13
Kuhapukana kwa Ablamu na Lutu
1 Ablamu nkuuka ku Misili, nkuhwena kulilanga lya Negebu. Ablamu ávele na n'jawe na dimali dyake dyammalele pamo na Lutu.
2 Mmahiku anelo Ablamu ávele na dimali dyohe namene, yani makuwa la anyama na dihela na zahabu.
3 Anepo Ablamu nkuuka, nkupita wanachionga-onga kulodya ya ku Beseli. Nkunahwika pachinu panadengile n'gongwe anepo patandi, ching'ati imanga ya Beseli na Ai,
4 pachinu apala panadengile chitala. Anepo Ablamu nkunnyuwa kavila Yahwe kwa lina lyake.
5 Uchocho, Lutu nanang'e ávele na makuwa la dingandolo na dimbudi na ding'ombe pamo na migongwe yachiikala na vanu vake.
6 Isabu ya vanyama uvanavenavo yavele ing'ulu namene, na chilambo achila nanga pachinatosije Ablamu na Lutu kuikala pamo,
7 kwa kuva, mmahiku anelo venedi va chilambo anecho, yani Vakanaani na Vapelizi váikalanga eneo ulyolyo. Bahi vachunga vanga Ablamu na vanga Lutu nkutandilika kupwatana.
8 Bahi Ablamu nkunnyaulila Lutu kuchidoni, “Nangu na wako tunapwatane, wala vachunga vangu na vako navanang'o vanapwatane, kwa kuva nangu na wako nni munu na mwanawe.
9 Lola chilambo achino chammalele chivêle muyo mwako. Bahi tuhapukane, wako ukàhwena m'bali wa kunchinda, nangu nìmbehwena m'bali wa kunkono, na ukàhwena m'bali wa kunkono, nangu nìmbehwena m'bali wa kunchinda.”
10 Lutu palolite saana, nkulwona luhunde lwa muto wa Yoludani. Lutu áluwene luhunde anelwo kuva lùvele na medi lohe namene kila pachinu. Eneo lya luhunde anelwo mpaka ku Soali lyanikatapala muchi bustani ya Adeni, yanaivikile Yahwe, na muchi chilambo cha ku Misili. Kwa kuva, uhiku anewo wavele kabla Yahwe akànambikwondonga imanga ya Sodoma na Gomola.
11 Bahi Lutu nkulitandolela luhunde lwammalele lwa muto wa Yoludani, nkulodya m'bali wa mashaliki. Anepo Ablamu na Lutu nkuhapukana.
12 Ablamu nkuikala nchilambo uchila cha Kanaani, na Lutu nkuhwena unadenga migongwe yake pepi na imanga ya Sodoma na kuikala ching'ati dimanga divêle nnuhunde lwa muto wa Yoludani.
13 Henga vanu va ku Sodoma vávele vanu vatênda lahakalenge na va kupundiha kutenda masambi pameho panga Yahwe.
Ablamu àlangujwa chilambo
14 Bada ya Lutu kuhapukana na Ablamu, Yahwe nkunnyaulila Ablamu kuchidoni, “Kutandikila anepo pauvele, lola saana mipata yammalele, kaskazini na kusini na mashaliki na mangalibi.
15 Chilambo anecho chammalele chiuchona nìmbekwing'a wako na vanu va nnukolo lwako chììve chenu, vyaka vyammalele.
16 Vanu va nnukolo lwako nìmbevatenda kuva vohe namene, vanu vakávalangika, malinga litutunga lya pachilambo chilikavalangika!
17 Bahi imila upite uwonga-onga nchilambo achino, ulehu wake na upana wake, kwa kuva, nìmbekwing'a wako.”
18 Bahi Ablamu nkuusa migongwe yake, nkuhwena unaikala ku Hebloni, pepi na milandi ya chinnungu yanga Mamle. Aneko Ablamu nkun'dengela Yahwe chitala.