ପ୍ରେରିତ ଶିଷ୍ୟମାନଙ୍କ କାର୍ଯ୍ୟର ବିବରଣୀ
ପ୍ରେରିତ ସିସୁରି ପାଣିଦି ଇସାବ୍
ପ୍ରେରିତ ବଇ ବିସୟ୍ତାନ୍ ଏସ ମାଟା
ପ୍ରେରିତ ବଇ ଆଜିନାତ୍ ମଣ୍ତଲିଦି ଆରାମ୍ ମାରି ଏଣ୍ତେସ୍ ଇକା ଜିରୁସାଲାମ୍ତାନ୍ ଜିହୁଦା, ସୋମିରିୟା, ମାରି ଇତିରାଜିଦୁ ୱେଙ୍ଗିଁତାତ୍, ଇକା ଜିସୁ ମୁସ୍କୁପୁର୍ତୁ ସନି ଆଗ୍ଡ଼ି ୱାନି ସିସୁରିଙ୍ଗ୍ ଇର୍ଆ ମାର୍ହାନ୍ ୧:୮ । ଇକା ଲୁକଦି ମାଣାନ୍ ରାସାତାମାନାତ୍ ଏନ୍ କି ସୁସମାଚାର୍ ଲୁକ ବା ରାସାତାମାର୍ହାନ୍, ୱାନ୍ ଅରେନ୍ ଡାକ୍ତର୍ ମାରି ଏନ୍ କି ନେଗେନ୍ତାନ୍ ରାସାତା ଇଟ୍ତା ମାର୍ହାନ୍ । ୱାନ୍ ୱାନି ସୁସମାଚାର୍ ନି ପ୍ରେରିତ ବଇଦୁ ତିୟପିଲ, ଏନ୍ କି ଗ୍ରିକ୍ ଲୋକ୍ ମାର୍ହାନ୍, ୱାନି ବିସୟ୍ତାନ୍ ୱେର୍ସିନାନ୍ । ମାତର୍ ବଇଙ୍ଗ୍ଁ ବା ଆନାତ୍ସୁଗି କ୍ରିସ୍ଟାନ୍ ଲୋକାଙ୍ଗ୍ ମିସାକିଜି ଗ୍ରିକ୍ ଲୋକାଙ୍ଗ୍ ମାରି ଜିହୁଦି ଲୋକାଙ୍ଗ୍ ମାର୍ହାତ୍ ୧:୧ ।
ପ୍ରେରିତ ବଇ ୬୦-୬୪ ବାର୍ସେକ୍ ଲୋଇ ଆନାତ୍ସୁଗି ରାସାତାମାନାତ୍ ଜିସୁ କ୍ରିସ୍ତଦି ଜନମ୍ ୱେନ୍କା ଇରିଙ୍ଗ୍ ବଇ ପାଉଲତି ଜଇଲ୍ତାନ୍ ମୁକୁଡ଼ାନି ଆଗ୍ଡ଼ି ବଇ ରାସାତିକା ୱିଜ୍ଜିନାତ୍ । ଲୁକ ବା ପାଉଲତି ୱାଲେ ସର୍ଆନ୍ ମାରି ଇୟା ବଇ ଆନାତ୍ସୁଗି ଆଣ୍ଟିୟକ ଗାଡ଼୍ତୁ ରାସାତାମାନାତ୍ । ପ୍ରେରିତ ବଇ ଲୁକ ବଇ ରାସାତି ୱେନ୍କା ୱେନ୍କା ରାସାତାମାନାତ୍ ମାରି ଇକା ଜିସୁ କ୍ରିସ୍ତଦି ମୁସ୍କୁପୁର୍ତୁ ସନି ୱାଲେ ଆରାମ୍ ଆତାମାନାତ୍ । ଲୁକ ରାସ୍ନି ଉଦେସ୍ ଆଜିନାତ୍ ଏଣ୍ତେସ୍ ସୁସମାଚାର୍ ରାସ୍ତା ମାର୍ହାନ୍ ଆୟାୱାଜା ଇବେବା ରାସ୍ତାମାନାନ୍ । ୱାନ୍ ତିୟପିଲଙ୍ଗ୍ ବଦା କିତାନ୍ ଆୟା ଦାପେ ଦାପେ ପିର୍ଜିମାନି କ୍ରିସ୍ଟାନ୍ ଲୋକୁ ଏଣ୍ତେସ୍ କିଜି ଅଜାଦେଙ୍ଗ୍ ଆଟ୍ନାର୍ ମାରି ୱାନ୍ ଜିସୁ କ୍ରିସ୍ତଦି ଜିବନ୍ତି ଟିକ୍ ଦାଡ଼ି ମାରି କ୍ରିସ୍ଟାନ୍ ପିରିନି ବିସୟ୍ତାନ୍ ରାସ୍ତାମାନାନ୍ ।
ପ୍ରେରିତ ବଇ ମାଙ୍ଗିଁ ପାର୍ତୁମ୍ ମଣ୍ତଲିଦି ନେଗି ବିସୟ୍ ତର୍ନାତ୍ ମାରି ଜିସୁ କ୍ରିସ୍ତଦିମାନୁ ବିସ୍ବାସ୍ତାନ୍ ଜିନିମାଡ଼ିନି ଉଣ୍ତିଙ୍ଗ୍ ତର୍ନାତ୍ । ପ୍ରେରିତ ସିସୁର୍ ମାଙ୍ଗିଁ ନେଗି ସାରି ତର୍ନାର୍ ଏଣ୍ତେସ୍ କିଜି ପବିତ୍ର ଆତ୍ମାଦି ସାକ୍ତିଦାନ୍ ଆସା ଇଡ୍ଜି ଆଇ ୱାରିମାନୁ ସୁସମାଚାର୍ ପ୍ରଚାର୍ କିନିକା ।
ଇୟା ବଇଦି ଏସ ମୁକିୟ ବିସୟ
୧. ସିସୁରି ମୁସ୍କୁ ପବିତ୍ର ଆତ୍ମାଦି ରେତାନିକା ମାରି ମଣ୍ତଲିଦି ପିରିନିକା । ୧:୧–୮:୧
୨. ମଣ୍ତଲିଦି କାସ୍ଟୁ ମାରି ଜିରୁସାଲାମ୍ ସାନ୍ଧି ସୁସମାଚାର୍ ୱେଙ୍ଗିଁତାତ୍ । ୮:୨–୧୨:୨୩
୩. ପାଉଲତି ପାର୍ତୁମ୍ ସେବାକିନି ପାଣି । ୧୨:୨୪–୧୪:୨୮
୪. ପୁନି ବିସ୍ବାସ୍ସିରି ଉଣ୍ତିଙ୍ଗ୍ ଇନିକା ଦର୍କାର୍ ଜିରୁସାଲାମ୍ତି ମିଟିଙ୍ଗ୍ତୁ ନିଷ୍ପତି । ୧୫:୧-୩୫
୫. ପାଉଲତି ମାରିଉନ୍ଡ୍ରିଦେବା ସେବାକିନି ପାଣି । ୧୫:୩୬–୧୮:୨୨
୬. ପାଉଲତି ମୁନ୍ଡ୍ରିଦେବେଙ୍ଗ୍ ସେବାକିନି ପାଣି । ୧୮:୨୩–୨୦:୩୮
୭. ପାଉଲ ଜିରୁସାଲାମ୍ତୁ ତର୍ତାର୍ । ୨୧–୨୬
୮. ପାଉଲତିଙ୍ଗ୍ ରୋମ୍ତୁ ପୋକ୍ତାର୍ । ୨୭–୨୮
୧
ପବିତ୍ର ଆତ୍ମାଦି ପାରାମାଣ୍
୧ ଏ ଲାଡ୍ତି ତିୟପିଲ,
