30
1 Laheli pawene kuva nanga pammelekedile Yakobo vavana, nkummikila wiu adadaye, nkunnyaulila Yakobo kuchidoni, “Nguvelekele vana. Ikànave uchocho, bahi nìmbekuhwa.”
2 Yakobo nkunsunalila Laheli, nkunnyaulila kuchidoni, “Kwani nangu ngùjukile kuva Nnungu akutendîle unààve na vana?”
3 Laheli nkunnyang'ula kuchidoni, “Biliha ntumwa wangu wachimahe ànipwawa. Bahi lala nawe uchinga unguvelekele vana, nanangu ngupate vana kupitila nang'e.”
4 Bahi Laheli nkumwing'a Yakobo Biliha ntumwa wake, uchinga ààve n'jawe, na Yakobo nkulala nawe.
5 Biliha nkupata chitumbo, nkummelekela Yakobo mwana wachilume.
6 Laheli nkuchema lina Dani, kwa kuva áhawile kuchidoni, “Nnungu ànining'a haki yangu, ànipilikana kuyuwa kwangu na kuning'a mwana wachilume.”
7 Biliha ntumwa wanga Laheli, nkupata kavila chitumbo, nkummelekela Yakobo mwana wavili wachilume.
8 Laheli nkunchema lina Nafutali, kwa kuva áhawile kuchidoni, “Ngùpanyene ing'ondo ing'ulungwa na nkulwangu, nanangu ǹninnema.”
9 Bahi Leya pawene kuva lutumbo lwake lùninyalalika kuveleka, nkuntwala Zilipa ntumwa wake, nkumwing'a Yakobo uchinga ààve n'jawe.
10 Zilipa nkummelekela Yakobo mwana wachilume.
11 Leya nkunchema lina Gadi, kwa kuva áhawile kuchidoni, “Ǹnibahatika.”
12 Zilipa, ntumwa wanga Leya, nkummelekela Yakobo mwana wavili wachilume.
13 Leya nkunchema lina Asheli, kwa kuva áhawile kuchidoni, “Ǹnihangalala! Vino vakongwe vàmbenguchema ihangaladi.”
14 Bahi mahiku la lichela lya ngano, Lubeni nkuhwena kumawelu, na aneko nkuyona mimeya fulani innyululîha munu kupata chitumbo, nang'e nkuitwala nkunamwing'a Leya, anyokwe. Laheli nkunnyaulila Leya kuchidoni, “Chonde ngùyuwa ungumayele kadiki mimeya yakupele mwanalo!”
15 Henga Leya nkunkalipila wachidoni, “Wako ùtenda chinu chijoko ungupakanyola ntwangu? Dachi, na vino ùlembela uitwale mimeya yaning'ile mwanangu?” Laheli nkunnyang'ula kuchidoni, “Ukàning'a mimeya yakwing'ile mwanalo, bahi nelo Yakobo achialale kwakuwe.”
16 Bahi chinalyulo Yakobo pachiuya kumawelu, Leya nkuhwena unanchingamila, nkunnyaulila kuchidoni, “Nelo ùlembelewa ulale kwang'une, kwa kuva ǹnikusuma kwa mimeya yaning'ile mwanangu.” Bahi chilo anecho Yakobo nkulala kwanga Leya.
17 Nnungu nkupilikana kuyuwa kwanga Leya, na Leya nkupata chitumbo, nkummelekela Yakobo mwana wa nnyano wachilume.
18 Leya nkunchema lina Isakali, kwa kuva áhawile kuchidoni, “Nnungu àning'ile inudyo, ing'anya nímwing'ile ntwangu ntumwa wangu wachimahe.”
19 Leya nkupata kavila chitumbo, nkummelekela Yakobo mwana wa sita wa chilume.
20 Leya nkunchema lina Zabuloni, kwa kuva áhawile kuchidoni, “Nnungu àning'ile inudyo yambone. Vino ntwangu achiangutumbyange, kwa kuva nìmmelekedile vana sita vachilume.”
21 Mmyaka ipapête, Leya nkummaleka mwana wachimahe, nkunchema lina Dina.
22 Bahi Nnungu nanga panannuvalidile Laheli, nkupilikana kuyuwa kwanga Laheli, nkunnyungula litumbo lyake.
23 Laheli nkupata chitumbo, nkummaleka mwana wachilume. Laheli nkuchidoni, “Nnungu àninguusija dihoni dyangu.”
24 Bahi mwana aneyo nkunchema lina Yusufu, kwa kuva áhawile kuchidoni, “Yahwe anguyenjeje mwana yunji wachilume.”
Yakobo àvenkutajilika
25 Bahi Laheli pammaleke Yusufu, Yakobo nkunnyaulila Labani kuchidoni, “Ndeke vino nguuye kukaya, kuchilambo changu.
26 Uning'e ajavangu na anavangu, unguvapete kwa kukutumikila wako, uchinga nguhwene navo. Kwa kuva ùnimala namuna chinikutumikidile saana.”
