୨୬
ଆଗ୍ରିପାଦି ଆଗ୍ଡ଼ି ପାଉଲ ନିଜେଦି ତରିଟାନ୍ ୱେର୍ନିକା
୧ ଆଗ୍ରିପା ପାଉଲତିଙ୍ଗ୍ ଇର୍ହାନ୍, “ମିଙ୍ଗିଁ ନିଜେଦି ମାଣ୍କୁ ୱେର୍ତେଙ୍ଗ୍ ଇଜି ସାରି ସିଆୟ୍ଆତାତ୍ ।” ପାଉଲ କିୟୁ ସାର୍ପ୍ସି ନିଜେଦିଙ୍ଗ୍ ସମର୍ଥନ କିଜି ଇର୍ହାନ୍ :
୨ ଏ ରାଜା ଆଗ୍ରିପା, ଜିହୁଦିର୍ ନାଙ୍ଗିଁ ଆମା ୱିଜୁ ବିସୟ୍ତାନ୍ ୱେର୍ତାମାନାର୍, ଆୟା ବିସୟ୍ତାନ୍ ମି ଆଗ୍ଡ଼ି ନାନ୍ ନିଜେଦିଙ୍ଗ୍ ୱେର୍ତେଙ୍ଗ୍ ସୁଜୋଗ ପୟ୍ତି ମାନିଙ୍ଗ୍ ନେରୁ ନିଜେଦିଙ୍ଗ୍ କାର୍ମୁ ଇଜି ଅଡ଼୍ବିଜିନା,
୩ ଇରିଙ୍ଗ୍ ଜିହୁଦିରି ରିତି ନିତି ମାରି ୱାର୍ଗିନି ବିସୟ୍ତାନ୍ ନିନୁ ନେଗେନ୍ତାନ୍ ନେସ୍ନି, ମାଡ଼ିସ୍ କିଜିନା, ନିନୁ ସାହାସ୍ତାନ୍ ନା ମାଟା ୱେନ୍ଆ ।
୪ କଡ଼ୱାଲେରାନ୍ ନାନ୍ ଏଣ୍ତେସ୍ ଜିତାମାନା, ଆକା ଜିହୁଦିର୍ ନେସ୍ନାର୍ । ଆଗ୍ଡ଼ି ନିଜେଦି ଦେସ୍ତୁ ମାରି ୱେନ୍କା ଜିରୁସାଲମ୍ତୁ ନାନ୍ ଏଣ୍ତେସ୍ ଜିବନ୍ କାଟେ କିତାମାନା, ଲୋକୁ ଆୟାକା ନେସ୍ନାର୍ ।
୫ ନାନ୍ ଜେ ଆଗ୍ଡ଼ିରାନ୍ ପାରୁସି ଦର୍ତି ମା ଦର୍ମଦି ୱିଜୁମାଣ୍କୁ ଦଲ୍ତି ପେରିକାନ୍ ଆଜି ଜିଜି ମାର୍ଆ, ୱାର୍ ଇକା ନେସ୍ନାର୍ ମାରି ବଦା କିତିଙ୍ଗାଁ, ୱାର୍ ଇୟା ବିସୟ୍ତାନ୍ ସାକି ସିଦେଙ୍ଗ୍ ଆଟ୍ନାର୍ ।
୬ ମାପୁରୁ ମା ପୁର୍ବେଦିଡକ୍ରାଦାଦାରିଙ୍ଗ୍ ଆମା ମାଟା ସିତାମାର୍ହାନ୍, ଆବେନୁ ନା ଆସା ମାନି ଉଣ୍ତିଙ୍ଗ୍ ନେରୁ ନାନ୍ ଇବେନୁ ବିଚାର୍ ଆଦେଙ୍ଗ୍ ନିର୍ଆମାନା ।
୭ ମା ବାରଗୋଟା କୁଟୁମ୍ ୱେଡ଼େନାଡ଼ା ପ୍ରବୁଦି ସେବା କିଜି ଆୟା ଉନ୍ଡ୍ରି ବିସୟ୍ ପୟ୍ନି ଉଣ୍ତିଙ୍ଗ୍ ଆସା କିନାର୍ । ଏ ରାଜା, ନା ଆୟା ଆସା ଉଣ୍ତିଙ୍ଗ୍ ଜିହୁଦିର୍ ନାଙ୍ଗିଁ ଦୋସ୍ କିଜିନାର୍ ।
୮ ମାପୁରୁ ଜେ ସାତିୱାରିଙ୍ଗ୍ ନିକ୍ନାନ୍, ଇକା ବିସ୍ବାସ୍ କିନିକା ବେକାର୍ ଇଜି ମିର୍ ଏନ୍ଦା ଅଡ଼ବିଜିନିଦେର୍ ?