ନା ପାର୍ତୁମ୍ ବଇଦୁ ଜିସୁ ୱାନି ପାଣି ଆରାମ୍ କିନି ଦିନ୍ତାନ୍ ଆମାୱିଜୁ ପାଣି କିତାମାର୍ହାନ୍ ମାରି ସିକିୟା ସିତାମାର୍ହାନ୍, ଆୟାୱିଜୁ ବିସୟ୍ତାନ୍ ରାସ୍ତାମାର୍ହା ।
୨ ମୁସ୍କୁପୁର୍ ସନି ଆଗ୍ଡ଼ିନେ ଆମାୱାରିଙ୍ଗ୍ ୱାନ୍ ନିଜେଦି ସିସୁ ୱାଜା ଆସ୍କିତା ମାର୍ହାନ୍, ୱାରିଙ୍ଗ୍ ୱାନ୍ ପବିତ୍ରାଆତ୍ମାଦି ସାକ୍ତିଦାନ୍ ସିକିୟା ସିତାମାର୍ହାନ୍
୩ ନାସ୍ତିୱାଲେ ୱାନ୍ ଜିବନ୍ ମାର୍ହାନ୍, ଇକା ପାରାମାଣ୍ କିନି ଉଣ୍ତିଙ୍ଗ୍ ମାରି ସିସୁର୍ ନାମ୍ଇକା ଆକ କିନି ଉଣ୍ତିଙ୍ଗ୍ ୱାନ୍ ୱାରି ସାତି ୱେନ୍କା ସାଲିସ୍ ଦିନ୍ ସାନ୍ଦି ଗାଦି ଦେବେଙ୍ଗ୍ ୱାରିଙ୍ଗ୍ ତରାୟା ଆତାମାର୍ହାନ୍ । ୱାର୍ ଜିସୁଙ୍ଗୁଁ ସୁଡ଼ୁତାମାର୍ହାର୍ ମାରି ଜିସୁ ୱାରିଙ୍ଗ୍ ମାପୁରୁଦି ରାଜି ବିସୟ୍ତାନ୍ ଇର୍ହାନ୍ ।
୪ ୱାର୍ ଉନ୍ଡ୍ରେମାନୁ ମାନିୱାଲେ ଉଣିତିନିମାନୁ ଜିସୁ ୱାରିଙ୍ଗ୍ ଇୟା ମାଟା ସିତାନ୍ ଜିରୁସାଲାମ୍ ଡ଼ିସ୍ସୋ ସଲ୍ମାଟ୍ । ମୁସ୍କୁପୁର୍ତି ବୁବା ମିଙ୍ଗିଁ ଆମାକା ସିନାନ୍ ଇଜି ପାର୍ମାଣ୍ କିତାମାନାନ୍ ମାରି ଆମା ଦାନ୍ ବିସୟ୍ତାନ୍ ନାନ୍ ମିଙ୍ଗିଁ ୱେର୍ତାମାର୍ଆ, ଆକା ପଇନି ସାନ୍ଦି କାପ୍କିଦୁ ।
୫ ଜୋହନ ଏର୍ତୁ ଡୁବନ୍ ସିତାନ୍, ମାତର୍ ଏସ ଉଣା ଦିନ୍ ୱେନ୍କା ମିର୍ ପବିତ୍ର ଆତ୍ମାଦୁ ଡୁବନ୍ ଆନିଦେର୍ ।
ଜିସୁଦି ମୁସ୍କୁପୁର୍ସନିକା
୬ ଅର୍ଲେନ୍ ପ୍ରେରିତ ସିସୁର୍ ଉନ୍ଡ୍ରେମାନୁ ମାନିୱାଲେ ଜିସୁଙ୍ଗୁଁ ୱେନ୍ବାତାର୍, “ପ୍ରବୁ, ନିନ୍ ଇନିକା ଇଲେଇ ଇସ୍ରାଏଲରିଙ୍ଗ୍ ୱାରି ରାଜି ଡ଼େସି ସିନି ?”
