କରନ୍ତୀୟମାନଙ୍କ ମଣ୍ତଲି ନିକଟକୁ ପାଉଲଙ୍କ ପ୍ରଥମ ପତ୍ର
କରିନ୍ତିୟ ମଣ୍ତଲିଦି ଲାକ୍ତୁ ପାଉଲତି ପାର୍ତୁମ୍ ଆକୁ
କରିନ୍ତିୟ ଆକୁ ବିସୟ୍ତାନ୍ ଏସ ମାଟା
ପାରତୁମ୍ କରିନ୍ତିୟ ଆକୁ ପେରିତ ପାଉଲତି ମାଣାନ୍ ଜିସୁ କ୍ରିସ୍ତଦି ଜନମ୍ତି ୫୫ ବାର୍ସେକ୍ ୱେନ୍କା ରାସାତାମାର୍ହାତ୍ ୧:୧ । ପାଉଲତି ମାଣାନ୍ ରାସାତିମାନି ରୁଣ୍ତି ଆକୁ ଲୋଇ ଇକା ଆଜିନାତ୍ ପାର୍ତୁମ୍ ଆକୁ । ୱାନ୍ ଆନାତ୍ସୁଗି ଇୟା ଆକୁ ଏପିସ୍ତୁ ମାର୍ଇ ବେଡ଼ାଦୁ ରାସାତାମାର୍ହାନ୍ । ମାସିଦନିଆଦାନ୍ କରନ୍ତିୟଦୁ ବାସାନି ଆଗ୍ଡ଼ି ରାସାତାମାନାନ୍ ୧୬:୫-୯ ।
ପାଉଲ ଇୟା ଆକୁଦୁ ମଣ୍ତଲି ଲୋଇ ରୁଣ୍ତି ବାଗ୍କୁ ଆନିକା ମାରି ତାଗ୍ଇ ପାଣି ସାଲାଜିମାନି ବିସୟ୍ ମଣ୍ତଲିଦି ଲୋକା ମାଣୁକୁ ୱେନ୍ଞ୍ଜି ୱେର୍ତେଙ୍ଗ୍ ଇଜି ଦିୟାନ୍ ସିନାନ୍ । କରିନ୍ତିୟ ଗାଡ଼୍ ତାଗ୍ଇ ପାଣିକିନି ବିସୟ୍ ଉଣ୍ତିଙ୍ଗ୍ ୱେଙ୍ଗିଁତା ମାର୍ଆତ୍ । ଆଦେଙ୍ଗ୍ ମଣ୍ତଲି ଇୟା ବଦା ୱିଜୁ ପୟଜି ମାର୍ହାତ୍ ଇବେନୁ କାବାନିକା ଇନିକା ସିଲେ । ୧ କରିନ୍ତିୟ ଜିବନ୍ନୋନି ବିସୟ୍ତାନ୍ ଉନ୍ଡ୍ରି ଅଧ୍ୟାୟ୍ ମାନାତ୍ ୧୩ ।
ଇୟା ଆକୁଦୁ ମାନି ମୁକିୟ ବିସୟ୍
୧. ପାଉଲ କରିନ୍ତିୟରିଙ୍ଗ୍ ନମସ୍କାର୍ କିଜିନାର୍ ମାରି ୱାରି ଉଣ୍ତିଙ୍ଗ୍ ମାପୁରୁଙ୍ଗୁଁ ଦନ୍ୟବାଦ୍ ସିନାନ୍ । ୧:୧-୯
୨. ପାଉଲ କରନ୍ତି ମଣ୍ତଲିଦାନ୍ ପୟ୍ତିମାନି ମଣ୍ତଲି ବାଗ୍ ଆନି ବିସୟ୍ତାନ୍ ସିକିୟା ସିନାନ୍ । ୧:୧୦–୪:୨୧
୩. ଆଇକା ୱାନ୍ ତାଗ୍ଇ ପାଣିୱିଜୁ ମାରି ଅରେନ୍ ଆଇୱାନିଙ୍ଗ୍ କର୍ଟତୁ ଅନି ବିସୟ୍ତାନ୍ ରାସାନାନ୍ । ୫–୬
୪. ୱେନ୍କା ପେଡ଼ିଆନି ବିସୟ୍, ଦିୟାମ୍ତିଙ୍ଗ୍ ପୁଜା ସିନିକା, ଉପାସନା, ପବିତ୍ର ଆତ୍ମାଦି ଦାନ୍ ମାରି ମାରିଡ଼େସି ନିଙ୍ଗିଁନିକା ରାସ୍ନାନ୍ । ୭–୧୫