୯ ନାଜରିୟତିୟ ଜିସୁଦି ବିରୁଦ୍ତିଙ୍ଗ୍ ମେଡ଼େକ୍ନି ଉଣ୍ତିଙ୍ଗ୍ ନାନ୍ ଆୟାଦାପ୍ରେ ସେସ୍ଟା କିନିକା ଇଜି ଅଡ଼ବିତାମାର୍ଆ ।
୧୦ ଜିରୁସାଲମ୍ତୁ ନାନ୍ ଆୟାୱାଜା କିତା । ୱିଜେରିଙ୍ଗ୍ ପେରିଜାଜକରିମାଣ୍କୁ ଅଦିକାର୍ତି ଆକୁ ଅସି ବିସ୍ବାସିରି ଲୋକା ଲୋଇରାନ୍ ନାଣ୍ତ ଲୋକାଙ୍ଗ୍ ଜଇଲ୍ତୁ ନିର୍ତାମାର୍ଆ ମାରି, ୱାରିଙ୍ଗ୍ ସାନିଦଣ୍ତ ସିଆୟ୍ଆନିୱାଲେ ନାନ୍ ବା ୱାରି ବିରୁଦ୍ତାନ୍ ମାର୍ଆ ।
୧୧ ଗାଦି ଦେବେଙ୍ଗ୍ ଜିହୁଦିରି ପାର୍ତନାକିନି ଇଲ୍କାଙ୍ଗ୍ ନାନ୍ ୱାରିଙ୍ଗ୍ କାସ୍ଟୁ ସିତାମାନା ମାରି ୱାରି ବିସ୍ବାସ୍ତାନ୍ ଅଲଗା କିନି ଉଣ୍ତିଙ୍ଗ୍ ସେସ୍ଟା କିତାମାର୍ଆ । ନାନ୍ ୱାରି ଉଣ୍ତିଙ୍ଗ୍ ବେସି ରିସା ଆତାମାର୍ଆ, ୱାରି ମୁସ୍କୁ କାସ୍ଟୁ ନିନ୍ଦା ସିନି ଉଣ୍ତିଙ୍ଗ୍ ଆଇଦେସ୍କାଦି ଗାଡ଼୍କାଙ୍ଗ୍ ବା ସର୍ଆମାର୍ଆ ।
ନିଜେଦି ବାଦେଲ୍ଆନି ବିସୟ୍ତାନ୍ ପାଉଲତି ମାଟା
(ପ୍ରେରିତ ୯:୧-୧୯; ୨୨:୬-୧୬)
୧୨ ଇୟା ଉଦେସ୍ତାନ୍ ୱିଜେରିଙ୍ଗ୍ ପେରି ଜାଜକରି ମାଣ୍କୁ ଅଦିକାର୍ତି ଆକୁ ମାରି ଆଦେସ୍ ଅସିନାନ୍ ଦାମାସ୍କସ୍ତୁ ସର୍ଆମାର୍ଆ ।
୧୩ ଏ ରାଜା ଆଗ୍ରିପା, ଅର୍ଲେନ୍ ଦାପ୍ରେନେ ମାଦ୍ଲାମ୍ ବେଡ଼ାଦୁ ପେର୍ଜାରି ମୁସ୍କୁ ନାନ୍ ୱେଡ଼ାଦି ଜାୟ୍ତିମାଣ୍କୁ ନାଣ୍ତ ଅଡ଼ିନି ଜାୟ୍ ସୁଡ଼ୁତା, ମୁସ୍କୁପୁର୍ତାନ୍ ଆୟା ଜାୟ୍ ୱାଜି ନାଙ୍ଗିଁ ମାରି ନା ୱାଲେମାର୍ଇୱାରି ସାରିବେଡ଼୍ତି ତରିତିକା ସୁଡ଼ୁତା ।