୭ ଜିସୁ ୱାରିଙ୍ଗ୍ ଇର୍ହାନ୍, “ୱେଡ଼ା ନି ଇଲେଇତିଙ୍ଗ୍ ନା ବୁବା ୱାନି ଆଡ୍ଗି କିଜି ଇଟ୍ତାମାନାନ୍ । ଇୟାୱିଜୁ ଏସ୍କାଙ୍ଗ୍ ଗଟାନାତ୍, ମିର୍ ନେସ୍ତେଙ୍ଗ୍ ଦର୍କାର୍ ସିଲେ ।
୮ ମାତର୍ ମି ମୁସ୍କୁ ପବିତ୍ରଆତ୍ମା ରେତାତିଙ୍ଗ୍, ମିର୍ ସାକ୍ତିଦାନ୍ ପୁରା ଆନିଦେର୍ ମାରି ଜିରୁସାଲାମ୍, ସାରାୱିଜୁ ଜିହୁଦା ମାରି ସମିରୋଣ ମାରି ଦୁନିଆଦି ସାରାସାରିଇତି ସାନ୍ଦି ନା ଉଣ୍ତିଙ୍ଗ୍ ମିର୍ ସାକି ଆନିଦେର୍ ।”
୯ ଇକା ୱେର୍ତି ୱେନ୍କା ଜିସୁଙ୍ଗୁଁ ମୁସ୍କୁପୁର୍ତୁ ସନିକା ୱାର୍ ସୁଡ଼ୁତାର୍ ମାରି କାଣ୍ତେକ୍ ବାଦ୍ଡ଼ତାନ୍ ୱାନ୍ ୱାରି କାଣାଗ୍ଦି ଆଗ୍ଡ଼ିରାନ୍ ସାୟାମାୟା ଆତାନ୍ ।
୧୦ ୱାନ୍ ମୁସ୍କୁ ସୋରି ୱେନ୍କା ବା ୱାର୍ ତିର୍ତାନ୍ ସୁଡ଼ୁଜି ବାଦ୍ଡ଼ତିଙ୍ଗ୍ ବେସ୍ସି ତେବାତାମାର୍ହାର୍ । ଅଡ଼ିନିଆଙ୍ଗିଁ ଆରାତିକାର୍ ରିଏର୍ ଲୋକୁ ଆୟାଦାପ୍ରେନେ ୱାରି ଲାକ୍ତୁ ୱାଜି,
୧୧ ନିର୍ହା ଇର୍ହାନ୍, “ଏ ଗାଲିଲିଦି ଲୋକୁ, ଏନ୍ଦା ଇବେନୁ ନିର୍ଦେର୍ନୋ ବାଦ୍ଡ଼ତିଙ୍ଗ୍ ବେସ୍ସିନିଦେର୍ ? ଏ ଜିସୁ ମି ଲାକ୍ତୁରାନ୍ ସୋଲ୍ସି ମୁସ୍କୁପୁର୍ତୁ ଅତାର୍ । ମାତର୍ ୱାନ୍ ଆମା ୱାଜା ମୁସ୍ପୁର୍ତୁ ସନିକା ମିର୍ ସୁଡ଼ୁତିଦେର୍, ଟିକ୍ ଆୟାୱାଜା ୱାନ୍ ମାରିଡ଼େସି ୱାନାନ୍ ।”
ଜିହୁଦାଦି ବାଡି ପୁରା ଆନାତ୍
୧୨ ତାନେୱେନ୍କା ପ୍ରେରିତ ସିସୁର୍ ଜିତ ଗରନ୍ତାନ୍ ଜିରୁସାଲମ୍ତୁ ଡ଼େସି ସୋର୍ହାର୍ । ଜିତ ଗରନ୍ ଗାଡ଼୍ତାନ୍ ଉନ୍ଡ୍ରେ କିଲମିଟର୍ ଆକ ମାର୍ହାତ୍ ।
