16
సత్తు సిచ్చల్ సత్తు దూతల్ బూలోకుమ్‍తె సువ దిలిసి
1 అన్నె కిచ్చొ సూన్లయ్ మెలె, ఏక్ వెల్లి అవాడ్ పరలోకుమ్‍తెచి జా దేముడుచి గుడి తెంతొ సత్తు దూతల్‍క, “తుమ్ గెచ్చ, దేముడుచ సత్తు గిన్నల్‍చి కోపుమ్‍చి సిచ్చ బూలోకుమ్‍తె సువ గెల.” మెన సంగిలన్.
2 జాకయ్, తొలితొచొ దూత గెచ్చ, బుఁయిచి ఉప్పిరి జోచి గిన్నచి సిచ్చ సువ దిలన్. జో జంతుచి గుర్తు కెరవన జోచి బొమ్మక జొకర్ల ఎత్కి మాన్సుచి అఁగి ఒగ్గర్ అల్లర్‍చ గవ్వో జల.
3 దొన్నిచొ దూత జోచి గిన్నచి సిచ్చ సముద్రుమ్‍తె సువ దిలన్, చి మొర్లొ మాన్సుచి లొఁయిచి రితి జలి, చి సముద్రుమ్‍తెచి ఎత్కి జీవుల్ మొర్ల.
4 తిన్నిచొ దూత జోచి గిన్నచి సిచ్చ గడ్డొచి ఉప్పిరి, ఊటల్‍చి ఉప్పిరి సువ దిలన్, చి లొఁయి జా గెల.
5 పితి పాని లొఁయి జతి సిచ్చచొ జో దూత కిచ్చొ సంగిలిసి సూన్లయ్ మెలె,
“తుయి అగ్గె తిలొసొ, అప్పె తతొసొ, పరలోకుమ్‍చి సుద్ది తిలొసొ,
తుచ తీర్పులు సిచ్చలు ఎత్కి సరిగా అస్తి.
6 కిచ్చొక మెలె, తుచయ్ జల మాన్సుల్‍చి లొఁయి, చి తుచ కబుర్లు సంగిల మాన్సుల్‍చి లొఁయి
విరోదుమ్ జల మాన్సుల్ సుఁవితికయ్,
జేఁవ్ తుచ మాన్సుల్‍చి లొఁయి సువిలసయ్ పింక మెన
జోవయింకయ్ లొఁయి దా అస్సిసి.
జోవయింక జెతి బట్‍వాడ్, జా!
జోవయించి పాపుమ్ జెఁవ్వి కతతి!”
మెన జో దూత సంగిలన్.
7 తెదొడి బలి దెతి టాన్ కిచ్చొ మెన కేక్ గల్లీస్ సూన్లయ్ మెలె,
“నిజుమి, ఎత్కి సెక్తి అదికారుమ్ తిలొ దేముడు ప్రబు,
తుచ తీర్పులు సిచ్చలు సరిగచ, సత్తిమ్‍చ!”
మెన సంగితి సూన్లయ్.
8 తెదొడి, చెత్తర్‍చొ దూత పొద్దుచి ఉప్పిరి జోచి గిన్నచి సిచ్చ సువ దిలన్, చి జాచి ఆగిక మాన్సుల్‍క డయిక మెన, పొద్దుక సెలవ్ అయ్‍లి.
9 జేఁవ్‍చి ఒగ్గర్ వేడిక మాన్సుల్ డడ్డిల, చి దేముడుచి నావ్ దూసుప కెర్ల. కిచ్చొక మెలె, ఈంజేఁవ్ సిచ్చల్‍చి ఉప్పిరి జోక అదికారుమ్ అస్సె, చి ఈంజేఁవ్ సిచ్చల్ జో దిలన్‍చి రిసొ. అన్నె, జేఁవ్ కెర్ల పాపల్‍క విసారుమ్ జతి నాయ్, ముల్తి నాయ్, చి జోక గవురుమ్ దెతి నాయ్.
10 పాఁచ్‍చొ దూత జోచి గిన్నచి సిచ్చ, జో వెర్రి జంతుచి సిఙాసనుమ్‍చి ఉప్పిరి సుఁవిలన్, చి జంతుచి రాజిమ్ అందర్ జా గెలి. మాన్సుల్, జలె, జేఁవ్‍క అయ్‍లి స్రెమల్‍చి రిసొ, జోవయించ జీబుల్ చప్లన్‍తె తిల.
11 జోవయించి నొప్పి జోవయించ గావ్వోచి రిసొ పరలోకుమ్ తిలొ దేముడుక సాపెనల్ సంగిల, గని జేఁవ్ కెర్ల కమొక విసారుమ్ జతి నాయ్, ములిత్ నాయ్.
