14
పవులు, బర్నబ ఇకొనియాదు సువార్త వెహ్సినార్‌
1 పవులుని బర్నబ కూడ్ఃజి ఇకొనియాదు సొహరె అంతియోకయాదు కిత్తిలె‍కెండ్ యూదురు మీటిఙ్‌ కిని ఇండ్రొ సొహార్. వారు నెగ్రెండ బోద వెహ్తిఙ్‌ నండొండార్ యూదురు, నండొండార్ యూదురు ఆఇకార్‌బా నమ్మితార్.
2 గాని నమ్మిఇకార్‌ యూదురు, యూదురు ఆఇ వరిఙ్ రేప్తారె అపొస్తురుఙ ముస్కు కోపం పుటిస్తార్.
3 గాని పవులు, బర్నబ నండొ రోస్కు బానె మహార్‌. యేసువందిఙ్ దయ్‌రమ్‌దాన్‌ వర్గితార్. వారు ప్రబు దయాదర్‌మమ్‌ వందిఙ్ వెహ్తి మాటెఙ్‌ నిజం ఇజి ప్రబు విజెరిఙ్‌ తోరిస్తాన్. ఎలాగ ఇహిఙ బమ్మాతి పణిఙ్ బమ్మాతి గుర్తుఙ్‌ కిదెఙ్ పవులుఙ్‌ బర్నబెఙ్ సత్తు సిత్తాన్‌.
4 అయ పట్నమ్‌దు మహి లోకుర్ రుండి గుంపుఙ్ ఆతార్. సెగొండార్ యూదురు పడఃకాద్, మరి సెగొండార్ అపొస్తురి పడఃకాద్.
5 అయావలె సెగొండార్ యూదురు ఆఇకార్, మరి సెగొండార్ యూదురు, యూదురి అతికారిఙు వెట కూడ్ఃజి అపొస్తురుఙ్‌ అసి వరిఙ్ సిగు కిజి పణుకుఙాణిఙ్ డెఃయ్‌జి సప్తెఙ్‌వలె ఇజి ఒడిఃబిజి మహార్‌.
6-7 అపొస్తురు అయ సఙతి నెస్తారె లుకయొనియాదు మహి లుస్‌త్ర, దెర్‌బ ఇని పట్నమ్‌కాణ్, వన్కా సురుల మన్ని దేసమ్‌కాఙ్ ఉహ్క్సి సొహరె అబ్బె సువార్త సాటిస్తార్.
లుస్‌త్ర దెర్‌బ ఇని పట్నమ్‌కాఙ్‌ సొన్‌సినార్‌
8 లుస్‌త్ర ఇని పట్నమ్‌దు, నడిఃదెఙ్‌ అట్‌ఇ సొట వాండ్రు ఒరెన్‌ మహాన్‌. వాండ్రు పుట్తిబాణిఙ్‌ మొదొల్సి సొటాదికాన్ ఆతండ్రె ఎసెఙ్‌బా నడిఃదెఙ్‌ అట్‌ఏండ బసినె మంజినాన్.
9 పవులు బోదిసి మహిఙ్‌ వాండ్రు వెంజి మహాన్‌. పవులు వన్నిఙె సుడ్ఃతిఙ్‌ నెగెండ్‌ ఆన ఇజి వన్నిఙ్ నమకం పుట్సినాద్‌ ఇజి నెస్తాన్.
10 అయావలె పవులు వన్నిఙ్, “నిఙ్అ, నీ పాదమ్‌కు బూమిదు మొప్సి నిల్‌అ”, ఇజి డటం వెహ్తిఙ్‌ అయ సొటాదికాన్ లిట్నె నిఙితండ్రె డాట్తెఙ్‌ మొదొల్‌స్తాన్.
11 పవులు కిత్తి బమ్మాతి పణి సుడ్ఃతారె బాన్‌ మహి లోకుర్ లుకోనియ బాసాదు గగోలాతార్‌. “దెయమ్‌కు లోకు లెకెండ్ ఆతెనె మాడగ్రు డిఃగ్‌జి వాతె”, ఇజి డటం గగోలాతార్‌.
12 బర్నబెఙ్ బ్రుహస్‌పతి ఇజి పేరు ఇట్తార్. నండొ బోద వెహ్తి వందిఙ్ పవులు హెర్మ ఇజి పేరు ఇట్తార్.
13 పట్నం వెల్లి మహి బ్రుహస్‌పతి గుడిఃది పుజేరి వాతండ్రె డాఃకుఙ్, పూఙుదండెఙ్ అస్తాండ్రె పట్నం వెల్లి మహి సేహ్ల డగ్రు తత్తాన్. మంద లోకు కూడ్ఃజి వాతారె పూజ కినాట్‌ ఇజి అయ పుజేరిని, కూడిఃతి మహి లోకుర్ ఒడ్ఃబితార్.
14 బర్నబని పవులు యాక నెస్తారె వారు కిని పణిదిఙ్ ఒప్పుకొడ్ఃఎప్ ఇజి తోరిసిని వందిఙ్ వరి సొక్కెఙ్ పాతెఙ్ కిస్తారె లోకురి నడిఃమిదు ఉహ్క్సి సొహరె డటం వెహ్తార్‌.
