21
ఓసన్న
1-2 వారు యెరూసలేము అందిని ముంఙాల, ఒలివ మరెక్‌ మని గొరొన్‌ ముస్కు మని బెత్‌పాగె ఇని నాటొ వాతార్. వాతిఙ్ యేసు వన్ని సిసూర్‌ రిఏరిఙ్‌ కూక్తాండ్రె ఈహు వెహ్తాన్‌. “మీ ఎద్రు మని నాటొ సొండ్రు. అందితిఙ సరి, తొహ్తి మన్ని ఉండ్రి గాడ్ఃదెఙ్‌ని దనివెట మని గాడ్ఃదె పిలాదిఙ్‌బా మీరు సూణిదెర్. వనకాఙ్‌ కుత్సి నా డగ్రు పేర్‌జి తగాట్.
3 ఎయెన్‌బా మిఙి ఇనికబా వెన్‌బాతిఙ వన్కాఙ్‌ ప్రబుఙ్‌ కావాలి ఇజి వన్నిఙ్ వెహ్తు. వెటనె వాండ్రు వనకాఙ్‌ మీ వెట పోక్నార్.”
4-5 “ఇదిలోన్‌ గాడ్ఃదె ముస్కు ఎక్సి, సార్‌లిదాన్‌ నీ రాజు వాజినాన్. గాడ్ఃదె పిల్ల ఆతి ఇజిరి గాడ్ఃదె ముస్కు ఎక్తాండ్రె, నీ డగ్రు వాజినాన్ ఇజి సీయోను గాల్సి ఆతి దనిఙ్‌ వెహ్తు”, ఇజి దేవుణు ప్రవక్తవెట దేవుణు ముఙాల వర్గితి మాటెఙ్‌ పూర్తి ఆదెఙ్‌ యాకెఙ్‌ జర్‌గితె.
6 యేసు వరిఙ్ వెహ్తి వజనె సిసూర్‌ సొహరె కిత్తార్.
7 వారు గాడ్ఃదెని దని పిలదిఙ్‌ తత్తార్. వన్కాఙ్‌ ముస్కు వరి సాల్వెఙ్ పహ్తిఙ్, యేసు దని ముస్కు బస్తాన్.
8 నండొండార్‌ వరి సాల్వెఙ్ సరి అందు పహ్తర్. మరి నండొండార్‌ మరెకాణి కొమెఙ్‌ కత్సి సరి అందు పహ్తర్.
9 మంద లోకుర్‌ వన్ని ముందాల సొన్సి మహికార్, వన్ని వెనుక వాజి మహికార్, “దావీదు మరిసిఙ్‌ ఓసన్న! ప్రబు సిత్తి ఆతికారమ్‌దాన్‌ వాజినికాన్‌ పొగ్‌డెః ఆనికాన్‌ పరలోకామ్‌దు దేవుణుదిఙ్‌ ఓసన”, ఇజి వారు డేల్సి మహార్.
10 యేసు యెరూసలేం పట్నమ్‌దు వాతిఙ్, లోకుర్‌ విజెరె “వాండ్రు ఎయెన్‌?”, ఇజి బమ్మ ఆతారె ఒరెన్ మరి ఒరెన్ వెట వర్గిజి మహార్.
11 “వీండ్రు గలీలయదు మన్ని నజరేతు ఇని నాటోణి ప్రవక్త ఆతి యేసు”, ఇజి వన్ని వెట మహి అయ మంద లోకుర్‌ వెహ్తార్‌.
యేసు దేవుణు గుడిఃదు సొన్సినాన్.
12 యేసు దేవుణు గుడిః లొఇ సొహాండ్రె, అబ్బె గుడిః అర్‌ఙుదు మహి కొణి వరిఙ్ పొర్ని వరిఙ్ విజేరిఙ్‌ వెల్లి పోక్తాన్. డబ్బు మారిసిని వరి బల్లెఙ్‌ని పావుర పొటిఙ పొర్నివరి పీటెఙ్‌ మహ్త విసీర్‌తాన్.
13 వాండ్రు వరిఙ్, “నా ఇలు పార్దనం కిని ఇలు ఇజి కూకె ఆనాద్‌లె, ఇజి దేవుణు మాటదు రాస్త మనాద్ గాని మీరు దనిఙ్‌ డొఙారిఙ సాలం లెకెండ్‌ కితి మనిదెర్”, ఇజి వెహ్తాన్‌.