୧୩ ଗାଡ଼୍ତୁ ସୋଲ୍ସି ୱାର୍ ତେବାଜିମାର୍ଇ ମୁସ୍କୁରି ବାକ୍ରାଦୁ ଡ଼ୁଗିତାର୍ । ଆୟା ପ୍ରେରିତ ସିସୁର୍ ଆଜିନାର୍ ପିତର, ଜୋହନ, ଜାକୁବ, ଆନ୍ଦ୍ରିୟ, ପିଲିପ୍, ଥୋମା, ବାର୍ତଲମି, ମାତିଉ, ଆଲପିଦି ମାରିନ୍ ଜାକୁବ, ଦେସ୍ତିଙ୍ଗ୍ଜିବନ୍ନୋନି ସିମୋନ ମାରି ଜାକୁବଦି ମାରିନ୍ ଜିହୁଦା ।
୧୪ ୱାର୍ ବେଡ଼ାବେଡ଼ାଦୁ ଉନ୍ଡ୍ରେ ଦଲ୍ ୱାଜା ପାର୍ତାନା କିଦେଙ୍ଗ୍ ଉନ୍ଡ୍ରେମାନୁ ଆଜିମାର୍ହାର୍ ମାରି ୱାରି ୱାଲେ ଜିସୁଦି ଆଇସି ମରିୟମ୍ ମାରି ଆଇ ଆଇମେକ୍ ମାରି ଜିସୁଦି ତଡ଼ାନ୍କୁ ବା ଉଣ୍ତାଜି ମାର୍ହାର୍ ।
୧୫ ଏସ ଦିନ୍ ୱେନ୍କା ସଏକଡ଼େ ଲୋକୁ ବିସ୍ବାସ୍ତି ତଡ଼ାନ୍କା ଉନ୍ଡ୍ରି ପେରି ମିଟିଙ୍ଗ୍ତୁ ପିତର ନିଲ୍ତାନ୍ନୋ ଇର୍ହାନ୍
୧୬ “ତଡ଼ାନ୍କୁ ନି ତାଙ୍ଗିଁକି, ଆମା ଜିହୁଦା ଜିସୁଙ୍ଗୁଁ ଆସ୍ତେଙ୍ଗ୍ ଇଜି ସାତ୍ରୁରିଙ୍ଗ୍ ସାରି ତର୍ସି ଅତାମାର୍ହାନ୍, ଆୟା ବିସୟ୍ତାନ୍ ଦାଉଦ ପବିତ୍ରଆତ୍ମାଦି ମାଣାନ୍ ସାଲାଜି ବବିସ୍ୟତ ମାଟା ୱେର୍ତା ମାର୍ହାନ୍ । ଦାର୍ମୁସାସ୍ତ୍ରଦୁ ରାସ୍ତି ଆୟା ମାଟା ପୁରା ଆଦେଙ୍ଗ୍ ସତ୍ ମାର୍ହାତ୍ ।
୧୭ ମାରିବା ଜିହୁଦା ମା ଦଲ୍ତୁ ମାର୍ହାନ୍ ମାରି ମା ଅରେନ୍ ଅର୍ସେ ସେବା ପାଣି କିନି ଉଣ୍ତିଙ୍ଗ୍ ଆସ୍କିଆତା ମାର୍ହାନ୍ ।”
୧୮ ୱାନି ତାଗ୍ଇ ପାଣି ଉଣ୍ତିଙ୍ଗ୍ ଜିହୁଦା ପୟ୍ତିମାନି ଡାବୁଣାଙ୍ଗ୍ ଉନ୍ଡ୍ରି ବୁମି କଡ଼ାୟା ଆତାମାର୍ହାତ୍ ମାରି ଆୟା ବୁମିଦୁ ମେଡ଼େତାନ୍ନୋ ୱାନ୍ ସାତାନ୍ । ୱାନି ପଟା ପାଡିଜି ସୋଲ୍ସି ୱାସ୍କିଙ୍ଗ୍ ସତେ ସର୍ଏ ।