27 Henga Labani nkunnyaulila kuchidoni, “Ikàva ùnikatapaliwa na nangu, ngùyuwa uikale upano. Nangu ǹnipata kumala kwa indila ya kulauja kuva, ing'anya yakuwe, Yahwe àningubaliki namene.
28 Bahi tambulanga nshahala ulambêla nikulipe, nanangu nguchinikulipe.”
29 Yakobo nkunnyaulila kuchidoni, “Wako umwene ùnimala namuna chinikutumikidile saana, na namuna anyama vako chivahalijije kuva vohe.
30 Kabla nikànambikwida, wako wavele chihi na dimali kadiki, henga kutandikila panguidile nangu, dimali dyako dìniyenjejeka namene, na Yahwe ànikubaliki kwa lammalele langulatendile. Henga vino ngùlembela nguvakambikambile vanu va nng'ande mwangu nimwene.”
31 Labani nkummuja Yakobo kuchidoni, “Vino ùlambela nikulipe chinu ntwani?” Yakobo nkunnyang'ula kuchidoni, “Wala unaning'e chinu chohecho. Nangu nguchinguhwenehe kuvachunga anyama vako,
32 ikàva nelo uchiunguluhusu ngupite mmatunji la anyama vako vammalele, na kila litunji nivatwale angandolo na ambudi vavêle na madolidoli au malemba, na kila ungandolo wanapi. Anevo njo vambekûva nshahala wangu.
33 Paumbeida unalola nshahala wangu mmaduva laîda, anepo njo paimbekwonekana ikulupiki yangu. Umbudi woheyo akávele na madolidoli au malemba, au ungandolo woheyo akávele wa langi-langi au wanapi akàonekana nnitunji lyangu, aneyo àmbekuva ǹnimwiva.”
34 Labani nkuchidoni, “Sawa! Bahi ììve muchi chuhawile.”
35 Henga nniduva ulyolyo, Labani nkuhwena unalatwala magogoma lammalele la ambudi vavêle na misitali na madolidoli, na makolo lammalele la ambudi vavêle na madolidoli au malemba lanahe, na kila ungandolo wa langi-langi, nkuvakamuja vana vake uchinga vavalolihije.
36 Labani na vana vake nkuhapukana na Yakobo, nkuvapelekeja anyama anevo ulehu wa mwanda wa maduva matatu, henga Yakobo nkwisalila wavachunga anyama vanji vanga Labani vaisalidîle.
37 Bahi Yakobo nkutwala dinavi dimbihi dya milandi fulani, nkudiwaula vipande-vipande uchinga yonekane misitali yanahe n'dinavi anedyo.
38 Yakobo nkuva wadiimija dinavi anedyo dyadiwawile, muvyombo vivavakumbijija anyama medi. Na kwa kuva anyama anevo pavachiida unakumbila medi vánakwelana,
39 bahi nkupata vitumbo muyo dinavi anedyo, bahi nkuvaveleka anyama vavêle na misitali na malemba na madolidoli.
40 Bahi Yakobo nkuvahapula anevo angandolo vajoko vavelekwejîje, kuva vake. Na angandolo vanji vanga Labani pavachikwelana, Yakobo nkuvalodya meho kuvavele anyama vanji vanga Labani. Bahi kwa kutenda uchocho, Yakobo nkupata kuvayenjeja anyama nnitunji lyake mwene, na wala nanga panalikundanije na alila lyanga Labani.
41 Na kila palachikamola mahiku la anyama vanyetîle kuhamula, Yakobo nkuva waimija adila dinavi muvyombo anevyo vya kuvakumbijija anyama uchinga vapate vitumbo muyo mwa dinavi anedyo.
42 Henga Yakobo nanga panadivikile dinavi anedyo muyo mwa vanyama vayandîle pavachipata vitumbo. Bahi anyama vanyetîle nkuva vanga Yakobo na vayandîle nkuva vanga Labani.
43 Bahi Yakobo nkutajilika namene, nkuva na matunji makulungwa la anyama na vatumwa vachimahe na vachilume na angamila na punda.