14 గుడ్డిదికార్, సొటాదికార్‌ దేవుణు గుడిఃదు వన్ని డగ్రు వాతిఙ్ వాండ్రు వరిఙ్ నెగెండ్‌ కితాన్.
15 గాని వాండ్రు కితి బమ్మాతి పణిఙ సుడ్ఃజి, దేవుణు గుడిః అరఙుదు మని కొడొఃర్, “దావీదు మరిసిఙ్‌ ఓసన్న”, ఇజి డేల్సినిక విహరె, పెరి పుజెరిఙుని, యూదురి రూలుఙ్‌ నెస్పిస్నికార్‌ నండొ కోపం ఆతార్.
16 వారు వన్నిఙ్, “యా కొడొఃర్‌వెహ్సినిక ఇనిక ఇజి నీను వెంజినిదా?”, ఇజి వెన్‌బాతార్. యేసు వరిఙ్, “ఓ వెంజిన, కొడొఃర్‌ని ఇజిరి కొడొఃరి వెయుదాన్‌ నీను పొగ్‌డిఃజిని మాటెఙ్‌ తయార్‌ కితి మన్ని’ ఇజి దేవుణు మాటదు రాస్తి మనిక మీరు ఎసెఙ్‌బా సద్‌విఇతిదెరా?”, ఇజి వెహ్తాన్‌.
17 వాండ్రు వరిఙ్‌డిఃసి పట్నమ్‌దాన్‌ వెల్లి సొహాండ్రె బెతానియ ఇని నాటొ సొన్సి అయ రయ్తు అబ్బె మహాన్‌.
బొడెమరాన్‌ వహ్సినాద్‌
18 పెందల వాండ్రు మర్‌జి పట్నమ్‌దు సొన్సి మహిఙ్‌ వన్నిఙ్ బఙ కట్తాద్.
19 సరి పడఃకాదు మని ఉండ్రి బొడెమరాన్‌ సుడ్ఃజి, మరాన్‌ డగ్రు వాతండ్రె సుడ్ఃతిఙ్‌ ఆకుఙ్‌ తప్ప మరి ఇనికెఙ్‌ తోర్‌ఉతె. వాండ్రు దనిఙ్‌ సుడ్ఃజి, “మరి ఎసెఙ్‌బా నీను కాయెఙ్‌ అస్‌ఇలె”, ఇజి వెహ్తాన్‌. వెటనె బొడెమరాన్‌ వహ్త సొహాద్.
20 సిసూర్‌ అక్క సుడ్ఃతారె బమ్మ ఆతార్, “నిస్సొ బేగి బొడెమరాన్‌ ఎలాగ వహ్త సొహాద్?”, ఇజి వారు వర్గితార్.
21 యేసు వరిఙ్, “నాను మిఙి నిజం వెహ్సిన, మిఙి నమకం మంజి, మీ లొఇ అనుమానం సిల్లెండ మహిఙ, యా బొడెమరాన్‌దిఙ్‌ కితికదె ఆఎండ, యా గొరొతిఙ్‌ సుడ్ఃజి”, నీను ఇబ్బెణిఙ్‌ పెరె ఆజి సమ్‌దారమ్‌దు సొన్సి అర్‌అ’ ఇజి వెహ్తిఙ అయవజనె జర్గినాద్‌లె.
22 మిఙి నమకం మహిఙ మీరు పార్దనం కిజి ఇనిక లొస్నిదెరొ, అయాక మిఙి దొహ్‌క్నాద్‌లె”, ఇజి వెహ్తాన్‌.
23 యేసు దేవుణు గుడిఃదు సొహాండ్రె గుడిః అర్‌ఙుదు బోదకిజి మహివలె, పెరి పుజెరిఙుని లోకుర్‌ పెద్దెల్‌ఙ వన్ని డగ్రు వాతారె, “ఇని అతికారమ్‌దాన్‌ నీను యా పణిఙ్‌ కిజిని? ఎయెర్‌ నిఙి యా అతికారం సిత మనార్‌?”, ఇజి వన్నిఙ్ వన్‌బాతార్.
24 యేసు వరిఙ్, “నానుబా మిఙి ఉండ్రి మాట వెన్‌బాన. అయాక మీరు నఙి వెహ్తిఙ ఇని అతికారమ్‌దాన్‌ నాను యా పణిఙ్‌ కిజిన ఇజి నానుబా మిఙి వెహ్న.