୫. ସାରାସାରିୱେନ୍କା ୱାନ୍ ଏସ ବ୍ୟବହାର୍ ଆନିକା ମାରି ନିଜେଦି ବିସୟ୍ତାନ୍ ରାସ୍ସି ୱିସ୍ନାନ୍ । ୧୬
୧
୧ ନାନ୍ ପାଉଲ, ମାପୁରୁଦି ଇଚ୍ଛାଦାନ୍ କ୍ରିସ୍ତ ଜିସୁଦି ଆସ୍କିଆତି ଅରେନ୍ ପ୍ରେରିତ୍ ସିସୁ, ମା ତଡ଼ାନ୍ ସୋସ୍ଥିନା,
୨ କରନ୍ତି ଗାଡ଼୍ଦୁ ମାନି ମାପୁରୁଦି ମଣ୍ତଲି ଲାକ୍ତୁ ରାସ୍ସିନାନ୍ : ଆମାକାର୍ ମାପୁରୁଦି ପବିତ୍ର ଲୋକୁ ଆନି ଉଣ୍ତିଙ୍ଗ୍ ବଦାମାନାର୍ ମାରି ଜିସୁ କ୍ରିସ୍ତଦି ୱାଲେ ମିସାନି ମାଣ୍କୁ ମାପୁରୁଦି ଲୋକୁଆତା ମାନାର୍ ମାରି ୱିଜୁ ମା ପ୍ରବୁ ଜିସୁ କ୍ରିସ୍ତଦି ଉପାସନା କିଜିନାର୍ :
୩ ମି ଉଣ୍ତିଙ୍ଗ୍ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାଣୁକୁ ଦୟା ମାରି ସାନ୍ତି ଆପିତ୍ ।
କ୍ରିସ୍ତଦି ମାଣ୍କୁ ଆସିର୍ବାଦ୍
୪ ଇରିଙ୍ଗ୍ କ୍ରିସ୍ତ ଜିସୁଦି ୱାଲେ ମିସାନିମାଣୁକୁ ମାପୁରୁ ମିଙ୍ଗିଁ ଆମା ଦୟା ସିତା ମାନାନ୍, ଆୟାଉଣ୍ତିଙ୍ଗ୍ ନାନ୍ ୱିଜୁଦିନ୍ ମି ବିସୟ୍ତାନ୍ ମାପୁରୁଙ୍ଗୁଁ ଦନ୍ୟବାଦ୍ ସିଜିନା,
୫ ଇରିଙ୍ଗ୍ କ୍ରିସ୍ତଦି ୱାଲେ ମିସାତି ମାନିଙ୍ଗ୍ ମିର୍ ୱିଜୁ ବିସୟ୍ତି ସିକିୟାଦୁ ମାରି ୱିଜୁଜାତିଦି ବୁଦିଦୁ ବା ଦନି ଆତିମାନିଦେର୍ ।
୬ ଇୟାୱାଜା କ୍ରିସ୍ତଦି ମାଟା ମିମାନୁ ସାକ୍ୟ ତିର୍ଆତା ମାନାତ୍ ।
୭ ଆଦେଙ୍ଗ୍ ପ୍ରବୁ ଜିସୁ କ୍ରିସ୍ତଦି ୱାନିତାନିଙ୍ଗ୍ କାପ୍କିଜି ତେବାନି ବେଡ଼ାଦୁ ମି ଇନି ଆତ୍ମାଦି ଦାନ୍ତୁ ଉଣା ଆଏତ୍ ।
୮ ଇୟାଉଣ୍ତିଙ୍ଗ୍ ୱାନ୍ ମିଙ୍ଗିଁ ସାରାସାରି ଦିନ୍ ସାନ୍ଦି ବା ତିର୍ ଇଡ୍ନାନ୍, ମା ପ୍ରବୁ ଜିସୁ କ୍ରିସ୍ତଦି ୱାନିନାଣ୍ତିଙ୍ଗ୍ ଏଣ୍ତେସ୍ ମିର୍ ନିନ୍ଦା ଆଇଦେର୍ ।
୯ ଆମା ମାପୁରୁ ୱାନି ମାରିନ୍ ମା ପ୍ରବୁ ଜିସୁ କ୍ରିସ୍ତଦି ସାକା ପୟ୍ନି ଉଣ୍ତିଙ୍ଗ୍ ମିଙ୍ଗିଁ କୁକ୍ତାମାନାନ୍, ୱାନ୍ ୱିଜୁଦିନ୍ ବିସ୍ବାସ୍ ।
