba.
26 Kodaha kufisa kukwihila kwake,
lakini gehile gake gogubuligwa mumting'hano.
27 Yohimba simo kokwingila mwenyego,
na yobimbilisa dibwe dombwelela mwenyego domuhonda.
28 Munhu yolonga uvizi kowehila waja yowalumiza,
na mulomo ulonga mbuli kamba za kweli ogala ubananzi.