25 బాప్తిసం సీని యోహనుఙ్, బాప్తిసం సీదెఙ్‌ మని అతికారం ఎంబెణిఙ్‌ వాతాద్‌ దేవుణుబాణిఙ్‌నా, సిల్లిఙ లోకుర్‌ బాణిఙ్‌నా?”, ఇజి యేసు వరిఙ్ వెన్‌బాతాన్. “దేవుణుబాణిఙ్‌ వాతాద్‌’ ఇజి మాటు వెహ్తిఙ, మరి ఎందానిఙ్‌ మీరు వన్నిఙ్ నమ్మిఇతిదెర్‌? ఇజి మఙి వెన్‌బానాన్.
26 గాని, యోహను ఒరెన్ దేవుణు ప్రవక్త ఇజి లోకుర్‌ విజేరె నమిజినార్. అందెఙె లోకుర్‌ బాణిఙ్‌ వాతాద్‌’ ఇజి వెహ్తెఙ్‌ మఙి తియెల్‌నె, ఇజి వరి లొఇ వారె వర్గితార్.
27 అందెఙె వారు, “మఙి తెలిఏద్”, ఇజి యేసుఙ్‌ మర్‌జి వెహ్తార్‌. నస్తివలె వాండ్రు, “ఇని అతికారమ్‌దాన్‌ యా పణిఙ్‌ కిజిన ఇజి నానుబా మిఙి వెహ్‌ఎ”, ఇజి వరిఙ్ వెహ్తాన్‌.
రిఎర్‌ మరిసిర్‌ కత
28 “దిన్నివందిఙ్‌ మీరు ఇనిక ఒడ్ఃబిజినిదెర్‌? ఒరెన్‌వన్నిఙ్‌ రిఎర్‌ మరిసీర్‌ మహార్. వాండ్రు పెరివన్ని డగ్రు సొహాండ్రె, “మరిన్, నేండ్రు నీను ద్రాక్స టోటాదు సొన్సి పణి కిఅ”, ఇజి వెహ్తాన్‌.
29 వాండ్రు, “నాను సొన్‌ఎ, ఇజి మర్‌జి వెహ్తాన్‌. గాని వెనుక మన్సు మారిస్తాండ్రె సొహాన్‌.
30 నస్తివలె అప్పొసి, కొగ్రిమరిసి డగ్రు సొహాండ్రె అయా వజనె వెహ్తాన్‌. వాండ్రు, ఒబా, నాను సొన”, ఇజి వెహ్తాన్‌ గాని సొన్‌ఏతాన్.
31 “యా రిఎర్‌ మరిసీర్‌ లొఇ అప్పొసి వెహ్తి వజ కితికాన్‌ ఎయెన్‌?”, ఇజి యేసు వరిఙ్ వెన్‌బాతాన్. వారు, “పెరికాండ్రె”, ఇజి వెహ్తార్‌. యేసు వరిఙ్ “పన్ను పెర్నికార్ని సానిదికెఙ్‌ మిఙి ఇంక ముఙాల దేవుణు కిని ఏలుబడిఃదు సొనార్‌లె ఇజి నాను మిఙి నిజం వెహ్సిన.
32 ఎందనిఙ్‌ ఇహిఙ యోహను వాతాండ్రె, నీతి నిజాయ్తిదాన్‌ బత్కిదెఙ్‌ ఇజి మిఙి సరి తోరిస్తాన్‌ గాని మీరు వన్నిఙ్ నమిఇతిదెర్. పన్ను పెర్నికార్ని సానిదికెఙ్‌ వన్నిఙ్ నమ్మితార్. అయాకెఙ్‌ సుడ్ఃతిఙ్‌బా మీరు మన్సు మరిసి మీరు కితి తపుఙ్‌ ఒప్పకొడిఃజి డిఃసి సీజి వన్నిఙ్ నమిఇతిదెర్”, ఇజి వెహ్తాన్‌.
పాలి సితి టోట కత
33 “మరి ఉండ్రి కత విండ్రు. బూమి మనికాన్ ఒరెన్ ఉండ్రి ద్రాసటోట ఉణుస్తాన్. దని సుటులం కోట తొహ్తన్. ద్రాక్స పట్కు రసం లాగ్‌దెఙ్‌ ఉండ్రి గానుగు తయార్‌ కిబిస్తాన్. కాప్‌కిదెఙ్‌ ఉండ్రి ఎత్తుమని ఇలుబా తయార్‌ కితాన్. వెనుక అయ ద్రాక్స టోట సెగొండార్‌ రయ్‌తురిఙ్‌ పాలిదిఙ్‌ సితాండ్రె పయనం కిజి మరి ఉండ్రి దేసెం సొహాన్‌.