ମଣ୍ତଲିଦୁ ବାଗ୍କିନିକା
୧୦ ଏ ତଡ଼ାନ୍କୁ ନି ତାଙ୍ଗିଁକି, ମା ପ୍ରବୁ ଜିସୁ କ୍ରିସ୍ତଦି ସାକ୍ତିଦାନ୍ ନାନ୍ ମିଙ୍ଗିଁ ଅନୁରଦ୍ କିଜିନା, ଏଣ୍ତେସ୍ ମିର୍ ୱିଜୁଲୋକୁ ୱାର୍ଗିଜିସାନିୱାଲେ ଉନ୍ଡ୍ରେ ମାଟା ଇନିଦେର୍, ମାରି ମି ଲୋଇ ଏର୍ପିସିସାନିକା ଆଏତ୍ । ମାତର୍ ମିର୍ ଉନ୍ଡ୍ରି ମୋନ୍ତାନ୍ ମାରି ଉନ୍ଡ୍ରି ବିଚାର୍ତାନ୍ ଉନ୍ଡ୍ରେମାନୁ ଆଦୁ ।
୧୧ ଏ ନା ତଡ଼ାନ୍କୁ ନି ତାଙ୍ଗିଁକି, ଖ୍ଳୟୀଦି ଇଲୁଦାଣୁକୁନେ ଏସଲୋକ୍ ମି ବିସୟ୍ତାନ୍ ନା ଲାକ୍ତୁ ଇକା ୱେର୍ତାମାନାର୍, ମି ଲୋଇ ଏର୍ପିସିସାନିକା ମାନାତ୍ ।
୧୨ ନା ମାଟାଦି ଏତ୍ ଇକା, ମିର୍ ୱିଜୁଲୋକ୍ ଆଇଆଇ ପାଣି କିଜିନିଦେର୍, ଏନ୍ ଏନ୍ ଆଜିନାର୍, ନାନୁ ପାଉଲତି ୱେନ୍କା ସୋଲ୍ସିନା, ମାରି ଏନ୍ ଏନ୍ ଆଜିନାର୍, ନାନୁ ଆପୋଲୋତି ୱେନ୍କା ସୋଲ୍ସିନା, ଏନ୍ ଏନ୍ ଆଜିନାର୍, ନାନୁ ପିତର୍ତି ୱେନ୍କା ସୋଲ୍ସିନା, ମାରି ଏନ୍ ଏନ୍ ଆଜିନାର୍, ନାନୁ କ୍ରିସ୍ତଦି ୱେନ୍କା ସୋଲ୍ସିନା ।
୧୩ କ୍ରିସ୍ତ ଇନିକା ବାଗ୍ବାଗ୍ ଆତାମାନାନ୍ ? ପାଉଲ ଇନିକା ମି ଉଣ୍ତିଙ୍ଗ୍ କ୍ରୁସ୍କାଟ୍ତୁ ସାତା ମାର୍ହାନ୍ ? ମାରି ମିର୍ ଇନିକା ପାଉଲତି ଦର୍ତାନ୍ ଡୁବନ୍ ଅତିମାର୍ଇଦେର୍ ?
୧୪ ନାନ୍ ମାପୁରୁଙ୍ଗୁଁ ଦନ୍ୟବାଦ୍ ସିଜିନା ଜେ କ୍ରିସ୍ପସ୍ ନି ଗାୟଙ୍ଗ୍ ଡ଼ିସ୍ତିଙ୍ଗ୍ ମି ଲୋଇରାନ୍ ମାରି ନାନ୍ ଏଙ୍ଗ୍ବା ଡୁବନ୍ ସିଏ ।
୧୫ ଆୟାଉଣ୍ତିଙ୍ଗ୍ ମିର୍ ନା ଦର୍ତାନ୍ ଡୁବନ୍ ଅତାମାନାପ୍ ଇଜି ମି ଲୋଇରାନ୍ ଏନ୍ ଇନ୍ଡ୍ରେଙ୍ଗ୍ ଆଟ୍ଏନ୍ ।
୧୬ ହୁଁ, ନାନ୍ ସ୍ତିପାନତିଙ୍ଗ୍ ମାରି ୱାରି ଇଲୁଦିୱାରିଙ୍ଗ୍ନେ ଡୁବନ୍ ସିତାମାନା; ମାତର୍ ଇକା ଡ଼ିସ୍ତିଙ୍ଗ୍ ମାରି ଏଙ୍ଗ୍ବା ନାନୁ ଡୁବନ୍ ସିତାମାନା ଇଜି ନାଙ୍ଗିଁ ଏତ୍ ରେଏଜିନା ।