సొవ్వుచొ దూత సువ దిలి సిచ్చ
12 సొవ్వుచొ దూత జోచి గిన్నచి సిచ్చ యూఫ్రటీసు మెలి వెల్లి గాడుచి ఉప్పిరి సుఁవ దిలన్, చి తూర్పు పక్క తెంతొ జెత రానల్ జెతికయ్ వాటు తెయార్ జతి రిసొ జాచి పాని అట్ట గెలి.
13 పడ్తొ వెల్లొ జో అయిచి చోండి తెంతొ, వెర్రి జో జంతుచి చోండి తెంతొ అన్నె దేముడుచ కబుర్లు సంగిలొసొ ఆఁవ్ మెన అబద్దుమ్‍క సంగితొసొచి చోండి తెంతొ మండుకుల్‍చ రిత తిన్ని బూతల్ బార్ జలిసి దెకిలయ్.
14 జేఁవ్, సయ్‍తాన్‍చి సేవ కెర్త బూతల్ జవుల, చి వెల్లెల వెల్లెల కమొ కెర కెర, ఒండి లోకుమ్‍చ రానల్‍తె గెతతి. కిచ్చొక మెలె, ఎత్కి సెక్తి అదికారుమ్ తిలొ దేముడు జోచి సెక్తి అదికారుమ్ దెకయ్‍తి వెల్లి సిచ్చ కెర్తి దీసిచి యుద్దుమ్‍క తెయార్ జతి రిసొ, జేఁవ్ రానల్‍క ఎక్కితె కుడవుక.
15 జలె, ఎబ్రీ బాస తెన్ ‘హార్‍మెగిద్దోను’ మెలి టాన్‍తె జేఁవ్ రానల్‍క జేఁవ్ బూతల్ కుడయ్‍ల.
16 యేసుప్రబు సంగిలిసి ఏక్ కిచ్చొ మెలె, “ఈందె, మాన్సుల్ నే ఉచర్లె పొది కీసి చోరు జెయెదె గే, దస్సి ఆఁవ్ జెయిందె. అయ్‍లె, కో తెలివి తా, డుమ్‍డొయ్ నే జతె లాజ్ నే బెట్టిత్ రితి జోవయించ పాలల్ సుద్ది తతి రితి దెకనుల గే, జోవయింకయ్ చెంగిలి” మెన ప్రబు సంగితయ్.
17 సత్తుచొ దూత జోచి గిన్నచి సిచ్చ ఆగాసుమ్‍చి వాదుచి ఉప్పిరి సువ దిలన్, చి పరలోకుమ్‍చి దేముడుచి గుడి తెంతొ, సిఙాసనుమ్ తెంతొ, గట్టిఙ అవాడ్ తెన్ కిచ్చొ సంగిలన్ మెలె, “జర్గు జలి!” మెలన్,
18 చి బిజిలి మొల్కిలి, అవాడ్ అయ్‍లి, ఉర్ముల్ కెర్లి, చి ఒగ్గర్ వెల్లి బూకంపుమ్ అయ్‍లి. కెద్ది వెల్లిచి మెలె, మాన్సుల్ బూలోకుమ్‍తె తొలితొ తిలిసి తెంతొ కెఁయ్య నే జర్గు జలి ఎదిలి బూకంపుమ్ అయ్‍లి.
19 జా బూకంపుమ్ జతికయ్, వెల్లి పట్నుమ్ తిన్ని వాటల్ జా గెలి, చి దేముడుక నేన్ల మాన్సుల్‍చ రాజిమ్‍ల్‍చ పట్నల్ పాడ్ జల. చి జోచి ఎదివాట్ కోపుమ్‍చి సిచ్చచి గిన్నయ్ తిలిసి జా వెల్లి బబులోను పట్నుమ్‍చ మాన్సుల్ పూర్తి పియ గెల్తి రితి, దేముడు నే పఁవ్సితె జర్గు కెర్లన్.
20 పడ్తొ ఎత్కి డిబ్బ ఉట్ట నిగిల్ రితి జా డీస్తి నాయ్, చి కేన్ డొంగుర్‍లు డీస్తి నాయ్.
21 అన్నె, వెల్లొ వెల్లెల కరపత్రల్ ఆగాసుమ్ తెంతొ మాన్సుల్‍చి ఉప్పిరి సేడ్ల. ఏక్ ఏక్ కరపత్తుర్ దొన్ని విసొ దెసు కేజిల్ చి ఎదిలి జాడు తవుల, చి జా సిచ్చ కెద్ది అల్లర్ కెర్లి మెలె, ఒగ్గర్ ఒగ్గర్ అల్లర్‍చి రిసొ, జా సిచ్చచ దెబ్బల్‍క మాన్సుల్ దేముడుక సాపెనల్ కెర్ల.