34 పట్కు పండ్ని కాలమ్‌దు వన్ని వంతుఙ్‌ లొస్తెఙ్‌ ఇజి వన్ని పణి మన్సిరిఙ్‌ పాలి అస్తి మని వరి డగ్రు పోక్తాన్.
35 పాలి అస్తిమనికార్‌ వన్ని పణి మన్సిరిఙ్‌ అస్తారె ఒరెన్ వన్నిఙ్ డెయ్‌తార్, ఒరెన్ వన్నిఙ్ సప్తార్, మరి ఒరెన్ వన్నిఙ్ పణకాణిఙ్‌ డెఃయ్‌తార్.
36 మరి, వాండ్రు ముఙాల పోక్తివరిఙ్‌ ఇంక నండొండార్‌ పణిమన్సిరిఙ్‌ పోక్తాన్. వరిఙ్‌బా పాలి అస్తిమనికార్‌ అయావజనె కితార్.
37 “నా మరినిఙ్‌ పోక్తిఙ వన్నిఙ్ వారు గవ్‌రం సీనార్‌లె”, ఇజి వెహ్తండ్రె కడెఃవెరిదు వన్ని మరిసిఙ్‌ వరి డగ్రు పోక్తాన్.
38-39 గాని పాలి అస్తిమనికార్‌ మరిసిఙ్‌ సుడ్ఃతారె, “వీండ్రు యా తోటాదిఙ్‌ అకు మనికాన్, రదు, మాటు వినిఙ్‌సప్సి యా టోట మా సొంతదిక కినాట్‌”, ఇజి వన్నిఙ్ అసి ద్రాక్స తోటదిఙ్‌ వెల్లి విసీర్‌తారె వన్నిఙ్ సప్తార్.
40 అందెఙె అయా ద్రాస టోట ఎజుమాని వానివలె అయ పాలి అస్తిమనివరిఙ్‌ ఇనిక కినాన్‌? ఇజి వెన్‌బతాన్‌.
41 “అయా సెఇవరిఙ్‌ నండొ కటినమతి సావుదాన్‌ సప్నాన్. మరి పట్కు పండ్ని కాలమ్‌దు వన్నిఙ్ సరియాతి వందుఙ్‌ సీని రెయ్తురిఙ్‌ ద్రాస టోట పాలిదిఙ్‌ సీనాన్”, ఇజి వారు వెహ్తార్‌.
42 యేసు వరిఙ్, “ ‘ఇలు తొహ్నికార్‌ నెక్తి పోక్తి పణుకునె, మూలాదిఙ్‌ బుర్ర పణకు ఆత మనాద్. యాక దేవుణు కీదాన్‌ జర్గితిక. యాక మా కణకెఙ బమ్మాతిక’, ఇజి దేవుణు మాటదు రాస్తి మనిక మీరు ఎసెఙ్‌బా సద్‌విఇతిదెరా?”.
43 అందెఙె దేవుణు ఏలుబడిః కినిక మీ నడిఃమిహన్‌ లాగ్జి దనిఙ్‌ తగితి పట్కు సీని వరిఙ్ సీనాన్”, ఇజి నాను మిఙి వెహ్సన.
44 ఎయెన్‌బా యా పణుకు ముస్కు అర్తిఙ వాండ్రు ముకెఙ్‌ ఆనాన్. యా పణుకు ఎయెన్‌ ముస్కు అర్‌నాదొ వాండ్రు గుండ ఆనాన్”, ఇజి యేసు కత వెహ్సి వీజితాన్.
45 యేసు వెహ్తి కతెఙ్‌ విహరె పెరి పుజెరిఙుని పరిసయ్‌రు, వరి వందిఙె వాండ్రు వెహ్సి మనాన్‌ ఇజి అర్దం కితార్.
46 వారు వన్నిఙ్ కయ్‌దు కిదెఙ్‌ ఉండ్రి ఉపాయ్‌ సుడ్ఃతార్‌ గాని లోకుర్‌ విజేరె వన్నిఙ్ ఒరెన్ ప్రవక్త ఇజి నమ్మితి వందిఙ్‌ లోకురిఙ్‌ తియెలాతార్.