୧୭ ଇରିଙ୍ଗ୍ କ୍ରିସ୍ତ ନାଙ୍ଗିଁ ଡୁବନ୍ ସିନି ଉଣ୍ତିଙ୍ଗ୍ ପୋକତାଏନ୍, ମାତର୍ ୱାନ୍ ନାଙ୍ଗିଁ ସୁସମାଚାର୍ ପ୍ରଚାର୍ କିଦେଙ୍ଗ୍ ପୋକତାତାମାନାନ୍; ଆକାବା ଲୋକା ବୁଦିଦାନ୍ ସିଲେ, ଏସ୍ତିୱାଲେ କ୍ରିସ୍ତଦି କ୍ରୁସ୍କାଟ୍ତି ସାକ୍ତି ମାରି ପ୍ରଭାବ ବେକାର୍ ଆଏତ୍ ।
ମାପୁରୁଦି ସାକ୍ତି ମାରି ବୁଦିଦି ଆଦାର୍ କ୍ରିସ୍ତ
୧୮ ଇରିଙ୍ଗ୍ ନାସ୍ଟୁ ଆଦେଙ୍ଗ୍ ସୋଲ୍ସିମାନି ଲୋକା ଉଣ୍ତିଙ୍ଗ୍ କ୍ରୁସ୍କାଟ୍ତି ମୁସ୍କୁରି ମାଟା ମୁର୍କୁ । ମାତର୍ ରକିୟା ପୟ୍ତିମାନି ମା ଉଣ୍ତିଙ୍ଗ୍ ଆକା ମାପୁରୁଦି ସାକ୍ତି ।
୧୯ ଇରିଙ୍ଗ୍ ଦର୍ମସାସ୍ତ୍ରଦୁ ରାସ୍ତାମାନାତ୍ :
“ନାନ୍ ଜ୍ଞାନ୍ମାନିୱାରି ଜ୍ଞାନ୍ ନାସ୍ଟୁ କିନାଟ୍,
ମାରି ବୁଦିମାନିୱାରି ବୁଦି ଡ଼ିସ୍ସି କିନାଟ୍ ।”
୨୦ ବୁଦି ଏମେ ? ସାସ୍ତ୍ରିର୍ ଏମେ ? ଇୟା ଯୁଗ୍ତି ସାଲାକି ଏମେ ? ମାପୁରୁ ଇନିକା ଦୁନିଆଦି ବୁଦିଦିଙ୍ଗ୍ ମୁର୍କୁ ଇଜି ଇନ୍ଏନ୍ ନୋ ?
୨୧ ଇରିଙ୍ଗ୍ ମାପୁରୁ ୱାନି ପେରି ଜ୍ଞାନ୍ତାନ୍ ତିର୍ କିତାମାର୍ହାନ୍ ଜେ ଜଗତ୍ତି ଲୋକୁ ନିଜେଦି ଜ୍ଞାନ୍ଦାନ୍ ମାପୁରୁଙ୍ଗୁଁ ନେସ୍ତେଙ୍ଗ୍ ଆଟ୍ଏର୍ । ମାପୁ ପ୍ରଚାର୍ କିଜିମାନି ବାକ୍ୟଦି ତାଗ୍ଇମାଟା ସୁସମାଚାର୍ତୁ ବିସ୍ବାସ୍ କିଜିମାନି ଲୋକାଙ୍ଗ୍ ରକିୟା କିନି ଉଣ୍ତିଙ୍ଗ୍ ମାପୁରୁ ୱେଡ଼ିକା ଆତାନ୍ ।
୨୨ ଇରିଙ୍ଗ୍ ଜିହୁଦିର୍ ସିନା ପୟ୍ନାର୍, ମାରି ଗ୍ରିକ୍କୁ ବୁଦି ପୟ୍ନାର୍ ।
୨୩ ମାତର୍ ମାପୁ କ୍ରୁସ୍ଦି ମୁସ୍କୁ ସାତିମାନି କ୍ରିସ୍ତଙ୍ଗ୍ ପ୍ରଚାର୍ କିନାପ୍, ୱାନ୍ ଜିହୁଦିରି ଉଣ୍ତିଙ୍ଗ୍ ଏରେପ୍ନିୱାଜା ମାରି ଅଣଜିହୁଦିରି ଉଣ୍ତିଙ୍ଗ୍ ମୁର୍କୁଦିୱାଜା;