୧୪ ମାପୁ ୱିଜୁଲୋକୁ ବୁମିଦୁ ମେଡ଼େତାପ୍, ନାନ୍ ଏବ୍ରି ବାସାଦାନ୍ ନା, ଉଣ୍ତିଙ୍ଗ୍ ଇୟା ମାଟା ୱେର୍ଆ, ସାଉଲ, ସାଉଲ, ନିନୁ ଏନ୍ଦା ନାଙ୍ଗିଁ ତାଡ଼ନା କିଜିନି ? ଡ଼ୁଜି ମାନି ଲୋକ୍ତି ତୁତେରିବାଡିଗାଦି କୁଟି ଟିପୁଦୁ ଅଦ୍ଗିଜିମାନି ଡ଼ାନ୍ ୱାଜା ନିନ୍ ନିଜେ କାସ୍ଟୁ ଆନି ।
୧୫ ନାନ୍ ୱେନ୍ବାତା, ପ୍ରବୁ, ନିନ୍ ଏନୁ ? ପ୍ରବୁ ଇର୍ହାନ୍, ନାନ୍ ଜିସୁ, ଆମାୱାନିଙ୍ଗ୍ ନିନ୍ ନିନ୍ଦା କିଜିନି ।
୧୬ ମାତର୍ ନିଙ୍ଗିଁଆ, ନିଙ୍ଗିଁନା ସେବାକିନି ୱାଜା ଆସ୍କିନି ଉଣ୍ତିଙ୍ଗ୍ ନାନ୍ ନିଙ୍ଗିଁ ତରାୟ୍ଆତାମାନା । ନେରୁ ମିରୁ ନା ବିସୟ୍ତାନ୍ ଆମାକା ସୁଡ଼ୁତିଦେର୍ ମାରି ୱାଜିନିଦିନ୍ତୁ ନାନ୍ ନିଙ୍ଗିଁ ଆମାକା ତର୍ନା, ଆୟା ବିସୟ୍ତାନ୍ ନିନ୍ ଆଇୱାରିଙ୍ଗ୍ ୱେର୍ନି ।
୧୭ ଆମା ଜିହୁଦି ମାରି ଅଣଜିହୁଦି ଲୋକା ଲାକ୍ତୁ ନାନ୍ ନିଙ୍ଗିଁ ପୋକ୍ନା, ୱାରିମାଣ୍କୁ ନାନ୍ ନିଙ୍ଗିଁ ରକିୟା କିନା ।
୧୮ ନିଙ୍ଗିଁ ୱାରି କାଣୁକୁ ରେପିସ୍ କିନିକା ମାନାତ୍ ମାରି ୱାରିଙ୍ଗ୍ ସିକାଟିଦାନ୍ ଜାୟ୍ତୁ ମାରି ସୟତାନ୍ତି ମାଣାନ୍ ପ୍ରବୁଦି ଲାକ୍ତୁ ତାତେଙ୍ଗ୍ ପଡ଼ାନାତ୍, ଏଣ୍ତେସ୍ ନା ମାନୁ ବିସ୍ବାସ୍ କିନିମାଣୁକୁ ୱାରି ପାପ୍ କେମା ଆନାତ୍ ମାରି ମାପୁରୁଙ୍ଗୁଁ ଆସ୍କିତି ଲୋକା ମାନୁ ୱାର୍ ବାଡି ପୟ୍ନାର୍ ।
ନିଜେଦି ପାଣି ବିସୟ୍ତାନ୍ ପାଉଲତି ମାଟା
୧୯ ମାରି, “ଏ ରାଜା ଆଗ୍ରିପା, ନାନ୍ ମୁସ୍କୁପୁର୍ତାନ୍ ଆମା ଦର୍ଶନ ପୟ୍ତାମାନା, ଆୟାତାନିଙ୍ଗ୍ ଅମାନ୍ୟ ଆଏ ।