୧୯ ଜିରୁସାଲାମ୍ତି ଗାଡ଼୍ତୁ ମାନି ୱିଜୁ ଲୋକୁ ଇୟାୱିଜୁ ନେସ୍ତେଙ୍ଗ୍ ଆଟ୍ସି ୱାରି ବାସାଦାନ୍ ଆୟା ବୁମିଦି ଦରୁ “ଆକେଲ ଦାମା” ଅର୍ତାତ୍ “ନେତେର୍ ତି କିଡ଼ିଇ” ଇଜି ଇଟ୍ତାମାନାର୍ ।
୨୦ ଇୟା ବିସୟ୍ତାନ୍ ଗିତସଂହିତା ବଇଦୁ ରାସାତାମାନାତ୍
“ୱାନି ଇଲୁ ସିମ୍ରା ଆପିତ୍,
ଆବେନୁ ଏନ୍ ତେବାମାକିର୍,
ମାରି ବା ରାସାତାମାନାତ୍;
ଆଇକାନ୍ ଅରେନ୍ ୱାନି ପାଣିଦୁ ରାପିନ୍ ।”
୨୧ “ମାରି ପ୍ରବୁ ଜିସୁଦି ଡ଼େସିନିଙ୍ଗିଁନି ବିସୟ୍ତାନ୍ ସାକି ଆଦେଙ୍ଗ୍ ଇଜି ମାରି ଅରେନ୍ ମା ୱାଲେ ମିସାନିକା ଦର୍କାର୍ ।
୨୨ ଜିସୁ ଜୋହନତି ମାଣାନ୍ ଡୁବନ୍ ଅତି ସମୟ୍ତାନ୍ ମୁସ୍କୁ ସନି ସାନ୍ଧି ୱିଜୁ ୱାଲେ ପ୍ରବୁ ଜିସୁ ମା ୱାଲେ ବୁଲାସାଲା କିନିୱାଲେ, ଏମେ ଲୋକୁ ମା, ଦଲ୍ତୁ ମାର୍ହାର୍ ଅରେନ୍ ୱାନିଙ୍ଗ୍ ଆସ୍କିଦେଙ୍ଗ୍ ଆନାତ୍ ଏମେ ଲୋକୁ ମା ଦଲ୍ତୁ ମାର୍ହାର୍, ୱାରି ଲୋଇରାନ୍ ଅରେନ୍ୱାନିଙ୍ଗ୍ ମାରିଡ଼େସି ଇୟାଉଣ୍ତିଙ୍ଗ୍ ଆସ୍କିଦେଙ୍ଗ୍ ଆନାତ୍ ।”
୨୩ ୱାର୍ ରିଏରି ଦରୁ ୱେର୍ତାର୍ ଜୋସେପ୍ ଏନ୍ ବର୍ସବା ମାରି ଜୁସ୍ତସ୍ ଇଜି ବା ଇନାର୍ ମାରି ମତିୟ ।
୨୪ ମାରି ପାର୍ତନା କିତାର୍, “ପ୍ରବୁ, ନିନ୍ ୱିଜୁ ସିନ୍ତା ନେସ୍ନି । ଇୟା ରିଏରି ଲୋଇ ଏଙ୍ଗ୍ଁ ବାସେକିତିମାନି,
୨୫ ଇୟା ବେକ୍ତି ଜିହୁଦା ନିଜେଦିବାଡିଦୁ ସନି ଉଣ୍ତିଙ୍ଗ୍ ଇୟା ଏମେ ସେବା ମାରି ପେରିତ ସିସୁ ପାଣି କିନାନ୍ ।”
୨୬ ତାନିୱେନ୍କା ରିଏରି ଲୋଇ ଅରେନ୍ୱାନିଙ୍ଗ୍ ବାସ୍କିଦେଙ୍ଗ୍ କୁଡ଼ୁକୁଡ଼ି ପକ୍ତାର୍ । ମାରି ମତିୟଦି ଦର୍ତାନ୍ କୁଡ଼ୁକୁଡ଼ି ସତାତ୍; ଆବେଟ୍ ୱାନ୍ ଏଗାର୍ ଲୋକୁ ସିସୁରି ୱାଲେ ମିସାତାନ୍ ।