15 “తంబెరిఙాండె, మీరు ఎందనిఙ్‌ ఈహు కిజినిదెర్‌? మాపుబా మీ నన్ని లోకునె. మీరు యా పణిదిఙ్ రెఇకెఙ్‌ డిఃసిసీజి ఆగాసం, బూమి, సమ్‌దరం, బాన్‌ మన్ని విజు వనకాఙ్ పుటిస్తి బత్కిజి మంజిని దేవుణుదిఙ్‌ నమ్మిదు ఇజి మిఙి సువార్త వెహ్సినాప్.
16 గడ్డిఃస్తి కాలమ్‌దు విజు జాతిఙ్ వరిఙ్ వరిఙ్ ఇస్టమాతి వ‍న్కాఙ్ పొగిడిఃజి మాడిఃస్తెఙ్‌ దేవుణు డిఃస్త సిత్తాన్‌.
17 అహిఙ్‌బా దేవుణు ఆగాసమ్‌దాన్‌ మిఙి పిరు, ఎమేణివేల పంట అయావలె కనికారం ఆజి సీజినాన్. తక్కు సిల్లెండ బోజనం సీజినాన్. మీ మన్సుదిఙ్‌ సర్ద కిబిసి పోస కిజినాన్. ఈహు వాండ్రు ఎలాగ మహ్తి దేవుణు ఇజి లోకాఙ్‌ తోరిస్తాన్”.
18 అపొస్తురు యాలెకెండ్ వెహ్తిఙ్‌బా వారు వి‍రిఙ్ పూజ కిఏండ ఆదెఙ్‌ ఇజి లోకురిఙ్‌ అడ్డు కిదెఙ్ గొప్ప కస్టం ఆతాద్.
19 అయావలె అంతియోకయదాన్, ఇకొనియదాన్ సెగొండార్ యూదురు వాతారె వరి మాటెఙాణిఙ్ నండొ లోకాఙ్‌ వరి పడఃకాదు కూడుఃప్తార్. కూడుఃప్తారె, పవులు ముస్కు పణుకుఙ్‌ డెఃయ్తా‍ర్. వాండ్రు సాతాన్‌ ఇజి ఒడిఃబిత్తారె పట్నం వెల్లి వన్నిఙ్ ఈడ్డిస్తారె బానె డిఃస్తార్.
20 గాని సిసూర్‌ వన్ని సురుల కూడిఃతి మహివలె పవులు నిఙితండ్రె పట్నమ్‌ లొఇ మర్‌జి సొహాన్‌. మహ్స నాండిఙ్‌ పవులు, బర్నబ కూడిఃతారె దెర్‌బ ఇని పట్నమ్‌దు సొహార్.
పవులుని బర్నబ సిరియాదు మన్ని అంతియొకయాదు మర్‌జి సొహార్
21 పవులుని బర్నబ దెర్‌బ ఇని పట్నమ్‌దు సువార్త బోదిస్తార్. నండొ లోకుర్ యేసుప్రబుఙ్‌ నమ్మితార్. వెనుక పవులుని బర్నబ, లుస్‌త్ర, ఇకొనియ, అంతియొకయాదు మర్‌జి వాతార్.
22 వాతారె, ఎమేణి పట్నమ్‌ది వరిఙ్ బానె సిసూరిఙ్‌ ఉసార్‌ కిబిస్తార్. “మీ నమకం డిఃస్‌ఏండ మండ్రు. మాటు నండొ మాలెఙ్ ఓరిసి దేవుణు రాజెమ్‌దు సొండ్రెఙ్‌ వలె”, ఇజి మరి మరి పణిసి వెహ్తార్‌.
23 పవులు, బర్నబ విజు సఙమ్‌కాఙ్‌ పెద్దెల్‌ఙ ఏర్‌పాటు కితారె ఉపాస్‌ మంజి పార్దనం కిజి, వారు నమ్మితి దేవుణుదిఙ్‌ వరిఙ్ ఒపజెప్తార్.
24 వెనుక పిసిదియ దేసెం డాట్తారె పంపులియాదు వాతార్.
25 పెర్గ ఇనిబాన్‌ దేవుణు మాటెఙ్‌ బోదిసి వెనుక అతలియ పట్నమ్‌దు డిఃగ్‌జి సొహార్.
26 అబ్బెణిఙ్ ఓడః ఎక్తారె వారు మొదొహి సోత్తి సొహి అంతియొకయాదు మర్‌జి వాతార్. యా అంతియొకయాదునె దేవుణు పణివందిఙ్, వన్ని దయాదర్మమ్‌దిఙ్ ఒపజెపె ఆతార్. అయ పణి వీస్తారె ఏలు బానె మర్‌జి వాతార్.
27 మర్‌జి వాతారె సఙమ్‌ది వరిఙ్ విజెరిఙ్‌ కూడుఃప్తారె, దేవుణు వరి వెటనె కిత్తి పణిఙ్ విజు వెహ్తార్‌. యూదురు ఆఇకార్ దేవుణుదిఙ్‌ నమ్మిదెఙ్‌ వాండ్రు ఎలాగ సరి సిత్తాన్‌ ఇజి వెహ్తార్‌.
28 వారు నండొ కాలం బానె మంజి సిసూరి వెట బత్కిత్తార్.