୨୦ ନାନ୍ ଆଗ୍ଡ଼ି ଦାମାସ୍କସ୍ ନି ଜିରୁସାଲମ୍ତୁ ମାରି ତାନେୱେନ୍କା ପୁରାୱିଜୁ ଜିହୁଦା ଦେସ୍ତୁ ମାରି ଅଣଜିହୁଦିରି ମାନୁ ପ୍ରଚାର୍ କିତା, ଏଣ୍ତେସ୍ ୱାର୍ ପାପ୍ତି ଉଣ୍ତିଙ୍ଗ୍ ମୋନ୍ ଡ଼େପ୍ସି ମାପୁରୁଦି ଲାକ୍ତୁ ଡ଼େସିୱାନାର୍ ମାରି ୱାର୍ ଜେ ଏତ୍ କିତାମାନାର୍, ଆୟା ପାଣିଦୁ ତର୍ନାର୍ ।
୨୧ ଇୟା ବିସୟ୍ତାନ୍ ନାନ୍ ମନ୍ଦିର୍ତୁ ମାନିୱାଲେ ଜିହୁଦିର୍ ନାଙ୍ଗିଁ ଆସ୍ସି ସାୟାମାର୍ଗା ଡାକ୍ତେଙ୍ଗ୍ଁ ସେସ୍ଟା କିଜିମାର୍ହାର୍ ।
୨୨ ମାତର୍ ମାପୁରୁଦିମାଣ୍କୁ ସାହାଜ୍ୟ ପୟ୍ଜି ନାନ୍ ନେରୁ ସାନ୍ଧି ଇସ୍ରି ପେରି ୱିଜେରି ଲାକ୍ତୁ ସାମାନ୍ତାନ୍ ନା ସାକ୍ଷ୍ୟ ସିଦେଙ୍ଗ୍ ନିର୍ଆମାନା । ବାବବାଦିରି ନି ମୋସା, ଆମାକା ଗଟାନାତ୍ ଇଜି ୱେର୍ତାମାନାର୍, ନାନ୍ ଆୟା ମାଟା ୱେର୍ସିନା :
୨୩ ମସିହ ଦୁଃକ୍ବୋଗ କିଜି ମାରି ସାତିୱାରି ମାଣ୍କୁ ୱିଜେରିଙ୍ଗ୍ ଆଗ୍ଡ଼ି ଜିବନ୍ଆଜି ମାରିଡ଼େସି ନିଙ୍ଗିଁଜି ଜିହୁଦି ମାରି ଅଣଜିହୁଦିରି ଲାକ୍ତୁ ରକ୍ୟାଦି ଜାୟ୍ ତର୍ନାନ୍ ।”
୨୪ ଇୟାୱାଜା ପାଉଲ ନିଜେଦି ତରିଟାନ୍ ୱେର୍ସିମାନିୱାଲେ ପେସ୍ଟସ୍ ଆଉଲି ଆଜି ଇର୍ହାନ୍, “ପାଉଲ, ନିନୁ ବାୟା; ନି ନାଣ୍ତ ସିକିୟା ନିଙ୍ଗିଁ ବାୟା କିତାମାନାତ୍ ।”
୨୫ ପାଉଲ ଇର୍ହାନ୍, “ନାନ୍ ବାୟା ସିଲେ, ଏ ସନ୍ମାନ୍ତି ପେସ୍ଟସ୍, ନାନ୍ ଆମାକା ଇଜିନା, ଆକା ସତ୍ ମାରି ସାନ୍ତି ବୁଦିଦି ବାକ୍ୟ ୱେର୍ସିନା ।