୨୪ ମାତର୍ ଜିହୁଦି ଆପିନ୍ ମାରି ଅଣଜିହୁଦିରି ଆପିନ୍, ଆମାକାର୍ ଇଚ୍ଛାମାନାର୍, ୱାରି ଉଣ୍ତିଙ୍ଗ୍ କ୍ରିସ୍ତ ମାପୁରୁଦି ସାକ୍ତି ମାରି ମାପୁରୁଦି ଜ୍ଞାନ୍ଦିୱାଜା ।
୨୫ ଆର୍ତିଙ୍ଗ୍ ମାପୁରୁଦି ମୁର୍କୁ ଇଜି ଏତ୍ ୱାନାତ୍ ବିସୟ୍ ଲୋକାଦି ଜ୍ଞାନ୍ ବାଦ୍ଲୁ ନାଣ୍ତ ଜ୍ଞାନ୍ ମାନାତ୍, ମାରି ମାପୁରୁଦି ଦୁର୍ବଳ ଇଜି ଏତ୍ ୱାନାତ୍ ବିସୟ୍ ଲୋକା ସାକ୍ତି ବାଦ୍ଲୁ ନାଣ୍ତ ସାକ୍ତି ।
୨୬ ଏ ତଡ଼ାନ୍କୁ ତାଙ୍ଗିଁକି, ମାପୁରୁ କୁକ୍ନି ବେଡ଼ାଦୁ ମିର୍ ଏଣ୍ତେସ୍ ମାର୍ଇଦେର୍, ଆକା ଅଡ଼୍ବିଦୁ । ଦୁନିଆଦି ଇସାବ୍ତାନ୍ ଗାଦିଲୋକ୍ ଜ୍ଞାନ୍ରି ମାରି ଏସଲୋକ୍ ଅଦିକାର୍ରି ଡାଟ୍ମାନି ପରିବାର୍ ମାର୍ହାର୍ ।
୨୭ ଇୟାଉଣ୍ତିଙ୍ଗ୍ ମାପୁରୁ ଜ୍ଞାନିରିଙ୍ଗ୍ ସେମାର୍ କିନି ଉଣ୍ତିଙ୍ଗ୍ ଜଗତ୍ତି ମୁର୍କୁରିଙ୍ଗ୍ ଆସ୍କିତାମାନାନ୍ ମାରି ସାକ୍ତିମାନିୱାରିଙ୍ଗ୍ ସେମାର୍ କିନି ଉଣ୍ତିଙ୍ଗ୍ ଜଗତ୍ତି ବପୁସିଲିୱାରିଙ୍ଗ୍ ଆସ୍କିତାମାନାନ୍,
୨୮ ମାରି ଜଗତ୍ତି କାଣ୍ଗାଦୁ ଆମାକା ୱିଜୁ ନେଗି ବିସୟ୍, ଆୟାୱିଜୁଦିଙ୍ଗ୍ ନାସ୍ଟୁ କିନି ଉଣ୍ତିଙ୍ଗ୍; ଜଗତ୍ତି ବିସୟ୍କୁ, ତେବାତିମାନି ମାରି ନଗଣ୍ୟୱାରିଙ୍ଗ୍ ମାପୁରୁ ଆସ୍କିତାମାନାନ୍ ।
୨୯ ଇବେଣ୍କୁ ନେସ୍ନିୱାଜା ଏନ୍ଆପିନ୍ ମାପୁରୁଦି ଆଗ୍ଡ଼ି ପେରିକାନ୍ ଇଜି ତରାଦେଙ୍ଗ୍ ଆଟ୍ଏନ୍ ।
୩୦ ମାତର୍ ମାପୁରୁ ମିଙ୍ଗିଁ କ୍ରିସ୍ତ ଜିସୁଦି ୱାଲେ ମିସାକିତା ମାନାନ୍ ମାରି ୱାନ୍ ମାପୁରୁଦିମାଣୁକୁ ମା ଉଣ୍ତିଙ୍ଗ୍ ଜ୍ଞାନ୍ଦିୱାଜା କିତାମାନାନ୍, ୱାନି ମାଣ୍କୁ ମାପୁରୁଦି ଆଗ୍ଡ଼ି ମା ଜତାର୍ଥ ମିସାଜି ପୁନା ତିଆର୍ ଆଜି, ମାଡୁ ଦାର୍ମିକ ମାରି ପବିତ୍ର ଲୋକ୍ ଆଜି ରକିୟା ପୟ୍ତିମାନିକା ।
୩୧ ମାରି, ଏଣ୍ତେସ୍ ଦର୍ମସାସ୍ତ୍ରଦୁ ରାସ୍ତାମାନାତ୍ : “ଏନ୍ ଗର୍ବ କିଦେଙ୍ଗ୍ ଇଚ୍ଛା, ୱାନ୍ ପ୍ରବୁଦିମାନୁ ଗର୍ବ କିପିନ୍ ।”