୨୬ ରାଜା ଆଗ୍ରିପା ! ନିନୁ ଇୟାୱିଜୁ ବିସୟ୍ ନେସ୍ତିମାନିଙ୍ଗ୍ ନାନ୍ ନି ଆଗ୍ଡ଼ି ଇୟା ମାଟା ୱେର୍ତେଙ୍ଗ୍ ସାହାସ୍ କିଜିନା, ନାନୁ ପୁରା ନେସ୍ନା ଜେ, ଇୟାୱିଜୁ ବିସୟ୍ ନିଙ୍ଗିଁ ଜାଣାମାନାତ୍, ଇରିଙ୍ଗ୍ ନେସ୍ଇ ବାଡିଦୁ ନେସ୍ଇ ୱାଜା ଇୟା ବିସୟ୍କୁ ଗଟାଉଁ ।
୨୭ ଏ ରାଜା ଆଗ୍ରିପା, ନିନୁ ବାବବାଦିରିଙ୍ଗ୍ ବିସ୍ବାସ୍ କିନି ? ନିନୁ ବିସ୍ବାସ୍ କିନି ଇଜି ନାନ୍ ନେସ୍ନା ।”
୨୮ ଆବେନୁ ଆଗ୍ରିପା ପାଉଲତିଙ୍ଗ୍ ଇର୍ହାନ୍, “ଇୟା ଉଣା ସମୟ୍ତି ଲୋଇ ନିନୁ ଇନିକା ନାଙ୍ଗିଁ କ୍ରିସ୍ଟିୟାନ୍ କିନା ଇଜି ଅଡ଼ବିଜିନି ?”
୨୯ ପାଉଲ ଇର୍ହାନ୍, “ଉଣା ସମୟ୍ ଆପିତ୍, କି ନାଣ୍ତ ସମୟ୍ ଆପିତ୍, ମାପୁରୁଦିମାନୁ ନା ନିସ ପାର୍ତାନା, ନିନ୍ ମାରି ନେରୁ ନା ମାଟା ୱେର୍ଇମାନି ୱିଜେରେ ନା ୱାଜା ଆପିର୍, ମାରିବା ଇୟାୱାଜା ସିକିଣିଦାନ୍ ତରାୟ୍ଆଜି ଜଇଲ୍ତୁ ସୋଲିର୍ ଇଜି ନାନ୍ ଇନ୍ଏ ।”
୩୦ ତାନେୱେନ୍କା ରାଜା, ସାସନକିନିକାନ୍, ବର୍ଣ୍ଣିସ୍ ମାରି ଆଇକାର୍ ୱିଜେରେ ସନ୍ଡ୍ରେଙ୍ଗ୍ ଇଜି ନିଙ୍ଗିଁତାର୍ ।
୩୧ ୱାର୍ ସୋଲ୍ସି ମାର୍ଇୱାଲେ ନିଜେନିଜେଦିଙ୍ଗ୍ ଇର୍ହାର୍, “ଇୟା ଲୋକ୍ ଇୟାୱାଜା ଇନି ପାଣି କିଏନ୍, ଆମାତାନି ଉଣ୍ତିଙ୍ଗ୍ ୱାନ୍ ସାନିଦଣ୍ତ ପୟ୍ନାନ୍ ମାରି ଜଇଲ୍ତୁ ସନାନ୍ ।”
୩୨ ଆଗ୍ରିପା ପେସ୍ଟସ୍ତିଙ୍ଗ୍ ଇର୍ହାନ୍, “ଜଦି ଇୟା ଲୋକୁ କାଇସର୍ତିମାନୁ ୱେର୍ଏତାନ୍ ମାନ୍ଧି, ଆର୍ତିଙ୍ଗ୍ ୱାନିଙ୍ଗ୍ ମାଡୁ ଡ଼ିସ୍ସୋ ସିଦେଙ୍ଗ୍ ଆତାତ୍ମାନ୍ଧି ।”